Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Bọu e Mawu Yesus nanětạ e nẹ̌bisara ringangu papinintu su manga imang těmbonange manga mananěntiro agama ringangu manga mananěmbonangu Yahudi e. Mawu Yesus něhengetang, "Piạ e sěngkatau nẹ̌suangu anggorẹ̌ su wawaelange, mase nipagarenge nal᷊ikụ. Bọu ene i sie namangka l᷊ohang baug'u pěmaměhaseng anggorẹ̌, mase něndarisịu wal᷊en pělahapaěng. Bọu ene i sie nakitamangu sasuang u anggorẹ̌ ene su měndal᷊ukadẹ̌ pirang katau mase i sie něbuạ sol᷊ong banua wal᷊ine.

² Sarạeng seng tempone manipo wuang anggorẹ̌, i sie rimoloh'u ěllange sěngkatau sol᷊ong anum mělahal᷊ẹ̌ u sasuang ene mědeạu měnarimạ bageang e.

³ Kutẹu manga mělahal᷊ẹ̌ e měngkatewe něnamẹ ěllang ene. Bọu ene nipahangeng i sire, kụ nioro pinakapul᷊ẹ tạ ul᷊ene apa-apa.

⁴ Mase taghuangu sasuange saụewe rimoloh'u sěngkatau ěllange wal᷊ine. Kutẹu manga mělahal᷊ẹ̌ e kawe němpaměbahẹ̌ těmbọ u ěllang ene, mase nanokolẹ̌ apid'u kapẹ̌parohange.

⁵ Taghuangu sasuange saụewe rimoloh'u sěngkatau ěllange wal᷊ine. Kai i sire kawe němate ěllang ene. Kụ kerene lai pẹ̌kakoạ i sire su kal᷊awọu ěllang bal᷊ine, tuhụ e: piạ u niwanggo ringangu piạbe lai nịpapate.

⁶ I sai lai ini e wẹ̌dang botonge ikaroloh'u taghuang sasuang e? Kate nal᷊ěmbe sěngkatau, kụ samatang ahuse ikẹ̌kěndagẹ̌. Kụ samurine i sie rimoloh'u ahuse sol᷊ong anum manga mělahal᷊ẹ̌ e. 'Nal᷊ahẹ u ahusẹ̌ku e sarungbe ilahunggeẹ̌,' su tiněnnane.

⁷ Kutẹu manga mělahal᷊ẹ̌ ene němpahumbisara sěmbaụ su wal᷊ine, 'Ěndaị mẹ̌papusakạ e! Mahịe pateěng i kitẹ i sie, tadeạu makoạ si kitẹ pusakạ e!'

⁸ Tangu rariọ ene nisamẹ mase nipate. Kasuange nirěmmẹ i sire su l᷊ikud'u waelẹ̌ ene."

⁹ Mase Mawu Yesus nakiwal᷊o, "Apạe ngae sarung koateng u taghuang sasuang e? Nal᷊ahẹu i sie sarung sumongo kụ měmate si sire mělahal᷊ẹ̌ ene, kụ bọu ene měnarakangu sasuange su mělahal᷊ẹ̌ bal᷊ine.

¹⁰ I kamene nal᷊ahẹu seng bọu němpẹ̌basa ayetẹ̌ ini su ral᷊ungu Bukẹ̌ Susi e, 'Batu kụ ta nipakẹ u tukang e, ini e nakoạ batu pinẹ̌bukuange.

¹¹ Ini e munara'm Mawu Kasěllahenge; kụ enẹ e kaholẹ e!'"

¹² Tangu manga mananěmbonangu tau Yahudi apan nakaringihẹ̌ papinintu ene, mědẹ̌deạu měnamẹ Mawu Yesus, batụu i sire kai masingkạu papinintu ene ipětẹ̌tahino Mawu Yesus si sire. Kaiso i sire kai matakụ u taumata l᷊awọ. Tangu i sire němpẹ̌dal᷊eng naněntangken Mawu Yesus.

¹³ Pirang katau wọu tau Farisi ringangu wọu ghal᷊ipohon Herodes nirolohẹ̌ pěngẹ̌ngal᷊ạ bera su Mawu Yesus ringangu kakiwal᷊o.

¹⁴ I sire riměnta su anum Mawu Yesus kụ němpẹ̌bera, "Tuang Guru, i kami e masingkạ u i Tuang kawe matul᷊idẹ̌ dingangu lai tawe mẹ̌sasěmpị kapulun sai-sai. I Tuang mạněntirowe ringangu mal᷊ahẹ mạanung kapulun Duata su taumata, batụu i Tuang e tawe měmamamile ghatin taumata. Ho, kěnangko i Tuang pẹ̌bera si kami, 'Tuhụ ator'u agamang kitẹ e, botonge mamaehẹ̌ pajakẹ̌ su Kaisarẹ̌ arau tala? Harusẹ̌ i kitẹ mamaehẹ̌ pajakẹ̌ arau tala?'"

¹⁵ Mawu Yesus e masingkạu lulun sire měmpẹ̌mẹ̌mělle. I Sie simimbang, "Kawe unụe i kamene měmpěnal᷊ukạ si Siạ? Kěnangko todẹ Siạ doitẹ̌ sal᷊aka sěngkal᷊ěpa."

¹⁶ Tangu i sire němpanẹ̌gọen doitẹ̌ sal᷊aka sěngkal᷊ěpa. Mase Mawu Yesus nakiwal᷊o, "Kai ghahị i sai ringangu areng i sai ini e?" "Kaisarẹ̌," angkuěng i sire.

¹⁷ "Ho, kamageng kerene," angkuěng'u Mawu Yesus, "onggọ e su Kaisarẹ̌ apạewen tataghuanengu Kaisarẹ̌, dingangu su Mawu Ruata apạewen tataghuanengu Ruata." I sire mangkewen dimal᷊inaụ nakaringihẹ̌ si Sie.

¹⁸ Ene piạ e pirang katau wọu ghal᷊ipohon tau Saduki himaung su Mawu Yesus. (I sire kai wọu komol᷊angu apam mangěnna u taumata nate e tawe mẹ̌biahẹ̌ kapia.)

¹⁹ "Tuang Guru," angkuěng i sire su Mawu Yesus, "I Musa e namohẹ u tita ini waug'i kitẹ: 'Kereu sěngkatau esẹ mate kụ i sie wědang tawẹ anạe su kawinge, ute sěngkatau wọu anạ u sěmbaụ e hinong mamillasẹ̌ su wal᷊une tadeạu makahombangke pal᷊ahite waugu wahakạ e.'

²⁰ Nạung piạ i sire pitu tahatuari. Kaiakanenge nẹ̌kawing, mase nate wẹ̌dang tạ hitene.

²¹ Tangu tuarine karuane nẹ̌kawingu wal᷊une, kụ i sie mal᷊aing nate tawẹ hitene. Kakakoạ kerene mal᷊aing nariadi su tuarine katěllune,

²² kụ mětẹ̌tatuhụ sarạeweng kapitune. Pangěnsueěnge tangu tau wawine ene nate e lai.

²³ Su tempo'm pẹ̌bawangungu taumata nate kapia e, ute kawingken sai ngae tau wawine ene? U i sire pitu e seng bọu němpẹ̌kawing i sie kěbị!"

²⁴ Mawu Yesus simimbang, "I kamene mambeng nẹ̌sal᷊a kahěngang. Batụu i kamene tawe makal᷊aěnna Winohẹ Susi kerene lai kawasa'm Mawu Ruata e.

²⁵ Kụ kamageng manga taumata nate měmpẹ̌bangung kapia, i sire seng tawe saụ měmpẹ̌kawing, kaiso i sire saụ mẹ̌biahẹ̌ kere malaekatẹ̌ su sorga.

²⁶ Arawe taumata nate kụ ipẹ̌bangung kapia e, kai wědang ta nakạbasa i kamene su ral᷊ungu bukẹ̌ i Musa piạ běkeng gahundungu sumpinị dimaẹ tangu? Su ral᷊ungu manga ayetẹ̌ ene kạbawohẹ u Mawu Ruata e něhengetang si Musa, 'Kai Iạ e Ruatang Abraham, Duatang Ishak dingangu Ruatang Yakub.'

²⁷ Ruata ene wal᷊inewe Ruatan taumata nate. I Sie kai Ruatan taumata wiahẹ̌. I kamene kai tumanịu měsẹ̌sal᷊a ěnna!"

²⁸ Kutẹu narěntạe sěngkatau mananěntirong agama nạung nakaringihẹ̌ pal᷊ahumbisaram Mawu Yesus dingangi sire wọu komol᷊angu Saduki e. Mananěntirong agama e masingkạ u Mawu Yesus seng simimbahẹ̌ mapia-pia si sire. Tangu i sie nakiwal᷊ọe su Mawu Yesus, "Kai tita sude kasěllahengu patikụ tita e?"

²⁹ Mawu Yesus simimbang, "Kahumotongangu tita ute: 'Daringihẹ̌ko, i kamene tau Israel! Mawu Ruatang kitẹ e kai Mawu mang sěmbaụ.

³⁰ Kěndagẹ̌kon Mawu Ruatanu e ringangu kạguwạu naungu, ringangu kạguwạu l᷊aěnnanu ringangu lai kạguwạu ihạu.'

³¹ Tita karuane ute ini: 'Kěndagẹ̌ko kasanggidangu e, kerẹewe i kau kuměndag'u watangengu.' Tawẹ tita wal᷊ine limembong kahumotongange wọu tita ene."

³² Mase mananěntirong agama e nẹ̌berạe su Mawu Yesus, "Sembeng nihino, Tuang Guru! Mambeng těngadẹ̌ apan nipěhengetang i Tuang: Seng i Tuang e Mawu Ruata mang sěmbaụ kụ seng tawẹ apa Ruata wal᷊ine.

³³ Dingangu taumata e harusẹ̌ kuměndagu Mawu Ruata e ringangu kaguwạu naunge, ringangu kaguwạu l᷊aěnnane, ringangu lai kaguwạu ihạe. Dingangu i sie lai harusẹ̌ kuměndagu kasanggidange kerẹewe kuměndagu watangenge. Ene kai limembong kapiaěnge wọu maněmbang sasěmba tẹ̌tutungang ringangkewelain sasěmba wal᷊ine su Mawu Kasěllahenge."

³⁴ Mawu Yesus nakasilọe u mananentirong agama e seng simimbahẹ̌ maudupẹ̌ kahěngang. Kụ Mawu Yesus něhengetang si sie, "I kau seng maraning makoạ kawanuan Mawu Ruata." Bọu ene seng tawẹu sarang sěngkatau relaing bahani makiwal᷊o su Mawu Yesus.

³⁵ Kạpaněntirone su Wal᷊em Mawu, i Yesus nakiwal᷊o, "Kawe kereapa manga mananěntirong agama e makapěbẹ̌bera u Ratu Mananal᷊amatẹ̌ e kai hěnton Daud?

³⁶ Sěmbal᷊iau i Daud sẹ̌sane -- ual᷊ingu nipẹ̌karadiahangu Rohkẹ̌ u Ruata e -- nẹ̌bera, 'Mawu e něhengetang su Mawuku: kaiangke su koaneng-Ku sarang Iạ e mapakawatạ u kal᷊awọu sědụ'U su těngo-Nu.'

³⁷ Tangu kamagengu i Daud měsẹ̌sěbạ u Ratu Mananal᷊amatẹ̌ e kai 'Mawu', ute mariadi we kereapa u i Sie kawe hěnton Daud?" Taumata l᷊awọ apang ene su Wal᷊em Mawu maral᷊uasẹ̌ dụdaringihẹ̌ Mawu Yesus mạněntiro.

³⁸ I Sie něhengetang si sire, "Pakal᷊aingatẹ̌ bue su manga mananěntirong agama. I sire papuluang mẹ̌daral᷊eng dingangu lakụ mananandụ, dingangu papuluang adateng su manga pasarẹ̌.

³⁹ I sire papuluangu kal᷊aianeng su horone su ral᷊ungu Wal᷊em Mawu ringangu su manga sal᷊iwang.

⁴⁰ I sire měmpạngakal᷊ẹ̌ manga wawine wal᷊u ringangu měmpěngẹ̌ngaho wal᷊ene. Kụ tadeạu měmpangambung kararal᷊akis'i sire ute i sire měmpẹ̌kal᷊iomaneng mananandụ-nandụ. Hukumang i sire sarung mawěhạ!"

⁴¹ Ene, mạiangke mětẹ̌těngon kasẹ̌ u sasěmba su Wal᷊em Mawu e, Mawu Yesus měnẹ̌nahimata taumata apam měmpẹ̌tẹ̌tahon doit'i sire su ral᷊ungu kasẹ̌ ene. Lawọ taumata kalạ měmpẹ̌tẹ̌tahon doit'i sire maral᷊awọ;

⁴² mase sěngkatau wawine wal᷊u kasiang himaungke lai. I Sie nẹ̌tahon doitẹ̌ bitụ duang kal᷊ěpa kaesẹ̌ kụ arẹ̌gane kasasanakenge.

⁴³ Tangu Mawu Yesus kimuị e manga murit'E mase něhengetangke si sire, "Kakěllako ini: Bawine wal᷊u kasiang ěndaị ene kai nẹ̌taho su kasẹ̌ e l᷊imembon kal᷊awọe wọu kěbị apan nịtatahon taumata wal᷊ine e.

⁴⁴ U i sire kěbị e němpẹ̌taho wọu l᷊ěmbeng arětạ i sire. Arawe tau wawine wal᷊u e maning kerene kakasiange kai nangonggọu apam piạ e -- kụ kai apang gẹ̌gausange waug'u ipẹ̌biahe."

Markus

Video Markus 12

Ikuti Kami:

KONTAK | PARTISIPASI | DONASI