Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali komi to sugi, padongeka paposiangku si’i. Katumangi pasi pakaroso loomu mangantangis mangampobuuka kasesa to danurata ngkomi!
2 Apa kasugi ngkomi roomo boo yau, pasi pake ngkomi pura nakoni yau nu ane.
3 Pasi weyawa pasi pera to re’e resi komi roomo kataisi yau apa komi ojo mangkalisoka pei taa rani mangampake damangansawang sa’e. Wali ri tempo to darata, komi damampobuuka weyawa pasi pera to nakataisi yau etu panewa komi dasoso kojo raya ngkomi apa saba komi taa mangansawang sa’e. Wali soso ndaya to danurata ngkomi etu maya raporapaka ewa apu to mangkoni yau koro ngkomi, apa mapari kojo soso ndaya etu. Apa tempo si’i semo temponya mosumo danakarata i mPue. Pei gete, nempo ewa wetu komi tiroo kanjo’u-njo’u kaboro-boros kasugi to nukalisoka yau ngkomi!
4 Pobuuka seja to papolaong ngkomi to roomo mamota nja’u nawu ngkomi. Komi mangantipu sira apa nempo sira mapalaong, komi taa mangawaika sira saro to sira masipato mangantima. Wali sira sakaboo mangkambumbuka komi pasi loo nsira etu nadongemo i mPue anu Makuasa.
5 Sira masiasi, pei komi to sugi masanang kojo katuwu ngkomi ri lino si’i, apa kesaa to mampakasanang koro ngkomi, etu semo to komi mangika. Wali komi maya raporapaka ewa binatang to rapakaboko ruyu panewa rasimbale yau.
6 Pasi komi re’e seja mangahuku pasi mampopate yau tau to singkonong lengkonya pei i Pue Allah, nempo sira taa mangewa komi. Ewa wetu palaong to nuika ngkomi to sugi. Wali pakatao kojo! Tamo masae komi darahuku!
7 Wali a’i-a’i, pakabae sabara ngkomi mangampeas tempo danakama’i i mPue. Rapanya ewa to panawu. Apa to panawu ane roomo mamuya mansabaraka mangampeas temponya rapomota. Ia mansabaraka mangampeas tempo uja to uyunya to mampakatuwu pae, pasi mangampeas wo’u tempo uja to tondong mpae etu mosumo matasa.
8 Wali to tao-tao komi seja mampakabae sabara ewa naika nto panawu etu. Pasi pakaroso pangaya ngkomi apa mosumo tempo danakama’i i mPue.
9 Ne’e masikambumbuka samba’a pei samba’a apa ane komi mangika ewa wetu, komi darabotus. Apa mosu kojo temponya danakarata nto Pobotus. Ia raporapaka ewa tau to ma’i yako longko pei ratamo ri tango nu wombo mpasuli ngkomi.
10 Wali a’i-a’ingku, anu kita mangansabaraka tempo mangarata soba. Pobuuka ruyu to pantuntu tuntu i mPue Allah tempo owi, to magombo to mamponsaruka i Pue. Tau etu maya mawali tondong resi kita mangkonong ewa wimba daraika mangansabaraka tempo mangarata kasesa.
11 Pobuuka! Apa kami manganto’o, “Masanang tau to mangansabaraka kasesa.” Wali pobuuka seja i Ayub, apa komi re’e seja mangandonge mangkonong kasabara to si ia. Pasi komi mangansani seja ewa wimba naika i mPue mampakasanang i Ayub tempo ia roomo rasoba. Wali naka pei i Pue mangika ewa wetu apa Ia bae kojo kanotoNya pasi pamporayangiNya. Wali masipato kita mangansabaraka tempo mangarata kasesa.
12 Wali a’i-a’ingku, si’i semo gombongku to bae kojo batuanginya. Ane komi damangika bara kesaa, to tao-tao komi ojo manganto’o, “Iya, dakuika.” Pasi ane komi taa damangika, to tao-tao ojo manganto’o, “Taa dakuika.” Ne’e mampokio matamanasa, nempo anu ri lino, bara ri yangi, bara to yusanya, damampatimonso parajanjimu etu. To tao-tao ojo ika to komi room manganto’o etu. Apa ane taa mangika pei re’e to mawali matamanasa mparajanjimu etu, ane ewa see, huku to danurata ngkomi mapari wo’u apa saba re’e matamanasa etu.Wali to tao-tao tare matamanasa naka ne’e komi darahuku.
13 Wali ewa si’i, ane re’e tau ri oyo ngkomi to mangarata kasusa, to tao-tao ia makai-kai resi i Pue Allah. Pasi ane re’e tau ri oyo ngkomi to ndende rayanya, to tao-tao ia mamponyanyika nyanyi to mangabarong i Pue Allah.
14 Pasi ane re’e tau ri oyo ngkomi to masaki, to tao-tao ia mampokio penatua-penatua ntau to mangaya see sira dama’i mampokaika ia pasi mampolasika minya resi ia mangika tondong kuasa i mPue.
15 Apa ane ia damangika ewa wetu, ia daroo muni masaki apa saba pokai-kai to nato’o mpenatua yako ri pangaya nsira. Wali i Pue semo damampakatao muni ia. Pasi ane bara saba yako dosa to inikanya see naka ia mawali masaki, dosanya etu daralapa seja.
16 Wali see naka pongakung dosa ngkomi samba’a pei samba’a, pasi masipokaika see komi maya rapakatao muni ane komi masaki. Apa pokai-kai ntau to lengkonya singkonong pei i Pue Allah, pokai-kai etu bae kojo kuasanya pasi bae seja batuanginya.
17 Wali rapanya i Elia tempo owi, i Elia etu ia to lino sewaju seja pei kita. Pei ia madota makai-kai resi i Pue Allah mamporapika see ne’e datudu uja. Wali see naka togo nto’u pei santongo, tare uja to tudu nja’u ria.
18 Panewa yako etu ia makai-kai wo’u panewa tudu muni uja, wali tuwu muni kalingaa ntau. Wali bae kojo batuanginya pokai-kai to yako ri pangayanta.
19 Wali a’i-a’ingku, ane rapanya re’e tau ri oyo ngkomi to mampiyaika jaya to monso, matao kojo ane re’e yununya to mangkeni muni ia damangalulu muni jaya to monso etu.
20 Apa ne’e mangkalingan gombo si’i, i semasema tau to mampakakonoka yununya to mangika sala, tau etu damangampalaes yununya etu yako ri kapatenya, pasi damangika see nempo boros dosanya tamo danakitanaka i mPue Allah. Wali ungkanyamo ruyu gombongku si’i.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA