Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Kontutojengi anne apa eroka kupau lanri inakke taunNa’ Isa Almasi. Tena nakua’balle-balle. Atingku siagang pa’maikku, nirurunganga ri RohNa Allata’ala, ampakatappa’ tonga’ ma’nassana kontutojengi anne kanangku.

² Sanna’ si’nana siagang pa’risi’na atingku,

³ passabakkang julu bansaku. Nasaba’ untu’ ike’nammi nakurella todong anggappa pangngalarroi battu ri Allata’ala siagang nisa’la’ battu ri Isa Almasi.

⁴ Ike’nammi umma’ nipilea siagang nipa’jaria ana’-ana’ KalenNa ri Allata’ala, kammayatompa le’baka angkasiaki kakoasanNa Allata’ala. A’janjimi Allata’ala mae ri ke’nanga, siagang nisaremi ke’nanga hukkung-hukkung agama. Nipauammi ri Allata’ala ke’nanga angkanaya antekamma batena ke’nanga musti anynyomba ri Allata’ala; kammayatompa natarimami ke’nanga janji-janjinNa Allata’ala.

⁵ Iami ke’nanga sossoranna boe-boeta. Battu ri bansanami ke’nanga assala’ kabattuanNa Almasi, ri wattu battuNa a’jari ma’rupatau ri lino. Iami kaminang mala’biri’ ri sikontuna taua. Nipujimi Allata’ala satunggu-tungguna! Aming.

⁶ Tena nalakukana tenamo natappake janjinNa Allata’ala; mingka tena nasikontu bansa Israelka nipile ri Allata’ala a’jari umma’Na.

⁷ Tena nasikontu sossoranna Abraham a’jari ana’-ana’Na Allata’ala. Nasaba’ Nakana Allata’ala ri Abraham, "Sossorannaji bawang Ishak laniareng sossorannu."

⁸ Battuang kana, sossoranna Abraham a’jaria ana’-ana’Na Allata’ala, iaji bawang sossorang nilassukanga lanri janjinNa Allata’ala; jari tena nasossoranna ngaseng.

⁹ Nasaba’ kammami anne janjinNa Allata’ala, "Punna narapi’mo wattu le’baka nipattantu labattua pole, nalania’mo ana’na Sara, sitau ana’ bura’ne."

¹⁰ Kammayatompa pole: Anjo Ribka rua ana’ bura’ne nalassukang battu ri se’rea mangge, iamintu Ishak, nene’ boeta.

¹¹ Ri wattu tenanapa nanilassukangi anjo ana’ ruaya, le’ba’ memammi Napattantu Allata’ala ana’ lanipilea sallang. Anjo pammileNa Allata’ala tena nabattu ri panggaukanna rupataua, passangalinna battu ri ero’ pakkio’Na bawang Allata’ala. Nasaba’ ri wattunna tenapa nangngasseng a’gau’ baji’ yareka a’gau’ kodi anjo ruaya ana’na Ribka,

¹² le’ba’ memammi angkana Allata’ala mae ri Ribka, "Anjo toaya la’jari palayangi mae ri anjo loloa."

¹³ Nia’ tattulisi’ lalang ri Kittaka angkanaya, kammaminne kananNa Allata’ala, "Kukamaseangi Yakub, mingka birisikKa’ mae ri Esau."

¹⁴ Jari apa bodona kana kamma-kamma anne? Lanikana tena naadele’ Allata’ala? Mattantuna adeleki Allata’ala!

¹⁵ Nasaba’ Nakana Allata’ala mae ri Musa, "LaKupappicinikangi barakkakKu, mae ri tau eroka Kupicinikiang barakkakKu, siagang laKupappicinikangi pangngamaseangKu mae ri tau eroka Kupicinikiang pangngamaseangKu."

¹⁶ Jari anjo apa Natappukia Allata’ala, teai lanri usahana yareka rellana rupataua, passangalinna kabajikang pa’mai’Na bawang Allata’ala mae ri anjo tau Napilea.

¹⁷ Nasaba’ nia’ tattulisi’ lalang ri Kittaka angkanaya, "Nakana Allata’ala mae ri karaeng Mesir, ‘Se’reji bawang erokKu naKupa’jariko karaeng, iamintu eroki Kupappicinikang kakoasangKu battu ri kau, siagang na’jari masahoro’ arengKu ri sikontu linoa.’"

¹⁸ Jari, iaji namangngamaseang Allata’ala mae ri se’rea tau punna Nakaerokangi kammaya. Kammayatompa a’jari kapala batui se’rea tau punna Nakaerokangi Allata’ala kammaya.

¹⁹ Jari, lanukana kapang ri nakke, "Punna kamma, apa saba’na Naero’ ija Allata’ala ampasalai rupataua? Sai manna inai takkulleaji natahang ero’Na Allata’ala?"

²⁰ Mingka ikau sari’battang, tau biasajako bawang! Takkulleako barani appiali mae ri Allata’ala! Maka akkullei se’rea pammantangang bunga mae ri tau amparekai, angkana, "Apa saba’na nanupare’ kamma’ anne?"

²¹ Sai ero’-ero’na todong anjo taua antekamma tanja’na anjo pammantangang bungaya napareka? Battu ri sikangkang butta pi’ anjo taua akkullei napare’ ruang rupa anjo pammantangang bungaya: se’re baji’, namaraenganga tena nabaji’ dudu.

²² Kamma tomminjo ri apa Napareka Allata’ala. Eroki ampappicinikangi pangngalarroinNa siagang kakoasanNa. Mingka sa’baraki Allata’ala mae ri anjo tau siratanga nihukkung lanri napakalarro-larrona Allata’ala.

²³ Mingka ero’ tongi ampappicinikangi mae ri katte kate’neang masukkuka, ia Napassareanga mae ri katte tau Nakamaseanga. Kamma-kamma anne Napasadia maki’ untu’ antarimai anjo kate’neanga.

²⁴ Ikattemi le’baka Nakio’, tena nabattu ri bansa Yahudia bawang, mingka battu ri bansa-bansa maraenga pole.

²⁵ Nasaba’ Nakana Allata’ala lalang ri Kitta’ Na’bi Hosea, "Tau teai ummakKu, laniarengi ‘UmmakKu’. Bansa tenaya naKukamaseangi, laKuarengi ‘TunikamaseangKu’.

²⁶ Siagang kere-keremae tampa’ nikanaya ri taua, ‘Teaiko ummakKu,’ anjoremmi taua laniareng ana’-ana’Na Allata’ala attallasaka."

²⁷ Naterassimi nakana Na’bi Yesaya ri sesena bansa Israelka, "Manna pole nasangkamma kassika ri tamparanga jaina bansa Israelka, mingka sike’de’ji lasalama’;

²⁸ nasaba’ tasalloami naNapaturung pangngalarroinNa Batara mae ri bonena linoa."

²⁹ Nakana pole Na’bi Yesaya, "Ebara’ angkana tenamo sossorang Nabolikangki’ Allata’ala Kaminang Koasaya, mattantu le’ba’ ngaseng maki’ a’jari sangkamma taua ri Sodom siagang Gomora."

³⁰ Jari bodona kana kammaminne: Anjo bansa-bansa maraenga tena nausaha sollanna a’jari baji’ ammotere’ passisambunganna siagang Allata’ala. Mingka lanri tappa’na ke’nanga, Napa’jari baji’mi ammotere’ Allata’ala passisambunganNa siagang ke’nanga.

³¹ Mingka bansa Yahudia tuli nausahai anturuki hukkunga sollanna a’jari baji’ ammotere’ passisambunganna siagang Allata’ala. Mingka kale’bakkanna tena wassele’na.

³² Angngapa natena wassele’na ke’nanga? Nasaba’ tena nanagaukangi ke’nanga lanri tappa’na ri Allata’ala, passangalinna lanri usaha kalennaji ke’nanga. Jari iaminjo saba’na natu’guru’ tatto’ro ke’nanga ri "Batu Pattatto’roanga".

³³ Ri sesena anjo batua, nia’ tattulisi’ lalang ri Kittaka angkana, "U’rangi baji’-bajiki anne: Ri Sion nia’ batu le’ba’ Kuboli’, la’jari sabaka natatto’ro taua; iamintu se’re batu lompo, la’jari sabaka natu’guru’ taua. Mingka inai-nai tappa’ ri Ia tena nalala’ba’ pa’mai’na."

Roma

Video Roma 9

Ikuti Kami:

KONTAK | PARTISIPASI | DONASI