Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Naonda ing ki Yesus nosambayang makow natua, Sia takin murií-Nya mita minayakdon kon ḷoḷan Ongkag ing Kidron. Kon tua oyuíon tobatuí taman, bo ki Yesus takin murií-Nya mita sinumu'ot kon taman tatua.
2 Tampat tatua kinota'auan doman i Yudas inta nomangkang ko'i Yesus; sim mokakitdon ki Yesus takin murií-Nya mita moyosipun kon tampat tatua.
3 Daí ki Yudas namangoidon in tampat tatua takin kodia-dia in tokolompok tontara in Rum bo tongonu domanmai moḷoḷukad kom Baḷoi Tuhan inta pinotabaí in imang mita itoi bo i intau mita im Parisi. Mosia nodia kon sonjata, lantera bo poḷombow.
4 Kinota'auanbií i Yesus im bayongan inta mobalií ko'i-Nia. Daí Sia dinimiug kon intau mita tatua bo noliboí, "Motayak ko'i ine i mo'ikow?"
5 Mosia noguman, "Ki Yesus Intau in Nazaret." Tubag i Yesus, "Aku'oibií na'a inta sinayak monimu." Ki Yudas inta nomangkang sinimindog doman noyotakin monia.
6 Kon dodai ing ki Yesus noguman, "Aku'oibií na'a inta sinayak monimu," mosia komintan inumundok bo no'umpag kom butaí.
7 Bo ki Yesus bui noliboí, "Ki ine in tayakon monimu?" Daí kai monia doman, "Ki Yesus Intau in Nazaret."
8 Tubag i Yesus, "Aim pinoguman-Ku kon Aku'oibií inta sinayak monimu. Bo aka Aku'oibií in tayakon monimu, daí pomayakdon makow ibanea nion mayak."
9 (Singog-Nya tatua, noponyata kon nobaliídon onu inta aim pinoguman-Nya muna nana'a: "Amaí, nongkon sigad in intau mita inta inogoi i Amaí ko'i-Nakoí, diaí tobatuímai im mobuli.")
10 Ki Simon Petrus inta nodia kom pitow, norabut kom pitownya bo nonimboi kon simpaḷ in imang moḷoben sahingga nopongkoí im bongoḷannya dotaí ing koḷanan. Ki Malkus tangoi in simpaḷ inta nopongkoí im bongoḷan tatua.
11 Daí ki Yesus noguman ko'i Petrus, "Tungkogdon bui im pitowmu nion kong gumaínya! Degaí iraimumai diaíbií inumon-Ku im palo in roriga inta inogoi i Amaí ko'i-Nakoí?"
12 Bo tontara mita in Rum takin komandan monia bo moḷoḷukad mita inta pinotabaí in intau Yahudi nodomokdon poḷat notogot ko'i Yesus.
13 Muna dinia monia in Sia ko'i Hanas, sing ki Hanas na'a kinunuton i Kayapas. Ki Kayapas na'a imang moḷoben kon taong tatua.
14 Ki Kayapas na'a inta ain nononggina kon itoi mita Yahudi, kom mopia-piabií tobatuí intau matoi sing kopontingan bayongan intau.
15 Ki Simon Petrus takin tobatuí murií ibanea dinumudui ko'i Yesus. Murií i Yesus tobatuí tangia nokanal i imang moḷoben, daí sia sinumu'ot noyotakin i Yesus kom palas i imang moḷoben,
16 ta'e ki Petrus tongaí kon ḷuai kong ngara mogoḷat makow. Onda intua murií tobatuí tatua iḷumuai bo noyosingog takin bobantung bobay inta noḷukad kon ḷolingkop, onda intua dinianyadon sinumu'ot ing ki Petrus.
17 Bobantung bobay inta noḷukad kon ḷolingkop tatua noguman ko'i Petrus, "Hoi, ikow doman tobatuí murií in intau tatua ma?" "De'emana," tubag i Petrus.
18 Motumpingdon totok dodai intua, daí bobantung mita bo moḷoḷukad mita nomiagdon kon tuḷu nongkon baga bo nonayang mosia. Ki Petrus minayak intua bo sinimindog nonayang noyotakin monia.
19 Imang moḷoben noliboídon ko'i Yesus soaáḷ murií-Nya bo soaáḷ totunduí-Nya.
20 Ki Yesus notubag, "Aku'oi umuran taran-tarangan kon tayowon intau mobayong. Aku'oi umuran doman motunduí kom bonu im baḷoi pososambayangan bo kom bonu im Baḷoi Allah inta nobalií tampat poyoyosipunan intau in Yahudi. Diaíbií dodai onda Aku'oi tongaí umuni-uni i mosingog.
21 Daí nongonu sin ikow i moliboíbií ko'i-Nakoí natua? liboídon ko'i monia inta ain nokodongog kon onu inta sinunduí-Ku; kinota'auan bidon monia totok onu inta siningog-Ku."
22 Naonda ing ki Yesus nosingog natua, tobatuí pongawal kon diug-Nyamai nonokap ko'i Yesus bo poḷat noguman, "Mobaranibií totok Ikow mosingog natua ko'i imang moḷoben!"
23 Ki Yesus notubag, "Aka Aku'oi noguman kon no'itaḷaí, yo pogumankah kon na'a onu in no'itaḷaí tua! Ta'e aka no'itutuibií im pinoguman-Ku tua, nongonu sin ikow nonokapbií ko'i-Nakoí?"
24 Bo kotogo-togotpa doman natua, pinokidiadon i Hanas ing ki Yesus pinobayak ko'i Kayapas tobatuí Imang Moḷoben.
25 Ki Simon Petrus sinimindogpa doman makow bo nonayang kon tua. Intau mita kon tua noguman ko'inia, "Ikow doman murií in Intau tatua ma?" Ta'e ki Petrus nomayow, "De'emana!"
26 Tobatuí ata i imang moḷoben, inta koluarga i intau inta bongoḷannya pinongkoí i Petrus, noguman, "Diaíbií moyotaḷaí kon ikowbií na'a inta inontongku noyotakin in Intau tatua kon taman!"
27 Bo ki Petrus buipa doman nomayow, "Diaíbiía," -- bo kon dodaipa doman tua manuk nokukuk.
28 Doḷo-doḷompa totok dinia monia ing ki Yesus nongkon baḷoi Kayapas pinobayak kon istana i gubernur. Intau mita in Yahudi diaíbií sinumu'ot kon istana tatua, simbaí mosia diaí monajis podudui in agama monia, sim mosia tumakindon moka'an kong ka'anon im Paskah.
29 Manangka intua ki Pilatus iḷumuai nokipodungkuḷ ko'i monia bo noliboí, "Nongonu sin diniabií monimu mangoi intau tana'a?"
30 Mosia notubag, "Aka Sia diaí kotaḷaí, daí tantu diaíbií dinia mangoi nami ko'i Gubernur."
31 Ki Pilatus noguman ko'i monia, "Gamaídon bo hakim monimu tontanií podudui in hukummu tontanií!" Ta'e intau mita Yahudi tatua notubag, "Kami in diaíbií mota'au mohukum kon intau dapot i matoi."
32 (Na'a nobalií simbaí mobaliídon onu inta aim pinoguman i Yesus soaáḷ kopopatoi-Nya.)
33 Ki Pilatus sinumu'ot bui kon istana bo nogoinií ko'i Yesus poḷat noliboí, "Degaí Ikow nion Raja Intau Yahudi?"
34 Ki Yesus notubag, "ḷoliboímu nion nongkon bonu ing ginamu tontanií andeka oyuíon intau ibanea in nopota'au muna ko'inimu soaáḷ Aku'oi?"
35 Ki Pilatus notubag, "Degaí aku'oi na'a intau Yahudi? Mosia inta nodia ko'i-Nimu pinoaíngoi ko'inakoí in intaubií mita tobangsa-Mu bo imang mita itoi. Yo onu degaí in inaidan-Mu?"
36 Ki Yesus noguman, "Karaja'an-Ku na'a in de'emanbií nongkon dunia na'a. Aka kuma bo karaja'an-Ku na'a nongkon dunia na'a, daí intau-Ku mita im moramijibií totok simbaí Aku'oi diaí posarahkan kom ponguasa mita in Yahudi. Ta'e totu'ubií kong karaja'an-Ku de'emanbií nongkon dunia na'a!"
37 Daí ki Pilatus noliboí ko'i-Nia, "Aka natua, Ikow nion Raja?" Ki Yesus notubag, "Ikowdon in noguman kon Aku'oi na'a in Raja. Aku'oi no'ilahir bo namangoi in dunia na'a takin tobatuí makusud mobogoi ing kosaksian soaáḷ kabenaran. Intau inta nongkon kabenaran tatua mokidongogbií ko'i-Nakoí."
38 (18-38a) Ki Pilatus noliboí ko'i-Nia, "Onu im mangale kabenaran tatua?" (18-38b) Nosingog makow natua, ki Pilatus iḷumuai bui bo minayak nokipodungkuḷ kon intau mita in Yahudi bo noguman, "Diaíbií tobatuímai in taḷaí no'uliíku ko'i-Nia.
39 Ta'e nobaliídon kabiasaan ko'i monimu, aku'oi umuran momuli kon tobatuí intau inta pinonjara aka kon Singgai Moḷoben Paskah. Daí degaí mo'ibog im mo'ikow baí pobebaskudon ko'i monimu in raja intau Yahudi tana'a?"
40 Ta'e mosia nomaḷuídon totok, "Diaí mota'au, dikabií intau tanion, ki Barabasdon!" (Ki Barabas na'a in tobatuí intau mogogagow bo mononakow.)
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA