Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Male pole' omi Puang Isa tama bola passambajangan. Ntuu jio den mesa' tau to mate sangbali limanna.

² Na den too tau laen jio to madoang bang nnangah kasalanna Puang Isa anna wa'ding mparapa'i. Jaji, napesa' tarruhhi kumua ba'tu la mpamalagahhi tau ke Allo Katorroanni.

³ Nakuamo Puang Isa lako joo tomate sangbali limanna nakua, "Maleko mai, mujenjen lan tangnga!"

⁴ Mekutanami lako joo tompesa'i nakua, "Ianna situru' atoran agama, apara to wa'ding tapugauk ke Allo Katorroan? Manggauk meloraka, ba'tu manggauk gaja'raka? Mpasalama'riki'ka padanta' rupa tau, ba'tu mbunoriki'ka padanta' rupa tau?" Apa pada kamma' bangngi.

⁵ Nakita mengguririkmi Puang Isa tuu lako tau na magalli, apa masse tooi penawan-Na, nasaba' totangmangpesa'ding ngasanni. Nakuanni joo tomate sangbali limanna, "E'te'i tuu limammu!" Nae'te'mi to limanna, namelo pole'mo.

⁶ Apa ia joo to-Farisi messunmi lan mai bola passambajangan, namale sipangkada-kada ba'tu pira-pira to tonturu' Raja Herodes la mbunoi to Puang Isa.

⁷ Malemi Puang Isa sola anak gurun-Na mpemboko'ii, namale lako Tasik Galilea. Apa liwa' buda to-Galilea undi nturu'i. Buda toda to ratu jao mai tana Yudea,

⁸ kota Yerusalem, tana Idumea, na kadellekanna Sa'dan Yordan na jio mai mengguririkkina kota Tirus na kota Sidon. Ratu ngasanni ssikitan Puang Isa, nasaba' nasa'dingmi to apa mangka napugauk.

⁹ Nasuami to anak gurun-Na mpasadianni lopi, nasaba' kabudanna tau, dikua danggi' nasisi'pinnii tobuda.

¹⁰ Gaja buda tau napamalagah Puang Isa. Iamo joo nasisi'pin-si'pinni bangmi to tomasaki mpendete'ii, la ngkaka'i.

¹¹ Na ia tonna kitami tonatamai setang, ta'pa suju'mi jio olo-Na, nametamba nakua, "Kita'mo Anak Allataa."

¹² Apa naanggai Puang Isa joo setang mpaui, kumua indara Ia.

¹³ Mangkai joo endekmi Puang Isa de' buntu, natambaii to tonaala penawan-Na. Ratu ngasanmi,

¹⁴ napileii sangpulo dua, nakua, "Kupileimo kamu', ammisolanna', na la kusua kamu' male mpangpeissenanni to Kareba Kasalamatan jio mai Puang Allataala,

¹⁵ na la diben kamu' kuasa la nnula'i setang."

¹⁶ Iamo tee sanganna joo sangpulo dua tau to napilei Puang Isa: Simon (to nasangai Petrus),

¹⁷ namane' dua anakkana Zebedeus, iamo to Yakub na Yahya (to nasangai Boanerges, battuananna 'anak galugu'),

¹⁸ Andreas, Filipus, Bartolomeus, Matius, Tomas, Yakub anakkana Alfeus, Tadeus, Simon to-Zelot (battuananna Simon tobarani),

¹⁹ na Yudas Iskariot to undinna mpangpejokkoan Puang Isa.

²⁰ Mangkai joo, polemi Puang Isa tama bola. Anna buda omo tau ratu sirempun. Iamo joo na te'damo wattunna kumande Puang Isa sola anak gurun-Na.

²¹ Na ia tonna sa'dingmi rapunna Puang Isa to ianna joo, malemi la nnalai to Puang Isa, nasaba' nakua tuu lako tau, "Mamemi Ia".

²² Ia to guru agama to ratu jao mai kota Yerusalem mangkadami nakua, "Natamaimi Beelzebul, ba'tu puanggawana setang! Jaji kuasanna puanggawana setang napake nnula'i setang."

²³ Natambaimi Puang Isa tee tobuda, nacuritanmi pangpasusian nakua, "Umbo nakua, la wa'dingraka to Ballisi' ba'tu puanggawana setang nnula'i padanna setang?

²⁴ Ia ke denni mesa' kaparentan natitawa-tawa to taunna na te'da namesa' penawa, tantu te'da namasai nalanynya'.

²⁵ Na ia to tosangbola, ke te'da namesa' penawa, tantu te'da namasai nasisarak-sarak.

²⁶ Susi toomi to kaparentanna Ballisi' ba'tu puanggawana setang. Ia ke puanggawana setang nnewa setang laen, battuananna sirarii pada setang na te'da namesa' penawa, te'da namasai nalanynya' joo kaparentanna."

²⁷ Mangkai joo, mangngajahhimi Puang Isa mpake pangpasusian nakua, "Te'da nakulle to taboko mentama bola, ke mawatangngi to ampu bola. La napumpungri jolo' to ampu bola, namane' nnalai ngasanni to ewananna.

²⁸ La miingaran tee kadang-Ku' kumua, ia to tompugauk dosa ba'tu ncapa' Puang Allataala, wa'dingpa didampangan.

²⁹ Apa ia to toncapa' Roh Allataala, te'da lalomo nawa'ding didampangan. Nasaba' ncapa' Roh Allataala, iamo dosa te'da cappa'na."

³⁰ (Iamo napaui Puang Isa susi joo, nasaba' den tau mangkada kumua, natamaimi setang.)

³¹ Ia tonna mangkamo joo, ratumi indo-Na sola sile'to-Na Puang Isa. Jenjen bangngi jio salean, nasua tau male ntambai.

³² Ia joo wattu buda tau cumadokko ntalimbung Puang Isa. Mangkadami nakua, "Oo Puang, jioi salean to indo-Ta' sola sile'to-Ta' nnangahki'."

³³ Mebalii Puang Isa nakua, "Indara to indo-Ku'? Indara to sile'to-Ku'?"

³⁴ Nakitami to tau cumadokko ntalimbungngi anna mangkada nakua, "Iamo tee indo-Ku' sola sile'to-Ku'!

³⁵ Inda-inda to tompugauk pakkaeloran-Na Puang Allataala, iamo sile'to-Ku' na indo-Ku'."

Markus

Video Markus 3

Ikuti Kami:

KONTAK | PARTISIPASI | DONASI