Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Hun bani si Paulus, juakjuak ni Naibata anjaha apostel ni Jesus Kristus, laho manogu-nogu halak na pinilih ni Naibata hubani haporsayaon ampa pangarusion bani hasintongan in, na mardomu hubani hadaulaton,
2 maronjolan hubani pangarapan bani hagoluhan na so ra bois, na dob humbani mulani iparbagah Naibata, na so siparladung in,
3 anjaha ipatalar do hata-Ni in bani panorangni, marhitei parambilanon na dob niondoskon-Ni bangku, romban hubani pangkatahon ni Naibata, Sipaluah hita,
4 marayak si Titus, anakku na tongon, marhitei haporsayaon riap in. Idop ni uhur ma bamu ampa damei humbani Naibata Bapa ampa humbani Kristus Jesus, Sipaluah hita.
5 Ase hutadingkon pe ham i Kreta, ai ma, ase ipatorsa ham horja na tading ope, anjaha ipabangkit ham sintua bani ganup huta, songon na dob huaturhon bamu,
6 ai ma dalahi na so dong sihataon bani, paramangon ni sada naboru, pardakdanak na porsaya, na so adong pamandangon bani parlahou anjaha seng jungil.
7 Ia parmahan, sijolom anakkunsi ni Naibata, ulang ma panurakon; ulang sihorjahon uhur-uhurni, ulang pargila-gila, ulang parmabuk, ulang paringor, ulang na marpansarian humbani na so dalanni,
8 tapi sipartamuei ma, na malas uhur bani na madear, siparuhur, na bonar, na pansing, sirajai diri,
9 na marsijoloman bani hata na sintong in, domu bani pangajaran in, ase margogoh ia, mangojur marhitei pangajaran na pintor in, age maminsang sipanlawan.
10 Tapi buei do halak, na jungil, sibuei sahap ampa na pakahouhon, tarlobih humbani parugama Jahudi.
11 Maningon pasipon do pamangan ni sidea, ai igeori sidea do bulat-bulat rumah tangga marhitei na mangajarhon na so patut, laho mambuat duit sihailahononkon.
12 Sahalak humbani sidea, ai ma nabi ni sidea sandiri, mangkatahon, “Halak Kreta, parladung do ai tong, binatang panoroh, sitahar boltok.”
13 Sintong do hasaksian ai, halani ai gomos ma paminsangmu bani sidea, ase dear sidea ibagas haporsayaon,
14 anjaha ulang be ipatangi-tangi sidea turi-turian ni halak Jahudi pakon titah-titah ni jolma, na marbalik humbani hasintongan in.
15 Borsih do haganup bani halak na borsih, tapi bani halak na butak, na so porsaya, seng dong na borsih, ai domma butak uhur ni sidea ampa panggora ni uhur ni sidea.
16 Ihatahon sidea, domma itanda Naibata, tapi iparnalang do Ia marhitei horja ni sidea; ai hagigi do sidea anjaha seng sipambalosi, seng tarpakei bani atap aha pe horja na madear.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA