Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ma moi ge'ena 'o Yesus waikali 'o lo-lomu ma woaka, de ge'enaka wimake wimoi wi giama ma songona 'isonge-songene.

² Ge'enaka dau yoboano mita 'o nyawa gee yosinonu-nonu 'o Yesus wi sowono la 'idadi wikalaki. So 'ona kawisilega dua nako la wisouru 'o nyawa gu'una Pomaoma-omasa ma Wangeka.

³ 'O Yesus kawongosekau wi giama ma songona 'isonge-songenika, "Nou, nongoka ma bionoka noma'okode."

⁴ Ge'enaka de 'o Yesus kawosanokau 'onaka, "Moteke to ngone nanga 'agama, 'okia 'idadi padiai Pomaoma-omasa ma Wangeka? 'O barangi ma owa bolo ma dorou? 'O nyawa pakisilaha bolo pakito'oma?" Ma 'ona kayomarii-riidika.

⁵ 'O Yesus witu'uduuku wakilega-lega gee wisigi-gilolitino ma de wi singina 'i'ogu sababu 'ona kaifoloi manga singina 'i'opini. Ge'enaka de kawongosekau wi giama 'isonge-songenika, "'Ani giama naboootika." 'O nyawa gu'una wi giama waboooto, de wi giama ge'ena koisongenuawau.

⁶ So ma rai 'o Farisioka yamada ma lo-lomu ma woaka ge'ena, de yomasikadibangi de yamuruo naga gee 'o Herodes wimote-moteke, la 'o Yesus wito'oma.

⁷ 'O Yesus de wi do-domoteke yotagi yomatingaka 'o Galilea ma talagaka. De 'o Galilea ma nyawa manga gudai yotagi 'o Yesus wimoteke. Manga gudai mita yoboano 'o Yudeano,

⁸ 'o Yerusalemuno, 'o Idumea ma daeraano, 'o Yordan ma songonasa dina ma daeraano, de 'o Tirus de 'o Sidon ma kota ma kakadate-dateoka ma daeraano. 'Ona yoodumu yaino 'o Yesusino, sababu yo'isene 'okia sonaa wokadiaiokau gee.

⁹ 'O nyawa go'ona kaifoloi yokudaioka, so ma rai 'o Yesus wosuloko wi do-domoteke widakalari 'o ngo'otiri, 'uwa sigado 'o nyawa go'ona wisibe'eto.

¹⁰ 'O nyawa manga gudai wakisi'aiki, so ma rai yopa-panyake yoodumu yomasikasisu yomau yomasisori 'unaka la 'idadi wi'ao.

¹¹ De 'o nyawa gee 'o tokata yakido-dongosamuku wimake 'isinoimi yosubaku wi bionoka de yomapoaka, "Ngona ne'ena ma Jo'oungu ma Dutu wi Ngowaka!"

¹² Ma 'o Yesus ka ma eta ma kowosidabiwa 'o tokata ge'ena 'isikademo 'ato 'una ge'ena nagu'una.

¹³ Ge'enaka de 'o Yesus wosau 'o gigiede, de waki'asoko 'o nyawa gee moteke to 'una wi mau. De 'ona mita yaika 'unaka.

¹⁴ Wakiiriki yamogiooko de modidi de kawongosekau, "Ngoi tiniiriki la nimoteke ngoi, ma ngale tinisuloko niosidagi 'o Habari ma Owa ma Jo'oungu ma Dutuno,

¹⁵ de ngini 'asa tinikula 'o kuasa de 'o pareta ma ngale 'o tokata nioginiiki."

¹⁶ Yamogiooko de modidi gee yakiiri-iriki yodadi su-suloko manga ronga-ronga koneda: 'O Simon, (gee wisironga-ronga mita 'o Petrus),

¹⁷ 'o Yakobus de ma dodoto 'o Yohanes, 'o Zebedeus wi ngowa-ngowaka, ('ona yakisironga 'o Boanerges, ma ngale "'o duturu ma ngowaka"),

¹⁸ mita 'o Andreas, 'o Filipus, 'o Bartolomeus, 'o Matius, 'o Tomas, 'o Yakobus 'o Alfeus wi ngowaka, 'o Tadeus, 'o Simon 'o Zelot ma nyawa,

¹⁹ de 'o Yudas Iskariot gee woba-badingaka 'o Yesusika.

²⁰ Ge'enaka de 'o Yesus wolio 'o woaka. Ma 'o nyawa manga gudai yoboa yomatoomuoli, sigado 'o Yesus de wi do-domoteke kayo'odomo ma koidadiwa.

²¹ 'O nyawa kayongosekau, "'Una witogosangukou!" De gee 'awi 'esa moi yo'isenoka 'o demo ge'ena, de yaika wi'ese.

²² 'O 'agamaka yodoto-dotoko 'o Yerusalemino yoboano de kayongosekau, "'Una 'o Beelzebul widongosamuku! 'Enau wikulaka 'o kuasa ma ngale woginiiki 'o tokata."

²³ So 'o Yesus waki'asokino de wakidajarita 'o 'ade-'ade ngai muruo naga. Kawongosekau, "Kokia 'idadi 'o tokata de 'o tokata 'imakaginiiki.

²⁴ Nako 'o Koana moi 'awi pareta ma sigoronaka 'o bolu yamo-moi yomatingaka yomaka'aku'uwa, ge'ena dua 'awi pareta ge'ena kaipiakoroka.

²⁵ Koge'enali mita nako 'o giabereki moi la koyomarimoiwa, de manga woa ma dodaku yomakadu'uduku ge'ena dua yomakati-tingaoka.

²⁶ So nako 'o tokata de to 'ena ma balusu 'imakaparangi, ge'ena dua ma raiokau koito'ingokawa de ma pareta kaitorouoka.

²⁷ Komoiwa moi 'idadi yowosanga wimoi wokua-kuata wi woaka de wi harataa ya'ora, nako 'o nyawa gu'una kowipusukuawasi. So salingou wipusuokasi 'asa de ya'ora 'awi harataa ge'ena.

²⁸ Bika niosigisene! Nako 'o nyawa yosowono de yobi-bicara yositi-tingoono, ge'ena manga sowono kai'ikirokasi.

²⁹ Ma nako yositi-tingoono 'o Ngomasa 'Itebi-tebini, ge'ena manga sowono koi'ikiruawau. Sababu yositi-tingoono 'o Ngomasa 'Itebi-tebini, ge'ena 'o sowono kaisi'ado-'adonika."

³⁰ ('O Yesus koge'ena wongose, sababu naga 'o nyawa yongose 'ato 'o Yesus 'o tokata widongosamuku.)

³¹ Ge'ena 'iduangino de 'o Yesus ma 'esa de wi riaka dodoto yoboa. 'Ona yota-tamaa ma dudunoka, de yosuloko 'o nyawaka 'o Yesus wi'asoko.

³² Ma 'orasi ge'ena 'o nyawa manga gudaioka yogogerie 'o Yesus wisibululunino. 'Ona yongose 'unaka, "'Aba, 'ani 'esa de ni riaka dodoto doka ma dudunoka. 'Ona ninonu ngona 'Aba."

³³ 'O Yesus kawosangokau, "Nagumuna to ngoi 'ai 'esa? De nago'ona to ngoi 'ai riaka dodoto?"

³⁴ Ge'enaka de wakilega-lega 'o nyawa wisigi-gilolitino gee de kawongosekau, "No'ona to ngoi 'ai 'esa de 'ai riaka dodoto!

³⁵ 'O nyawa gee ma Jo'oungu ma Dutu 'awi mau yamote-moteke, 'ona ge'ena to ngoi 'ai riaka dodoto, 'ai 'esa biranga de 'ai 'esa."

Markus

Video Markus 3

Ikuti Kami:

KONTAK | PARTISIPASI | DONASI