Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ge'enaka de 'o Yesus wokurue wobicara de 'o 'ade-'ade 'o 'imam ma sae-saekika de 'o 'agamaka yodo-dotoika de mita 'o Yahudioka manga balu-balusika go'ona, kawongosekau, "Naga wimoi wi bairoka 'o 'anggur wotuduku, de ma batingino 'o hisa wosikilolitoka. Ge'enaka de 'o sukono wodiai ma ngale 'o 'anggur 'ide-deteo, 'asa de wosigoko mita ma bairi ma ja-jaga manga ngii. 'Iduangoka 'iodumu de 'o 'anggur ma bairi ge'ena wosisewakau yoma-manaramika yamuruo naga, ge'enaka de 'una wotagiokau 'o daeraa 'ireguka.

² Ma 'orasi ya'adono 'o 'anggur ma sowoko ya'utuku, 'o nyawa gu'una wosidingoto 'awi ro-riwo wimoi 'o bairi yoma-manaramika, ma ngale wa'ese to 'una 'awi bula.

³ Ma yoma-manarama go'ona witagoko 'o bairi ma dutu wi ro-riwo gu'una, ge'enaka de wipesana de wisuloko wolio kawomamurue.

⁴ Ge'enaka de 'o bairi ma dutu gu'una wosidingotoli wi ro-riwo wimoioli. Ma yoma-manarama go'ona wipesanoli 'o ro-riwo gu'una wi saeika, ge'enaka de wiginiiki ma de wi doana.

⁵ 'O bairi ma dutu gu'una wosidingotoli 'awi ro-riwo wimoioli, ma 'ona wito'omaka 'o ro-riwo gu'una. De koge'enau 'ona yakidiai 'o ro-riwo 'iregu yoku-kudaika mita; naga munuka yakipesana, de munuka yakito'oma.

⁶ 'O bairi ma dutu gu'una nago'onasi 'idadi wakisidingoto 'awi bairika ma 'orasi ne'ena? Kawomatengokau, ge'ena la to 'una ma sirete 'awi ngowaka wisiboso-bosono. So ma du'uruku 'una wosidingoto 'awi ngowaka gu'una yoma-manaramika. 'Una watibangi 'ato, ''Ai ngowaka ge'ena ma raiokau wi'isene.'

⁷ Duga yoma-manarama go'ona yomakadongose moi de moi, yongose 'ato, 'Nu'unau ma warisi ma dutu. Nou ngone powito'oma, la ngone pamake to 'una 'awi warisi!'

⁸ So 'o ngowaka gu'una witagoko de wito'omaka. De 'awi songene ya'umo ge'ena ma bairi ma dudunika."

⁹ Ge'enaka de 'o Yesus wosano, "'Okia dua wodiai 'o bairi ma dutu gu'una? Ma raiokau dua 'una waino de wakito'omaka yoma-manarama go'ona. Deika 'o bairi ge'ena wosisewali yoma-manarama 'ireguka.

¹⁰ Ngini ma raiokau niabacakau ma bo-bula naneda 'o Buku 'Itebi-tebini ma dodaka: ''O teto gee kaya'umokou 'o woa yodi-diai, 'idadi ma ba-bangini ma guata.

¹¹ Ne'ena ge'ena ma Jou wodiai; duru de 'i'ofioka!'"

¹² So 'o Yahudioka manga balu-balusu gee yo'ise-'isene 'o 'ade-'ade ge'ena, yomau 'o Yesus witagoko sababu 'ona yanako 'o 'ade-'ade ge'ena 'o Yesus wositago-tago 'onaka. Duga 'ona yakidomodongo 'o nyawa yoku-kudaika, so 'ona yotagi 'o Yesus kawimadaka.

¹³ 'O Farisioka yamuruo naga de gee 'o Herodes wimote-moteke yamuruo naga yakisuloko 'o Yesusika wibole ma timi-timi de 'o sa-sano.

¹⁴ 'Ona yoboa 'o Yesusika de kayongosekau, "'Aba Guru, ngomi mianako ngona 'o nyawa 'iloa-loa moi, de ngona konosigisenuwa nago'ona bato manga di-dibangi. Ma ngona 'Aba nodotoko kanositi-tiaikau ma ngale ma Jo'oungu ma Dutu 'awi mau 'o nyawaka, sababu ngona konosikairi-irikuwa 'o nyawa. So bika nosidemo ngomino. Moteke to ngone nanga 'agama ma besesongo, kaidadi 'o balasitengi pofangu 'o Kaisarika bolo koidadiwa? Salingou pofangu 'o pajaki ge'ena bolo koidadiwa?"

¹⁵ 'O Yesus wanako to 'ona manga ngeluku ge'ena. So kawongosekau 'onaka, "'Ido'oa so niomau nitaili? Bika nisidumutino 'o pipi 'o saaka ngai moi."

¹⁶ So 'ona ya'asano 'o pipi 'o saaka ngai moi. So 'o Yesus wosano 'onaka, "To nagu'una wi dulada de wi ronga ne'ena?" De 'ona yosango, "To Kaisar."

¹⁷ 'O Yesus wongose, "Nako koge'ena, niokula 'o Kaisarika 'okia naga gee to Kaisar de ma Jo'oungu ma Dutuka 'okia naga gee to ma Jo'oungu ma Dutu." 'Ona yoherangi yo'isene 'awi sa-sango.

¹⁸ 'O Sadukioka yamuruo naga yaika 'o Yesusika. ('Ona ge'ena yongose 'ato 'o nyawa yosongenokau ge'ena dua koyomomikuawau.)

¹⁹ 'Ona kayongosekau, "'Aba Guru, 'o Musa wolefo to ngone nanga besesongo naneda: 'Nako 'o nauru wimoi wosongene 'ena wi ngowaka koi'iwa, ge'ena 'awi dodoto salingou womingaamoko 'o bao-bao gumuna la 'o ngowaka yamake de 'o ngowaka ge'ena wisitesongo ma riaka wosonge-songene 'awi waata.'

²⁰ 'Idadiokau naga 'o riaka dodoto yatumudiingoka. 'O riaka womodokano 'awi ngowaka koi'iwasi de wosongenokau.

²¹ Ge'enaka de ma dodotoli womimodoka 'o bao-bao gumuna, ma 'una mita 'awi ngowaka koi'iwasi de wosongenokau. Koge'ena mita 'idadi sigado yaruange,

²² de 'isigila sigado yatumudiingi. De ma do-dogumuku 'o ngeweka gumuna mita mosongene.

²³ Gee ma 'orasi 'o nyawa yosonge-songenoka yomomiki, to nagu'una wi wekata 'o ngeweka gumuna? Sababu yatumudiingi go'ona yoodumu mingaamokokau!"

²⁴ 'O Yesus wosango, "Ngini nia di-dibangi 'isowono ma sala. Sababu ngini koniasahewa 'o Buku 'Itebi-tebini de ma Jo'oungu ma Dutu 'awi kuasa.

²⁵ Sababu nako 'o nyawa yosonge-songenoka yomomikie, ge'ena koyongaamokuawau, ma dua 'ona yo'ahu 'isoka 'o mala'ekati 'o sorogaaka.

²⁶ De mita ma ngale 'o nyawa yosonge-songenoka yosimomikoli, koniabacawasi 'o Musa 'awi bukuoka gee 'o 'ubutu 'iluru-lurusu? Ge'ena dau ma bo-bulaka 'isilefoku ma Jo'oungu ma Dutu kawongosekau 'o Musaka, 'Ngoi ne'ena ma Jo'oungu ma Dutu gee 'o Abraham, 'o Ishak, de 'o Yakub 'isuba-suba.'

²⁷ Ma Jo'oungu ma Dutu gu'una ge'ena koyosonge-songenuwa manga Jou. 'Una ge'ena 'o nyawa yo'ahu-'ahu wisuba-suba. Ngini nia di-dibangi 'isowono ma sala!"

²⁸ Ge'enaka de 'o 'agamaka wodoto-dotoko wimoi waino wosigisene 'o Yesus de 'o Sadukioka yomabi-bicara. 'O 'agamaka wodoto-dotoko gu'una wolega-lega 'ena 'o Sadukioka manga bicara 'iodumu 'o Yesus wasangokau ma sureka, so 'una wosano 'o Yesusika, "'O besesongo 'iodumu ge'ena ka'ena 'ifoloi ma dekuoka?"

²⁹ 'O Yesus wosango, "'O besesongo ma di-disiraka de ma dekuoka ge'ena la: 'Ee, Israel ma nyawa! Ma Jo'oungu ma Dutu gee powisuba-suba, 'una ge'ena ma Jou womatengo-tengoka.

³⁰ Winidora ma Jo'oungu ma Dutu gee winisuba-suba de nia singina ma gou-goungu, de nia 'ahu, de nia 'akali, de nia guata 'iodumu.'

³¹ 'O besesongo modidi gee ma dekuokali ge'ena la: 'Niakidora 'o nyawaka 'isoka ngini ma sirete nimadora!' Koi'iwau 'o besesongo 'iregu 'ifoloi 'idaduie de 'o besesongo ngai modidi ge'ena."

³² Ge'enaka de 'o 'agamaka wodoto-dotoko gu'una kawongosekau 'o Yesusika, "Posironga yadaenoka 'Aba Guru! Nongose 'ato ma Jouou gu'una ma Jo'oungu ma Dutu womatengo-tengoka, de koi'iwau 'o jo'oungu ma dutu 'iregu.

³³ De 'o nyawa salingou widora ma Jo'oungu ma Dutuka de manga singina ma gou-goungu, de manga 'akali de manga guata 'iodumu. De salingou yakidora 'o nyawaka, 'isoka 'onali ma sirete yomadora. Ge'ena 'ifoloi yaowa de gee yosisuba 'o su-suba yatuu-tuuku de 'o su-suba 'iregu-regu gee yosisuba ma Jo'oungu ma Dutuka."

³⁴ 'O Yesus wimake 'o 'agamaka wodoto-dotoko gu'una 'awi sa-sango 'ena ma sureka, de kawongosekau 'unaka, "Ngona rekeni nowosangoka ma Jo'oungu ma Dutu 'awi pareteka." Ge'ena 'ipasa de komoiwau yomoroini yosano 'o Yesusika.

³⁵ 'O Yesus wodotoko ma gu-gudaioka ma Jo'oungu ma Dutu 'awi Woa 'isure-sureka de wosano, "Kokia so 'o 'agamaka yodoto-dotoko yongose 'ato ma Koana Wosilaha-laha ge'ena 'awi 'asali 'o Dautino?

³⁶ 'Ena momongo 'o Dautu ma sirete 'o Ngomasa 'Itebi-tebini wikuasano so kawongosekau, 'Ma Jou wongose 'ai Jouka: Tonigoraka nodadi Koana la nopareta de de ngoi, sigado nisa-saturuu takidiai yo'isene ngonaka.'

³⁷ So nako 'o Dautu ma Koana wosilaha-lahaka wisironga ''Ai Jou', kokia so 'una 'awi 'asali 'o Dautino?" 'O nyawa manga gudai yoduaka ma sala yosigisene to 'una 'awi do-dotoko.

³⁸ De 'una wodotokoli 'onaka wongose 'ato, "Nimasitiari 'o 'agamaka yodoto-dotoika. 'Ona yoduaka yotagi-tagi de manga juba 'ikaku-kakuruku yomasinoaku de yoduaka yakihoromati 'o pasarioka.

³⁹ 'Ona yoduaka yogogere ma bionuku nako 'o lo-lomu ma woaka bolo 'o rameka la 'o nyawa yakimake.

⁴⁰ 'Ona yakisihaga 'o bao-baoka, de yakikaeluku so manga woa ma ya'oraka. Ma ngale yomadidumu manga di-diai 'ito-torou ge'ena, 'ona yolahidoa yato-to'ingoka. To 'ona manga hukumani dua 'itubuso!"

⁴¹ Gee 'o Yesus wogogeruku 'o su-suba ma ngiiku ma dateoka ma Jo'oungu ma Dutu 'awi Woa 'isure-sureka, de wolega-lega 'o nyawa 'o pipi yodonoa ge'ena ma ngiiku. Manga gudai yokaya-kaya 'o pipi yodonoa ma amoko.

⁴² Ge'enaka 'o bao-bao mimoi mosusa-susa mita moboa. Muna mita maino 'ami su-suba mo'otaka, sioko mi pipi ge'ena ka 'o gobangi modidioka so ma ngale ka ma etaka.

⁴³ So 'o Yesus wi do-domoteke waki'asokino de kawongosekau 'onaka, "Niolega-lega ne'ena: 'O bao-bao mosusa-susa gumuna 'ifoloi 'iamoko modonoa 'o petiku nako posikatero de 'iregu-regu yoodumu.

⁴⁴ Sababu 'ona yokula ge'ena manga harataa 'ifoloiku. Ma 'o bao-bao gumuna ngaro mosaigalere ma sala, ma gee munaka 'iodumu mosidukulaka -- 'ena ge'enau maparaluu ma ngale mi 'ahu."

Markus

Video Markus 12

Ikuti Kami:

KONTAK | PARTISIPASI | DONASI