Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali ane tau to si’a to Yahudi pei mawali seja i Pue Allah puenya ane mangalulu Ia, ane ewa see, bara re’e dale to narata nto Yahudi to taa narata ntau to si’a to Yahudi etu? Pasi bara re’e batuanginya tau rasui?
2 Re’e kojo! Bae kojo dale to narata nto Yahudi pasi bae kojo batuanginya tau ane rasui. Dale to uyunya narata nto Yahudi etu, etu semo tuntu i mPue Allah to nasarumakaka i mPue kita.
3 Wali wimba ane re’e to Yahudi to taa mangaya tuntuNya etu? Ane ewa see, wimba, i Pue Allah bara tamo mangika to Ia room mamparajanjika?
4 Ia damangika kojo, apa nempo samparia tau mawuti, ane gombo i mPue Allah, gomboNya etu sangkani monso. Kita tansani gombo i mPue sangkani monso, apa re’e to ratulis ri raya ntuntuNya mangkonong Ia, to’onya, “Pue, tempo Komi magombo, samparia tau damangansani monso pu’u gomboMu etu. Pasi ane re’e tau mampakasala Komi, Komi damanganangi tau etu.” Etu semo gombo to room ratulis etu.
5 Wali manasa, nempo kita taa mangaya tuntu i mPue Allah pei Ia tiroo damangika ewa wimba Ia room manganto’o. Wali saba yako lengko ngkita to maja’a etu see naka tau to yusa mangansani matao kojo lengko i mPue Allah. Wali ane ewa see bara re’e tau bea to mampobuuka taa masipato i Pue Allah mangahuku tau to mangika lengko to maja’a ewa wetu, apa saba yako palaong nsira etu see naka tau to yusa mangabarong Ia. Ewa wetu pampobuuka ntau bea, wali wimba bara monso pu’u ewa pampobuukanya etu?
6 Gete taa! Apa ane taa masipato i Pue Allah mangahuku dosa ntau, wimba danaika mangabotus to lino ri tempo to darata?
7 Pei re’e tau to mampobuuka ewa si’i, sira mampobuuka, “Yako wuti to aku mangika, miyala i Pue Allah Ia taa mawuti, wali see naka tau mangabarong i Pue Allah apa Ia taa mawuti.” Wali yako etu tau mampobuuka wo’u, “Gete, ane ewa see maka pei i Pue Allah tiroo mangahuku aku ewa tau madosa?”
8 Wali ane rapanya monso pu’u ewa pampobuuka ntau etu, kita maya manganto’o, “To tao-tao kita mangika anu to maja’a see damawali anu to matao.” Pei kita taa maya manganto’o ewa wetu apa taa monso. Pasi aku tare mampotundeka tau ewa wetu, pei re’e tau to mawuti mampakasala aku, sira manganto’o, “Ewa see semo nato’o i mPaulus.” Wali tau to manganto’o gombo to etu, sira masipato darahuku.
9 Wali ewa si’i. Kita to Yahudi si’a kita to tao-tao pei tau to yusa. Apa ewa to aku roomo mampakanasaka kita ngena, kita samparia to Yahudi pasi tau to si’a to Yahudi, kita paka re’e ri ara ngkuasa nu dosa.
10 Ewa to re’e ratulis ri raya ntuntu i mPue, to’onya, “Tare pasi samba’a tau to tare dosanya.
11 Tare pasi samba’a tau to mangansani jaya anu to monso, pasi tare to mawongko rayanya resi i Pue Allah.
12 Samparia tau room mangandolika yau tangonya yako ri jaya i mPue Allah, wali ri pangkita i mPue Allah tare batuanginya katuwu nsira. Tare pasi samba’a tau to mangika anu to matao.
13 Gombo nsira makarika see naka waroko nsira raporapaka ewa dayo tiloka. Pasi nganga nsira sangkani manganto’o gombo to mangantipu sa’e. Gombo nsira mampoja’a sa’e ewa moso nu ule to mate tau natungku.
14 Gombo nsira sangkani mantanaa sa’e pasi mampoja’a sa’e.
15 Sira magasi ane rani mampopate sa’e.
16 Pasi bara imba nakayako nsira, tau to nakarata tamo re’e kasanang, omo sangkani kasusa.
17 Sira taa nansani jaya maroo masingkatao pei sa’e.
18 Pasi sira taa mampalaika pasi manga’angga i Pue Allah.”
19 Wali etu semo to ratulis ri raya ntuntu i mPue Allah to rato’oka porentaNya. Pasi kita tansani anu to ratulis etu ratulisika kita to Yahudi to ri ara mporenta etu. Naka pei re’e porenta etu see kita manasanta samparia tau paka madosa. Wali kamonsonya tare pasi samba’a tau to maya manganto’o, “Aku tare dosangku.” Samparia to lino paka damampongakung sira masipato danahuku i mPue Allah.
20 Wali tare pasi samba’a tau to danato’o i mPue Allah tare dosanya apa saba mangalulu porentaNya, apa tare tau to nakoto mangalulu samparia porenta etu. Naka pei kita rawaika porenta etu see mampakanasaka resi kita mangkonong dosanta.
21 Pei si’i-si’i i Pue Allah room mampaponsanika to lino jaya to nikaNya see kita maya rato’o tare dosanta. Jaya etu si’a kita mangalulu porenta. Jaya etu semo jaya to rato’o yami ri raya buku-buku mporenta i Musa pasi ri raya buku-buku nto pantuntu tuntu i mPue Allah tempo owi.
22 Wali jaya etu semo samparia tau to mangaya i Yesu Kerisitu, tau etu danato’o i mPue tare dosanya. Ia taa mampasisala tau.
23 Apa samparia tau paka madosa pasi taa kojo masipato mangarata tilanya yako kayawa i mPue Allah.
24 Pei yako ri kanoto i mPue Allah Ia buya rayaNya manganto’o kita tare dosanta. Ia mangika ewa see apa saba i Kerisitu Yesu re’e mangalapa kita yako ri kuasa nu dosa.
25 I Pue Allah semo to mampampueka i Yesu, wali i Yesu mate yau mawali pampue to mampakasanang i Pue Allah. Wali tempo i Yesu mate yau mangkapateka kita etu, tempo etu masuwu raaNya. Wali saba yako raaNya etu see naka kita tamo danakitanaka i mPue Allah dosanta ane kita mansarumaka raa i Yesu etu. Wali yako ri palaong to etu i Pue Allah mampaponsanika kita Ia sangkani mangika anu to masipato raika, etu semo Ia sangkani mangahuku dosa ntau. Naka pei Ia mampaponsanika kita ewa wetu apa rataka tempo etu Ia tawa mangahuku dosa ntau to tempo owi apa Ia bae sabaraNya.
26 Pei dosa nto lino taa maya taa rahuku, wali see naka i Pue Allah mangahuku i Yesu mangabolos to lino. Wali yako ri palaong etu Ia mampaponsanika kita ri tempo si’i Ia sangkani mangika anu to masipato raika. Wali i Pue Allah tare dosaNya, pasi i sema tau to mangaya i Yesu, tau etu nato’o seja i mPue Allah tare dosanya.
27 Wali kita taa maya mangabarong koronta ngkalio, apa si’a yako palaong ngkita mangalulu porenta i mPue Allah naka pei Ia manganto’o kita tare dosanta. Ojo yako pangaya ngkita semo naka pei Ia manganto’o kita tare dosanta.
28 Wali ewa si’i pampobuuka mami, tau naka pei nato’o i mPue Allah tare dosanya apa saba pangayanya, si’a saba ia mangalulu porenta i mPue Allah ewa to nika nto Yahudi.
29 Apa i Pue Allah si’a ojo Pue ntau to Yahudi. Ia seja Pue ntau to si’a to Yahudi.
30 Apa ojo samba’aja i Pue Allah. Ia semo to manganto’o to Yahudi tare dosanya apa saba yako pangaya nsira, pasi Ia seja manganto’o tau to si’a to Yahudi tare dosanya apa saba yako pangaya nsira.
31 Wali ane kita rapalaes saba yako pangayanta etu, wimba, kita bara mamposaka yau porenta i mPue Allah? Taa kojo. Apa saba yako pangaya ngkita etu, see naka kita manga’angga porenta etu.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA