Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dan indoc erij medam an dan indaguner dara dan indamouwer dau indan meijouhuda dau leng Israel gin namcir. Hang dan demarges dau gin touwero. Doba dan deb dara dan indoc esesa an len terimda. Anai len lemedag hom dara Krisdus touebma. Areg dan den dou yen gini, kaba, dag dan demereiyara dou yen touwero, doba se misen namcir. Hanoba dan indoc ouma debin gin toua, aimo dau areg Mena Gogoufu ens dou dan. Anai dan dedag hom dara enohob.
2 (9:1)
3 Dangga hang, sug Allah en ouwan, kaba, en asid dan eng dau Krisdus. Hanoba en eic mor mor dou dan eng se dum smougb dous. Dauntoba indan lusud gin, kaba, len lemeihwedig dum smougb touwero. Doba len merdoc dag hom dara Krisdus leperwei dan induhw ucugb toua.
4 Anai len, kaba, Allah ouci len debinim dag enin men meijouhuda sug nosa. Dara en eigdoumesa len meroho dag en mogwihi mogo len dag misen touohob. Hanoba en ens dau men gogouf cucugb ucucugb dou len. Dara sug en os ara ara dou len, kaba, en eic men gomnomna ogdoc Musa baos dara dou len toua. Dauntoba len lecinaga ucina naugb sug len lesijaresa en dag misen namcir. Dara en os dou len dag en eigdoc len dau meren gogom. Hanoba en eic maireseb geb huhugb dou len. Dara en ousa len se aremer gus augwan toua terimda.
5 Dara len gin, kaba, len ledag Abraham, Isag, dara Yakub len merdebeitor len toua. Dara Krisdus sug en edag lusud misen se cinogo gin, kaba, enin toua dau meijouhuda gini. Dangga hang, eigouhw naugb maman magahugouhw an Allah beb huhugb terimda. Anai en, kaba, en moho eb taiba augwanohob. Augwan gini asesa dag misen namcir.
6 Dangga areg dan den dou yen graga, kaba, gini aninim dag Allah emaimo areg en os dou leng Israel gin toua deiteroei? Doba en arges dau namcirohobei? Naro, dan demenara dangga dou yenero. Anai Allah emouci len laugwan dag enin men lusud teiteiyero.
7 Dara en emecic Abraham medebeitor len laugwan dag enin men lusud touwero. Doba en ecic leng nagama dag enin men lusud gin dous. Anai en enara dou Abraham deb sug nosa dag gin touohob, endagai: Dan decic Isag medebeitor dous eng dag ban abdebeitor misen naugb dani.
8 Dangga hang, areg graga, kaba, men meijouhw dag gini: Abraham en mehir gedig en aimo dau areg en medoc etrij icira mesouwer an len, kaba, Allah emeigdoumesa len meroho dag Abraham mehir misen ginero. Doba Allah ecic Abraham en meisi Isag an en meisi lahwai dara en medebeitor, len laugwan dag Abraham mehir misen dous. Anai len gin, kaba, len lemedag Abraham mehir gedig en aimo dau areg en medoc etrij icira mesouwer an lenero. Doba len ledag en mehir, aimo dau areg Allah os dou en gin dous.
9 Anai sug Allah os en meisi hom dou en sug nosa, kaba, en enara dou en deit, endagai: Edebeij lona areg dan dos deb dou ban ginohob, kaba, dan demecicugb aud ban deits. Se lona ingga, kaba, Sarai emouwadan meisi hom gin toua.
10 Dara hom gin dousero. Doba sug Ribga en menuhwa an meisi lahwai dau maman mamjemouwa hom, moho Isag, ginaba, kaba, Allah enara dou en, endagai: Dan douwan naugb maguna mebin en edag sogougb dou magto. Allah enara dou en dag gini, kaba, sug en emouwadan lanbuma. Hanoba lan lemaimo areg geigouhw era areg gecgu mougwa hom touebma. Dauntoba areg Allah en ouci gin, kaba, emaimo dau lusud misen meren geicara touwero. Doba aimo dau areg en ouci se enin medoc gin dous. Dangga hang, sug Allah eigdoumesa magto en moho dag mougt, hanoba en owun maguna en moho dag sogougb dou en magto, kaba, augwan gini emaimo dau maran geicara gin touwero. Doba dau areg Allah en ogod se enin medoc mes an lanohob dous.
11 (9:10)
12 (9:10)
13 Augwan gini aimo dau areg Allah enara eisaugb lan se Surad Injil Meb Mohon deb sug nosa touohob, endagai: Yakub, kaba, dan indoc eigouhw an en teiteiyohob. Doba Esau, kaba, dan indoc emeigouhw an enero.
14 Sug Allah emaimo lusud meren geicara ginero, doba en medoc eigouhw era gecgu an len dau enin medoc mes dag gin dous, kaba, maman man dagiro eisaugb gina? Maman manara dag Allah medoc emedag beim an lusuderoei? Doba en obsara dau gin augwougb an lenohobei? Dangga, isnaro.
15 Anai Allah enara dou Musa sug nosohob, endagai: Sud hom areg dan dogod se dan indoc mes naugb dan indoc eineg an en, kaba, dan deicara daimo dangga an en. Dara sud hom areg dan dogod se dan indoc mes naugb dan indoc erij an en, kaba, dan deicara daimo dangga an en toua. Naro, kab, naro.
16 Dangga hang, sug Allah ouci sud hom, era en emouci enero, kaba, augwan gini emogdoc sug sud hom ogod dangga se enin medoc mes. Era sug en eic mouwemougb esesa naugb gin touwero, doba aimo dau sug Allah medoc an en, era naro, gin dous.
17 Augwan gini aimo dau areg Allah enara dou Piraun se Surad Injil Meb Mohon deb sug nosa touohob, endagai: Danin eng deigdoumesa ban aboho dag leng Mesir meren mougt mera medam naugb dan dens dau indan goubesa dou lusud ogdoc ban. Dauntoba lusud se cinogo augwan, kaba, len leigdoumesa dan indoho an gin toua namcir.
18 Dangga hang, sud hom areg Allah ogod se enin medoc mes naugb en medoc eineg an en, kaba, en eicara aimo dangga an en. Dara sud hom areg Allah ogod se enin medoc mes naugb en eic en medoc aiyansem dou en, kaba, en eicara aimo dangga an en toua.
19 Doba sud hom dau yen, kaba, en esbes an dan, endagai: Sug Allah aimo areg augwougb an lusud dag gin dous, kaba, dagiro en owun maman mamoho dag maman mabesesar terimda. Anai gareg men goubesa edeinyum naugb sug en en dougwo Allah an areg en ogod deinaugb enohoba?
20 Doba dan insirija, bani garena, hang ban bemen dougwo Allah an areg en ogod deinaugb ban gina? Ban aboho agas edeinyum naugb ginei? Naro, ban aboho emedeinyum naugb ginero. Dangga hang, ban bemen dougwo areg Allah esedeb naugb ban gin touwero. Doba ban barges dau namcir. Anai sug sud hom en esinsin debecijohob, kaba, debecij ingga en dougwo en naugb sug en esinsin en dag ginei? Naro, debecij emenara dag gin dou en touwero. Doba en arges dau gin toua terimda.
21 Anai sud hom gedig en mou ouforoho naugb en esinsin debecij, kaba, men goubesa inggebga naugb sug en esinsin debecij hwai dau cinebcina mogo hom gin toua. Homa, kaba, naugb lona gouji. Doba homa, kaba, naugb lona gus gus gin toua, aimo dau areg enin ouwan dous.
22 Areg graga augwan, kaba, aninim dag Allah men geicara an maman toua. Anai ligbum dau maman, kaba, len ledag debecij gedig Allah medoc esrougb an len teiteiyohob. Hang en esedeb len naugb en eic mor mor se dum smougb dou len. Dara meren lona naugb gin, kaba, ebeij deinyor namcir touohob. Doba Allah en ouwan ens dau sug en medoc esrougb an sesar. Dara sug men goubesa edeinyum naugb sug en ogod aremer gomom deinaugb lusud hwas gini asesa dou len toua. Dangga hang, en emerba len se dum smougb ingga dedemeda touwero. Doba en eigtou ateteij len. Dauntoba sug lusud leiya dau men geicara dou len gini, kaba, len lecinaga dag en medoc emeigouhw an sesar hom touwero. Doba en medoc esrougb an terimda. Dara men goubesa edeinyum naugb sug en eic gogom dou len toua.
