Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Adi bage i bas kai nge lebihen kalak Jahudi e asaken bangsa si deban? Ntah lit kin nge gunana isunatken e?
2 Tentu mbue i bas kai pe! Perlebe: sabap man kalak Jahudi me perlebe iendesken Dibata perkatan-PerkatanNa.
3 Dage adi lit piga-piga kalak Jahudi la setia man Dibata, iakapndu kin maka erdandanken si e Dibata lanai setia man PadanNa?
4 Tentu lang! Tapi bagenda kap. Dibata e tetap nge i bas ketuhu-tuhun aminna gia kerina manusia perbual. Bagi lit tersurat i bas Pustaka Si Badia, "I japa pe Kam ngerana, Kam tetap nge ibenarken. Katawari pe menang nge Kam, adi iaduken kalak Kam."
5 Tapi kuga, adi arah kesalahenta e reh ulina teridah kebujuren Dibata? Kuga ninta? Salah kin perbahanen Dibata e adi iukumna kita? (Aku ngerana i jenda bagi biasana manusia ngerana.)
6 Tentu lang! Sabap adi la kin adil Dibata e, labo banci iadilina doni enda.
7 Umpamakenlah lit kalak si atena ersoal, nina, "Adi arah kejahatenku emaka ertangkasna teridah keadilen Dibata seh maka la ipermuliaken, ma patut min aku lanai iukum Dibata bagi kalak perdosa?
8 Dage ngkai maka la sibahan si jahat, gelah arah kejahaten e reh si mehuli?" Si tuhuna lit nge kalak si encekuraki aku alu ngataken maka si enda me kuajarken. Kalak enda la banci la iukum bagi patutna.
9 Dage, ulin kin kita kalak Jahudi asangken si labo kalak Jahudi? Sitik pe lang! Ndai nggo kupetangkas i das maka subuk kalak Jahudi bage pe bangsa si deban kerina i teruh kuasa dosa.
10 Bagi lit tersurat i bas piga-piga kitap i bas Pustaka Si Badia, "La lit ise pe bujur i lebe-lebe Dibata,
11 la lit ise pe si pentar, la lit ise pe ndarami Dibata.
12 Kerina manusia nggo nilah i bas Dibata nari; kerina ia nggo macik; la lit ise pe erbahan si mehuli, sada pe lang.
13 Kalah-kalahna desken lubang kubur si talang nipu ia alu dilahna, janah i bas biberna nari ndarat kata-kata desken bisa nipe si erbahanca kalak mate.
14 Babahna dem alu sumpah pagit.
15 Nahena pedas ngayak-ngayak dingen munuh kalak.
16 Gedang-gedang dalan si ibentasina, ibahana kecedan dingen kesusahen.
17 La pernah idalanina dalan perdamen.
18 Bage pe la diatena erkemalangen man Dibata."
19 Sieteh maka kerina si ikataken Undang-undang e, itujuken man kalak si nggeluh i teruh Undang-undang, gelah ulanai lit kalak si erdalih janah gelah doni enda lanai lit ampang-ampangna nandangi ukumen Dibata.
20 Sabap labo ise pe banci rembak ras Dibata adi arah ndalanken Undang-undang. Undang-undang e gunana eme gelah ierti manusia ia erdosa.
21 Tapi genduari cara Dibata ngerembakken manusia kempak DiriNa nggo ipetangkas, janah si e la lit sangkut pautna ras Undang-undang. (Si tuhuna Undang-undang Musa ras kitap nabi-nabi mereken kesaksin maka si e tuhu kap.)
22 Dibata ngerembakken manusia kempak DiriNa erdandanken kiniteken manusia e man Jesus Kristus. Kerina kalak si tek man Kristus iperembak Dibata ras DiriNa sabap bali nge kerina manusia enda.
23 Kerina manusia nggo erdosa janah nggo ndauh sirang ras sura-sura Dibata si mejile.
24 Tapi arah pemere Dibata erpalasken lias AteNa, kerina manusia irembakken Dibata kempak DiriNa, arah pertebusen si ibahan Kristus Jesus.
25 Dibata nggo netapken Ia jadi sada persembahen gelah arah Ia engkorbanken DiriNa seh mate, kerina dosa-dosa manusia isasapken dingen pernembeh ate Dibata ipepalem, adi tek ia man Jesus Kristus. Arah si enda icidahken Dibata maka Ia bujur kap. Nai nari isinikken Dibata saja kerna dosa-dosa manusia,
26 janah la Ia megelut. Tapi i bas paksa si genduari nggo iukum Dibata dosa-dosa manusia i bas diri Jesus Kristus. Arah si e IcidahkenNa maka Ia adil, janah radu ras si e IrembakkenNa kempak DiriNa kerina kalak si tek man Jesus.
27 Dage labo lit si man megahenken manusia. Ngkai makana bage? Sabap manusia ikelini Dibata labo erdandanken ndalanken Undang-undang, tapi erdandanken tek ia man Jesus Kristus.
28 Dage, manusia banci rembak ras Dibata labo erdandanken manusia e ndalanken kai si ituntut Undang-undang, tapi erdandanken tek man Jesus Kristus ngenca.
29 Ntah kin Dibata e Dibata kalak Jahudi saja ngenca? Ma kin Ia pe Dibata bangsa si deban nge? Tentu.
30 Sabap Dibata e sada ngenca. Dibata ngerembakken kalak Jahudi si ersunat e kempak DiriNa erdandanken ia tek man Jesus Kristus; bage pe IrembakkenNa kalak si deban si la ersunat kempak DiriNa erdandanken kalak enda pe tek man Jesus Kristus.
31 Adi tek kita man Jesus Kristus, sicedaken kin Undang-undang e? Kutera pe lang! Tapi arah si e sitamaken Undang-undang e i babo palas si lebih enteguh.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA