Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Yésus nengimun pebala nedeh dengan aceh luk pinginud, "Inan seburur lemulun luk nenibu aceh kabun anggur, ieh nengar libut-libutneh, ieh nengukat luk inanneh misak bua' anggur ineh, idi ieh nemudut aceh lepo luk medita'. Idi ieh nemaré kabun ineh icam tuda'-tuda' lun matar kabun, idi ieh iné' bawang baken.
2 Idi macing kareb bua' ineh melak, idi ieh nengecuk seburur demulunneh amé' ngalap babpat bua' rat nelun luk ngacam kabun ineh.
3 Iamo' lun luk ngacam kabun ineh nengakem neneh, idi nemebal neneh, idi nengecuk neneh muli' dengan na uang.
4 Idi lun luk kuan kabun ineh nengecuk seburur demulunneh luk baken teh idi demulun ineh pana' inuratdeh uluhneh, idi ideh nengigu' neneh.
5 Idi teh ieh nengecuk seburur lun baken, idi lemulun ineh pana' pinatédeh, idi mula' lun baken icukneh teh, sebuang bibaldeh, idi sebuang pinatédeh.
6 Idi inan teh seburur, ieh ineh anakneh luk deléi luk inanneh mawa, idi bang luk kekiped ieh nengecuk neneh amé' nelun luk ngacam kabun ineh, ngaceku keburi'neh, 'Kali' rungen ideh miak ngedita' anakku.'
7 Iamo' lun luk ngacam kabun ineh nepebala seburur dengan seburur, 'Ini inulneh, do' tau ngaté neneh, idi babpatneh ineh mangun ku binaweh tau.'
8 Idi ideh nengakem neneh idi nengaté neneh, idi ideh nenala' butungneh rat bang kabun ineh.
9 "Anunké luk ruen lun luk kuan kabun ineh? Na miak na ieh macing idi ngaté amung-amung lun matar kabun ineh, idi maré kabun anggur ineh kuan luk baken.
10 Naké muyuh nemaca' ayat bang Surat Allah: 'Idi batu luk tila' lemulun luk mudut ruma' ineh, pangeh mangun ku batu lidung;
11 Ieh ineh kekamen Tuhan, idi pelaba do' siren mateh tau?'"
12 Lun Yahudi nenakap dalan sikal ngakem Yésus, ngaceku ideh kali' luk pinginud ineh bilaNeh ratnan ideh sebuleng. Iamo' ideh matot nelun mula', idi ideh nenima' Neneh idi ideh nenalan.
13 Idi ideh nengecuk tuda'-tuda' lun Parisi idi lun Herodiani, sikal nuuk Yésus.
14 Idi ideh iné' matun Yésus, kebaladeh, "O Guru, kai kali' idi Iko seburur lemulun luk matu, luk na mili' ayu lemulun, ngaceku Iko na ngerawé do' lemulun, iamo' dalan Allah badénMu dengan matu. Petuluké kai maré pupuk kuan raca' Rum, kian na lek? Do'ké kai maré, kian na lek?"
15 Iamo' Yésus kali' nedeh siayu, idi Ieh nengitun nedeh, "Ngudehké muyuh nutun Negku? Do' nguit aceh sin amé' Negku, pad Ui miak nier ineh."
16 Idi ideh nenguit sesin sirenNeh. Idi Yésus nepebala nedeh, "Ayu idéké ini idi ngadan idéké ini?" Idi keburi'deh Neneh, "Ini raca' kuan."
17 Idi Yésus nepebala nedeh, "Do' maré kuan raca' anun-anun luk raca' kuan, idi kuan Allah anun-anun luk Allah kuan." Idi ideh mawa ku balaNeh.
18 Idi lun Saduki iné' matun Yésus. (Ideh mala na luk idi tui ratnan até.)
19 Kebaladeh, "Guru, Musa pangeh nengayud ukum ini kuan tau: 'Kudeng kinanak seburur lemulun maté idi necan awanneh, iamo' na luk idi anak, do' kinanakneh ngalap awanneh ineh, idi nginul anak kuan kinanakneh.'
20 Idi inan tudu' deléi luk denganak. Idi seluk rayeh ineh nengaweh, iamo' ieh naté dengan na anak.
21 Idi luk kedueh pana' nengalap tinula' ineh, idi ieh pana' naté dengan na anak; idi luk keteluh ineh pana' kudeng ineh teh.
22 Idi ideh luk tudu' burur ineh pana' nengalap neneh, idi na anak; idi pangeh amung-amungdeh naté, decur ineh pana' naté teh.
23 Kareb aco tui, idé mangun ku awan decur ineh? Ngaceku luk tudu' burur ineh pangeh nengaweh neneh."
24 Idi kebala Yésus nedeh, "Sala' terawé muyuh! Anun punneh? Ngaceku na muyuh kali' Surat Allah idi lalud Allah.
25 Ngaceku kareb lemulun tumui rat arang lun naté, na ideh ngaweh, iamo' ideh mepad kudeng melaikat luk déi' surga.
26 Iamo' ratnan lun naté luk tinui ineh, naké muyuh nemaca' bang Surat Musa ratnan kayuh luk meseb, kudeng apeh Allah nepebala neneh, 'Ui ini Tuhan Ibrahim, Isak, idi Yakub'?
27 Ilungneh Allah ineh baken Tuhan lemulun luk maté, iamo' Tuhan lemulun luk mulun. Muyuh ini sala' terawé.
28 Inan seburur guru Ukum luk neninger nedeh pesaad. Ieh kali' or Yésus nelun Saduki pelaba do'. Idi ieh pana' nengitun Neneh, keburi'neh, "Ukum sapehké luk atun?"
29 Kebala Yésus, "Ukum luk meluun rayeh, ieh ineh, 'Ninger muyuh do'-do', O Israil! Allah Tuhan tau, Ieh ineh Tuhan luk Sebuleng.
30 Do' iko mawa inan Allah Tuhanmu dengan amung niatmu, amung ulunmu, amung terawému, idi amung tuehmu teh.'
31 Idi luk kedueh, 'Do' iko mawa nelun denganmu mepad kudeng bururmu sebuleng.' Idi na luk idi ukum baken luk meluun rayeh ratnan dueh ukum ini."
32 Idi guru Ukum ineh nepebala nan Yésus, "Matu, Guru, matu balaMu ineh, idi Allah ineh Sebuleng, idi na luk idi luk baken iamo' Allah.
33 Do' lemulun mawa inan Tuhan dengan amung niatneh, amung ilehneh, idi amung tuehneh; idi teh do' ieh mawa nelun denganneh mepad kudeng bururneh sebuleng. Ineh luk meluun rayeh ratnan amung-amung baré luk sabpen idi baré luk kereten."
34 Kareb Yésus nenier idi ieh pangeh, nengor balaNeh dengan ileh, idi Ieh nepebala neneh, "Iko na mado ratnan Imet Allah." Idi na lemulun mekuu' ngitun Neneh peh.
35 Kareb Yésus nemada' bang Ruma' Allah, Ieh nengitun, "Kudeng apehké guru-guru Ukum mala idi Keristus ineh Anak Daud?
36 Ngaceku Daud nepebala bang Roh Meligan, 'Tuhan nepebala kuan Tuhanku, Tudo Iko pa tinuehKu, pad Ui nganau' bunu'-bunu'Mu mangun ku tapin kukudMu.'
37 "Daud sebuleng neneten Neneh Tuhan; idi kudeng apehké Ieh mangun ku Anakneh teh?" Lun mula' ine pelaba pian ninger bala Yésus.
38 Idi bang bada'Neh Yésus nepebala nedeh, "Matar burur muyuh ratnan guru-guru Ukum luk sikal nalan-nalan dengan kuyu' luk mekadang, idi sikal buren lemulun déi' kadai,
39 luk tudo luun kerusi luk meluun do' bang ruma' sembayang, idi su luk inan ubur kareb irau.
40 Ideh ngabud amung-amung binaweh decur tinula', idi mekadang sembayang dengan dalan luk siayu. Idi dieh ineh pana' miak mekaneh ukum luk meluun berat."
41 Kareb Yésus netudo muneng ku pati' luk ruan usin, idi Ieh nenier lun mula' luk nganau' usin bang pati' ineh. Mula' lun do' nenipa usindeh bang pati' ineh.
42 Idi seburur decur tinula' luk masi' nacing, idi nenipa dueh balad usin, ieh ineh sesin mo'.
43 Idi Yésus nenawar anak-anak sekola'Neh idi nepebala nedeh, "Matu, Ui pebala nemuyuh, decur tinula' luk masi' ini pangeh nenipa meluun ratnan amung-amung lemulun luk nenipa usin bang pati' ineh.
44 Ngaceku amung-amungdeh ineh pangeh nenipa usindeh ratnan eladeh, iamo' decur ini pangeh nenipa ratnan asi'neh amung-amung luk inan neneh, pad na luk ketecan kuanneh."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA