Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ki Yesus sinumu'ot bui kom baḷoi pososambayangan. Kon tua oyuíon tobatuí intau inta limanya tosimpaḷ nolempeng.
2 Kom baḷoi pososambayangan tatua oyuíon doman intau mita inta mo'ibog motayak kon taḷaí i Yesus, simbaí oyuíon baliíon monia dodoyonan popongaduan ko'i-Nia. Tuamai umuran tarukira'an makow monia mongo mongundam doman ing ki Yesus kon singgai in Sabat.
3 Daí ki Yesus noguman kon intau inta nolempeng in limanya tosimpaḷ tua, "Koligai kon na'a bo sindog kon tayowon intau mita tana'a."
4 Onda intua iliboí i Yesus kon intau mita kon tua, "Aka podudui in agama, onu im mota'au aidan naton kon singgai in Sabat? Momia kom mopia andeka mora'at? Moposaḷamat kon intau andeka molimod?" Mosia komintan nongobioí.
5 Korogi-rogi ing ki Yesus nobobui magií-makow kon intau mita inta kon tua, ta'e moaíjar doman totok ing gina-Nya sin totu'u motogat ing gina monia tua. Onda intua Sia noguman kon intau inta nolempeng in lima tatua, "Sintakdon in limamu." Daí sinintak doman i intau tatua in limanya, bo baḷuí domandon nopia in limanya tatua.
6 Daí intau mita im Parisi nonaḷaímaidon kom baḷoi pososambayangan tatua, bo minayak noyosingog takin intau mita i Herodes kon soaáḷ poḷolimod ko'i Yesus.
7 No'iduduimai kon tua, ki Yesus takin murií-Nya mita sinimiípa bo nopobayak in Danow Galilea. Ta'e nobayong totok intau nongkon Galilea in dinumudui ko'i Yesus. Nobayong doman in namangoi nongkon Yudea,
8 nongkon Yerusalem, nongkon butaí Idumea, nongkon dotaí in timur in Yordan, bo nongkon butaí in Tirus bo Sidon. Mosia komintan namangoi ko'i Yesus, sing kinodongogandon monia im bayongan inta inaidan-Nya.
9 Mobayong totok in intau, manangka intua ki Yesus nokitayak in uangga kom murií-Nya mita, simbaí diaí kogupitan monia in Sia.
10 Bo nobayong totok intau inundaman-Nya, sahingga bayongan intau notakit komintan moramiji dimiug ko'i Yesus bo moliai ko'i-Nia.
11 Bo intau mita inta kinotoḷangan dimukud mora'at, pomuḷoi im moko'ontong ko'i-Nia baḷuí tumungkud kon tayowon-Nya bo momaḷuí moguman, "Ikowbií nion ki Adií i Allah!"
12 Ta'e ilarang totok i Yesus in dimukud mita mora'at tatua mopota'au kon soaáḷ ki ine in Sia.
13 Onda intua ki Yesus notakod kon tobatuí buḷud, bo nogoinií kon intau mita inta kino ibog-Nya. Intau mita tatua namangoi,
14 bo Sia nonantuídon kon intau mopuḷuh bodoyowaí takin singog nana'a, "Aku'oi momilií ko'i monimu, simbaí mo'ikow tumakin ko'i-Nakoí. Potabaí-Ku im mo'ikow mopota'a-ta'au makow in Habar Mopia nongkon i Allah,
15 bo mo'ikow ogoian-Ku ing kawasa moguntun kon dimukud mita mora'at."
16 Na'a in tangoi monia mopuḷuh bodoyowaí tua: Ki Simon (inta dinonoi doman ki Petrus),
17 ki Yakobus bo ki Yohanes ki utatnya. Taya dua na'a ki adií mita i Zebedeus (mosia sinangoian ki Boanerges, inta mangalenya, "ki adií ing gotup"),
18 ki Andreas, ki Pilipus, ki Bartolomeus, ki Matius, ki Thomas, ki Yakobus ki adií i Alpeus, ki Tadeus, ki Simon intau in Zelot,
19 bo ki Yudas Iskariot inta nopotaḷui ko'i Yesus.
20 Onda intua ki Yesus nobuidon kom baḷoi. Ta'e intau nobayong buipabií namangoi noyosipun, sahingga ki Yesus bo murií-Nya mita diaídon nokoponga'an.
21 Intau mita noguman, "Nobundaidon in Sia nion!" Bo naonda ing kinodongogan ginaḷum-Nya in singog monia tua, binayakdon monia ginamaí ing ki Yesus.
22 Mototunduí mita kon agama Yahudi inta namangoi nongkon Yerusalem noguman, "Kinotoḷangan i Beelzebul in Sia! Itoi in dimukud mita mora'at tatua in nobogoi ing kawasa ko'i-Nia moguntun kon dimukud mora'at."
23 Daí ki Yesus nogoinií kon intau inta mobayong tua bo nongonguman kom porumpama'an mita. Kai-Nia, "Ule, diaíbií kuma'an kon akaḷ aka dimukud mora'at moguntun kon dimukud doman mora'at.
24 Sin aka tobatuí karaja'an bo mosilai mokolo-kolompok inta mososaturuan, yo diaíbií mononoi ing karaja'an tatua.
25 Ande, aka motoḷu adií diaí motobatuí bo mosisaturuan doman yo mogoguya'atbií im motoḷu adií tatua.
26 Daí natuabií doman kom bonu ing karaja'an Ibilis aka mosia mosisaturuan bo moyosilai, diaíbií doman monahang mo'onggot bo moyoyang.
27 Diaíbií doman tobatuímai intau mokotu'ot kom bonu im baḷoi intau moropot bo mogagow kong kapunya'an in intau moropot tatua, aka diaínyapa muna togoton in intau moropot tatua. Tantuí munanyapabií togoton bodongka kogamaannya ing kapunya'an i intau moropot tatua.
28 Pokota'audon! Aka intau mogaid kon dosa bo mohojat yo mata'apabií ampungan in sia.
29 Ta'e aka mohojat in sia kon Roho i Allah, yo intau tatua in diaíbií mota'au ampungan! Sin hojatan tatua in dosabií mononoi."
30 (Ki Yesus noguman natua sin oyuíon intau noguman kon Sia kinotoḷangan in dimukud mora'at.)
31 No'iduduimai kon tua, ki inaí bo ki utat mita i Yesus namangoi. Mosia sinimindog kon ḷuai bo nopotabaí kon intau mogoinií ko'i Yesus.
32 Dodai intua nobarong intau ilimituí kon libumai Yesus. Daí mosia noguman ko'i-Nia, "Pak Guru, ki inaí bo ki utat mita i Pak Guru, tua kon ḷuai. Mosia notayak ko'i Pak Guru."
33 Ta'e ki Yesus notubag, "Ki inebií ing ki inaí-Ku? Ki inebií ing ki utat-Ku mita?"
34 Onda intua ki Yesus nobobui magií-makow ko'i monia inta ilimituí kon libu-Nyamai bo noguman, "Na'abií ing ki inaí bo ki utat-Ku mita!
35 Intau inta dinumudui kon ibog i Allah, siabií tua ing ki utat-Ku ḷoḷaki, ki utat-Ku mita bobay bo ki inaí-Ku."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA