1 Aka natua, yo onu ing ka'untungannya mobalií intau in Yahudi? Bo onu im baragunanya dumudui kon atorang in sunat?
2 Mobayongbií totok im baragunanya! Muna-munamai, lantaranbií kon intaubi in Yahudi na'a im pinopo'pirisayaan i Allah in singog-Nya mita.
3 Ta'e naonda degaí aka tongobotak intau in Yahudi diaí mosatia? Degaí lantarandon tua, sahingga ki Allah diaídon mosatia?
4 Tantuí diaíbií natua! Sin notarang bidon kong ki Allah in tantuíbií mobanar, umpakahbií bayongan intau monguboḷ. Kom bonu im Buk mosuci aim pinais nana'a, "Ikow musti monyata kon totu'u kon onu inta siningogmu, bo ikow mo'untung ko wakutu ikow hakimon."
5 Ta'e aka koaídilan i Allah mobaliídon totok monyata, lantaran kita nogaid kon inta diaí totu'u, yo onu in singogon naton? Degaí diaí moaídil aka ki Allah mohukum ko'i naton? (ḷoliboí tana'a im mopiabií saḷaku intau.)
6 Ta'e totu'ubií kon diaíbií mota'au im mosingog natua! Sin aka ki Allah bo diaí moaídil, yo naondabií im pohohakim-Nya kon dunia na'a?
7 Ta'e aka lantaran oaíid inta diaí mo'itutui tua, onu inta mobanar soaáḷ ki Allah modugangdon mo'iḷontuí sahingga in Sia dayowon, yo nongonu sin intau inta nogaid kom mora'at tua tantuípabií potaḷa'an saḷaku intau binaradosa?
8 Bo nongonu sing kita in diaí doman mota'au moguman, "Koligai, kita mogaid kon inta mora'at simbaí momukaídon in inta mopia?" Totu'ubií kon oyuíonbií in intau mohojat ko'inakoí bo moguman kon aku'oi ain nosingog kon natua. Intau mita natua im patusbií hukumon i Allah.
9 Daí aka natua, yo degaí kita na'a no'iliu kon intau mita inta de'eman Yahudi tua? Diaíbií ing kita no'iliu! Aindon pinogumanku muna, kon intau in Yahudi andeka bangusa ibanea, komintan bidon kinawasa'an in dosa.
10 Naí inta pinais kom bonu im Buk Mosuci nana'a, "Diaíbií tobatuímai intau inta mobanar,
11 diaíbií tobatuímai intau inta nomangarti bo diaíbií doman tobatuímai intau nosumbah ko'i Allah.
12 Bayongan intau iyumayukdon ko'i Allah; komintandon nogaid kon no'itaḷaí. Diaídon tobatuímai intau nogaid kon inta mobanar, tobatuímai yo diaíbií!
13 Sigogow monia naonda bo kuburan inta no'ibukat makow. Dilaí monia pinakeí monia mosingog kon uboḷ, bo kulit im bibig monia totok im mobisa, naonda bo bisa in uḷag.
14 Bibig monia nopuling in singog inta pogodi-godi bo pohojat.
15 ḷangkad monia molikat aka mayak moposikisa bo molimod kon intau.
16 Korimumudan bo kasusahan pogambor magií-makow monia.
17 Diaíbií kota'auan monia im mobiag motompia,
18 bo mosia dia'bií motogu'ondok ko'i Allah."
19 Tana'a, kinota'auandon naton kom bayongan inta pinais kom bonu in hukum agama Yahudi, pinomakusudbií kon intau mita inta nobiag dinumudui kon hukum tatua. Tuamai diaíbií tobatuímai intau mota'au mobogoi in alasan onu, bo bayongan intau kon dunia na'a mota'aubií tuntuton i Allah.
20 Sin diaíbií tobatuímai mota'au mopopia'an i Allah sin lantaran mosia ain nogai kon soaáḷ mita inta kom bonu in hukum agama Yahudi. Ta'e hukum tatua tongaíbií moponyata kon intau tua im binaradosabií komintan.
21 Ki Allah ain nobogoi in daḷan kon naí onda intau moyopia bui takin-Nya, bo cara tatua diaíbií in hubungannya takin hukum agama Yahudi. Tongaí buk mita i Musa bo buk in nabi mita noponyatadon kon soaáḷ tatua,
22 kong ki Allah no'ibogbií noyopia bui takin intau, ta'e tua im pongin pirisayabií ko'i Yesus Kristus. Tua inaidan i Allah kom bayongan intau inta mopirisaya ko'i Kristus, sin Sia in diaíbií mopoyoposi kon intau.
23 Intau ing komintan bidon binaradosa bo noyayukdon ko'i Allah inta moposaḷamat ko'i monia.
24 Tongaíbií lantaran totabi i Allah inta pinomorosen-Nya, sahingga hubungan in intau bo i Allah motompiadon bui; caranya kon tua intau pinobebasdon i Kristus Yesus.
25 Ki Allah ain nopokurban ko'i Yesus Kristus simbaí takin natua mo'inyatadon kon intau pinilatandon nongkon bayongan taḷaí monia aka mosia mopirisaya ko'i Yesus. Tua im pinomia i Allah sim mopo'ontong ing koaídilan-Nya. Sin tungkuḷ intua nosabardon in Sia kom bayongan dosa in intau, sahingga diaí ihukum-Nya im mosia.
26 Ta'e tana'a in hukumon-Nyabií ki ine im mogaid kon inta diaí mopia sim moponyata kom moaídilbií in Sia. Aid-Nya tatua im moponyatabií kon Sia tua in totu-totu'ubií mobanar bo pomuḷoi intau inta mopirisaya ko'i Yesus, pinonyata-Nyadon saḷaku intau inta ain noyopia bui takin i Allah.
27 Manangka intua diaíbií in dodoyonan naton dumodia. Nongonu sin natuabií? Lantaran kita degaí dinumuduidon kon onu inta pinais kon hukum agama Yahudi? De'emanbií! Ta'e lantaranbií kita mopirisaya.
28 Sin nana'abií ing kasimpulannya: Intau sinangoian noyopiadon bui i Allah, de'emanbií lantaran nogaid kon onu inta pinais kon hukum in agama Yahudi, ta'e lantaranbií pirisayanya ko'i Yesus Kristus.
29 Andeka degaí ki Allah tua tongaíbií Allah intau in Yahudi? De'emanbií Sia tua ing ki Allah im bayongan intau? Totu'u, Sia tua ing ki Allahbií doman im bayongan intau!
30 Sing ki Allah tua in tongaíbií tobatuí. Siabií tua inta nobogoi ing kasampatan kon intau mita in Yahudi noyopia bui takin i Allah sim pinodoyon doman kom pirisaya monia. Bo Siabií doman tua inta nobogoi ing kasampatan kon intau ibanea mobiag moyopia takin i Allah, bo tua in nobalií doman lantaran mopirisaya im mosia.
31 Yo mota'au degaí singogon kon lantaran kita bo mopirisaya ko'i Kristus, daí musti ḷumbuíondon in hukum agama Yahudi tatua? diaíbií mota'au mosingog natua! Justru lantaran oyuíondon im pirisaya naton tatua, daí musti harga'an naton in hukum Tatua.

Studi Alkitab lengkap, silahkan lihat Alkitab SABDA :: Roma 3
Studi Alkitab mobile, silahkan lihat Alkitab Mobi :: Roma 3

Download Aplikasi Alkitab Karaoke (BETA) Android:
https://play.google.com/store/apps/details?id=org.sabda.alkitabkaraoke