Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Surat enda i bas aku nari, Paulus, persuruhen Dibata dingen rasul Jesus Kristus. Aku ipilih Dibata jenari IsuruhNa mpegegehi kiniteken anak-AnakNa si terpilih janah mabai ia ku si ngena ate Dibata rikutken pengajaren agamanta,
2 si erpalasken pengarapen kerna kegeluhen si tuhu-tuhu si la erkeri-kerin. Kegeluhen si tuhu-tuhu si la erkeri-kerin nggo ipadanken Dibata man banta ope denga lit paksa-paksa; Dibata labo erbual.
3 Janah i bas paksa si ItetapkenNa, nggo IpetangkasNa kegeluhen e arah KataNa. Enda me si IendeskenNa man bangku. Emaka kupembarken KataNa e bekas persuruhen Dibata Si Engkelini kita.
4 Surat enda man Titus, anakku si tuhu-tuhu rikutken kinitekenta ersada. Dibata Bapa ras Kristus Jesus Singkelini kita mereken lias ate ras kemalemen ate man bandu gelah.
5 Kutadingken kam mbaru enda i Pulau Kreta gelah ipejorendu dahin si perlu idungi, bage pe gelah ngangkat pertua-pertua i bas tep-tep kuta. Ingetlah si kukataken man bandu:
6 sekalak pertua ula min lit si man pandangen; sekalak ngenca ndeharana, janah anak-anakna erkiniteken man Kristus dingen la icap kalak gutul ntah pe la terajarken.
7 Erdandanken dahin peminpin perpulungen e ngaturken dahin Dibata, ula min lit i bas ia si man pandangen. La banci meganjang ukurna ntah sukah merawa, ntah pemabuk, ntah pengamuk, merangap nandangi duit.
8 Arus ia pertemue, ngena atena si mehuli. Pentar, bersih, dingen terkuasaina dirina.
9 Arus nteguh itagangina Berita si rehna i bas Dibata nari e, eme Berita si banci iteki bagi si nggo iajarken man bana. Alu bage ngasup ia mpegegehi kalak si deban alu pengajaren si tuhu-tuhu e, dingen ngasup ia ncidahken salah kalak si ngelawan pengajaren e.
10 Sabap nterem kalak lanai patuh, terlebih-lebih si teriket denga i bas sunat; itipuna kalak si deban alu cakapna si la erguna.
11 Kalak si bage ula bere ngerana, sabap ngguluti jabu kalak saja ngenca perasatna alu pengajaren si la bage arusna. Kai si ibahanna e man kemelanken, sabap sura-surana ndarami duit saja nge.
12 Sekalak nabi i Kreta nari pernah ngataken, "Kalak Kreta perbual, bali ras rubia-rubia si merawa, kalak rangap si perkisat."
13 Kai si ikataken nabi e tuhu, emaka ajarken ia alu la tangung-tanggung, gelah tuhu-tuhu kinitekenna,
14 janah gelah ulanai ia tek turi-turin kalak Jahudi ras aturen-aturen manusia si erlawanen ras pengajaren si benar.
15 Nandangi kalak si bersih pusuh-peratenna kai pe bersih kap; tapi nandangi kalak si la bersih pusuh-peratenna dingen la erkiniteken, kai pe la bersih, sabap nggo meluat ukur ras pusuh-peratenna.
16 Ngaku ia maka itandaina Dibata, tapi arah perbahanenna teridah labo itandaina. Perukurenna mbau, janah la nggit patuh; kalak enda la ngasup erbahan kai pe si mehuli.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA