Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali a’i-a’i aku mawo kojo rayangku. Tare pandoonya kamawo ndayangku etu mampobuuka ja’ingku to Yahudi apa sira bo’onya mangaya i Yesu Kerisitu. Monso pu’u gombongku si’i apa aku samba’a pei i Kerisitu. Pasi rayangku pasi i Nosa Mapasing paka mampakanasaka aku taa mawuti.
2 (9:1)
3 Aku rani kojo to Israel rapalaes. Sira pua’ingku apa sira sambiyaa pei aku. Wali ane rapanya bara nawaika i mPue Allah aku semo ratanaa yau pei maga’a yako resi i Kerisitu see to Israel maya rapalaes, nempo ewa see aku buya rayangku. Pei taa nawaika i mPue Allah ewa wetu.
4 Wali ane mangkonong to Israel etu, sira semo to napilis i mPue Allah tempo owi damawali anaNya. Pasi boros wo’u to nawaika i mPue Allah to Israel. Ia re’e maroo resi sira pasi mampaporaoka sira kayawaNya. Ia mangawaika sira parajanjiNya pasi porentaNya. Pasi Ia mangawaika seja sira ada to nalulu nsira mampue mampakabae Ia. Pasi re’e wo’u parajanji matao to nawaika i mPue Allah sira mangkonong ewa wimba sira darapalaes.
5 Sira semo wiyaa i Abraham, i Ishak, i Yakub pasi buebue nsira to yusa tempo owi. Pasi i Kerisitu, Makole Parajanji i mPue Allah, tempo Ia mawali to lino Ia rapoanaka yako ri wiyaa nsira seja. I Kerisitu etu Ia semo Allah anu mangkuasang samparia, wali masipato Ia rabarong rataka singkasaenya. Amin.
6 Wali si’i-si’i kaborosinya to Israel bo’onya mangaya i Yesu Kerisitu pei nempo sira bo’onya mangaya, si’a batuanginya i Pue Allah taa mangabanang parajanjiNya. Apa taa samparia tau to wiyaa nto Israel to nato’o i mPue Allah monso pu’u to Israel.
7 Pasi taa samparia tau to wiyaa i Abraham to rato’o monso pu’u ana i Abraham ewa to naparajanjika i mPue Allah. Apa i Abraham ia si’a ojo Ishak ananya pei i Pue Allah re’e manganto’oka ia, to’oNya, “Wiyaa i Ishak semo to darato’o wiyaamu.”
8 Wali si’a batuanginya samparia wiyaa i Abraham to mawali ana i mPue Allah. Ojo tau to rapoanaka singkonong pei parajanji i mPue Allah to rato’o wiyaa i Abraham.
9 Apa rapanya ewa si’i. I Pue Allah mangika parajanji resi i Abraham, Ia manganto’o, “Ane ratamo temponya to ipilisingKu Aku dama’i muni, pasi rongomu, i Sarah, damampoanaka ana to langkai.” Ewa wetu parajanjiNya mangkonong tempo i Ishak rapoanaka.
10 Pasi si’a ojo to etu. Si’i wo’u rapa to mangkonong i Yakub sira dua i Esau. Sira dua ana ma’api, ana i Ribka. Pasi sira dua samba’aja pa’anya, etu semo bue ngkita, i Ishak.
11 Pei tempo i Ribka tawa mampoanaka ana to api etu, i Pue Allah manganto’oka ia, to’oNya, “Anamu to tu’anginya damawali to papolaong ntua’inya.” Wali tempo i Pue Allah manganto’o gombo etu, ana i Ribka tawa rapoanaka pasi tawa re’e mangika palaong to matao bara to maja’a. Pei tempo etu semo i Pue Allah mampakanasa Ia mangampilis tau singkonong pei songka to Ia mangika yami. Wali manasa i Yakub rapilis si’a apa saba palaong to nikanya. Ia rapilis apa ia semo to napokio i mPue Allah.
12 (9:11)
13 Wali palaong to nawali etu singkonong kojo pei gombo i mPue Allah to ratulis ri raya ntuntuNya tempo owi. Gombo etu manganto’o, “Aku mangampilis i Yakub pei Aku mampobo’o i Esau.” Ewa wetu gombo to ratulis.
14 Wali ane i Pue Allah mangampilis samba’a tau pasi mampobo’o tau to yusa, wimba datato’o mangkonong Ia? Bara maya kita manganto’o i Pue Allah taa sangkani mangika ewa wimba to masipato raika? Gete taa maya!
15 Apa Ia re’e manganto’oka i Musa tempo owi, to’oNya, “I sema tau to Aku rani mamporayang, tau etu Aku damamporayang. Pasi i sema tau to Aku rani mangansawang, tau etu daKusawang.” Etu semo gombo i mPue Allah resi i Musa.
16 Wali ane i Pue Allah rani mangampilis tau, si’a yako pamporani ntau etu bara yako palaong ntau etu naka pei i Pue Allah mangampilis ia. Ojo yako pamporayang i mPue Allah semo.
17 Wali aku mamporapaka wo’u, rapanya ewa makole Mesir tempo owi. Ri raya ntuntu i mPue Allah kita mangabasa gomboNya resi makole Mesir etu. Ia manganto’o, “Naka pei Aku mangokotaka korom mawali makole see Aku maya mampaponsanika tau kuasangKu tempo Aku manganangi korom. Wali yako palaong etu see naka kareba mangkonong Aku datikareba resi tau ri sambawo lino.” Etu semo gombo i mPue Allah resi makole Mesir.
18 Wali ane i Pue Allah rani mamporayang tau, Ia damamporayang tau etu. Pasi ane Ia rani mampakabukul raya ntau, Ia damampakabukul raya ntau etu.
19 Wali bara re’e samba’a komi to damanganto’oka aku, “Maka pei i Pue Allah mampakasala lengko ntau to maja’a ane Ia semo to mampakabukul raya ntau etu?”
20 Pei gete, ne’e manganto’o ewa see! Apa taa masipato to lino mangabanta i Pue Allah. Rapanya kura tana. Wimba, bara re’e kura tana manganto’oka tau to mangika, “Maka pei korom mangika aku ewa si’i?” Tare!
21 Apa tau to palaonginya mangika kura tana, tau etu maya mangika ewa wimba pamporaninya. Ia yau mangalemo ruyu tana puyu panewa yako silemo tana puyu etu ia maya mangika dua yongu kura, songu to magaya kojo to rapake tempo roa, pasi songu wo’u to taa magaya kojo to rapake eo-eo.
22 Wali ewa see seja i Pue Allah. Masipato Ia mangika ewa wimba pamporaniNya resi kita to lino apa Ia semo to nampapowali kita. Kamonsonya i Pue Allah rani mangahuku tau to maja’a pasi mampaponsanika tau kuasaNya. Pei nempo ewa wetu pamporaniNya pei Ia tiroo mansabaraka kojo tau maja’a to masipato mangarata huku etu pasi to masipato darapakaja’a yau.
23 I Pue Allah mangika ewa wetu see mampaponsanika ewa wimba kabaenya kayawa to Ia mangawaika tau to Ia mamporayang, etu semo tau to Ia mampasigena yami damangarata kayawaNya etu.
24 Wali kita semo to damangarata kayawaNya etu, apa Ia roomo mampokio kita. Pei Ia si’a ojo mampokio tau yako ri oyo nto Yahudi, Ia mampokio seja tau to yako ri oyo ntau to si’a to Yahudi.
25 Wali palaong to naika i mPue Allah etu singkonong pei gomboNya to natulis i Hosea tempo owi, to’oNya, “Tau to si’a Aku Puenya, tau etu daKuto’oka seja ‘taungKu’. Pasi tau to si’a tau to Kuporayang, tau etu daKuto’oka seja ‘tau to Kuporayang’.
26 Pasi re’e tau to seore Aku manganto’oka, ‘Komi si’a taungKu,’ wali ri lipu nakare’e nsira tempo Aku manganto’oka sira gombo etu, ri lipu etu semo tau etu darato’oka seja, ‘ana i mPue Allah to tuwu’.” Wali etu semo gombo i mPue Allah to natulis i Hosea mangkonong tau to si’a to Yahudi.
27 Pasi re’e wo’u to nato’o i Yesaya tempo owi mangkonong to Israel. Tempo etu ia maroso loonya manganto’o, “Wiyaa nto Israel boros kojo, ewa bone ri wii ntasi kaborosinya. Pei nempo ewa wetu kaborosinya, ojo santila kodi sira to darapalaes.
28 Apa i Pue taa singkasaenya ojo damansabaraka palaong nto lino. Tamo masae Ia damangahuku sira, pasi hukuNya etu damapari kojo.”
29 Pasi re’e wo’u to nato’o yami i Yesaya etu, to’onya, “I Pue anu Makuasa re’e mamporayang pasi mampalaes santila kodi bansa ngkita. Ane taa Ia mampalaes tau etu, bansa ngkita pura yau sewaju ewa tau ri kota Sodom pasi Gomora tempo owi.” Etu semo gombo i Yesaya.
30 Wali ane ewa see wimba danato’o ngkita? Ewa si’i datato’o. Ane tau to si’a to Yahudi, sira tare mangaliwu jaya mapalaong see danato’o i mPue Allah tare dosanya, pei nempo ewa see re’e sira to nato’o i mPue Allah tare dosanya. Ia manganto’o sira tare dosanya apa saba yako pangaya nsira.
31 Pei ane to Israel, sira re’e mangaliwu jaya mapalaong see danato’o i mPue Allah tare dosanya. Wali sira mampobuuka ane sangkani mangalulu porenta i Musa, etu semo jaya. Pei taa monso, wali sira taa mangarata jaya etu.
32 Wali maka pei sira taa mangarata? Sira taa mangarata apa sira ojo mansarumaka palaong nsira ngkalio, sira taa mangaya i Pue. Wali sira raporapaka ewa tau tisumpul ri watu to rakatisumpul to re’e ri tongo njaya.
33 Wali palaong etu re’e ratulis yami ri raya ntuntu i mPue. I Pue Allah mamporapaka i Yesu ewa watu to rakatisumpul etu. Ia manganto’o, “Padongeka kojo! Aku re’e mamposaka watu nda’a kota Yerusalem to rato’oka seja Sion. Etu semo watu to nakatisumpul ntau, pasi watu to bae to nakatirombi nsira etu naka pei sira tisiba yau. Pei i sema tau to mansarumaka watu etu, tau etu taa darapakamea apa anu to nasarumaka nsira monso pu’u.” Ewa wetu to ratulis ri raya ntuntu i mPue Allah.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA