Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Genduari, begikenlah katangku, o kalak bayak! Tangis ras ngandunglah kam erdandanken kiniseran si nandangi reh ngkenai kam!
2 Kebayakenndu nggo macik, janah uisndu nggo ipangani ngetnget.
3 Emas ras pirakndu nggo tembesin, janah tembesina e me pagi ersaksi ngelawan kam. Itutungna me dagingndu bagi api. I bas wari-wari si arah pudi enda nggo ipepulungndu erta-erta.
4 La igalarindu upah kalak si rani i jumandu. Begikenlah penderkuhna! Penderkuh kalak si rani i jumandu nggo ibegi Dibata, Tuhan si Mada Kuasa.
5 Mewah dingen senang kal pergeluhndu i doni enda. Ipeburndu bandu guna wari penggelehen.
6 Kalak si la ersalah iukumndu dingen ibunuhndu, janah la kam ilawanna.
7 Dage o senina-seninangku, saberlah kam ngayak reh Tuhan. Nehenlah sekalak perjuma kuga ia saber nimai seh jumana mereken ulih si erguna. Saber ia nimai udan si reh nandangi merdang ras udan si reh kenca rumpah page.
8 Kam pe arus saber. Tetap min kam erpengarapen, sabap wari kerehen Tuhan seh me.
9 O senina-seninangku, ula kam jungut-jungut dingen sisalah-salahen, gelah ula kam iukum Dibata. Hakim e reh me; bengket me Ia.
10 O seninangku, ingetlah nabi si ngerana nai i bas gelar Tuhan. Usihlah saber atena ras kinigenggengenna i bas ngenanami kiniseran.
11 Sikataken malem atena erkiteken megenggeng ia. Nggo ibegindu kerna saber ate Jop, bage pe ietehndu maka dungna isampati Tuhan ia. Sabap Tuhan e perkuah dingen dem keleng ate.
12 I babo si e kerina o senina-seninangku, ula kam ersumpah tupung erpadan. Ula kam ersumpah alu gelar langit, ntah doni, ntah kai pe si debanna. Katakenlah "Ue" adi ue kin, janah "Lang" adi lang kin atendu, gelah ula kam kena ukumen.
13 Adi lit sekalak i bas kam ngenanami kiniseran, ertotolah ia man Dibata. Adi lit si ermeriah ukur, rendelah ia muji Dibata.
14 Adi lit si sakit, idilonalah pertua-pertua i bas perpulungen, gelah itotoken pertua-pertua e ia dingen iminakina i bas gelar Tuhan.
15 Pertoton si bage, si ibahan alu tek man Tuhan tentu pepalem kalak si sakit e. Malem me ia ibahan Tuhan i bas penakitna e nari, janah ialemi Tuhan me dosana si nggo ibahanna.
16 Emaka akukenlah dosandu sekalak-sekalak i lebe-lebe temanndu, janah ertotolah kam pekepar kerna teman, gelah malem kam. Pertoton kalak si bujur ergegeh kal.
17 Nabi Elia pe manusia nge bali ras kita. Alu tutus ate ertoto ia gelah ula nusur udan, jenari lego telu setengah tahun dekahna.
18 Kenca ertoto ka ia mulihken, reh udan i langit nari, jenari taneh mereken asilna.
19 O senina-seninangku! Adi lit sekalak i tengah-tengahndu nari papak i bas pengajaren si tuhu-tuhu nari, jenari lit ka sekalak si negu ia mulihken,
20 ingetlah kata enda: Ise si negu kalak si erdosa gelah itadingkenna si papak e, iselamatkenna kap tendi si erdosa e i bas si mate nari, janah erdandanken ia, melala dosa ialemi Dibata.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA