Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'O Yesus wosidotoko 'iduanga 'iodumu ge'ena, de wongose wi do-domoteika,

² "Ngini nianako 'o wange modidiosi de porame ma ngale posinganonie Wakisisupu ma Wange de 'o Nyawa ma Ngowaka 'asa wisisarakani la wisidele 'o salipoka."

³ Ma 'orasi ge'ena 'o 'imam ma sae-saeke de 'o Yahudioka manga balu-balusu yomatoomu ma 'Imam ma Amoko 'o Kayafas wi woaka.

⁴ 'Ona yomaka'aturu la kayomasiriidino 'o Yesus witagoko de wito'oma.

⁵ Ma yomakadongose 'ato, "'Uwa gee 'o rame-rame ma 'orasi, sababu dua naga 'o kawasaka 'iruahe."

⁶ Ma 'orasi 'o Yesus 'o Betaniaka, 'o Simon gee wipado-pado wi woaka,

⁷ ge'enaka de mimoi maino 'o Yesusino mo'asa 'o goooro ma bounu yaowa-owa de 'ihali-hali 'o botoli ma dingoonuku moi. Gedagee 'o Yesus wogogeruku wo'odomo, de 'o ngeweka gumuna 'o goooro modarisi 'o Yesus wi saeuku.

⁸ 'O do-domoteke yamake ge'ena de yakitu'uduku. Yongose, "'Ido'oa so ma halebiru ge'ena 'iodumu?

⁹ 'O goooro ge'ena nako mawukunu, ge'ena ma 'ija 'ihali, de ma pipi 'idadi mokula 'o nyawa yosusa-susaka."

¹⁰ 'O Yesus wanako manga singinaka ge'ena so wongose, "Minimadaka! Muna modiai 'okia naga yaowa-owa ngoino.

¹¹ 'O nyawa yosusa-susa ge'ena kaitaurika naga de de ngini, ma ngoi kaitaurikawa de de ngini.

¹² De 'o goooro ma bounu yaowa-owa moidarisi 'ai roesuku, ge'ena ma ngale moidudu-duangou 'ipo'osuku.

¹³ Tinisidemo ne'ena: 'O duniaka ne'ena gee kiaka naga bato 'o Habari ma Owa ma Jo'oungu ma Dutuno 'isitotara, 'o ngeweka numuna 'ami di-diai dua 'asa kayosija-jarita mita, de kamingano-nganono."

¹⁴ Ge'enaka de wimoi gee 'o do-domoteke yamogiooko de modidino wi ronga 'o Yudas Iskariot wotagi 'o 'imam ma sae-saekika.

¹⁵ 'Una wosano 'onaka, "'Okiau dua nikula nako 'o Yesus towisisarakani nginika?" Ge'enaka de 'ona yokula 'unaka 'o pipi 'o saaka 'o nagi sa'ange.

¹⁶ Ge'enau 'ikurue 'o Yudas 'o 'orasi wononu la 'o Yesus wisisarakani.

¹⁷ Ma wange ma di-disiraka 'o Roti Koiragi-ragiwa ma Rameka 'awi do-domoteke yaino 'o Yesusino yosano, "'Aba, kiakau ngona nomau ngomi miosidaoto nanga 'inomo ma ngale Wakisisupu ma Wange ma ngodomo?"

¹⁸ 'O Yesus wosango, "Niotagi doka wimoika 'o kotaka de niongose 'ato 'o 'Aba Guru wongose, 'Ma 'orasi ya'adonokau ma ngale ngoi. Ngoi tomau de 'ai do-domoteke mio'odomo 'ani woaka ma ngale Wakisisupu ma Wange.'"

¹⁹ 'O Yesus wi do-domoteke yamoteke 'okia naga wongosekau gee. 'Ona yotagi yosidaoto ma rame ma 'inomo ge'ena.

²⁰ 'Iobiruku de 'o Yesus de wi do-domoteke yamogiooko de modidi yogogeruku yo'odomo.

²¹ Yo'odomo ma gu-gudaioka de 'o Yesus wongose, "'Ena nio'isenika, ne'ena nginioka naga wimoi dua woiwukunu!"

²² 'O do-domoteke yo'isene ge'ena, de manga singina 'isusa ma sala. Ge'enaka de moi-moi yomadasano 'o Yesusika, "Ma raiokau ko ngoiwa 'Aba?"

²³ 'Una wosango, "Gee 'awi roti wositubuku 'o sawokuku de de ngoi, gu'unau dua woisisarakani.

²⁴ Ma goungu 'o Nyawa ma Ngowaka dua wosongene 'isoka 'isidemokau 'o Buku 'Itebi-tebinoka, duga wotorouoka 'o nyawa gu'una gee wisisa-sarakani 'o Nyawa ma Ngowaka. 'Ifoloi yaowa nako 'o nyawa gu'una koma'iwa woboano 'o duniaka."

²⁵ Ge'enaka de 'o Yudas gee 'o Yesus wiwuku-wukunu wongose, "Ma rai ko ngoinowa gee, 'Aba Guru, 'ani dumutu?" Ge'enaka de 'o Yesus wosango, "Ka to ngona ni demo ge'ena!"

²⁶ Gedagee yo'odomo, de 'o Yesus wa'ese 'o roti de wo'amalaha ma Jo'oungu ma Dutude, deika waeta-eta so wakikula wi do-domoteika de wongose, "Nia'ese de nia'odomo; ne'ena to ngoi 'ai roese."

²⁷ Ge'ena 'iduanga de wa'ese 'o 'anggur 'o sawoko moi, de wo'amalaha ma Jo'oungu ma Dutude. Ge'enaka de wokula 'awi do-domoteika de wongose, "Nioodumu nia'okere 'o sawokoka ne'ena.

²⁸ Ne'ena ge'ena 'ai 'aunu gee 'ipoa ma ngale 'o nyawa 'iodumu, la manga so-sowono ma Jo'oungu ma Dutu kowosi-singinawau. Ma Jo'oungu ma Dutu 'awi jaji wositiai de ne'ena.

²⁹ Tinisidemo ne'ena: Ngoi dua kota'okeruawau 'o 'anggur kone'ena, sigado ma 'orasi ngoi ta'okere 'o 'anggur ma sungi de de ngini 'ai Dea wi dunia ma sungioka."

³⁰ Ge'enaka de 'ona yosinyanyi 'o nyanyi moi ma Jo'oungu ma Dutu wisiarene. Ge'ena 'iduanga deika yotagi 'o Zaitun ma gigieka.

³¹ Ge'enaka de 'o Yesus wongose 'awi do-domoteika, "Ne'ena ma eta 'iobiruku ngini nioodumu dua 'ania ngo-ngaku 'igiwioka ngano 'okia naga gee 'idadi ngoino. Sababu 'o Buku 'Itebi-tebinoka 'isilefoku konee: 'Ngoi dua towito'oma 'o so-sowohi gu'una de ma domba 'asa 'ikokiowara 'imakati-tingaoka.'

³² Ma gee dua tomomikieli, de ngini koniotagiwasi 'o Galileaka 'ena ngoi tomatisirakau ge'enaka doka."

³³ De 'o Petrus wongose 'o Yesusika, "Ngaro 'iregu-regu 'ona yoodumu nimada, ma ngoi ma gou-goungu ko'uwa."

³⁴ 'O Yesus wongose 'o Petrusika, "Ma gou-goungu 'o obiri ne'ena 'o namoro koisorenuawasi, ngona nomasipongono ngoino ma sa'angeu."

³⁵ 'O Petrus wongose, "Ngaro tosongene de de ngona, ma dua kotomasipongonuwa." De 'o do-domoteke 'iregu mita koge'ena yongose.

³⁶ Ge'ena 'ipasa de 'o Yesus de wi do-domoteke yotagi 'o ngii moika ma ronga 'o Getsemani. Kadoka yaika de 'o Yesus wongose wi do-domoteika, "Niogogerukosi ne'enaka, ngoi totagi tolahidoasi."

³⁷ Ge'enaka de wakisigaro 'o Petrus de 'o Zebedeus wi ngowa-ngowaka yamididi wimoteke. 'Una wamao wi singina 'isusa de wobalisa.

³⁸ 'Una wosidemo 'onaka, "Tamao tobalisa ma sala matero tosongenoka. Ngini ne'enakasi de niomajaga-jaga de de ngoi."

³⁹ Ge'enaka de 'o Yesus wotagi ma etasi 'ikurutika de wotalibukuku wolahidoa wongose, "'Aba, nako yaowa de noisikurutu 'o sangisara gee salingou tamoku, ma 'uwa ka to ngoi 'ai mau 'idadi, la 'ena ka to ngona, 'Aba."

⁴⁰ Ge'enaka de 'o Yesus wolio 'awi do-domoteika gee yaruangeka, 'ena 'ona yonisuoka. 'Una wongose 'o Petrusika, "Ka 'o takoro moi ma koidadiwa nimajaga-jaga de de ngoi?

⁴¹ Nimajaga-jaga de nimalahidoa la 'uwa nitaili. Ma goungu ngini nia singinaka niomau niadiai ma owa, ma ngini niolamahani."

⁴² Ma moioli 'o Yesus wotagi wolahidoa wongose, "'Aba, nako 'o sangisara 'o sawooka ne'ena salingou tamoku de koidadiwa 'isiresene, madakau la moteke to ngona 'ani mau."

⁴³ Ge'ena 'ipasa de 'o Yesus wolioli 'ena wakidaenino wi do-domoteke kayoma'iduokasi sababu kaifoloi manga ako 'itubuso.

⁴⁴ Ma moioli 'o Yesus wakimadaku de wotagi wolahidoali wosigali ma sa'angeu, ma betongo ka koge'ena.

⁴⁵ Ge'ena 'iduanga de wolioli wi do-domotekino de wongose, "Kanionisukosi? De kaniomaomasosi? Niamake ma 'orasi ya'adonokau 'o Nyawa ma Ngowaka wisisarakani 'o nyawa yosowo-sowono manga giama ma soatika.

⁴⁶ Niomomikieu! Potagiou! Woiwuku-wukunu gu'una woboau."

⁴⁷ 'O Yesus kawobicarasi, de 'o Yudas gee 'o do-domoteke wimoi yamogiooko de modidino, woboa de 'o nyawa yoku-kudai 'o samarangi de 'o palo-palo yo'asa. 'Ona 'o 'imam ma sae-saeke de 'o Yahudioka manga balu-balusu yakisuloko.

⁴⁸ 'O nyawa gee 'o Yesus wisisa-sarakani wakidongosekau ma no-nako konee, "'O nyawa gee towiame, ge'ena gu'unau so winitagoko!"

⁴⁹ Gee ya'adonika ge'enaka de 'o Yudas kawogila-gila waika 'o Yesusika de wongose, "Tabea, 'Aba Guru!" Deika wiame.

⁵⁰ 'O Yesus wongose, "Ee 'Esa moi! 'Okia nodo'oa ne'enano?" Ge'enaka de yoku-kudai go'ona wida-dagi witagoko.

⁵¹ 'O do-domoteke wimoi wi samarangi wagoraka de wi'oto 'o 'Imam ma Amoko wi ro-riwoka so wi ngauku ma 'itoaoka.

⁵² Ge'enaka de 'o Yesus wongose wi do-domoteika gu'una, "'Ani samarangi nosigilioku ma sarumuku, sababu nago'ona 'o wase yosisasaru, 'asa yosisongene de 'o wase.

⁵³ Bolo ngona nongose ngoi koidadiwa tomaga'asoko 'ai Dea woiriwo? Nako toga'asoko ge'ena 'una 'asa kawataitino wosidingoto 'o mala'ekati 'o solodado gee 'o bolu mogiooko de modidi 'ifoloi!

⁵⁴ Ma nako koge'ena, kokia la 'idadi moteke ma Jo'oungu ma Dutu 'awi demo? Sababu 'o Buku 'Itebi-tebinoka 'isidemokau salingou 'idadi 'isoka gee ma 'orasi ne'ena."

⁵⁵ Ge'enaka de 'o Yesus wongose yoku-kudaika gee, "Ngoi ne'ena to'ora-'ora? so 'o samarangi de 'o palo-palo nidagasa la nitagoko? 'O wange 'isinoi-noimi ngoi todotoko ma Jo'oungu ma Dutu wi Woaka, ma konitagokuwa!

⁵⁶ Ma ngano salingou koge'enau la 'idadi 'isoka 'o nabii yosilefokau 'o Buku 'Itebi-tebinoka!" Ge'enaka de wi do-domoteke yoodumu yoowara wisidamadaku.

⁵⁷ 'O Yesus witagokino de wi'otaka 'o Kayafasika ma 'Imam ma Amoko gu'una. Ge'enaka doka 'o Yahudioka manga 'agamaka yodoto-dotoko de 'o Yahudioka ma balu-balusu yomalomunou.

⁵⁸ 'O Petrus doka 'o gurutika 'o Yesus wisidu-du'uru sigado ma 'Imam ma Amoko wi ginitaroka waino. Ge'enaka de wowosama ma dodaka so wogogerie de yojaga-jaga gee, ma ngale womau wanako 'iodumu ge'ena dua kokia ma do-dogumuku.

⁵⁹ 'O 'Agamaka ma Hakimi 'ona ge'ena la 'o 'imam ma sae-saeke de 'o 'agama ma balu-balusu yoodumu yosikanonu yomau yodamake 'o sakisii ma ngeluku, la 'o Yesus wihukumu wiso-songene.

⁶⁰ Ma ngaro manga gudai yosidemo manga sakisii, ma ka ma eta ma koyodamakewa 'awi sowono. Sababu ge'ena yamididi yoma'okode ma bionoka,

⁶¹ de yongose, "'O nyawa nu'una wongose, 'Ngoi 'idadi taruba ma Jo'oungu ma Dutu wi Woa, de ka 'o wange sa'ange ma dodaka de tosigokoli.'"

⁶² Ge'enaka de ma 'Imam ma Amoko woma'oko de wongose 'o Yesusika, "Nooluku nasango manga galaki ge'ena?"

⁶³ Ma 'o Yesus kaworii-riidika. Ge'enaka de ma 'Imam ma Amoko wongoseli 'o Yesusika, "De ma Jo'oungu ma Dutu wowango-wango, nosidemo ngomino ngona ne'ena ma Koana Wiiri-iriki ma Jo'oungu ma Dutu wosijajiokau gu'una? Ma Jo'oungu ma Dutu wi Ngowaka?"

⁶⁴ 'O Yesus wosango, "'Isoka to ngona ni demo! Duga tinidongose, dua 'asa winimake 'o Nyawa ma Ngowaka wopareta de ma Jo'oungu ma Dutu gee 'awi kuasa 'ifoloi 'iamoko de woboa daku 'o kakamoroka 'o diwangino!"

⁶⁵ Ge'enaka de ma 'Imam ma Amoko 'awi baju waracanga de wongose, "'Una ma Jo'oungu ma Dutu wisiti-tingoono! Ngaro ma sakisii koi'iwau sababu ngini ma sirete nio'isenokau 'awi demo-demo gee ma Jo'oungu ma Dutu wisiti-tingoono.

⁶⁶ Kokia ne'ena moteke ngini?" 'Ona yosango, "'Una salingou wihukumu wiso-songene."

⁶⁷ Ge'enaka de wi bionoko yakibiti de wipesana, de munuka wipoka,

⁶⁸ de kayongosekau, "Ngona ma Jo'oungu ma Dutu wi Ngiriki. Bika nopasi nago'ona nipesana?"

⁶⁹ Ma 'orasi ge'ena 'o Petrus doka ma dudunoka 'o ginitaroka wogogerie, de 'o ro-riwo mimoi moboa de mongose, "Ngona mita nomote-moteke de 'o Yesus 'o Galileano?"

⁷⁰ Ma 'o Petrus womadidumu ge'ena 'o nyawa ma gu-gudai manga bionoka wongose, "Ngoi kotasahewa 'okia ni dumutu."

⁷¹ Ge'enaka de womato'oraka 'o ginitara ma ngoranika. 'O ro-riwo mimoioli mimake 'o Petrus de mongose 'o nyawa-nyawaka ge'enaka dau gee, "'O nyawa nu'una mita kangano womote-moteke de 'o Yesus 'o Nazaretino."

⁷² Ge'enaka de 'o Petrus womasipongonoli de wosasi, "Ma gou-goungu ngoi kotowinakowa 'una."

⁷³ Koito'ingowa de yoma'oko-'okode ge'enaka yaika 'o Petrusika de yongose, "Ma raiokau ngona mita de de 'ona. Ma nyo-nyata ni bicaraka gee."

⁷⁴ Ge'enaka de 'o Petrus womasibo-bobeto de wongose, "Ma gou-goungu ngoi kotowinakowa 'o nyawa gu'una!" Ma 'orasi ge'ena mita 'o namoro 'isorene.

⁷⁵ De 'o Petrus wonganonino 'o Yesus wongosekau, "'O namoro koisorenuawasi 'ena ngona nomasipongono ma sa'angeu." Ge'enaka de 'o Petrus wosupu ge'ena ma 'Imam ma Amoko wi ginitaroka 'ena wo'ari kawidomo-domo.

Matius

Video Matius 26

Ikuti Kami:

KONTAK | PARTISIPASI | DONASI