Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ee nasiam na bayak, tangis anjaha doruh-doruh ma nasiam halani sitaronon na sihol roh bani nasiam.
2 Domma busuk habayakon nasiam, domma ngitngiton hiou nasiam.
3 Domma tasikon omas ampa pirak nasiam, anjaha tasik ai, saksi ma ai dompak nasiam, anjaha gagatonni ma daging nasiam songon apuy. Na patumpu-tumpu arta do hape nasiam sanggah panorang parpudi.
4 Tonggor ma, upah ni halak siparhorja, na manabi i juma nasiam, na ijolomi nasiam ai, doruh-doruh do, anjaha dilo-dilo ni sipanabi ai domma das bani pinggol ni Tuhan Zebaot.
5 Marmewah-mewah anjaha marlobih-lobih do goluh nasiam i tanoh on. Ipamombur-mombur nasiam do diri nasiam hubani ari pamotongan.
6 Iuhum anjaha ibunuh nasiam do halak parpintor; seng dong ilawan sidea nasiam.
7 Ai pe, nasiam sanina, sabar ma nasiam das hubani ari parroh ni Tuhan in! Ai parjuma pe, ipaima-ima do buah na maharga hun tanoh in, anjaha sabar do ia paima-imahon udan partidahonkon ampa udan paima pariama.
8 Nasiam pe sabar ma, patotap nasiam ma uhur nasiam, ai dohor ma parroh ni Tuhan in.
9 Ulang ma nasiam marsiungut-ungutan samah nasiam, nasiam sanina, ase ulang hona uhum nasiam. Tonggor ma, domma jongjong Panguhum in bani labah.
10 Nasiam sanina, nabi-nabi na marsahap ibagas goran ni Tuhan in, sidea ma bahen nasiam tiruan ibagas sitaronon ampa hasabaron.
11 Iparhatuah hita do halak na sabar. Ibogei nasiam do hasabaron ni si Job, anjaha ididah nasiam do sonaha dobni ibahen Tuhan in, ai parontou ni uhur banggal do Tuhan in anjaha paridop ni uhur.
12 Tapi i lobei ni haganup, nasiam saninangku, ulang ma nasiam marbija, barang hubani langit barang hubani tanoh barang hubani na legan. Hatahon nasiam ma “Eak” anggo eak ma, atap “Lang” anggo lang ma, ase ulang hona uhum nasiam.
13 Anggo adong na marsitaronon i tongah-tongah nasiam, martonggo ma ia. Anggo adong na marmalas ni uhur, idodingkon ma doding puji-pujian.
14 Anggo adong na boritan i tongah-tongah nasiam, idilo ma sintua ni kuria in, ase itonggohon anjaha iminaki ia ibagas goran ni Tuhan in.
15 Jadi paluahon ni tonggo haporsayaon in ma na boritan ai, anjaha pajongjongon ni Tuhan in ma ia; anjaha sasap ma dousani, anggo adong ihorjahon.
16 Ai pe, marsisopotkon dousani bei ma nasiam anjaha marsitonggoan, ase malum nasiam. Na margogoh tumang do pangkorhon ni tonggo ni halak parpintor, anggo ihabujurhon.
17 Jolma do si Elias, sabiak pakon hita; pongkut do ia martonggo, ase ulang roh udan, gabe seng roh udan i tanoh in tolu tahun onom bulan dokahni.
18 Dob ai iulaki ma martonggo, gabe ibere langit in ma udan, anjaha ipantubuhkon tanoh in buahni.
19 Nasiam sanina, anggo adong humbani nasiam na kahou humbani hasintongan in, hape adong na mambobansi mulak,
20 ibotoh ma, barang ise na mamboan pardousa mulak humbani hakahouonni, na paluahkon tonduyni do ia humbani hamatean anjaha manrungkub buei dousa.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA