Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Kudian Isa Almasih muloi mangecek jo parumpamoan kabake imam-imam kapalo, guru-guru agamo sarato jo pamimpin-pamimpin Yahudi tu. Baliau mangatokan, "Adolah surang urang nan mananami sabidang parak anggur, inyo mamasang paga di sakuliliang parak tu. Sudah tu inyo manggali lubang untuak tampaik marameh anggur, inyo managakkan pulo gulang-gulang tampaik manjago. Sasudah tu inyo mampasaduwokan parak tu kabake babarapo urang pakarajo, sudah tu inyo barangkek ka nagari lain.

² Kutiko lah tibo masonyo musin ma ambiak buwah anggur, urang tu manyuruah surang budaknyo payi kabake urang-urang nan bakarajo di parak tu, untuak mamintak bagiannyo.

³ Tapi urang-urang nan bakarajo tu manangkok budak tu. Kudian mananganinyo, sudah tu disuruahnyo budak tu babaliak pulang, indak mambawok sabuwah alah jo.

⁴ Sudah tu nan punyo parak tu manyuruah pulo surang budaknyo nan lain. Tapi urang-urang nan bakarajo tu manokok kapalo budak tu, sudah tu inyo usie, inyo cacek sarato inyo kato-katoi budak tu.

⁵ Nan punyo parak tu manyuruah pulo, surang lai budaknyo nan lain. Tapi, dek urang-urang nan bakarajo di parak tu, dibunuahnyo pulo budak tu. Bakcando itulah sataruihnyo nan dipabuwek dek urang-urang nan bakarajo tu, kabake budak nan lain, banyak pulo nan bakcando itu: ado nan dilakak-inyo, ado pulo nan dibunuahnyo.

⁶ Siya lai kiniko nan ka dapek disuruahnyo dek nan punyo parak tu? Hanyo ado tingga surang lai, iyolah anaknyo sandiri nan sangaik dikasiahinyo. Akienyo, inyo manyuruah anaknyo tu payi kabake urang-urang nan bakarajo tu. Manuruik pikierannyo, 'anak ambo ko, lah musti di aromaik-i dek urang-urang tu.'

⁷ Tapi urang-urang nan bakarajo tu mangecek sasamo inyo, 'Iko nan tibo ko suwarihnyo bana komah. Molah kito bunuah anaknyo ko, buliah kito mandapek pusakonyo!'

⁸ Mako anak tu ditangkok, sudah tu dibunuah. Mayiknyo dicampakkan dek urang-urang tu kaluwa dari parak tu."

⁹ Sudah tu Isa Almasih batanyo, "Apo lai nan ka dipabuwek dek nan punyo parak tu? Lah jaleh inyo ka datang untuak ka mambunuah urang-urang nan bakarajo tu, sudah tu inyo manyarahkan paraknyo tu kabake urang nan lain.

¹⁰ Angku-angku tantu lah mambaco ayaik nan bakcando iko, nan tatulih di Alkitab, 'Batu nan indak tapakai dek urang tukang, lah manjadi batu sandi nan tarutamu.

¹¹ Iko adolah pabuatan Tuhan; baralah ka rancaknyo!'"

¹² Pamimpin-pamimpin banso Yahudi nan mandangakan parumpamoan tu, ba usawo nak ka manangkok Isa Almasih, dek karano inyo tawu baraso parumpamoan tu ditujukan dek Baliau kabake inyo. Tapi inyo takuik kabake urang nan banyak. Mako tapasolah inyo payi barangkek maninggakan Isa Almasih.

¹³ Babarapo urang Farisi, sarato jo babarapo urang nan tamasuak anggota Herodes, disuruah payi manjarek Isa Almasih, jo sagalo macam parkaro nan ditanyokan.

¹⁴ Inyo bi tibo kabake Isa Almasih sambia bakato, "Angku Guru, kami tawu baraso Angku adolah urang nan luruih, sarato indak tapangaruah jo pandapek siya-siyanyo. Angku ma aja sacaro taruih tarang, tantang apo nan katuju dek Allah, nan musti dikarajokan dek manusia, dek karano Angku indak mamandang ka urang. Nah, cubolah Angku katokan kabake kami, 'Manuruik paratuaran agamo kito, layi ko buliah kito mambayie pajak kabake Kaisar atau indak? Paralu koh kito mambayie pajak tu, atau indak?'"

¹⁵ Isa Almasih mangatawui kamunapiak-an urang-urang tu. Dek karano itu Baliau manjawab, "Apo sababnyo mangko angku-angku nak manjarek Ambo jo tanyo nan sarupo itu? Cubolah paliyekkan kabake Ambo agak ciyek pitih perak tu."

¹⁶ Mako urang-urang tu mambarikan pitih perak ciyek kabake Baliau. Sudah tu Baliau batanyo, "Gambar siya ko, sarato jo namo siya ko nan ado dipitih ko?" "Gambar Kaisar sarato jo namo Kaisar," kecek urang-urang tu.

¹⁷ "Nah, jikok baitu," kecek Baliau, "barikanlah kabake Kaisar apo nan patuik manjadi punyo Kaisar, sarato barikanlah kapado Allah apo nan musti manjadi miliak Allah." Urang-urang tu bi tacangang mandangakan jawaban Isa Almasih tu.

¹⁸ Babarapo urang dari golongan urang Saduki, bi tibo kabake Isa Almasih. (Urang-urang tu adolah golongan urang nan bapandapek, baraso urang nan mati, indak ka ba iduikkan doh.)

¹⁹ "Angku Guru," kecek urang-urang tu kabake Isa Almasih, "Nabi Musa, lah manyurekkan paratuaran nan bakcando iko untuak kito: 'Jikok ado surang laki-laki nan mati, tapi inyo indak punyo anak, mako karek-annyo musti mampabini jandonyo tu, supayo buliah mambari katurunan, untuak urang nan lah mati tu.'

²⁰ Ado tajadi, tujuah urang laki-laki nan badunsanak. Nan paliang tuwo babini, sudah tu inyo mati sabalun punyo anak.

²¹ Kudian adiaknyo nan kaduwo mampabini jandonyo tu, tapi adiaknyo tu mati pulo sabalun punyo anak. Kajadian nan sarupo iko tajadi pulo di adiaknyo nan katigo,

²² baitulah sataruihnyo sampai ka adiaknyo nan katujuah. Akienyo padusi tu pun maningga pulo.

²³ Isuak, di ari urang mati ba iduikkan baliak, jadi bini siya urang padusi tu? Dek karano, katujuah-tujuahnyo laki-laki nan badunsanak tu, lah mampabini inyo!"

²⁴ Isa Almasih manjawab, "Angku-angku iyo lah sabana kaliru. Dek karano angku-angku indak mangarati isi Alkitab, indak mangarati pulo jo kuwaso Allah.

²⁵ Jikok isuak urang-urang nan mati di iduikkan baliak, mako inyo indak ka bi balaki bini lai, inyo ka iduik saroman jo malekaik nan di sarugo.

²⁶ Alun adokoh angku-angku mambaco ayaik Alkitab, di kitab Nabi Musa nan mangatokan, baraso urang-urang nan mati di iduikkan baliak, sarato jo tantang samak baduri nan ba api nyalo tu? Di ayaik-ayaik tu tatulih, baraso Allah bakato kabake Nabi Musa, 'Adenlah Allah Ibrahim, Allah Ishak, Allah Yakub.'

²⁷ Allah tu, indak Allah urang nan mati doh. Baliau adolah Allah urang nan iduik. Angku-angku, iyo lah sabana-bana kaliru!"

²⁸ Sudah tu tibo pulolah surang guru agamo Yahudi, sato pulo mandangakan, apo nan dipabincangkan dek Isa Almasih jo urang-urang Saduki tu. Guru agamo tu lah mandanga, baraso Isa Almasih lah manjawab tanyo urang-urang tu sacaro tapek. Mako inyo batanyo pulo kabake Baliau, "Nama parentah nan paliang pantiang, di ateh sagalo parentah?"

²⁹ Isa Almasih manjawab, "Parentah nan partamu iyolah: 'Dangakanlah, oih banso Israel! Tuhan Allah kito tu, adolah Tuhan nan indak babilang.

³⁰ Cintoilah Tuhan Allah angkau tu, jo sapanuah ati angkau, jo saganok jiwa angkau, jo sadonyo aka pikieran angkau, sarato jo sagalo kakuatan angkau.'

³¹ Parentah nan kaduwo iyolah: 'Cintoilah sasamo manusia, bakcando angkau mancintoi diri angkau sandiri.' Indak ado lai parentah nan lain, nan labiah pantiang daripado parentah nan duwo ko."

³² Sudah tu, guru agamo tu bakato kabake Isa Almasih, "Tapek bana tu Angku Guru! Iyo sabana batua tu sagalo nan Angku katokan tu: Tuhanlah Allah nan indak babilang, indak ado lai Allah nan lain.

³³ Manusia musti mancintoi Allah jo sapanuah atinyo, jo kasadonyo aka pikierannyo, sarato jo sagalo kakuatannyo. Inyo musti pulo mancintoi sasamo manusia, samo jo bakcando inyo mancintoi dirinyo sandiri. Itu labiah ba arago di mato Tuhan, daripado mampasambahkan karoban nan babaka, atau pun karoban-karoban nan lainnyo."

³⁴ Isa Almasih lah mandangakan, baraso guru agamo Yahudi tu lah manjawab sabana tapek. Baliau bakato kabake guru agamo tu, "Angku lah ampia mandakek ko, ka Karajaan Allah." Sasudah tu, indak surang juwo lai urang, nan talok bi batanyo kabake Isa Almasih.

³⁵ Samantaro ma aja di Rumah Tuhan, Isa Almasih batanyo, "Baa mangko guru-guru agamo bi mangatokan, baraso Rajo Panyalamaik tu katurunan Nabi Daud?

³⁶ Padohal Nabi Daud sandiri -- dek karano di ilhami dek Roh Allah -- inyo mangatokan, 'Tuhan bakato kabake Tuhan ambo: duduaklah disabalah suwok-Den sampai Den jadikan musuah-musuah Angkau tunduak kabake Angkau.'

³⁷ Jadi, jikok Nabi Daud mangatokan Rajo Panyalamaik tu, 'Tuhan', dima pulo ka mungkin Baliau tu katurunan Nabi Daud?" Urang banyak nan ado di Rumah Tuhan tu, sangaik sukonyo mandangakan Isa Almasih ma aja.

³⁸ Baliau bakato kabake urang-urang tu, "Ingek-ingeklah taradok ka guru-guru agamo Yahudi. Inyo suko bajalan mamakai jubah nan panjang, suko di aromaik-i di pasa-pasa.

³⁹ Inyo suko duduak di tampaik nan ta aromaik di rumah ibadaik, baitu pulo di tampaik urang baralek.

⁴⁰ Inyo kicuah urang marando, sudah tu rumahnyo di ambiak pulo. Untuak panyawok-i karajo buruaknyo tu, inyo bae badowa sapanjang tali baruak. Isuak inyo ka manarimo ukunan nan barek!"

⁴¹ Kutiko Isa Almasih duduak bakatantangan, jo kotak pitih pasambahan di Rumah Tuhan, Baliau mamparatikan urang-urang nan mamasuakkan pitih ka kotak tu. Sambuah urang-urang nan kayo, nan bi mamasuakkan pitih banyak ka kotak tu;

⁴² dalam pado itu, tibo pulolah surang urang marando nan bansaik. Inyo mamasuakkan duwo buwah pitih timbago, iyolah pitih badarai nan paliang ketek aragonyo.

⁴³ Mako di imbaulah dek Isa Almasih pangikuik-pangikuik-Nyo, sudah tu Baliau bakato, "Paratikanlah ko: Urang marando nan bansaik tu, labiah banyak mamasuakkan pitih ka kotak pitih pasambahan, daripado nan dimasuakkan dek kasadonyo urang-urang nan lain ko.

⁴⁴ Dek karano, urang-urang nan lainnyo ko mambarikan dari kalabiahan aratonyo. Tapi urang marando tu, biyapun inyo sangaik bansaik, inyo mambarikan kasadonyo apo nan ado dinyo -- malah inyo barikan apo nan diparalukannyo untuak panyambuang iduik."

Markus

Video Markus 12

Ikuti Kami:

KONTAK | PARTISIPASI | DONASI