Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali re’e seore i Yesu masua wo’u ri banua to napampatunde nto Yahudi. Nja’u raya banua etu re’e samba’a tau to mapongko palenya sambali.
2 Pasi re’e seja bara sawei mba’a to Yahudi to aliran Parisi, sira mangalo’aka kojo i Yesu. Sira rani kojo mangkita i Yesu bara wimba, bara Ia damampakatao muni tau to mapongko palenya etu ri Eo Rapandoo, apa sira rani mangarata jaya mampakasala Ia.
3 Wali ojo pangkita i Yesu tau to mapongko palenya etu, Ia manganto’oka ngkai etu, “Mai pakore ri tangonya si’i.” Wali tau etu yau resi i Yesu.
4 Panewa i Yesu mampotanaka resi tau to mangalo’aka Ia etu, Ia manganto’o, “Ane ewa porenta i Musa to imba to tao-tao daraika ri Eo Rapandoo. Mangika to matao bara mangika to maja’a? Bara mampakatao muni sa’e bara mampopate sa’e?” Etu semo pampotanaka i Yesu resi sira, pei sira tare to mangansono. Sira ojo maroti.
5 Wali i Yesu mangalo’aka resi sira samparia samba’a pei samba’a. Ia maja’a rayaNya pasi Ia mawo seja rayaNya apa sira bingol pasi taa kojo mamporayang sa’e. Wali Ia manganto’oka tau to pudu palenya etu, “Tonjuka palemu.” Wali ngkai etu mangantonjuka palenya panewa palenya etu rapakatao muni sewaju ewa palenya to sambali.
6 Wali ojo pangkita nto Yahudi to aliran Parisi palaong to mawali etu, sira masuwu muni yako ri banua etu. Sira mansaka yau mampogomboka joa i Herodes, sira mansongka mangaliwu jaya see sira maya mampopate yau i Yesu.
7 Wali tempo etu, ojo karoonya i Yesu mampakatao muni tau to mapongko palenya, Ia manganto’oka anaguruNya, “Yaumo kita njo’u rano Galilea.” Wali sira yau. Pei tempo sira yau etu, boros kojo tau yako ri propinsi Galilea to mangalulu sira. Pasi boros seja tau to yusa to mangampago i Yesu naj’u ria, tau etu sangga’a yako nja’u propinsi Yudea,
8 pasi re’e seja to yako ri kota Yerusalem, yako ri tana Edom, yako sambote ngkoro Yordan, pasi yako ri lipu Tirus pasi Sidon. Naka pei tau boros etu mangampago i Yesu apa sira roomo mangandonge kareba mangkonong palaong to taa rapobiasa to inikaNya.
9 Wali rata nja’u rano Galilea etu i Yesu manganto’oka anaguruNya, “Pasigenka Aku samba’a bangka see Aku maya matunda nja’u rayanya ane bara najuju ntau boros si’i.”
10 Naka pei Ia manganto’o ewa wetu apa tau boros etu mangansani Ia room mampakatao muni boros tau to masaki, wali see naka tau masaki to owo rata etu sira rani kojo mampotaka Ia see tuwu-tuwuja sira seja darapakatao muni.
11 Pasi ane measa, tempo sira mangkita i Yesu, sira mapuka yau ri tangonya pei sakaboo, sira manganto’o, “Komi semo Ana i mPue Allah.”
12 Wali i Yesu mamporentang sira, Ia manganto’oka measa etu, “Ne’e kojo komi manganto’oka tau Aku Ana i mPue Allah.” Wali ewa see naika i Yesu mamporentang sira.
13 Wali yako etu i Yesu mangansale bara sawei mba’a tau to Ia mamporani yau mangalulu Ia damandake nto’u rapa mpantana. Wali sira nayau. Ojo karata nsira ndate ria, i Yesu mangampilis sampuyu pei dua mba’a tau etu. Tau to sampuyu pei dua etu Ia manganto’oka anaguruNya, apa sira semo to damawali yunuNya pasi sira semo to Ia damampokau damampakarebaka tuntu i mPue Allah resi tau.
14 (3:13)
15 Pasi Ia mangawaika sira kuasa mangarubak measa resi tau to naposuak measa etu.
16 Wali tau to sampuyu pei dua ipilisiNya etu, sanganya samba’a etumo i Simon. Ia nasangaka wo’u i Yesu i Petrus. Pasi re’e seja i Yakobus sira dua i Yohanes, sira sintua’i, ana i nZebedeus. Sira dua etu nasangaka wo’u i Yesu, Boanerges, apa Boanerges batuanginya tau ewa loo lamoa.
17 (3:16)
18 (3:16)
19 Panewa re’e wo’u i Andreas, Pilipus, Bartolomeus, Matius, Tomas pasi Yakobus. I Yakobus etu ia ana i Alpeus. Panewa re’e seja i Tadeus pasi i Simon. I Simon ia tau to seore nangewa to Roma to mamporentang to Yahudi. Pasi re’e seja Yudas Iskariot to mamposora yau i Yesu resi baliNya. Wali tau to sampuyu pei dua etu napilis i Yesu mawali anaguruNya.
20 Wali i Yesu pasi anaguruNya sira nayau muni njo’u banua to nakaroo. Ojo karata nsira nja’u ria, boros wo’u tau to siromu. Tau to mampago i Yesu tempo etu malagi kojo, wali i Yesu pasi anaguruNya tare temponya pasiwa mangkoni apa taa yoa, boros kojo tau.
21 Wali tempo etu ja’i i Yesu sira mangandonge, re’e to manganto’oka sira i Yesu tempo etu Ia tare temponya Ia damangkoni, apa taa yoa. Pasi re’e tau to manganto’o, “I Yesu Ia wando yau.” Wali ja’iNya etu sira yau damangoko Ia.
22 Pasi re’e seja tau to mampoguru porenta i Musa yako nda’a Yerusalem, sira seja ma’i mangampago. Sira manganto’o, “I Yesu Ia napasuak i Beelsebul, Kepala Measa semo. Wali yako kuasa i ngKepala Measa etu naka pei Ia nakurang mangarubak measa yako resi tau.”
23 Wali ojo pangandonge i Yesu gombo ntau to manganto’o ewa see, Ia mampokio tau etu panewa Ia manganto’oka sira, “Gete, taa mawali i Kepala Measa mangarubak joanya, apa sewaju ewa mangarubak koronya!” Roo see Ia manganto’oka sira rapa, to’oNya, “Rapanya makole pasi joanya. Ane joa nu makole etu pei masimusu yau, taa masae tau etu datiga’as yau, wali makolenya etu tamo re’e tau to ia mangkuasang.
24 (3:23)
25 Pasi ewa see seja ane tau santina. Ane sira matingka samba’a pei samba’a, taa masae sira datiga’as yau.
26 Wali ewa see seja resi Kepala Measa. Ane Kepala Measa mangarubak joanya, taa masae sira samparia damasimusu yau panewa Kepala Measa tamo re’e joanya to ia mangkuasang. Wali manasa si’a kuasa i ngKepala Measa to mangarubak measa.”
27 Wali roo see i Yesu rani mampakanasaka sira Ia semo to rosoroso pei i Kepala Measa, see naka Ia manganto’o wo’u rapa, to’oNya, “Rapanya re’e tau to maroso kojo, tau taa maya masua ri raya banuanya pei mangoko yau ngaya-ngayanya apa ia maroso mangamparambang. Pei ane rata tau to roso-roso wo’u pei ia, tau etu maya mangampungu yau ia panewa mangoko yau ngayangayanya. Wali Aku roomo manganangi i Kepala Measa see naka Aku maya mangarubak joanya pei mangoko yau tau to ia puenya.”
28 Wali yako etu i Yesu mampatiendoka sira mangkonong dosa, Ia manganto’o, “Aku manganto’oka komi, monso pu’u samparia dosa to naika nto lino maya nalapas i mPue Allah. Pasi samparia gombo nsira to manto’o maja’a sa’e bara manto’o maja’a i Pue Allah, dosa etu maya seja nalapas i mPue Allah.
29 Pei ane tau to manto’o maja’a i Nosa Mapasing, tau etu taa daralapas dosanya etu. Apa manto’o maja’a i Nosa Mapasing, etu semo dosa to danakitanaka i mPue Allah rataka ri singkasaenya.”
30 Wali ewa wetu gombo i Yesu manganseko tau to mampoguru porenta i Musa apa sira manganto’o Ia napasuak nosa to maja’a, wali sira sewaju ewa manganto’o i Nosa Mapasing Ia measa semo.
31 Wali yako etu ratamo indo i Yesu pasi tua’iNya bara sawei mba’a nja’u sambali banua nakare’e i Yesu. Tempo sira rata etu, boros kojo tau to re’e ri raya banua etu, sira matunda tiku i Yesu. Wali indo i Yesu pasi tua’iNya sira manganto’oka tau, “To’oka i Yesu nakama’i.” Wali tau etu sira yau manganto’oka i Yesu, to’onya, “Re’e indoMu pasi tua’iMu ri sambali banua, sira mampokio Komi.”
32 (3:31)
33 Pei i Yesu Ia mangansono gombo ntau etu, Ia manganto’o, “I sema kamonsonya indongKu pei a’ingKu?”
34 Panewa Ia mangalo’aka yau resi tau boros to matunda ri aweNya etu pei manganto’o, “Tau si’i seja indongKu pasi a’ingKu!
35 Apa i sema tau to mangangika pamporani i mPue Allah, tau etu seja a’ingKu to langkai pasi a’ingKu to we’a pasi indongKu.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA