Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Manga anạ u sěmbaụ apang kalạ! Pěmpẹ̌daringihẹ̌ko sasasaku. Pěmpahunsangị dingangu pěmpẹ̌kěndung u i kamene sarung makahombang sigěsạ!

² Kakakalạ i kamene seng nahenẹ. Pakeang i kamene seng nasueng kinạ e su uane.

³ Bul᷊aeng dingangu sal᷊akang kamene seng natukusu taine; kụ taine tangu sarung makoạ sahidi rumokạ si kamene ringangu sarung kumaěng gẹ̌sing kamene kere putung. I kamene seng němpangěmmung arětạ su ěllo kasamuriange.

⁴ I kamene tawe němpamaehẹ̌ sasewang mělahěnsinuang bael'i kamene. Kụ daringiheko rorong i sire! I sai-sain měmpạměnsạ bael'i kamene, měngkate ghụgahiorọ u mědẹ̌dorong tul᷊ung, kụ kakahiorọ i sire e seng nikaringihu Mawu Ruata Makawasa.

⁵ I kamene seng němpẹ̌biahẹ̌ masorogạ, dingangu nakateěng kawawusang dunia ini. I kamene al᷊ingkai mětẹ̌těngkatawang batangeng měngẹ̌ngampal᷊ẹ̌ ěllong pamamotọ e.

⁶ I kamene němpěhukung dingangu němpěmate taumata tawẹ sal᷊ane, kai i sire tawe rimokạ si kamene.

⁷ Ual᷊ingu ene, pakakakědang manga anạ u sěmbaụku, sarang Mawu e ruměnta. Kakěllạ e kereapa kararage sěngkatau mělahěnsinuange mělẹ̌hědo sarang ěntanane měngonggọu ghẹ̌sine maarěga si sie. Kụ měngkai mararagẹ̌ i sie rụdal᷊ahědo tahiting musungu kalalolang dingangu tahiting musungu mẹ̌burạ.

⁸ Kụ i kamene pakakakědangko l᷊ai ringangu pěmpanoghasẹ̌ko ral᷊ungu naung'i kamene, u ěllon darěntang Mawu e seng masandigẹ̌.

⁹ Kumbahangbe měmpẹ̌kurubụ dingangu mětatatokeng sal᷊a, tadeạu i kamene tawe ihukungu Mawu Ruata. Pẹ̌tahěndung! Mělahukunge seng dụdarisị su těngon tukadẹ̌ kụ seng masarạ marěnta.

¹⁰ Manga anạ u sěmbaụ, pẹ̌tahěndung manga nabi kụ měmpẹ̌bẹ̌bisara ringangu arengu Mawu. I sire kai mararagẹ̌ dingangu makakědang su sigěsạ. Kụ pěngal᷊ạko si sire makoạ pẹ̌tatěnoěng.

¹¹ I sire isěsẹ̌bạ maral᷊unsemahẹ̌ batụu i sire makakědang. I kamene seng nakaringihẹ̌ kereapa kasabare i Ayub, dingangu i kamene masingkạ u kereapa wue Mawu e kụ pangěnsueěnge něngal᷊amatẹ̌be si sie. Batụu Mawu e měngkai matal᷊ěntụ dingangu kerẹeng kapiane naung'E.

¹² Limembong kasariaěnge ute kai: Kumbahang mẹ̌salu, waẹbe maněbọ l᷊angị, arau l᷊ai maněbọ ěntana, arau walạewe mẹ̌salun sasalu wal᷊ine. Měngkate pẹ̌bera u "Ore" kereu timonan'u e kerene wue, ringangu "Tala" kereu timonan'u e wal᷊inewe kerene; tadeạu i kamene e kumbahang kaěnsakeng u hukumang kahian Duata.

¹³ Kereu sutal᷊oarang kamene piạ u lụl᷊ahunsusa, ute mapiawe i sie pẹ̌kal᷊iomaneng. Kereu piạ u lụl᷊uasẹ̌ e, ute mapiawe i sie pẹ̌kantarị pẹ̌dalo Ruata.

¹⁴ Kereu piạ u masakị, ute mapiawe i sie pẹ̌kui manga těmbonang u jamaatẹ̌. Dingangu kěnangko manga těmbonange ene mẹ̌kal᷊iomaneng i saing masakị ene ringangu měmuhang lana ringangu arengu Mawu.

¹⁵ Kakal᷊iomaneng iwẹ̌bunạ su Mawu ringangu pangangimang matoghasẹ̌ e, sarung makakaul᷊e masasakị, dingangu mangampungbe patikụ dosa kinoạ e.

¹⁶ Ual᷊ingu ene, pěmpẹ̌papangakungkong pẹ̌sasal᷊a lawọ i kamene, ringangu pěmpẹ̌kakal᷊iomaneng lawọ i kamene, tadeạu i kamene ipakaul᷊e wọu kasasakị. Kakal᷊iomaneng i sain tụtuhụ kapulun Duata e, mambeng masaria kawasane.

¹⁷ I Elia, mal᷊aing taumata mẹ̌sul᷊ung i kitẹ. I sie měkẹ̌kal᷊iomanembeng kasěllahu ral᷊ungu naunge tadeạu tawe rumasehẹ̌ e, tangu tawe rimasehẹ̌ gěnnangu těllu taung ěnnungu wul᷊ang.

¹⁸ Mase i sie nẹ̌saụ e nẹ̌kal᷊iomaneng tangu langị e naparaseheng tahiti hakịu ěntana e nẹ̌gěllịeng lai ghěsine.

¹⁹ Manga anạ u sěmbaụku! Kereu wọu i kamene piạu sěmbaụ kụ semben tawe tumatol᷊e lai těntirong Duata, bọu ene sěngkatau lai wal᷊ine napẹ̌bal᷊ị u tau ene kạpia e su Mawu Ruata,

²⁰ pẹ̌tahěndungko ayetẹ̌ ini: Taumata apang nakapamal᷊ị u taumata waradosa wọu ral᷊enge nẹ̌sal᷊a e, taumata ene napakasal᷊amatu diwang tau waradosa e wọu papate ringangu makạkaual᷊i rosang taumata lawọ e gěllirambeng kal᷊aampung. Adat'i kami, Yakobus

Yakobus

Video Yakobus 5

Ikuti Kami:

KONTAK | PARTISIPASI | DONASI