Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Titus, bije tiang! Tiang, Paulus, nulis surat niki sebagẽ hambe Allah dait rasul Deside Isa Almasih. Tiang tepilẽq dait teutus jari meliharaq iman dengan-dengan saq sampun tepilẽq siq Allah, dait jari meliharaq penenaoq mengenai kebenaran saq nyate lẽq ibadahte.

² Pengajahan nike tedasarang lẽq pengharepan bahwe ite gen nerimaq idup sejati dait kekel. Allah sampun janjiqang idup nike sendẽqman awal jaman -- dait Allah ndẽqne mungkin beduste.

³ Lẽq waktu saq sampun Ie tentuang, Allah nyatayang janji-Ne nike lẽq dalem manik-Ne. Manik nike sampun tepercayeang lẽq tiang, dait tiang nyampẽang manik nike sesuai kance prẽntah Allah, Juruselamet ite.

⁴ Titus, bije tiang saq sah lẽq dalem imante saq pade. Rahmat dait damẽ sejahtere lẽman Allah Bapa dait Deside Isa Almasih, Juruselamette araq bareng kance side.

⁵ Tiang bilin side lẽq Kreta adẽq side bau ngurus hal-hal saq masih perlu teatur. Dait adẽq side ngangkat pemimpin-pemimpin jemaah lẽq sebilang kote, maraq saq sampun tiang pesen lẽq side:

⁶ Dengan saq jari pemimpin jemaah harus dengan saq ndẽq bedowẽ cacat cele; ie harus bedowẽ cume sopoq senine; bije-bijene harus idup lẽq dalem iman dait ndẽqne tekenal jari kanak tele dait saq ndẽq bau teatur.

⁷ Pengawas jemaah nike dengan saq ngurus karye Allah, ie ndẽqne kanggo bedowẽ cacat cele. Ie ndẽq kanggo sombong atao becat sili, atao girang bowos, atao girang besiaq atao serakah.

⁸ Laguq ie harus demen bẽng dengan nyodoq lẽq balẽne, demen lẽq hal-hal saq solah, bijaksane, adil, solẽh dait tao nahen diriq.

⁹ Ie harus bedowẽ keyakinan saq teguq lẽq pengajahan saq kenaq, maraq saq sampun teajahang lẽq ie. Siq care nike ie sanggup ngebẽng nasẽhat lẽq dengan tedasarang ajahan nike, dait ngeyakinang dengan-dengan saq nentang ie.

¹⁰ Sẽngaq araq luwẽq dengan saq ndẽq mẽlẽ teatur, terutame lẽq antare ie pade saq ngelaksaneang hukum sunat. Ie pade nyesatang dengan lain siq raos saq ndẽq araq manpaatne.

¹¹ Dengan-dengan saq maraq nike harus tetungkem biwihne, sẽngaq ie pade miaq kaco luwẽq keluarge siq pengajahan-pengajahan saq ndẽq-ndẽq. Ie pade ngelaksaneang nike cume lantaran mẽlẽ boyaq keuntungan saq ndẽq patut!

¹² Laẽq ie pade sampun bedowẽ sopoq nabi, saq asalne lẽman Kreta ẽndah, bebase, "Dengan-dengan Kreta girang beduste, dait maraq binatang buas saq serakah dait mayus."

¹³ Napi saq teucapang siq nabi nike mule kenaq. Keranaq nike side harus peringet ie pade secare teges; adẽq ie pade jari sẽhat lẽq dalem iman

¹⁴ dait ndẽqne malik percaye lẽq dongẽng-dongẽng Yahudi, atao aturan-aturan saq tepiaq siq dengan-dengan saq ndẽq mẽlẽ nerimaq kebenaran.

¹⁵ Selapuq-lapuqne suci umaq dengan-dengan saq suci. Laguq umaq dengan-dengan saq kotor pikiranne dait saq ndẽq beriman, ndẽq araq napi juaq saq suci, sẽngaq pikiran dait atẽ nurani ie pade sampun kotor!

¹⁶ Ie pade bebase bahwe ie pade kenal kance Allah, laguq siq perbuatan ie pade, ie pade nilas Ie. Ie pade bejat, durhake dait ndẽqne sanggup ngelaksaneang hal-hal saq solah.

Titus

Video Titus 1

Ikuti Kami:

KONTAK | PARTISIPASI | DONASI