Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Terang a valing averi, afa ovi veka ufalak ini kena, ovu wol usiklabir, tevek Kristus Ni roak yaꞌa. Ubu Ni Roh a nfangrebat ovu nfalyawang naꞌa ralang ilaꞌa ne, afa ovi ufalak ini, kena.
2 Ralang a lalau urun i lahir, ovu ufarnuang lalawatan susa i dawan urun a naꞌa ralang a,
3 verin terang a valing tamata Yahudi ra, tevek wol rorang Kristus. Yaꞌa utorung ma Ubu near nfasoba yaꞌa, ovu nfaroa yaꞌa tali Kristus, boma nlobang ira ma rorang Kristus.
4 Ira tamata Israel ira. Ubu nfili roak ira, ma nala ira ma reluk yanan ra, ovu nfaturu lahir Ni ngrebat verin ira. Ia notu tnorung ra verin ira, ovu nala Musa ni inukun ra verin ira. Ubu nfaturu vali verin ira ne, wean inba ma raraning Ia ovu nala roak Ni tnorung ra verin ira.
5 Ira ini, uburir-nusirira verin Abraham, Ishak ovu Yakub. Naꞌut i Kristus neluk tamata, na Ia ubun-nusin vali ira. Kristus Ubu Ia, ovu Ni dawan nlia munuk afakataka, ba musti tfadawang Ia, nata ti wol ni wahan. Kena urun!
6 Yaꞌa wol ufalak ne, Ubu wol nfakena Ni tnorung a verin ira. Naꞌuk tali tamata Israel uburir-nusirira ra munuk, na boku wol Israel mngaꞌun ira.
7 Abraham ubun-nusin ra wean vali inyai. Tali Abraham ubun-nusin ra munuk, na boku Ubu wol nrekan ne, Abraham ubun-nusin ira. Ubu nfalak verin Abraham ne, “Ishak ubun-nusin ra watan veka reluk ubum-nusim wean Ning tnorung a, naꞌuk liak ra wahal.”
8 Inyai ihin a ne, kasikoꞌu ovi rarali ira tevek Ubu Ni tnorung a, na Ubu yanan ira. Ba wol mane munuk lahir kasikoꞌu ovi rtali Abraham ubun-nusin ra, Ubu yanan ira.
9 Ubu notu tnorung verin Abraham, ma nfalak ne, “Naꞌut amar i ufadoku roak ma veka ewal Yaꞌa, na Sara nrali roak ia, ma yanan a brana.”
10 Wean vali inyai naꞌut i Ribka nlewan yanan brana irua tali Ishak. Ita tamata Yahudi ra ubud-nusid vali Ishak.
11 Naꞌut i Ribka mane nrali kasikoꞌu dekut avyai, na Ubu nfalak verin ia ne, “Yanam iwarin a veka nfareta yanam iyaꞌan a.” Naꞌut i nangrihi wean inyai, na kasikoꞌu avyai wol rotu afa ovi sian te lolin obin. Ubu nfalyawang lan roak ne, Ia nfili roak kasikoꞌu i mane naflahar ia. Notu wean inyai, boma ita munuk tkaꞌa ne, wean i nfili tamata ra ma naflahar ira, na wol naflahar ira tevek afa ovi rotu ra. Ia nfili ira, tevek kaꞌi nfadoku wean inyai naꞌa ralan a.
12 (9:11)
13 Wean lahir i Ubu nfalak roak naꞌa Surat Ralan ne, “Yaꞌa ufili roak Yakub, naꞌuk wol ufili Esau.”
14 Ba wean inyai, na ita veka tfalak afaka? Naꞌut i Ubu nfili tamata, na Ia wol notu afa ovi rmalola ra? Afa yai wol kena lahir!
15 Mingnanang! Ubu nfalak roak verin Musa ne, “Wean i mane ulobang tamata isa, na veka ulobang lahir ia. Wean i mane ufaturu Ning rala lolin verin tamata isa, na veka ufaturu lahir Ning rala lolin a verin tamata yai.”
16 Ba Ubu wol nfili tamata ra tali rira ininan ra te tali afa ovi rotu ra, naꞌuk ntali watan Ni rala lolin a verin tamata ra.
17 Afa ovi Ubu nfalak verin raja Firaun rtulis roak naꞌa Surat Ralan ne, “Yaꞌa otu ma mnaꞌa raja, boma ufaturu Ning ngrebat a verin tamata ra munuk. Tali afa yai vali, na otu ma tamata ra munuk naꞌa lanit ivavan ini rkaꞌa narang a ma ralang Yaꞌa.”
18 Ba wean i Ubu inan ma nfaturu Ni silobang a verin tamata isa, na Ia veka nfaturu lahir Ni silobang verin tamata yai. Wean i Ubu inan ma notu ma tamata isa ralan nangrebat watan ma wol nafrenar, na Ia veka notu ma tamata yai ralan a nangrebat ma wol nafrenar.
19 Fiang ini, mia veka myorat yaꞌa ne, “Wean inyai, na notu afakinimi Ubu nfasala watan tamata ra obin, tevek rira salasilan ra? Tamata iki vali nangal nala afa ovi Ubu ralan a nfalak ma notu ra?”
20 Terang a valing averi, deka fyalak wean inyai! Iki mia ma fyikir ne, myangal nala Ubu? Mia tamata watan mia. Wol inovan ma suran i rotu tali bal, norat tamata i notu a ne, “Notu afakinimi motu yaꞌa wean ini?”
21 Velik aba, tamata i notu suran yai bisma notu afaka watan tali bal a, wean i ralan a nfalak. Tali bal yai watan, na ia bisma notu suran irua, ma isa verin afa ovi fyawan a, na isa vali ma baꞌi tpake watan lokat amar.
22 Wean vali inyai naꞌa afa ovi Ubu notu ra, inovan ma not-orang watan afa ovi ralan nfalak ma notu verin tamata ra. Velik aba, ntorung ma nfaturu Ni ngrova i nvua matmatan a verin tamata ovi rotu salasilan, ovu mane nfaturu Ni ngrebat a, tevek inovan ma nukun ira. Naꞌuk Ubu ntahang ralan obin, ma wol nukun lahir tamata ovi musti nukun ira tevek rotu ma nangrova urun.
23 Ia notu wean inyai verin ita, boma nfaturu ne, Ni dawan a nrahi lia munuk, ovu nfaturu vali ne, Ni silobang a verin ita. Ralan nfalak roak tali lalan ma nfili ita ma dida afa lolin yai naꞌa lanit ratan.
24 Ubu nera roak ita ma teluk Ni tamata ra. Ia wol mane nera watan tamata ovi rtali Yahudi ra, naꞌuk nera vali tamata ovi wol Yahudi ra.
25 Ubu nfalak vali roak verin nabi Hosea naꞌa kitab i ntulis ne, “Wean i ungrihi verin tamata ovi wol rnaꞌa Ning sidovung tamata inorang ra, na veka ufalak ne, ‘Ning tamata inorang verin mia.’ Wean i ungrihi verin tamata ovi wol ufaturu Ning silobang a verin ira, na veka ufalak ne, ‘Ulobang urun mia.’”
26 Rtulis vali vaivatul ini ne, “Lan a, Ubu nfalak verin tamata ra ne, ‘Yaꞌa wol Ning tamata inorang verin mia.’ Naꞌuk naꞌa amar isa, na veka nfalak verin ira ne, ‘Yaꞌa ini Ubu i ala vavaꞌat a, ovu yanak mia.’”
27 Nabi Yesaya vain dawan ma nfalak naꞌa tamata Israel ra ne, “Velik ne tamata Israel rivun ilaꞌa ira ma wean ngur naꞌa tahat nelan a, naꞌuk Ubu veka nsikat boku watan tali rira salasilan ra ma rira vavaꞌat kakiwal.
28 Tevek Duilaꞌa veka nfaleka lahir inukun i kena, ovu veka nukun nala munuk lanit ivavan ini.”
29 Nabi Yesaya nfalak vali roak ne, “Wean i Ubu i Ni ngrebat a nlia munuk afakataka, wol nfadoku ita tamata Yahudi boku ma totu duad-yanad, na ita tamwear roak wean kota Sodom ovu Gomora.”
30 Ba wean inyai, na ita veka tfalak afaka naꞌa vaivatul ovi beti ufamalik yai? Tamata ovi wol Yahudi ira wol rkiwal ma rdava roak ma rira vavaꞌat ra rmalola, naꞌuk boku tali ira rira roak vavaꞌat yai. Ubu notu ma rira vavaꞌat ra rmalola, tevek rorang Yesus Kristus.
31 Tamata Israel ra wol wearira inyai. Ira rkiwal ma rdava lalawatan inukun i bis notu ma rira vavaꞌat ra rmalola, naꞌuk wol rdav-nala vavaꞌat yai.
32 Notu afakinimi ira wol rdav-nala vavaꞌat yai? Ira wol rdav-nala, tevek wol rorang Ubu. Ira kaꞌi rdava watan ovu rira ngrebat ra ma rot-orang Musa ni inukun ra. Ba rasvotun naꞌa Vatu i baꞌi notu ma tamata ra rleka a.
33 Rtulis roak Vatu yai naꞌa Surat Ralan ne, “Ubu nfalak ma msyiꞌik ma lolin afa ini: ‘Naꞌa Sion, ufadoku roak Vatu isa. Vatu yai veka notu ma tamata rasvotun, ovu veka notu ma tamata ra rleka. Naꞌuk tamata ovi rorang Ia, na Ia veka not-nala afa ovi nfadoku roak naꞌa Ni tnorung a ma nala verin ira, ma ralarira ra wol lalau.’”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA