Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Wawu ti Isa ma lomulayi lobisala ode olimongoliyo to delomo lumade odiye, ”Woluwo tawu ngota lomuo mao ilengi tuwawu wawu lopomulo mao lo angguru teto lapatao bilalaliyo mao pali-palito. Tiyo lomuwangao huta tambati pomitodeliyo angguru wawu lohutu mao monara tuwawu podahaliyo ilengi boyito. Tiyo loikaraja mao ilengi boyito to ta hepokkarajawa ilengi wawu hasililiyo motayadu, lapatao tiyo ma lonao ode lipu wuwewo.

² Tou ledungga sembo lo umolipu angguru, tiyo lomarenta mota wato ngota ode ta loti kara-karaja ilengi boyito mota mololimo tayadiyo lonto olimongoliyo.

³ Bo wato boyito ma yilaupiyo wawu pilobubohe mayi limongoliyo lapatao pilopowuwalingiyo wolo udila dedelo wolo-wolo.

⁴ Lapatao tiyo lomarenta mota poli watoliyo wuwewo ode olimongoliyo. Wato boyito pilobubohe mayi limongoliyo to lunggongo wawu pilo'olitayi limongoliyo.

⁵ Lapatao tiyo lopoahu mota wato wuwewo. Bo wato boyito olo yilinggila mayi limongoliyo nyawa. Wawu donggo ngohuntuwa pomao wato wuwewo ta heilahulaliyo mota, woluwo ta hepilobuboheliyo mayi wawu woluwo olo ta hepilate mayi limongoliyo.

⁶ Masatiya bolo ngota ta dipo piloponaoliyo mota, ta boyito yito walaiyo ta otoliangiyo. Bo pulitiyo mao debo piloponaoliyo mota ode olimongoliyo, tiyo loloiya odiye, ’Walau'u ma isingiyo limongoliyo.’

⁷ Ta hekarajawa ilengi boyito lobisala to wolota limongoliyo lomao odiye, ’Tiyo boti ta mololimo warisi liyamoliyo. Dulo yinggilanto nyawa tiyo boti, alihu harata liyamoliyo mali ulanto.’

⁸ Walaiyo boyito ma piloheupa limongoliyo wawu yilinggila limongoliyo nyawa lapatao pilomai limongoliyo ode bulemengo ilengi.”

⁹ Ti Isa lohintu ode olimongoliyo odiye, ”Masatiya wolo u ma pohutuwo li tuwani ta ahu'uwo lo ilengi boyito? Tiyo ma monao mota lohihilawo wawu ma mota lopuwaliyo nga'amila ta hekarajawa ilengi boyito, lapatao ilengi boyito ma pomaracayaliyo ta wuwewo.”

¹⁰ Ti Isa loloiya poli ode olimongoliyo odiye, ”Tantu timongoli ma helopobaca ayati u tula-tulade to kitabi odiye, ’Botu u pilomai lo ta hepomeseliya ma lowali botu u ohunaliyo da'a.

¹¹ U odito huhutu lo Allahuta'ala Eya; u mo'olinggolabu to bibilohunto.’ Odito u tula-tulade to kitabi.”

¹² Lapatao timongoliyo ta lo'odungoheo lumade boyito ma hipongusahawa moheupa oli Isa, sababu timongoliyo ma longarati deu timongoliyo ta hepatujuwo-Liyo lo lumade boyito. Bo timongoliyo mohe lo tawu ngohuntuwa. Lapatao timongoliyo lolola mao oli Isa.

¹³ Lapatao woluwo ngololota tawu ta o pahamu Parisi wawu ngololota anggota lo parteyi ta hepodukungiya oli olongiya Herodes ilahula mota lo mongotauwa lo imamu wawu mongoahali lo Tawurat wawu ta dudula'a-dudula'a tawu lo Yahudi, mololohe dalalo wololo alihu ti Isa tala mobisala.

¹⁴ Tawu-tawuwala boyito lonao mota ode li Isa wawu loloiya odiye, ”Guru, otawa lamiyatiya Ito boti ta o hilawo motulidu, sababu ti Guru dila hemopobedawo lo tawu, bo ti Guru hemongajari to tawu tomimbihu dalala motulidu ode Allahuta'ala. Amiyatiya mohintu oli Guru: Moturuti mao aturangi lo agama, mowali momayari hasili ode oli kayisar olongiya lo Roma meyalo dila? Ito botiya musi momayari hasili meyalo dila?”

¹⁵ Bo hila limongoliyo u munapiki boyito ilotawa li Isa wawu Tiyo loloiya odiye, ”Longola timongoli mohimontala ola-U? Nte tonu ola-U doyi ngopita tala'a bilohe-U!”

¹⁶ Timongoliyo ma lodelo mayi doyi ngopita tala'a ode o-Liyo. Ti Isa lohintu ode olimongoliyo odiye, ”Gambari wawu tanggulita u woluwo to doyi boyito?” Tameti mongoliyo odiye, ”Gambari wawu tangguli kayisar.”

¹⁷ Ti Isa loloiya ode olimongoliyo odiye, ”Uli kayisar wohiya mao ode oli kayisar wawu ulo Allahuta'ala wohiya mao ode Allahuta'ala.” Timongoliyo ma hiheraniya lo'odungoheo wolo u yiloiya-Liyo mayi boyito.

¹⁸ Lapatao woluwo ngololota tawu ta o pahamu Saduki lonao mayi ode oli Isa. Timongoliyo dila paracaya deu ta ma lopowate muli mobongu mayi monto kuburu. Timongoliyo lohintu ode li Isa odiye,

¹⁹ ”Guru, ti nabi Musa yito loluladeyi parenta ode olanto odiye, ’Wonu ta lolai ngota yilate lolola mao dileliyo bo dila lolola mao walao wawu tiyo o wutata ta lolai, wutatiyo boyito musi monika wolo dileliyo wawu mongohi mao walao ode wutatiyo ta ma yilate boyito.’

²⁰ Woluwo mongololai mohutata pitulota. Ta mohuhula lonika wolo tabuwa ngota wawu yilate wolo udila lo'otapu walao.

²¹ Lapatao ta oluwoliyo lonika wolo tabuwa boyito wawu yilate olo wolo udila lo'otapu walao. Odito olo ta otoluliyo.

²² Wawu odito turusi mola sambe demola ta opituliyo dila lolola mao walao. Lapatao tabuwa olo boyito yilate.

²³ To dulahu ta lopowate ma muli mobongu mayi, tatonu to wolota lo ta pitulota boyito ta mowali hiyaliyo lo tabuwa boyito? Sababu pitu-pitulota timongoliyo ma lonika wolo tabuwa boyito.”

²⁴ Tameti Isa ode limongoliyo odiye, ”Timongoli ma yilapalo, sababu timongoli dila mongarati lo tuwango kitabi meyalo kawasa lo Allahuta'ala.

²⁵ Sababu to wakutu ta lopowate muli popotumulo mayi lo Allahuta'ala, tawu didu monika meyalo poponikaliyo, bo hetumula odelo malaikati to soroga.

²⁶ Wawu tomimbihu obobongu mayi lo ta ma lopowate, tantu ma pilobaca limongoli to kitabi li nabi Musa tomimbihu hiyambunga yilumaito. Lonto hiyambunga boyito woluwo Pirimani lo Allahuta'ala ode oli nabi Musa odiye, ’Wau botiya Allahuta'ala ta hetubo le Ibrahim, le Ishak wawu te Yakob.’”

²⁷ Ti Isa loloiya ode olimongoliyo odiye, ”Tiyo dila Allahuta'ala ta hetubo lo ta lopowate, Tiyo Allahuta'ala ta hetubo lo ta hetumula. Timongoli otutu ma yilapalo.”

²⁸ Lapatao woluwo ta ahali lo Tawurat ngota lo'odungohe oli Isa bubutola wolo tawu-tawuwala ta o pahamu Saduki. Wawu otawaliyo lo ta ahali lo Tawurat boyito deu tameti Isa boyito mopiyohu. Tiyo lodudula mota ode oli Isa wawu lohintu odiye, ”Guru, parenta tonu u lebe paralu to nga'amila parenta?”

²⁹ Tameti Isa odiye, ”Parenta bohuliyo tingohiyo odiya, ’Po'odungohe limongoli, weyi timongoli bangusa lo Israel! Allahuta'ala Eyanto yito bo tuwawu.

³⁰ Otolianga lomao Allahuta'ala Eyamu wolo hilawo liya-liyatu, wolo jiwamu nga'amila, wolo nga'amila akalimu wawu wolo nga'amila lotolumu.’”

³¹ Ti Isa loloiya poli odiye, ”Parenta u oluwoliyo tingohiyo odiya, ’Otolianga mao tawu ta titiliya wolemu odelo yio motoliango batangamu lohihilawo.’” Lapatao ti Isa lohumbutao odiye, ”Diduluwo mao parenta wuwewo u lebe molanggatao lo parenta moheduluwo boti.”

³² Lapatao ta ahali lo Tawurat boyito loloiya odiye, ”Gaga uwito Guru, banari u yiloiyanto boyito deu Tiyo Eya yito bo tuwawu wawu diyaluwo Eya wuwewo ngopohiya Tiyo Allahuta'ala.

³³ Wawu memangi manusiya musi motoliang-Iyo wolo hilawo liya-liyatu wawu wolo nga'amila pikirangi wawu wolo nga'amila lotolo. Wawu manusiya olo musi motolianga to manusiya ta titiliya woliyo odelo tiyo motoliango batangaliyo lohihilawo. U odito lebe mopiyohu popobandingiyo mao wolo nga'amila kurubani.”

³⁴ Ti Isa lo'onto mao deu tawu boyito lolametao wolo otutu bijaki. Tiyo loloiya ode oliyo odiye, ”Yio ma didu molamingo to Yiladiya lo Allahuta'ala!” Lapato uwito diduluwo ngota mao ta donggo barani mosuali lo uhetuwa-tuwawuwa oli Isa.

³⁵ Lapatao tou ti Isa hemongajari poli to pango bele lo Eya, Tiyo loloiya odiye, ”Wololo mongoahali lo Tawurat hemopolele deu Olongiya ta pilojanjiya lo Allahuta'ala boyito waliya li nabi Dawud?

³⁶ Hiyambola ti nabi Dawud lohihilawo sababu tiyo lololimo Pirimani lo Allahuta'ala, tiyo loloiya odiye, ’Allahuta'ala Eya lopotunggulayi lo Pirimani ode Eyau odiye: Potihulo'olo to ambahu olowala-U sambe nga'amila musu-Mu popota'alukuwo-U mayi to tibawa lo oatu-Mu.’”

³⁷ Ta ngohuntuwa da'a boyito lodungohe o-Liyo wolo uhewengahe.

³⁸ To delomo pongajari-Liyo ti Isa loloiya odiye, ”Po'odaha timongoli to mongoahali lo Tawurat. Timongoliyo motohilawo henao-naowa hepakeya lo jumba huhulaya'a wawu motohilawo hurumatiyo lo tawu to patali.

³⁹ Timongoliyo olo motohilawo motihuloa to sapu awwali to bele hepotabiyalo. Wawu to pesta timongoliyo motohilawo motihuloa to huhuloa lo ta dudulamango.

⁴⁰ Timongoliyo hepo'opulita haku lo mongojanda wawu timongoliyo hepoduawa huhulaya'a, alihu ontonga mayi lo tawu timongoliyo ta salehe. Bo ma medungga mayi wakutuliyo timongoliyo boti ma mololimo hukumani lebe mobubuheto lonto Allahuta'ala.”

⁴¹ To wakutu tuwawu ti Isa hulo-huloa tataluwa lo kasi hepopomasowaliyo lo doyi to bele lo Eya. Tiyo hemopo'obilohe tawu ngohuntuwa hepopomasowa mao lo doyi to kasi boyito. Ta hekayawa ngohuntuwa ta helopomaso mao lo doyi to kasi boyito wolo jumula ngohuntuwa.

⁴² Ta janda ngota misikini lonao mayi lopomaso lo doyi dulopita tala'a, deuwitoyito u ngointi da'a nilayiliyo.

⁴³ Lo'onto mao u odito boyito, Tiyo lotiyangayi mongomuri-Liyo wawu loloiya odiye, ”Tutuliyotutu polele-U mayi ode olimongoli: Ta janda misikini boyito longohi lebe-lebe popobandingiyo mao lo tawu nga'amila ta lopomaso mao lo doyi to kasi boyito.

⁴⁴ Sababu timongoliyo nga'amila longohi lonto lebeliyo lo harata u woluwo to olimongoliyo, bo ta janda boyito longohi lonto omisikiniliyo, deuwitoyito nga'amila u woluwo to oliyo u mowali pongonggosiliyo.”

Markus

Video Markus 12

Ikuti Kami:

KONTAK | PARTISIPASI | DONASI