Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Doba ligbum dau yen, kaba, yen yesbes an dan, yendagai: Sug Allah emeigdoumesa mamang Yahudi maman mamoho emedreg dau leng lugmahara len meroho dag ginero, kaba, maman mara mera ara edreg dau len sug maman madag Allah enin men meijouhuda mamang Yahudi gina? Dara sug maman mac mamus dau naugb mauma debin gin, kaba, gin toua emeigouhw dagiro?
2 Naro, Allah eigdoumesa mamang Yahudi maman mamoho edreg dau lugmahara se aremer einyanohob. Anai aimougtut, kaba, en eic enin men gomnomna ogdoc Musa dou mamanin dous eng naugb sug maman maimo augwan gini dara maman mamdoc hom namcir.
3 Doba ligbum dau yen, kaba, yen yauni dou dan, yendagai: Leinyana dau leng Yahudi, kaba, len lemaimo Allah men gomnomna areg en ogugwo dou lenohob dara len merdoc hom deitero. Doba len larges dau namcirohob. Areg yen yen gini, kaba, misen namcir. Doba dagiro naugb sug leinyana len lemaimo areg Allah ogugwo dou maman gini dara merdoc mes deitero? Yen youdesa dau sug len leicara danggohob, kaba, eic dag Allah en emaimo areg en os dou mamanohob dara en medoc hom toua deiteroei? Doba en arges dau gin toua namcirohobei?
4 Naro, en emarges dau ginero. Doba areg en os dou lusud dag ginohob, kaba, en aimo augwan gini dara en medoc hom an len terimda. Anai lusud, kaba, len laugwan lereiyara mougwa einyana namcirohob. Doba naugb Allah, kaba, maman macinaga dag en emereiyara mougwa hom touwero. Doba en aimo areg se geica an maman terimda dous. Augwan gini esogwa deisa areg Daud en erba Ugwaremer an deb se Surad Injil Meb Mohon deb sug nosa touohob, endagai: Astesda sug ban benara dou lusud, kaba, len leiya, doba ban benara augwan se geica dou lenohob. Dangga hang, astesda sug len loho las ban an aban geicara doum, kaba, len lemogod gogom ingma deinaugb ban touwero. Doba len larges dau terimda, anai len leiya dag ban baimo areg edag beim dara obosboro an len namcirohob.
5 Doba sug maman geicara gecgu ens ainyes dou lusud dag Allah aimo augwan edag beim an maman dag ginohob, kaba, maman man ara eisaugb gina? Dag Allah ebesesar sug en ogod gogom deinaugb maman an maman geicara gecgu gin touohobei? Naro, maman mamenara dangga touwero. Anai sug Allah emaimo areg edag beim dara obosboro an lusudero, doba en edreg touohob, kaba, dagiro, naugwe hang, en emogod aremer aga mamana? Naro, en emeicara emaimo dag gin an maman touwero. Doba en esedeb naugb sug en ogod aremer aga mamanohob. Hang gini ens ainyes dou maman dag en emebesesar mougwa hom touebma. Doba en aimo augwan edag beim an maman namcir. Doba areg dan denara dou yen gin, kaba, aimo dau lusud se cinogo gini meren gauwamara dous.
6 (3:5)
7 Doba ligbum dau yen, kaba, yen yesbes an dan deit, yendagai: Sug maman geicara dag amcirac gini ens ainyes dou lusud dag Allah aimo areg en os gini se geica namcirohob, kaba, dagiro, naugwe hang, en owun maman mamoho dag maman mabesesarohoba? Anai maman geicara gecgu gin, kaba, eic dag lusud leigdoumesa en moho an men geicara geigouhw gin touohob.
8 Doba sug areg graga augwan dag misen namcirohob, kaba, eigouhw naugb maman masulou lusud dag len laimo areg gecgu terimda. Dauntoba meren geicara gin, kaba, era mera areg geigouhw dag lusud leigdoumesa Allah en moho an gin toua terimda. Dara ligbum, kaba, len lowun dan indoho dag dan desulou lusud dag gin touohob. Hang emedeinyum naugb Allah emogod gogom deinaugb len toues. Anai meren geicara dag gini, kaba, edeinyum naugb ginohob.
9 Dangga areg dan den dou yen graga, kaba, men meijouhw dagiro? Dag emeng Yahudi, kaba, emen emoho eb taiba deseino Allah edreg dau yeng yugmaharahobei? Naro, dan demenara dangga dou yenero. Anai dan dens dou yenohob dag emeng Yahudi dara yeng yugmahara maman maugwan madag sogougb dou sesarohob.
10 Augwan gini esogwa deisa areg lusud len log deb se Surad Injil Meb Mohon deb sug nosa touohob, lendagai: Sud hom ingma, kaba, en emaimo areg asesa Allah enin medoc mes.
11 Hang en emecinaga en mer gini men meijouhw dara en medoc emerleij aud en touwero.
12 Doba len laugwan lohw meridgo dou enohob. Hang sud hom ingma dau len, kaba, en emaimo areg geigouhw an lusud touwero. Doba len laugwan lobsara dau ucina misen, hanoba len laimo areg ogor anim toua terimda.
13 Len merir toua, aninim dag aremogougb moda gedig lusud lemerba cinogo mor debinbuma. Dangga hang, len lemenara misen touwero, doba len lerba mohoisa. Dara meren genara augwan, kaba, eic gomom dou lusud toua, aninim dag hinogo sug au lusud, kaba, len lomom an toua namcir.
14 Dara len merdoc obgos an lusud naugb len louwaran len toua terimda.
15 Dara len merohora eijouhw naugb sug len leic mog erij dou lusud, dara len les len, dara lohud len toua. Hang len lemaimo ucina gesgigouhwesa an lusud touwero.
16 Doba astesda cinogo sug len leihweda, kaba, len logod lusud merur mor namcir. Dara len leic gogom dou len toua terimda.
17 (3:16)
18 Anai len lemahau dau Allah an meren geicara ginero, doba len leic merus naugb len laimo gin toua namcir.
19 Doba areg leng nosa len logod deb se Surad Injil Meb Mohon ginohob, kaba, len log dou emeng Yahudi gedig Musa men gomnomna oiharaga emenohob. Dauntoba sud hom ingma dau emen, kaba, en emaunun dougwo men geicara deseino Allah toua deitero. Doba en owun emen an yugmahara maman maugwan mamoho dag maman maugwan mabesesarohob.
20 Dangga hang, Allah emeic gesgigouhwesa dou sud hom ingma ogdoc sug en aimo Musa men gomnomna gin touwero. Doba men gomnomna gini ens dou maman dag maman mabesesar namcirohob.
21 Doba iteitogini, kaba, Allah ens ucina dou mamanohob naugb sug en eic gesgigouhwesa dou lusud ucugb deit. Dara men ucina gin, kaba, emogdoc Musa men gomnomna gin touwero.
22 Doba en eic gesgigouhwesa dou len ogdoc sug len merdoc ebdebin an Yesus Krisdus gin dous. Dara en emesi emeng Yahudi aiyei touwero. Doba gareg dau emeng Yahudi dara yeng yugmahara en medoc ebdebin an Krisdus dag en omom naugb men sesarohob, kaba, en emomom deitero. Doba Allah eic gesgigouhwesa dou en ucugb deit.
23 Anai maman maugwan mabesesarohob. Hang sud hom ingma en emedebeij Allah men gogouf cucugb touwero. Doba maman maugwan madebeij taij dous. Augwan gin, kaba, aimo dau areg Musa dara leng lesai Allah moro sug nosa len log deb se meren surad deb sug nosa touohob.
24 Dara sug Allah eic gesgigouhwesa dou maman, kaba, en emacgeij aremougb dau maman touwero. Doba ogdoc en medoc an maman gin dous, hang en emeic gesgigouhwesa dag mogud dou maman ogdoc Krisdus men geicara gin toua namcir. Anai Krisdus enin eng esga maman dau sesar men gogom augwanohob.
25 Dangga hang, gareg en medoc ebdebin an Krisdus ginohob, kaba, sesar men gogom emeb naugb en toua deitero. Doba Allah aigdougwo men sesar augwan dau en namcirohob. Anai en ens Krisdus ainyes deseino maman dag enin dous eng omom taiba sogo salib naugb maman sesarohob. Dauntoba maman sesar emeb naugb maman toua deitero. Doba Allah oguc dougwo maman sesar augwan bediyebeiya dau maman ogdoc Krisdus an mogwihi gin toua. Allah esa en naugb en omom taiba sogo salib dag gini, dauntoba maman macinaga dag Allah emaimo sesar hom touwero. Doba dag se men geicara augwan, kaba, en aimo areg edag beim dara obosboro an gin dous. Anai sug nosa, kaba, Allah emecic dau lusud meren sesarero, doba en amsoho len an meren sesar gin dous. Hanoba en emeic gogom dou len touwero. Doba en eigtou ateteij len an namcir.
26 Doba iteitogin, kaba, en emamsoho lusud an meren sesar gin deitero. Hanoba en emeigtou emateteij an meren geicara gecgu gin touwero. Doba en ehilon ucina naugb sug en aigdougwo lusud meren sesar dau len toua. Dangga hang, gareg en medoc ebdebin an Krisdus dag en omom taiba sogo salib naugb men sesar ginohob, kaba, en emomom deitero. Doba Allah eic gesgigouhwesa dou en ucugb deit. En eicara dag gin, dauntoba en ens enin ainyes dou maman dag en emaimo sesar hom touwero. Doba en aimo areg edag beim dara obosboro an augwan dous.
27 Sug Allah eicara dag ginohob, kaba, maman maigdoumesa mamanin mamoho an ara deseino en deita? Naro, maman marges dau namcir. Dara dagiro, naugwe hang, maman maicara dag gina? Maman maicara dag gini, anai Allah emeic gesgigouhwesa dou maman emogdoc sug maman maimo Musa men gomnomna ginero. Doba ogdoc sug maman mamdoc ebdebin an Krisdus en dous.
28 Dangga areg maman macic ginohob, kaba, men meijouhw dag gini: Allah emeic gesgigouhwesa dou lusud dau sug len laimo Musa men gomnomna ginero. Doba en eic gesgigouhwesa dou len ogdoc sug len merdoc ebdebin an Krisdus hom dous.
29 Dara en eicara dangga dou yeng lugmahara yen toua. Anai eni edag Allah naugb emeng Yahudi emen dousei? Naro, eni Allah naugb emeng Yahudi emen dousero, doba eni Allah naugb yeng yugmahara yen touohob.
30 Dangga sug eni maman maugwan maman Allah hom dag ginohob, kaba, en eic gesgigouhwesa dou emeng Yahudi ogdoc sug emen emdoc ebdebin an Krisdus. Dara en eic gesgigouhwesa dou yeng yugmahara ogdoc sug yen meigdoc ebdebin an en toua.
31 Doba sug Allah eic gesgigouhwesa dou maman ogdoc dau sug maman mamdoc ebdebin an Krisdus gin dous, kaba, gini men meijouhw dag emen emerba Musa men gomnomna dau emen touohobei? Dangga, isnaro. Doba sug emen emdoc ebdebin an Krisdus dag gin, kaba, emen emauma debin men gomnomna dag augwan gini dag misen namcirohob.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA