Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Mangkin umaq side pade, dengan-dengan sugih! Side pade harus nangis dait ngerung ẽroq asẽq lantaran sengsare saq gen nimpe side pade!

² Kesugihande sampun berek. Kelambinde sampun tekaken siq tembrẽnẽ.

³ Emas dait perakde sampun bekarat; karatne gen jari saksi ngelawan side pade dait gen ngaken awakde jangke bis maraq api. Side pade sampun ngumpulang harte lẽq ahir jaman.

⁴ Side pade ndẽq bayah upaq dengan-dengan saq begawẽan lẽq lendangde. Mangkin dengahang kuihan ie pade! Dengan-dengan saq ngumpulang hasil lendangde, bekuih nunas tulung, dait kuihan ie pade sampun dateng tipaq Allah, Tuhan penguase alam semeste.

⁵ Side pade sampun idup mẽwah dait ngeraseang kesenengan dunie niki. Side pade sampun muasang atẽnde maraq dengan saq kenyeke mokohang diriq jari jelo penampahan.

⁶ Side pade ngukum dait nyematẽq dengan-dengan saq kenaq, dait ie pade ndẽq ngelawan side pade.

⁷ Keranaq nike, pade sabar semeton-semeton tiang, jangke Tuhan rauh. Pade serioq berembẽ sabarne sopoq petani ngantih jangke tanaqne ngasilang hasil saq mahel ajine. Ie sabar ngantih ujan saq penembẽq dait ujan saq penutuq.

⁸ Side pade ẽndah harus sabar dait teguqang angende, sẽngaq jelo kerauhan Tuhan sampun rapet.

⁹ Ndaq pade ngerumun dait saling nyalahang, adẽq side pade ndẽq tehukum siq Allah. Inget! Hakim sampun rapet, siep gen rauh.

¹⁰ Semeton senamian, pade turut teladan penderitean dait kesabaran pare nabi saq sampun bebaos siq pesẽngan Tuhan.

¹¹ Ie pade tesebut bahagie sẽngaq ie pade tekun. Side pade sampun dengah mengenai ketekunan Ayub, dait side pade nenaoq berembẽ ahirne Tuhan ngicanin ie berkah. Sẽngaq Tuhan nike Mahe Pengasih dait Mahe Penyayang.

¹² Laguq saq terutame gati: Ndaq besumpah, timaq demi langit, atao demi gumi, atao demi napi juaq. Lamun mule tetu, badaq tetu atao lamun ndẽq, badaq ndẽq, adẽq side ndẽq tehukum siq Allah.

¹³ Lamun lẽq antare side araq saq kenyeke menderite, ie harus bedo'e. Lamun araq saq seneng, ie harus benyanyi memuji Allah.

¹⁴ Lamun araq saq sakit, ie harus ngempoh pemimpin-pemimpin jemaah. Dait pemimpin-pemimpin nike harus do'eang dengan saq sakit nike dait ngolẽsang minyak siq pesẽngan Tuhan.

¹⁵ Do'e saq asalne lẽman iman gen nyelametang dengan sakit nike dait Tuhan gen nyelahang ie; dait lamun ie sampun piaq dose, make dosene nike gen teampunin.

¹⁶ Keranaq nike, side pade harus saling ngakuq dose dait saling do'eang, adẽq side pade teselahang. Do'e dengan saq kenaq lamun siq yakin tedo'eang, belẽq gati kuasene.

¹⁷ Elia pade-pade manusie maraq ite. Ie bedo'e pacu-pacu adẽqne ndẽq turun ujan, make ujan ndẽqne turun sengonẽq telu setenge taun.

¹⁸ Sesampun nike ie bedo'e malik, beterus langit nurunang ujan sehingge tanaq bau ngasilang malik.

¹⁹ Semeton-semeton tiang! Lamun lẽq antare side araq malik sopoq dengan saq nyimpang lẽman kebenaran, beterus sopoq dengan saq lain miaq dengan nike tulak tipaq Allah,

²⁰ side pade harus nenaoq bahwe: Dengan saq miaq dengan bedose bebalik lẽman langanne saq sesat, ie nyelametang jiwe dengan saq bedose nike lẽman kematẽan dait segah dengan piaq dose malik.

Yakobus

Video Yakobus 5

Ikuti Kami:

KONTAK | PARTISIPASI | DONASI