Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ee, kamu' to tosugih! Pesa'dingngii tee pangpakainga'ku'. La kumarrak kamu', la mbating too kamu', sanga la disessa kamu'.

² Ia to kasugiranmi la cappu' ngasan. Ia to pakeanmi la nakande kaluane.

³ Ia to bulawan sola salaka miampui naputu'mi ta'gah. Ia to ta'gahna la menjaji tanda kumua la nakande too kamu' api, nasaba' mipangmesamo ewananmi tonna la Kiama'mo tee lino.

⁴ Te'da mibenni gajinna to tau misua njama bara'bahmi. Ia tee too pesa'dingngii to sarrona! Metamba joo torrempun assele' bara'bahmi meta'da tulung, na ia to petambana nasa'dingmo Puang Allataala, to makuasa.

⁵ Mangkamo kamu' nnolai to disanga kala'bian sola mperasai kamasannangan lan tee lino. Susi kamu' patuoan dipelompoi la digere'.

⁶ Misessa mibuno tooi to tau te'da salana, apa te'da naewa kamu'.

⁷ Ee, tomala'bihku'! La sabbara' kamu' ratu lako nadete' karatuan-Na pole' Puang Isa. Takitai to pangdusung ntajanni assele' bara'bahna. Susi tooi sabbara' ntajanni to wattu peuranan.

⁸ La sabbara' kamu' mida'tan masumanga', nasaba' la ratu pole'mi Puang.

⁹ Ee, tomala'bihku'! Danggi' misipasala, anna te'da midisessa. Ingaranni: Cingga'tu'mora naratu to tomangra'tah.

¹⁰ Ee, tomala'bihku'! Ingaranni to nabi mangkada mpau pepasan-Na Puang. Sabbara'i nnoloi kamaparrisan, jaji alai palelean mata.

¹¹ Disanga tomasannang sanga sabbara'i. Misa'dingmo to kasabbarasanna Nabi Ayub, misa'ding toomo kumua undinna nabarakka'i Puang. Sanga melo penawan-Na Puang Allataala na liwa' kamamasean-Na.

¹² Ee, tomala'bihku'! Ia to kaminang parallu danggi' mimassapah la mpau langi', la mpau lino, ba'tu apa toomo. Pau maruruhhi, "Io" ke la mipugaukki, na "Te'da" ke cia' kamu' la mpugaukki, anna danggi' nasessa kamu' Puang Allataala.

¹³ Ia ke masussa kamu', massambajang kamu'. Ia ke masannang kamu', makkelong kamu' mipuji Puang Allataala.

¹⁴ Ia ke den kamu' masaki, melo ke mitambaii to pekaamberan jamaa napassambajangan kamu', naparussui minynyak mpau sangan-Na Puang.

¹⁵ Ia ke nakatappa'i kumua natarima Puang to peta'danna, la napumalagah joo tomasaki. La napamalagah Puang, na la nadampangan tooi ke denni dosa napugauk.

¹⁶ Iamo joo pada la nnakui kamu' kasalanmi ammisipassambajangan midipamalagah. Liwa' makuasa to peta'da doangna to tonturu' pakkaeloran-Na Puang Allataala.

¹⁷ Ia to Nabi Elia tolino biasara susi kita'. Apa ia tonna tongan-tongannii massambajang nakua danggi' nauran, te'da tongan nauran tallung taun sitangnga masainna.

¹⁸ Massambajang pole' omi na membanasa to uran jao mai langi' anna endek too to assele' padang.

¹⁹ Ee, tomala'bihku'! Ingaranni tee kada kumua, ia ke den tau membalik jio mai pangngajaran-Na Puang Allataala, la mipangngingaranni namengkatoba' pole', na ia to tompangngingaranni joo tomadosa namengkatoba', iamo joo tau napusaba' nadipasalama' to sunga'na jio mai kamatean jio ahera', na didampangan, moi buda dosana. Padamo jolo' too. Sallangki' mati', Yakub

²⁰ (5:19)

Yakobus

Video Yakobus 5

Ikuti Kami:

KONTAK | PARTISIPASI | DONASI