Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Beterus Deside Isa mulai bemanik kadu perumpamean lẽq imam-imam kepale dait ahli-ahli Taurat dait pemimpin-pemimpin Yahudi nike. Deside Isa bemanik, "Araq sopoq dengan saq nalet anggur lẽq kebonne. Terus ie miaq lambah lẽq sekelining kebon nike. Sesampun nike ie kaliq longkak jari taoqne peres anggur, terus ie penganjeng menare taoq dengan bejage. Sesampun nike sẽweangne kebon anggur nike lẽq penyakap-penyakap, beterus ie berangkat ojok negeri lain.

² Sewaktu sampun waktune musim buaq anggur, ẽpẽn dowẽ kebon nike ngutus pelayanne tipaq penyakap-penyakap kebon nike, jari nerimaq bagianne.

³ Laguq penyakap-penyakap nike bau pelayan nike. Beterus ie pade empuk pelayan nike, dait suruqne ie ulẽq ndẽq jauq napi-napi.

⁴ ~Epẽn dowẽ kebon nike ngutus malik pelayanne saq lain. Laguq penyakap-penyakap nike ngempuk ulu pelayan nike, terus suruqne nyedi sambil tesumpaq-senaq.

⁵ ~Epẽn dowẽ kebon nike ngutus malik pelayanne saq lain. Laguq ie pade matẽq pelayan nike. Dait maraq nike seterusne ie pade perlakuang luwẽq pelayan saq lain ẽndah: araq saq tempuk dait araq ẽndah saq tematẽq.

⁶ Ahirne cume karing sopoq saq araq lẽq ie, bijene mẽsaq saq paling ie tunah. Jari ie ngutus bijene nike tipaq penyakap-penyakapne. Pikirne, 'Pasti anak tiang gen tehormatin.'

⁷ Laguq penyakap-penyakap nike bebase sopoq kance saq lain, 'Niki ie ahli warisne, silaq ite matẽq ie, adẽq ite mauq warisanne!'

⁸ Make ie pade bau ie terus tematẽq. Mayitne ie pade tetẽh ojok luah kebon nike."

⁹ Beterus Deside Isa beketuan, "Napi saq gen tepiaq siq ẽpẽn dowẽ kebon nike? Pasti ie gen dateng dait nyematẽq penyakap-penyakap nike, terus nyerahang kebon nike ojok penyakap-penyakap saq lain.

¹⁰ Side pade pasti sampun bace ayat niki lẽq Kitab Suci, 'Batu saq tetetẽh siq tukang bangunan sampun jari batu saq paling utame.

¹¹ Niki karye Tuhan; sopoq karye saq ajaip lẽq julunte!'"

¹² Make pare pemimpin bangse Yahudi saq dengah perumpamean nike berusahe bau Deside Isa, sẽngaq ie pade nenaoq bahwe perumpamean nike tetujuang tipaq ie pade. Laguq ie pade takut lẽq dengan luwẽq. Jari, ie pade lumbar bilin Deside Isa.

¹³ Pire dengan Parisi dait anggote-anggote golongan Herodes tesuruq boyaq kesalaqan Deside Isa siq care besoal jawab adẽqne bau nyalahang Deside Isa.

¹⁴ Ie pade parek ojok Deside Isa dait matur, "Bapaq Guru, tiang pade nenaoq Pelungguh jujur dait nẽnten takut lẽq sai juaq. Pelungguh ngajahang secare terus terang mengenai langan saq kenaq tipaq Allah. Sẽngaq Pelungguh nẽnten pilẽq kasih. Silaq Pelungguh bemanik lẽq tiang pade, 'Menurut aturan agamente, kanggo napi nẽnten bayah pajek lẽq kaisar? Napi pajek nike harus ite bayah atao nẽnten?'"

¹⁵ Deside Isa wikan kemunapikan ie pade. Jawab-Ne, "Kembẽq side pade boyaq-boyaq kesalaqan adẽq bau nyalahang Tiang? Petitoqang lẽq Tiang sopoq kẽpẽng perak."

¹⁶ Make ie pade serahang lẽq Deside Isa sopoq kẽpẽng perak. Beterus Deside Isa beketuan, "Gambar dait aran sai niki?" "Kaisar," jawab ie pade.

¹⁷ "Nah, lamun maraq nike," manik Deside Isa, "serahang ojok Kaisar napi saq jari dowẽn Kaisar, dait tipaq Allah napi saq jari dowẽn Allah." Ie pade bengaq dengah jawaban-Ne.

¹⁸ Pire dengan lẽman golongan Saduki parek ojok Deside Isa. (Ie pade golongan saq bedowẽ pendapet bahwe dengan ninggal ndẽq gen idup malik.) Ie pade metakẽn lẽq Deside Isa:

¹⁹ "Bapaq Guru, Musa nulis hukum niki tipaq ite: 'Lamun sopoq dengan mame ninggal dait ie ndẽq bedowẽ bije, make semetonne harus merariq kance bebalune adẽq ie bau ngebẽng keturunan tipaq dengan saq sampun ninggal nike.'

²⁰ Sampun araq pituq dengan besemetonan. Saq sengake merariq, terus ninggal ndẽq bedowẽ bije.

²¹ Beterus saq kedue merariq kance bebalune, laguq ie ẽndah ninggal ndẽq bedowẽ bije. Maraq nike ẽndah telaksane lẽq semetonne saq ketelu,

²² dait seterusne jangke saq kepituq. Ahirne dengan nine nike ẽndah ninggal.

²³ Lẽq jelo dengan ninggal teidupang malik, sai semame dengan nine nike? Sẽngaq kepituq-pituqne sampun merariq kance ie!"

²⁴ Jawab Deside Isa, "Side pade keliru gati, lantaran side pade ndẽq ngerti Kitab Suci dait kuase Allah.

²⁵ Sẽngaq lamun dengan-dengan ninggal teidupang malik, ie pade ndẽq gen merariq malik, laguq ie pade gen idup maraq malaẽkat lẽq sorge.

²⁶ Dait mengenai dengan ninggal teidupang malik, napi side pade ndẽq uwah bace lẽq dalem kitab Musa mengenai bebenes saq nyale nike? Lẽq dalem ayat-ayat nike tetulis bahwe Allah bemanik tipaq Musa, 'Tiang Allahne Ibrahim, Allahne Ishak dait Allahne Yakub.'

²⁷ Allah nike nẽnten Allah dengan ninggal, laguq Allah dengan saq idup. Side pade keliru gati!"

²⁸ Beterus dateng sopoq ahli Taurat saq pirengang bebaosan antare Deside Isa kance dengan-dengan lẽman golongan Saduki nike. Ahli Taurat nike serioq bahwe Deside Isa sampun jawab dengan-dengan nike secare bagus. Make ie metakẽn tipaq Deside Isa, "Prẽntah mbẽ saq paling utame lẽq antare selapuq prẽntah?"

²⁹ Jawab Deside Isa, "Prẽntah saq utame: 'Pade dengahang, hai bangse Israel! Allah, Tuhante, Tuhan Saq Mahe Esa!

³⁰ Kasihin Allah, Tuhan side siq segenep atẽnde, dait siq segenep jiwende dait siq segenep akal budinde dait siq selapuq kekuatande.'

³¹ Prẽntah kedue: 'Kasihin sepadende manusie, maraq side ngasihin diriqde mẽsaq.' Ndẽq araq malik prẽntah lain saq pentingan lẽman kedue prẽntah nike."

³² Beterus ahli Taurat nike matur lẽq Deside Isa, "Tepat gati, Bapaq Guru! Mule kenaq napi saq Pelungguh manikang: Tuhan nike Allah saq esa, dait nẽnten araq malik Allah saq lain.

³³ Dait manusie harus ngasihin Allah siq sepenoq angenne, dait siq selapuq akalne, dait siq selapuq kekuatanne. Dait ie ẽndah harus ngasihin sepade manusie maraq ie ngasihin diriqne mẽsaq. Nike jaoq solahan ketimbang ngaturang kurban tunuqan dait kurban-kurban saq lain tipaq Allah."

³⁴ Deside Isa cingakin bahwe ahli Taurat nike sampun bejawab secare bagus gati. Dait Deside Isa bemanik lẽq ie, "Side ndẽq jaoq lẽman Kerajaan Allah." Sesampun nike, ndẽq araq sopoq dengan juaq saq bani malik metakẽn lẽq Deside Isa.

³⁵ Lẽq waktu kenyeke ngajahang lẽq Gedẽng Allah, Deside Isa beketuan, "Berembẽ ahli-ahli Taurat iniq bebase bahwe Almasih nike keturunan Daud?

³⁶ Padahal Daud mẽsaq -- lantaran teilhamin siq Roh Suci -- bebase, 'Tuhan bemanik lẽq Junjungan tiang: Melinggih lẽq sedi kanan Tiang, jangke Tiang piaq musuh-musuh Deside takluk lẽq Deside.'

³⁷ Jari, lamun Daud mẽsaq nyebut Almasih nike 'Junjungan Saq Mulie', segerah Ie keturunan Daud?" Dengan saq araq lẽq Gedẽng Allah nike seneng dengahang pengajahan Deside Isa.

³⁸ Ie bemanik lẽq ie pade, "Onyaq-onyaq lẽq ahli-ahli Taurat. Ie pade demen lampaq-lampaq kadu jubah saq bẽlo dait demen tehormatin lẽq peken-peken.

³⁹ Ie pade seneng melinggih lẽq kursi saq paling julu lẽq balẽ-balẽ ibadah, dait seneng melinggih lẽq taoq saq paling tehormat lẽq taoq dengan-dengan begawẽ.

⁴⁰ Ie pade tipu bebalu-bebalu dait ngerampas balẽne. Dait jari seboq pegawẽanne saq jahat nike, ie pade bedo'e bẽlo-bẽlo. Pasti ie pade gen nerimaq hukuman saq beratan!"

⁴¹ Sewaktu Deside Isa melinggih andang kotaq persembahan lẽq Gedẽng Allah, Deside Isa perhatiang dengan-dengan namaq kẽpẽng ie pade ojok dalem kotaq nike. Luwẽq dengan sugih tamaqang luwẽq kẽpẽng.

⁴² Beterus sopoq bebalu saq miskin dateng ẽndah tamaqang due kẽpẽng tembage, kẽpẽng rẽcẽh saq paling kodẽq ajine.

⁴³ Make Deside Isa ngemanikang pengiring-pengiring-Ne, terus bemanik lẽq ie pade, "Tiang badaq side: Setetune bebalu niki namaqang ojok dalem kotaq nike luwẽqan tebanding saq tetamaqang siq selapuq dengan-dengan lain.

⁴⁴ Sẽngaq ie pade selapuq ngebẽng lẽman kelebihan dowẽne. Laguq bebalu niki, timaq miskin gati, ie ngebẽng selapuq saq araq lẽq ie -- saq ie perluang jari biaye idup."

Markus

Video Markus 12

Ikuti Kami:

KONTAK | PARTISIPASI | DONASI