23 Doba ligbum dau maman, kaba, len ledag debecij gedig Allah esedeb len naugb en medoc eineg an len teitei touohob. Anai en emouwan naugb sug lusud lecinaga dag en medoc esrougb an sesar dousero. Doba en ouwan ens dou lusud dau sug len laimo areg edag beim dara ecabeci, kaba, dag en medoc eigouhw an len beiseisaugb namcir toua. Dangga hang, en emeic gogom dou maman touwero. Doba en eic areg geigouhw aingma aingma dou maman terimda. Hanoba en esedeb maman naugb sug en ogugwo men gogouf cucugb ingma dou maman toua.
24 Anai sug en eija maman aud en naugb maman madag enin men lusud, kaba, en emeija emeng Yahudi emen dousero. Doba en eija yeng yugmahara aud en touohob.
25 Augwan gini esogwa deisa areg Allah enara eisaugb yeng yugmahara se surad Hosea deb sug nosa touohob, endagai: Leng lemedag indan lusud nosahabero, kaba, dan demeija len dag indan lusud. Dara meijouhuda gedig dan indoc gororougb lenero, kaba, dan demeija len dag dan insir len toues.
26 Dara en enara dou lugmahara se surad Hosea gin deit, endagai: Se usi gedig dan dowun yen meijoho dag yen yemedag indan lusudero, kaba, se usi ingga dang Allah Geis Huhugb dan demeija yen dag indan lusud deits.
27 Doba eisaugb emeng Israel, kaba, Yesaya en eimiman dau emen dag gini, endagai: Leng Israel, kaba, leinyana gougwa, aninim dag geria se dum mebera namcir. Doba maman Adehsud Geis Huhugb gin, kaba, en eigdoc sud hom yom dau len dau sesar men gogom aud maireseb menau geb huhugb gin dous. Anai en emamsoho len deb deitero. Doba en emogod meren aremer dedemeda debin len se meren hancob augwan, dara en medoc agadgeij dougwo len toua namcir.
28 (9:27)
29 Augwan gini acgunog dau areg Yesaya ens deb dou emen sug nosa touohob, endagai: Sug Allah Gen Mobisamougb namcir en emarges maman mamdebeitor ingma debero, kaba, maman madag lusud se cinogo Sodom dara Gomora touohob. Dobnaro. En amsoho lingma debohob. Hang maman mamedag leng se Sodom dara Gomora touwero. Doba ligbum, kaba, len meriresebaba.
30 Dangga hang, areg dan den dou yen ginohob, kaba, men meijouhw dag gini: Lugmahara gedig len lemainyen naugb sug Allah eic gesgigouhwesa dou lenero, kaba, Allah eic gesgigouhwesa dou len ucugb. Anai sug len louman Mer Geigouhw eisaugb Krisdus gin, kaba, len lemotogoto en gin touwero. Doba len merdoc ebdebin anohob.
31 Doba Allah men lusud leng Israel gin, kaba, len lehilon ucina dau lenin dous. Dauntoba Allah eic gesgigouhwesa dou len ogdoc gin toua. Dobnaro. Len lemesma ucina ginero.
32 Doba dagiro, naugwe hang, len lemesma ucina ginero? Len lemesma ucina ginero, anai len merdoc emebdebin an Allah men Mer Geigouhw eisaugb Krisdus gin touwero. Doba len louwan Allah eic gesgigouhwesa dou len dau sug len laimo Musa men gomnomna gin dous. Dangga hang, len lemetohob igdahab hom, moho Igdahab Getohob, gin touohob.
33 Augwan esogwa deisa areg Allah en enara se Surad Injil Meb Mohon deb sug nosa touohob, endagai: Yen youman deigeigouhw namcir. Se lona daiyamo gacin, kaba, dan demob igdahab hom se cinogo Sion gini. Dangga gareg en medoc ebdebin an igdahab gin, kaba, dan demeic igdebes dou enero. Doba gareg en medoc emebdebin an igdahab ginero, kaba, igdebeseba eni, anai en etohob bobsara icira igdahab gin namcirohob.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA