Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ To delomo tangguli Isa Almasih wau mopolele lo u banari deu wau otutu yilololo wawu lalayita susukari da'a. To delomo kawasa lo Roh lo Allahuta'ala hilau hemopoyiyakini olau deu wau dila hemohimbulo.

² (9:1)

³ Hiyambola wonu bo mowali, wau yinawo la'anatiyo lo Allahuta'ala wawu mobuaya woli Isa Almasih, alihu mongowutatu'u tawu-tawuwala lo Yahudi mowali salamati.

⁴ Timongoliyo tilulawoto Allahuta'ala lowali umati-Liyo wawu pilopowali-Liyo mongowala-Iyo wawu Allahuta'ala lopopatatao lo kawasa-Liyo ode olimongoliyo. Ma ngohuntuwa pasali u ma hepilosatujuwa lo Allahuta'ala wawu mongotiyombu limongoliyo wawu Allahuta'ala olo longohi mao hukum lo Tawurat, aturangi lo umoibadati wawu loposadiya mao lo barakati wuwewo mao ode olimongoli to soroga.

⁵ Lonto waliya lo mongotiyombu limongoliyo ngohuntuwa mongonabi. Wawu ti Isa Almasih pilotutuliyo mayi lonto waliya limongoliyo olo. Tiyo toyitato ta nga'amila wawu Tiyo Allahuta'ala ta musi pujiyola turu-turusi. Amin!

⁶ Dila nga'amila tawu ta lonto Israel tawu lo Israel, sababu memangi banari ngohuntuwa tawu lo Israel ta dipo paracaya ode oli Isa Almasih. Bo Pirimani lo Allahuta'ala dila ponga lo akali dila meganapu.

⁷ Wawu dila nga'amila ta lemaso to waliya li nabi Ibrahim walai nabi Ibrahim, odelo loiya lo Allahuta'ala ode oli nabi Ibrahim tula-tulade to kitabi odiye, ”Bo waliya le Ishak ta boyito ta mowali tanggulala waliyamu.” Odito Pirimani lo Allahuta'ala.

⁸ Deboliliyo mao dila nga'amila wala'a ta pilotutu mayi lo manusiya ta mowali mongowalao Allahuta'ala, bo mongowalao ta lowali moturuti mao janjiya lo Allahuta'ala, ta boyito waliya li nabi Ibrahim.

⁹ Sababu janjiya lo Allahuta'ala boyito odiye, ”Donggo ngotawunu mola Wau muli monao mayi wawu tou odungga-U mayi, ti Sara ma o wala'a ta lolai ngota.” Odito janjiya lo Allahuta'ala ode oli nabi Ibrahim.

¹⁰ Dila bo wambao uwito. Lebe mopatato to oli Ribka dileliyo le Ishak tiyombu lo bangusa lo Yahudi. Tiyo lo'otapu wala'a dulota.

¹¹ To wakutu mongowala'a boyito dipo pilotutuliyo mayi wawu dipo lohutu u mopiyohu meyambo u moleto, Allahuta'ala ma loluwota ngota to wolota limongoliyo dulota, alihu patuju lo Allahuta'ala tatapu mewujudu dila dadasari to huhutu lo manusiya bo dadasari to ibodu Allahuta'ala.

¹² Loiya lo Allahuta'ala ode oli Ribka odiye, ”Wala'a ta yali-yali ma mowali lebe kawasa lo wala'a ta mohuhula.” Odito loiya lo Allahuta'ala ode oli Ribka.

¹³ Odelo woluwo tula-tulade to kitabi tomimbihu wala'a dulota boyito odiye, ”Te Yakob ta tulawoto-U bo te Esawu dila.” Odito u tula-tulade to kitabi.

¹⁴ Wolo uodito, tantu woluwo tawu ta ma moloiya mayi deu Allahuta'ala dila adili. Bo poleleu mayi, uwito dila ponga lo akali!

¹⁵ Sababu Allahuta'ala ma lopotunggulayi lo Pirimani ode oli nabi Musa odiye, ”Wau ma motolianga tawu ta okohondakiya-U wawu Wau moponu wawu motoliango ode tawu ta okohondakiya-U.” Odito Pirimani lo Allahuta'ala.

¹⁶ Wolo uodito, putusani lo Allahuta'ala moluwota tawu ta okohondakiya-Liyo, dila dadasari to kohondaki meyalo usaha lo tawu, bo dadasari to ponu wawu toliango Allahuta'ala.

¹⁷ Allahuta'ala loloiya ode ole Pirawun olongiya lo lipu lo Mesir odiye, ”Makusudu-U lominta'a olemu mowali olongiya, alihu Wau mopobiloheyi lo kawasa-U to delomo batangamu wawu alihu tanggulu-U popomasahuruwo lo nga'amila manusiya to ngoyilanggubu duniya.” Odito loiya lo Allahuta'ala ode oli olongiya Pirawun.

¹⁸ Wolo uodito, Allahuta'ala ma moponu wawu motoliango tawu tutu'ude wolo kohondaki-Liyo wawu Tiyo ma mopo'otoheta hila lo tawu olo tutu'ude wolo kohondaki-Liyo.

¹⁹ Tantu woluwo tawu ta ma moloiya mayi odiye, ”Wonu odito, longola Allahuta'ala donggo hemopotala lo manusiya, sababu diyaluwo tawu ta mowali molawani kohondaki lo Allahuta'ala?”

²⁰ Bo poleleu mayi, manusiya dila mowali mobubutola wolo Allahuta'ala. Dila ponga lo akali u pilohutu moloiya ode ta hemohutu odiye, ”Longola yio ma lohutu olau lowali odiye?”

²¹ Ta mohhutuwa ulonga yito o haku mohutu ulonga gaga da'a meyalo u biyasa monto huta ngotopinga. Odito olo wolo Allahuta'ala ta lopowali lo manusiya.

²² Allahuta'ala o patuju mopobiloheyi lo muruka-Liyo wawu mopopatatayi lo kawasa-Liyo ode tawu ta patuti muruka-Liyo, ta ma piloposadiya-Liyo mao mowali binasa. Bo wonu Allahuta'ala losabari da'a lotahangi muruka-Liyo,

²³ Tiyo o patuju mopopatatayi lo uda'a lo masahuru-Liyo ode tawu ta oponu wawu otoliang-Iyo ta ma piloposiyapu-Liyo mao lonto u omo-omolu popomasahuru wo-Liyo,

²⁴ deuwitoyito ito ta ma ilibode-Liyo, dila bo wambao lonto wolota lo tawu lo Yahudi, bo lonto wolota lo bangusa-bangusa wuwewo mao olo.

²⁵ Odelo woluwo tula-tulade to kitabi li nabi Hoseya odiye, ”Allahuta'ala ta tamu-tamulo loloiya odiye, ’Ta dila umati-U ma ibode-U umati-U; tawu ta dila otoliango ma otoliangu-U.’

²⁶ Wawu to tambati Allahuta'ala hemoloiya odiye, ’Timongoli boti dila umati-U,’ to tambati boyito Allahuta'ala moloiya odiye, ’Timongoli mongowalau-U.’” Odito u tula-tulade to kitabi li nabi Hoseya.

²⁷ Ti nabi Yesaya loloiya tomimbihu tawu lo Israel odiye, ”Openu jumula lo walao tawu lo Israel odelo huntuwa lo hungayo to bihu pentadu, bo ngointi ta poposalamatiyo lo Allahuta'ala,

²⁸ sababu ma ngope'e medungga wakutu lo Allahuta'ala mopodehu lo hukumani ode lipu lo tawu lo Israel.”

²⁹ Ti nabi Yesaya loloiya olo odiye, ”Wonu Allahuta'ala ta laba-labatutu kawasa dila lolola mao ngointi to wolotanto ta silalamati, ito ma lowali binasa odelo tawu lo kota lo Sodom wawu kota lo Gomora.” Odito u tula-tulade to kitabi li nabi Yesaya.

³⁰ Utiye patuju'u deu bangusa-bangusa wuwewo ta dila hepongusahawa tumumula banari to talu lo Allahuta'ala, pilopobanari lo Allahuta'ala sababu timongoliyo paracaya ode oli Isa Almasih.

³¹ Bo bangusa lo Israel ta hepongusahawa tumumula banari to talu lo Allahuta'ala wolo umoponao mao lo hukum lo Tawurat, dila ilohasililiyo.

³² Timongoliyo dila ilohasiliyo sababu bangusa lo Israel hepongusahawa, dila wolo imani ode oli Isa Almasih, bo wolo huhutu limongoliyo, tunggulo timongoliyo ma letedua to botu damango.

³³ Odelo woluwo loiya lo Allahuta'ala tula-tuladu to kitabi odiye, ”Ototayi mao: Wau ma lopodutu mao to kota lo Yerusalem botu tuwawu damango. Ta metedua to botu boyito ma modehu; wawu titalotita ta paracaya ode o-Liyo, dila ta mole'e.” Odito loiya lo Allahuta'ala to kitabi.

Roma

Video Roma 9

Ikuti Kami:

KONTAK | PARTISIPASI | DONASI