Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Deside Isa tulak malik ojok balẽ ibadah. Lẽq derike araq sopoq dengan saq imene matẽ setowẽq.

² Lẽq derike araq dengan-dengan saq mẽlẽ boyaq kesalaqan Deside Isa adẽqne bau ngelaporang Ie. Jari, ie pade terus merhatiang Deside Isa, napi Ie gen nyelahang dengan lẽq jelo Sabat.

³ Deside Isa bemanik lẽq dengan saq imene matẽ setowẽq nike, "Silaq nganjeng lẽq deriki, lẽq julu."

⁴ Beterus Deside Isa beketuan lẽq dengan-dengan saq araq lẽq derike, "Menurut agamente, napi saq kanggo ite laksaneang lẽq jelo Sabat? Laksaneang hal saq solah atao saq jahat? Nyelametang dengan atao nyematẽq?" Ie pade tedoq doang.

⁵ Siq menggah Deside Isa cingakin sekelining-Ne, laguq Deside Isa ẽndah sedih sẽngaq ie pade pagah gati. Beterus Ie bemanik lẽq dengan nike, "Ulurang imende." Dengan nike ngulurang imene, dait imene selah.

⁶ Make dengan-dengan Parisi bilin balẽ ibadah nike, terus nyerepek berunding kance pire dengan anggote golongan Herodes jari nyematẽq Deside Isa.

⁷ Beterus Deside Isa dait pengiring-pengiring-Ne nyingkir ojok Danao Galilea. Luwẽq gati dengan lẽman Galilea saq lumbar ngiring Deside Isa. Luwẽq ẽndah saq dateng lẽman Yudea,

⁸ lẽman Yerusalem, lẽman daẽrah Idumea, dait lẽman daẽrah lẽq bagian timuq Kokoq Yordan, dait lẽman sekiter kote-kote lẽq Tirus dait Sidon. Ie pade selapuq parek ojok Deside Isa, sẽngaq ie pade dengah mengenai hal-hal saq sampun telaksaneang siq Deside Isa.

⁹ Dengan-dengan nike luwẽq gati, sehingge Deside Isa ngemanikang pengiring-pengiring-Ne siepang Ie perau, adẽq Ie nẽnten tedesek siq dengan-dengan nike.

¹⁰ Luwẽq gati dengan teselahang siq Deside Isa, sehingge selapuq dengan sakit bedesek-desekan berusahe ngerapetin Deside Isa adẽqne bau jamah Ie.

¹¹ Sewaktu serioq Deside Isa, roh-roh jahat nike terus doang sujut lẽq arepan-Ne dait bekuih, "Pelungguh Bije saq asalne lẽman Allah!"

¹² Laguq roh-roh jahat nike tebalaq siq Deside Isa badaqang sai setetune Ie.

¹³ Beterus Deside Isa taẽk ojok sopoq bukit. Ie ngemanikang dengan-dengan saq Ie kayunang dait dengan-dengan nike parek.

¹⁴ Deside Isa pilẽq due olas dengan lẽq antare ie pade, dait bemanik, "Tiang pilẽq side pade, adẽq side pade turut Tiang, adẽq Tiang utus side pade jari nyebarang Kabar Solah lẽman Allah,

¹⁵ dait side pade gen mauq kuase jari sediq sẽtan."

¹⁶ Niki aran kedue olas dengan nike: Simon (saq Ie sebut ẽndah Petrus),

¹⁷ Yakub dait Yahya semetonne, ie pade bije-bije Zebedeus (ie pade niki tearanin siq Deside Isa Boanerges, artine "Anak guntur"),

¹⁸ Andreas, Pilipus, Bartolomeus, Matius, Tomas, Yakub bije Alpeus, Tadeus, Simon dengan Zelot,

¹⁹ dait Yudas Iskariot saq behianat lẽq Deside Isa.

²⁰ Beterus Deside Isa tame ojok sopoq gedẽng. Laguq dengan luwẽq dateng malik bekumpul, jangke Deside Isa dait pengiring-pengiring-Ne ndẽq araq waktu medaran.

²¹ Sewaktu keluarge-Ne dengah hal nike, ie pade lumbar jari bait Deside Isa, sẽngaq dengan-dengan bebase, "Ie sampun jogang!"

²² Ahli-ahli Taurat saq dateng lẽman Yerusalem nimbal, "Ie tekuasein siq Beelzebul, dait siq kuase lẽman datune sẽtan Ie sediq sẽtan-sẽtan nike."

²³ Make Deside Isa ngemanikang dengan luwẽq nike, dait bemanik kadu perumpamean-perumpamean lẽq ie pade. "Segerah Belis sediq Belis," manik Deside Isa.

²⁴ "Lamun sopoq negare araq golongan-golongan saq saling bemusuhan negare nike ndẽq gen kuat.

²⁵ Dait lamun dalem sopoq keluarge ndẽq araq persatuan dait anggote-anggotene saling bemusuhan, keluarge nike gen ancur.

²⁶ Lamun Belis ngelawan diriqne mẽsaq dait saling bemusuhan, ie ndẽq bau tahen ngonẽq, dait pasti gen musnah.

²⁷ Ndẽq araq sopoq dengan juaq saq bau tame ojok balẽ dengan saq kuat dait mẽlẽ ngerampas dowẽne lamun ie ndẽq juluan sẽkoq dengan saq kuat nike. Sesampun nike baruq ie bau ngerampas dowẽne.

²⁸ Tiang badaq side: Setetune selapuq dose dait penghinean manusie gen teampunin, seluwẽq napi juaq penghinean saq ie pade ucapang.

²⁹ Laguq lamun ie menghine Roh Suci, ie ndẽq bau teampunin! Sẽngaq penghinean nike dose saq kekel!"

³⁰ (Deside Isa bemanik maraq nike sẽngaq araq dengan saq bebase bahwe Ie tekuasein siq roh jahat.)

³¹ Sesampun nike, mamiq bini dait sanak-sanak Deside Isa rauh. Ie pade nganjeng lẽq luah, dait suruqne dengan ngempoh Deside Isa.

³² Waktu nike luwẽq dengan kenyeke tokol lẽq sekelining Deside Isa. Ie pade matur lẽq Deside Isa, "Silaq cingakin, mamiq bini dait sanak-sanak Pelungguh araq lẽq luah. Ie pade boyaq Pelungguh."

³³ Jawab Deside Isa, "Sai mamiq bini Tiang? Sai sanak-sanak Tiang?"

³⁴ Terus Deside Isa perhatiang dengan-dengan saq tokol lẽq sekelining-Ne terus bemanik, "Niki inaq dait semeton Tiang!

³⁵ Dengan saq ngelaksaneang pekayunan Allah, ie saq jari semeton mame dait semeton nine serte inaq Tiang!"

Markus

Video Markus 3

Ikuti Kami:

KONTAK | PARTISIPASI | DONASI