Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 No'iduduimai kon tua ki Yesus mulaidon bui nosingog takin nomakeí im porumpama'an kon imang mita itoi, guru mita in agama bo itoi mita intau Yahudi. Kai-Nia, "Oyuíon tobatuí intau nomuḷa kon anggur kong gobaínya. Gobaí tatua ilibunya sinondok. Bo pinogaidannya doman kon tampat pomomugutan kon bungai in anggur. Sia nogaid doman kon ḷangkeang poḷoḷukadan. Onda intua pinotomoyoknya ing gobaí anggurnya tatua kon tongonumai intau mototomoyok bodongka minayak in sia kon lipuí inta moyayuk.
2 Naonda iwakutunyadon posipuían kom bungainya, ki togi gobaí tatua nopotabaí im bobantungnya minayak kom mototomoyok mita tatua sim mogamaí kon silainya.
3 Ta'e dinomok im mototomoyok mita tatua im bobantung tatua. Binongkung monia bodongka pinokipobuian takin diaí doman inogoian in onu bo onu.
4 Ki togi gobaí tatua nopotabaí bui im bobantungnya ibanea. Ta'e binontung doman i mototomoyok mita tatua kon uḷu im bobantung tatua poḷat inuntun bo siniba-sibaíanmai.
5 Ki togi gobaí tatua nopotabaí bui im bobantungnya ibanea. Ta'e ilimod monia im bobantungnya tatua. Bo naí doman tua im pinogogogaid monia kom bobantung mita inta no'iduduimai: oyuíon binongkug, oyuíon doman ilimod.
6 Daí ki inepa im mota'au potabaí i togi gobaí in tana'a makow? Dongkadon tobatuí intau, tuata ing ki adiínya tontanií inta totok ing kotabi-tabinya. Pangabisannya pinotabaínyadon ing ki adiínya tatua minayak kom mototomoyok tatua. Pinikirnya, 'Pasti hormatonbií monia ing ki adiíku tana'a.'
7 Ta'e noko'ontongmai im mototomoyok mita tatua kon adií tatua, nosigumanan mosia, 'Sia tana'a inta mowaris kong kapunya'an tana'a. Koligai baí limodon naton in sia, baí mo'ilabuídon ko'i naton ing gobaí tana'a!'
8 Daí dinomokdon monia in adií tatua bo ilimod. Mayatnya iḷumbuí monia kon ḷuai ing gobaí tatua."
9 Ki Yesus noliboí, "Yo onu in aidan i togi gobaí tatua in tana'a? Pasti angoionnyabií putuían im mototomoyok mita tatua, bo potomoyoknyadon kon intau ibanea ing gobaí anggur tatua.
10 Bo tantuí kinobaca'an bidon monimu in ayat tana'a kom bonu im Buk Mosuci, 'Batu inta diaí pinakeí im mogogaid kom bangunan nobaliídon batu inta totok im moponting.
11 Tuata in inaidan i Tuhan; totu'u mopia!'"
12 Daí itoi mita Yahudi inta nokodongog kom porumpama'an tatua, moramijidon totok modomok ko'i Yesus, sing kinota'auan monia kom porumpama'an tatua pinopomakusudbií i Yesus ko'i monia. Ta'e mo'ondok mosia kon intau moaíntoí. Daí sinaḷaíanmai monia ing ki Yesus.
13 Onda intua tongonumai intau im Parisi bo intau i Herodes pinotabaí minayak ko'i Yesus bo moliboí sim potayakan monia kon taḷaí-Nya.
14 Mosia namangoi bo noliboí ko'i-Nia, "Pak Guru, kinota'auan nami ki Pak Guru mojujur bo diaí mo'ondok kon singog i inekabií. Taran-tarangan ki Pak Guru i motunduí kon soaáḷ inta kino'ibog i Allah aidan in intau, sing ki Pak Guru in diaíbií mopoyoposi intau. Daí tuamai pogumankah ko'inami, 'Aka podudui atorang agama naton, mota'au degaí moguboli kom pajak ko'i Kaisar andeka diaí? Musti moguboli kom pajak ing kita mongo diaí?'"
15 Ta'e kinota'auanbií i Yesus ing kino'momunapik monia tua.Daí iliboí-Nya, "Nongonu sim mo'ikow mo'ibogbií motayak kon taḷaí-Ku? Po'ontongka ko'i-Nakoí in tobatuí doit perak."
16 Daí inogoi monia ko'i Yesus in tobatuí doit perak. Ki Yesus noliboí ko'i monia, "Gambar bo tangoi ine in na'a?" "I Kaisar," tubag monia.
17 "Daí aka natua," kai Yesus, "Ogoi ko'i Kaisar onu in nobalií kapunya'an i Kaisar, bo ogoi ko'i Allah onu ing kapunya'an i Allah." Mosia nongoherang nokodongog kon singog-Nya tatua.
18 Tongonumai intau nongkon golongan Saduki namangoi ko'i Yesus. (Golongan Saduki na'a inta noguman kon intau minatoi in diaíbií biagon bui.)
19 Mosia noliboí ko'i Yesus, "Pak Guru, ki Musa nomais kon hukum tana'a ko'inaton: 'Aka tobatuí ḷoḷaki matoi bo diaípa kogadií, daí ki utatnya mustibií mobuḷoi ko'i baḷunya, simbaí mobogoi ing katurunan ko'inia inta ai minatoi tua.'
20 Noko'imontandon nobalií ko'i monia pitu mogutat. Inta guya-guyang nobuḷoi, bo minatoi ta'e diaípa kogadií.
21 Onda intua ki ai-ainya induanya nobuḷoi ko'i baḷunya tua, ta'e minatoi domandon in sia bo diaípa doman kogadií. Soaáḷ tatua nobalií doman ko'i utatnya inta intoḷunya,
22 no'idapot ko'i utatnya impitunya. Pangabisan bobay tatua minatoi doman.
23 Aka kon singgaidon inta kobiagan bui intau minatoi, yo ki buḷoi ine im bobay tatua? Sin taya pitu mogutat tua komintandon nononibuḷoi ko'inia!"
24 Ki Yesus noguman, "No'itaḷaídon totok in raian monimu. Diaí komangalean monimu im Buk Mosuci andeka kawasa i Allah.
25 Sin aka intau mita minatoi mobiagdon bui, yo mosia in diaí bidon motonibuḷoi bui, ta'e mosia im mobiag bidon naíonda bo malaekat kon soroga.
26 Bo soaáḷ intau minatoi mobiag bui, degaí diaípa kinobaca'an monimu kom bonu im buk i Musa soaáḷ diaít inta nodokot tua? Kom bonu in ayat mita tatua pinais kon ki Allah noguman ko'i Musa, 'Aku'oibií na'a ki Allah i Abraham, i Ishak bo i Yakub.'
27 Ki Allah tua in de'emanbií Allah intau minatoi. Sia ki Allahbií intau nobiag. No'itaḷaídon totok im pororai monimu!"
28 Bo namangoidon tobatuí mototunduí kon agama nokidongog kom pinongonguman i Yesus bo in intau mita inta nongkon golongan Saduki tatua. Mototunduí kon agama tatua noko'ontong kom mopiabií totok im pinotubag i Yesus kon intau mita tatua. Daí sia noliboí ko'i Yesus, "Degaí parentah ta'onda im paling moponting nongkon bayongan parentah?"
29 Tubag i Yesus, "Na'a im parentah inta paling moponting: 'Indongogaidon, hei intau Israel! Ki Tuhan tua ki Allah naton, ki Tuhan tua tongaíbií tobatuí.
30 Totu-totu'udon kotabi ing ki Tuhan Allahmu, takin bayongan ginamu, jiwamu, raianmu bo bayongan ropotmu.
31 Bo na'a im parentah induanya: 'Kotabibií in tumpaḷa intau naí kototabimu kon awakmu tontanií.' Diaí bidon parentah ibanea makow im moponti-ponting nongkon parentah doyowa tana'a."
32 Daí kai mototunduí kon agama tatua, "No'itutui totok intua Pak Guru! Totu'ubií ing guman-Mu: Tongaíbií tobatuí in Tuhan, Sia tuata ing ki Allah, bo diaíbií ibanea makow.
33 Bo intau im mustibií totu-totu'u motabi ko'i Allah kom bonu ing ginanya, bo kom bonu in raiannya bo ropotnya. Bo mustibií doman in sia motabi kon tumpaḷa intau naí kototabinya kon awaknya tontanií. Tuabií im mopia-pia nongkon mobogoi in sosumbah inta kurban tuba'an bo kurban mita ibanea ko'i Allah."
34 Inontong i Yesus kom mototunduí kon agama tatua mopiadon im pototubagnya. Daí ki Yesus noguman ko'inia, "Ikow motoyongdon mobalií anggota in umat i Allah." Nopaḷut makow kon tua diaídon tobatuímai intau nokobalií mopoliboí-liboí ko'i-Nia.
35 Wakutu ing ki Yesus yogot mobogoi in totunduí kom bonu im Baḷoi Tuhan, noliboí in Sia nana'a, "Naí ondabií degaí sim mototunduí mita kon agama mota'au moguman kon ki Raja Mopoposaḷamat tua katurunan i Daud?
36 Padahaḷ ki Daud tontanií wakutu ing kinawasa'an Roho i Allah -- noguman, 'Ki Tuhan nogumandon ko'i Tuhanku: lituídon kon dotaí ing koḷanan-Ku modapot im potungkud-Ku im bayongan saturu-Mu.'
37 Daí aka ki Daud monangoi ko'i Raja Mopoposaḷamat tatua 'Ki Tuhan', yo naíondabií kon Sia tua in turunan i Daud?" Bayongan intau inta kom bonu im Baḷoi Tuhan, komintan mosanang ing gina mokodongog ko'i Yesus notunduí.
38 Sia noguman ko'i monia, "Mokopo'ingatdon kom mototunduí mita kon agama. Mosia mo'ibog-ibog modondaḷoi bo mogi jubah moḷanggoí bo mo'ibo-ibog doman hormaton kom pasar.
39 Mosia mo'ibo-ibog doman limituí kon tampat inta mopia aka kom bonu im baḷoi pososambayangan bo kom poramean mita.
40 Mosia monguboḷ kon intau mita inta dongkadon boba-bobay bo mogagow kom baḷoi monia. Olingoian monia in aid mita monia mora'at tatua, takin sambayang inta mobanat. Mosia tua in notantuí bidon kom motarimabií kon hukuman inta lebe mobogat!"
41 Kon singgai tobatuí ki Yesus ilimituí sinumayow ing kas pobobonuan kon sosumbah kom Baḷoi Tuhan poḷat nonarukira makow kon intau mita mopobonu in doit monia kon kas tatua. Nobayong intau no'oyuíon nopobonu in doit mobayong.
42 Kon tua namangoi domandon in tobatuí intau inta dongkadon boba-bobay inta nobiag nobogaí. Sia nopobonu doman in doitnya tambaga doyowa, doit logam inta paling mo'intok in nilainya.
43 Daí ki Yesus nogoinií kom murií-Nya mita bo noguman ko'i monia, "Tarukira in na'a: Intau inta dongkadon boba-bobay bo inta nobiag doman nobogaí tua in nobogoi im ma'anto-antoí nongkon bayongan inta inogoi in intau mita ibanea.
44 Sim mosia nobogoi nongkon kalebean monia. Ta'e intau inta dongkadon boba-bobay tatua umpakah nobiag nobogaí totok in sia, ta'e sia nobogoi im bayonganonu inta oyuíon ko'inia -- inta totokpabií im paraḷunya pakeíon kong kobiagannya."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA