Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Sintong do na huhatahon on ibagas Kristus, seng marladung ahu, dihut do panggora ni uhurhu manaksihon marhitei Tonduy Na Pansing,
2 paboa pusok tumang do uhurhu anjaha tongtong marborit ni uhur ibagas.
3 Ipangindo uhurhu do age bali humbani Kristus halani saninangku, hasomanku sabangsa mangihutkon pardagingon.
4 Bangsa Israel do sidea, simada hak haanakon, hasangapon, parpadanan, titah, parugamaon, bagah-bagah,
5 ampa ompung ni bangsa in, anjaha humbani sidea do roh Kristus mangihutkon pardagingon, Naibata na mangatasi haganup, na tarpuji ronsi sadokah ni dokahni. Amen.
6 Tapi sedo na gabe lang asi hata ni Naibata. Ai seng haganup na marasal humbani Israel, margoran Israel ai.
7 Anjaha seng haganup ginompar ni si Abraham anak ni si Abraham, tapi: Na susur humbani si Isak do goranon ginomparmu.
8 Artini ai: Sedo anak ni daging anak ni Naibata, tapi anak na pinarbagah-bagah ai do ihira anak na tongon.
9 Ai sonon do hata ni bagah-bagah ai: Sonon musimni use, roh do Ahu, anjaha adong ma ijai sada anak bani si Sara.
10 Seng pitah ai buktini, tapi dihut do si Rabekka, na boratan rumah humbani sada halak, ai ma si Isak, ompungta ai.
11 Ai sanggah lape tubuh ope sidea, lang ope ihorjahon na madear barang na masambor, ase totap sura-sura ni Naibata domu hubani pamilihon-Ni.
12 Seng marguru bani pambahenan, tapi pitah bani na mandilo tumang do, ihatahon do hu bani: “Maningon sikahanan do pambalosi bani sianggian.”
13 Songon na tarsurat ai homa, “Holong do uhur hubani si Jakob, tapi sogam do bani si Esau.”
14 Ai pe, aha ma hatahononta? Ai lang songon na geduk ma Naibata? Seng sonai.
15 Ai ihatahon do hubani si Musa, “Maidop do uhur-Hu bani na Huidopi, anjaha marontou do uhur-Hu bani siontouan ni uhur-Hu.
16 Ase seng marguru bani rosuh ni jolma atap horjani, tapi bani idop ni uhur ni Naibata do.”
17 Ai sonon do nini surat in hubani siarao, “Halani on do ase Hupabangkit ho, ase Hupatalar kuasang-Ku marhitei ho, ase tarambilan goran-Ku hu sab dunia on.”
18 Ase iidopi do na sihol siidopan-Ni, anjaha ipahengkeng do na sihol sipahengkengon-Ni.
19 Ra ihatahon ham do bangku: Mase mansalahkon ope Ia? Ai ise boi manlawan harosuh-Ni?
20 Ale jolma, ai ise ma ho, na pag manjabab Naibata? Mintor hatahonon ni na pinauli ma bani na paulihonsi: “Mase ma sonon ahu ibahen ham?”
21 Ai lang markuasa sitopa hudon, laho manjadihon humbani sangkimpal tanoh halampung, deba parugas bani na sangap anjaha deba nari bani na dorun?
22 Tapi sonaha ma, laho pataridahkon ringis-Ni anjaha pabotohkon kuasa-Ni, marsabar ni uhur do Naibata manganju parugas siringisan, na pinasirsir hinan hu hamagouan,
23 ase ipabotohkon habayakon ni hasangapon-Ni bani parugas siidopan, ai ma na pinasirsir-Ni hinan bani hasangapon,
24 ai ma hita, na dob nidilo-Ni, seng pitah humbani Jahudi tumang, tapi dihut do homa humbani sipajuh begu-begu?
25 Songon na hinatahon-Ni ai bani surat ni si Hosea, “Goranon-Ku ma na so bangsang-Ku hinan bangsang-Ku, anjaha na so hinaholongan hinan haholongan-Ku.”
26 Anjaha, bani ianan ai, dob ihatahon bani sidea, “Seng bangsang-Ku hanima,” pala ijai ma sidea goranon anak ni Naibata na manggoluh in.
27 Ai idilohon si Jesayas do pasal bangsa Israel: “Age pe nasa buei ni horsik na i topi ni laut buei ni anak ni Israel, pitah teba-tebani do na maluah.”
28 Ai pasaudon ni Tuhan in do hata-Ni i tanoh on gok anjaha podas.
29 Songon na dob jinahaan ni si Jesayas hinan: “Ambit lang itebai Tuhan Zebaot bonih banta, usih do hita bani Sodom ampa Gomora.”
30 Ase aha ma hatahononta? Sipajuh begu-begu na so mangindahi hapintoron, manjalo hapintoron, ai ma hapintoron na humbani haporsayaon.
31 Tapi Israel, na mangindahi titah hapintoron in, seng das hujai.
32 Halani aha? Ai ma halani seng humbani haporsayaon, tapi humbani horja do, gabe tartolsu sidea bani batu partolsuan in,
33 songon na tarsurat in: “Tonggor ma, hupatibal do i Sion sada batu partolsuan ampa sada batu gingging parsangsian, anjaha seng sipabadoron na porsaya Bani.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA