Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ngaceku ineh, inanké lun Yahudi meluun samal rat nelun pupu baken? Idi inanké ulek sunat ineh?
2 Kali' rungen! Pun-pun ngaceku Allah pangeh nemaré balaNeh nelun Yahudi.
3 Mekudeh ieh kudeng sebuang lemulun na manu? Miakké ineh ngisu' niat Allah luk lutep maya' jani'Neh?
4 Na tu-tu! Ngaceku Allah ineh matu, sagan pana' amung-amung lemulun mebalih, maya' kudeng luk inayud ini: "Nima' balaMu uen ngegala' matu, kareb Iko pebala, idi Iko miak metueh, kareb Iko uen lemulun ngesala'."
5 Iamo' kudeng sala' tau ngelio luk matu ratnan Allah, anunké luk miak belén tau? Naké Allah ineh matu kareb Ieh ngacing usehNeh kuan tau? (Ui pebala maya' bala lemulun.)
6 Na tu-tu! Kudeng Allah na matu, kudeng apehké Ieh ngukum tana' ini?
7 Iamo' kudeng luk matu ratnan Allah rinayeh ngaceku balihku, ngudehké ui inukum mepad kudeng lun mesala'?
8 Ngudehké tau na pebala, "Aganeh tau nganau' luk dat pad do'neh miak uen ngegala'"? Setuneh inan lemulun luk ngesala' idi ngadu' negku, kebaladeh ui pangeh pebala kudeng ineh. Petulu lemulun ineh kumin Allah.
9 Kudeng apehké? Inanké tau lun Yahudi nganau' luk meluun do'? Na tu-tu! Ui pangeh nengegala' ratnan lun Yahudi idi lun pupu baken teh pa liang ukum sala',
10 maya' kudeng luk inayud ini: "Idi na luk idi seburur pana' luk matu,
11 na luk idi lemulun luk kali' ilungneh, idi luk nakap Allah.
12 Amung lemulun pangeh neteketed ratnan Allah; amungdeh pangeh neraruh; na luk idi lemulun luk nganau' luk do', seburur pana' nateh!"
13 Telanandeh ineh mepad kudeng tanem luk mukab; idi dengan dila'deh ideh naluk, idi galih rat bang tang seruang inan luun bibirdeh;
14 tangdeh mepanu' ku kediman luk mepét.
15 Ideh mesaget ngeruat dara' lemulun;
16 ideh ngacing usag idi dereh iapeh-iapeh luk ulekdeh.
17 Idi dalan awang na initideh,
18 idi nateh ideh mileh matot inan Allah."
19 Nekini tau kali' amung-amung luk bila bang Ukum, ieh ineh luk bila kuan lemulun luk pa liang Ukum ineh, pad anid-anid tang lemulun miak semiep idi amung uang tana' ini mebpeh pa liang ukum Allah.
20 Ngaceku seburur pana' nateh luk ruen matu pa kiung Allah ratnan nganau' Ukum ineh. Iamo' ratnan Ukum Musa lemulun miak kali' ratnan sala'.
21 Iamo' nekini luk matu ratnan Allah pangeh linio baken ratnan ukum. Iamo' ineh pangeh bida' bang surat Ukum Musa idi surat nabi-nabi.
22 Lemulun ruen Allah matu ngaceku manu inan Yésus Keristus, ieh ineh amung lemulun luk manu, ngaceku na Ieh mili' ayu lemulun:
23 amung-amung lemulun pangeh nenganau' sala', pad ideh mado ratnan Allah luk miak ngulun nedeh.
24 Amungdeh ruen matu ratnan katu Allah luk barén mo'-mo' ngaceku ratnan uli' luk bang Keristus Yésus.
25 Allah nemaré AnakNeh mangun ku aceh dalan pedo', ngaceku manu inan dara'Neh, pad ngegala' luk matu ratnan Allah, ngaceku dengan ulai niatNeh Ieh nemaré do' ratnan sala' luk inau' lemulun atun.
26 Ieh pian ngegala' siriNeh bang kareb ini teh, pad ngegala' ratnan Ieh sebuleng luk matu, idi Ieh nganau' lemulun luk manu inan Yésus matu.
27 Ngaceku ineh, anunké ulekneh ngedita' burur tau? Na ulekneh! Mekudeh na miak? Ngaceku tau maya' Ukum Musaké? Baken, iamo' ngaceku tau manu.
28 Ngaceku ineh tau kali' idi lemulun ruen matu ratnan manu, baken ratnan nganau' Ukum Musa.
29 Inanké Allah ineh Tuhan lun Yahudi mo'? Bakenké Ieh ineh Tuhan lun pupu baken teh? Kali' rungen!
30 Allah ineh Sebuleng mo', idi Ieh luk nganau' nelun Yahudi matu ratnan anudeh, idi lun pupu baken pana' ruen matu ngaceku anu.
31 Ngaceku ineh, ratnan anu ineh tau nala' Ukum Musaké? Na tu-tu, iamo' tau ngepicet Ukum ineh.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA