Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Na si manõ, hadia hare tobali niha Yahudi? Ba hadia guna wolo'õ amakhoita wamoto?
2 Tatu manõ oya gunania! Si fõfõna, bõrõ me ba niha Yahudi Ifaduhusi tõdõ daroma li-Nia Lowalangi.
3 Ba hewisa na so õsa niha Yahudi salio farõi? Hadia farõi gõi Lowalangi bõrõ da'õ?
4 Tatu lõ'õ! Bõrõ me satulõ manõ Lowalangi, hew̃a'ae falimo dozi niha. No tesura bakha ba Mbuku Ni'amoni'õ, "Ena'õ satulõ ndra'ugõ ba wehedeu, ba si mõna ndra'ugõ ba ginõtõ wanguhuku."
5 Ba na itugu oroma wa'atulõ Lowalangi, bõrõ me talau zi lõ atulõ, hadia niw̃a'õda? Hadia tamane lõ atulõ Lowalangi bõrõ me ihuku ita? (Fanofu da'e ba no sinangea na molo'õ fa'aniha.)
6 Ma'ifu lõ'õ! Bõrõ na lõ atulõ Lowalangi, hewisa wa Ihuku dania gulidanõ andre?
7 Ba hiza na bõrõ gamuata si lõ atulõ, itugu oroma wa'atulõ Lowalangi, irege tefolakhõmi Ia, ba hana nasa wa labe'e mosala niha, si mane niha si so horõ?
8 Ba hana wa tebai tamane, "Lau, da tafazõkhi zi lõ sõkhi ena'õ alua zi sõkhi?" Sindruhu so niha sango'aya ya'o me lamane no uw̃a'õ zi manõ. Niha si mane da'õ, ba no sinangea Ihuku Lowalangi.
9 Hadia tohude wa'asõkhi wetaroda ya'ita niha Yahudi moroi ba niha soi bõ'õ? Ma'ifu lõ'õ! No uw̃a'õ wa he niha Yahudi ma zui niha soi bõ'õ, no nifatõrõ horõ fefu ira.
10 Si mane nisura bakha ba Mbuku Ni'amoni'õ, "Samõsa lõ satulõ,
11 samõsa lõ saboto ba dõdõ ba samõsa lõ sanõmba Lowalangi.
12 No la'arõu'õ ira niha khõ Lowalangi, no elungu fefu. Samõsa lõ solau satulõ; samõsa lõ'õ!
13 Hulõ lewatõ si no teboka dõlõtõlõra. Mangele walimosa moroi ba lelara, ba alua wamõbõgõ ba mbewera, hulõ zõfu gulõ.
14 Afõnu mbawara fangelifi ba fangotu'õ.
15 Alio mbekara ba wamunu niha.
16 Gofu heza misa, lafazaewe wa'atekiko ba fa'atosasa.
17 No balunõ ira ba wangila lala fa'ohahau dõdõ,
18 ba ma'ifu lõ fangata'ufira Lowalangi."
19 Aboto ba dõdõda iada'e wa fefu nisura ba huku agama Yahudi, tebe'e ba niha si so barõ wamatõrõ huku andrõ. Bõrõ da'õ samõsa lõ si tola mangeheta ba hulunia, ba Ihuku zi sagõrõ ulidanõ fefu Lowalangi.
20 Samõsa lõ nibe'e Lowalangi aefa moroi ba zalania bõrõ me no ilau niha andrõ zi so bakha ba huku agama Yahudi. Ba zi tambai da'õ huku andrõ ha ba wangoroma wa si so horõ niha.
21 Iada'e no I'oroma'õ lala Lowalangi hewisa ena'õ tola sõkhi mangawuli niha khõ Lowalangi; ba lala andrõ ma'ifu lõ amakhaitania ba huku agama Yahudi. No la'ombakha'õ da'õ bukubuku Moze ba bukubuku ndra sama'ele'õ,
22 wa Itehegõ Lowalangi ena'õ ifuli sõkhi niha andrõ khõ Lowalangi, ha na mamati niha khõ Yesu Keriso. Ilau da'õ Lowalangi ba niha fefu samati khõ Keriso; bõrõ me lõ amaehutara:
23 Fefu niha no si so horõ ba no arõu moroi khõ Lowalangi sedõna mangorifi ya'ira.
24 Tobali, ha bõrõ wa'ahakhõ dõdõ Lowalangi manõ nibe'e-Nia lõ bõli, wa ifuli sõkhi mangawuli gamakhaita niha khõ Lowalangi; ya'ia wa I'efa'õ niha Yesu Keriso.
25 Lowalangi zolulu Yesu Keriso andrõ tobali hõli ena'õ ba wa'amate-Nia te'efa'õ niha moroi ba zala na mamati ira khõ-Nia. Ilau da'õ Lowalangi ba wangoroma fa'atulõ-Nia. Bõrõ me no Ibologõ dõdõ-Nia Lowalangi ba zi no numalõ ba horõ niha, irege lõ nihuku-Nia ya'ira.
26 Ba iada'e Ihalõ halõw̃õ-Nia ba horõ andrõ ba wangoroma fa'atulõ-Nia. Ba zi manõ I'oroma'õ wa satulõ Ia; ba dozi niha samati khõ Yesu, tobali niha si no mu'atulõ'õ khõ Lowalangi.
27 Bõrõ da'õ lõ danedaneda sa'ae wanunonuno ya'ita. Hana wa si manõ? Hadia, bõrõ me no ta'o'õ zi so ba huku agama Yahudi? Tenga! Ha bõrõ me mamati ita.
28 Rahurahunia: Te'atulõ'õ niha ba khõ Lowalangi. Isõndra wangefa andrõ, tenga bõrõ me i'o'õ hadia zi so ba huku agama Yahudi, ha bõrõ me mamati ia khõ Yesu Keriso.
29 Ma zui ha Lowalangi niha Yahudi Lowalangi andrõ? Hadia, tenga Lowalangi soi bõ'õ gõi? Duhu, Lowalangi soi bõ'õ gõi!
30 Bõrõ me ha samõsa Lowalangi. Ya'ia zanguma'õ wa te'efa'õ niha Yahudi moroi ba zala bõrõ me mamati ira. Ba Ya'ia gõi zanguma'õ te'efa'õ niha soi bõ'õ moroi ba zalara bõrõ gõi me mamati ira.
31 Hadia, da'e geluaha wa bõrõ wamatida khõ Keriso, taheta huku agama Yahudi? Ma'ifu tenga! Ma na'i bõrõ wamatida andrõ, tafosumange huku andrõ.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA