Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ninger bada'ku, O muyuh luk mula' binaweh. Do' muyuh nangi' idi temido ngaceku amung-amung dereh luk macing nemuyuh.
2 Binaweh muyuh ineh pangeh musag, idi ayung muyuh ineh pangeh kinan tugor.
3 Amas idi pirak muyuh pangeh netugor idi tugor ineh miak mangun ku luk nekali' ratnan muyuh, idi kuman uang muyuh mepad kudeng apui. Muyuh pangeh nengamung binaweh bang tuda'-tuda' aco ini luk kekiped.
4 Muyuh na nemayar tabpar lemulun luk ngakem bang lati' muyuh. Ninger aroddeh! Arod lemulun luk ngeranih bang lati' muyuh ineh pangeh nesemuet bang lalid Tuhan luk Meluun Lalud.
5 Muyuh pangeh mulun luun tana' ini dengan nakap binaweh luk meraga; muyuh pangeh nengawang niat muyuh; idi muyuh pangeh nengelamu burur muyuh mepad kudeng dumba luk miak kereten.
6 Muyuh pangeh nengukum idi nengaté lemulun luk matu ineh; ieh na sikal metueh rat nemuyuh.
7 Ngaceku ineh, O kinanak-kinanakku, do' muyuh mulai niat pad kareb Aco Tuhan ineh macing. Siruh, lemulun luk bang lati' nganét bua' luk do' remuat ratnan tana' dengan mulai niat, pad macing udan luk pun-pun idi luk muci.
8 Do' muyuh mulai niat, idi do' muyuh lutep niat, ngaceku Tuhan ineh lélé macing.
9 O kinanak-kinanakku, aleg muyuh medureng rat arang muyuh sebuleng, pad muyuh na mekaneh ukum Allah. Siruh, Lun luk Mutut Besara' ineh tuped munung tanga'.
10 O kinanak-kinanakku, do' ngerawé dalan susa' idi ulai niat amung-amung nabi luk pangeh nepebala dengan ngadan Tuhan.
11 Lemulun luk mulai niat ineh tau mala samal. Muyuh panegh neninger ratnan ulai niat Ayub, idi muyuh kali' kudeng apeh Tuhan nengasa' neneh kareb kekiped derehneh. Ngaceku Tuhan pelaba éi' idi mekatu.
12 Iamo' luk pun-pun, O kinanak-kinanakku, aleg muyuh pebulung, do' ratnan surga idi ratnan tana' pana', idi ratnan bulung luk baken-baken teh. Iamo' do ngamo ratnan luk "mo", idi mala "Na" ratnan luk "na", pad muyuh na mekaneh ukum.
13 Idéké rat arang muyuh luk mesusa'? Do' ieh sembayang. Idéké rat arang muyuh luk mawang niat? Do' ieh menani ngubur Allah.
14 Idéké rat arang muyuh luk mét? Do' ieh nawar lun rayeh-rayeh sidang, luk miak sembayang kuanneh, idi ngumau neneh dengan ngadan Tuhan.
15 Sembayang ini luk dinengan anu miak ngedo' lemulun luk mét ineh, idi Tuhan miak nui neneh; idi kudeng ieh pangeh nenganau' sala' idi ieh miak ngalap do' ratnan sala'neh.
16 Ngaceku ineh do' anid-anid burur muyuh ngamo sala' muyuh arang muyuh sebuleng, idi sembayang seburur kuan seburur pad muyuh uen ngedo'. Idi sembayang lemulun luk matu, dengan matu-matu niatneh, rayeh laludneh.
17 Elia ineh mepad teh ulunneh dengan tau, idi ieh nesembayang dengan anu pad udan na temurun, idi teluh lak anem bulan kinioneh udan na netemurun luun tana'.
18 Idi ieh nesembayang teh, idi langit pana' nemaré udan idi tana' pana' nengeruat uli'neh.
19 O kinanak-kinanakku, kudeng seburur rat arang muyuh meraruh ratnan luk matu, idi seburur lun baken nenguit neneh lumi,
20 idi do' muyuh kali' seburur lemulun luk nenguit seburur lemulun luk mesala' lumi ratnan dalanneh luk neraruh ineh, miak ngulun niat lemulun ineh ratnan até, idi miak ngapung sala' luk mula'.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA