Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Kutẹu nasuẹen těntirone kěbị hal᷊ẹ̌ ene su Mawu Yesus, i Sie něhengetang su manga murit'E,

² "I kamene masingkạu kate lai rua ěllo seng Ěllong Paskah, kụ Ahus'u Taumata e sarung isarakang tadeạu pakipaku su kalu kuruisẹ̌!"

³ Su tempo ene manga imang těmbonange ringangu manga matatimad'u tau Yahudi e němpẹ̌tampung su istanang Imang Mawantugẹ̌ i Kayafas.

⁴ I sire němpẹ̌dal᷊ahintau mědeạu měnamẹ si Yesus pakapěnisẹ̌ dingangu měngakal᷊ẹ̌ měmate si Sie.

⁵ "Kaiso," angkuěng i sire, "kumbahang hal᷊ẹ̌ ene koateng su tempon sal᷊iwang, mạdiring makapẹ̌gonggạ kawanua."

⁶ Piạ i Yesus nạung su Betania, su wal᷊en Simon nạung piạ sakịe su pisị makạtatakụ,

⁷ ene piạ e tau wawine sěngkatau himaung si Yesus. I sie nẹ̌bawa wotol᷊ẹ̌ pualam sěmbua lohone lana mawěngi mal᷊ěgadẹ̌. Ene Mawu Yesus mạiang kapẹ̌sẹ̌simokol᷊e, tau wawine ene naněboheng lana mawěngi ene su těmbọu Mawu Yesus.

⁸ Manga murit'i Yesus e nakasilọe hal᷊ẹ̌ ene kụ naral᷊akị naung i sire. "Apawe gunane kěbị ene nipẹ̌gagholọ?" angkuěng i sire.

⁹ "Lana mawěngi ene wotonge ikawal᷊ụ mal᷊ěgadẹ̌, kụ doite rembeng ikaonggọ su taumata kasiang!"

¹⁰ Mawu Yesus masingkạu tiněnnang sire, kụ i Sie něhengetang, "Kawe unụe i kamene mapakasusan tau wawine ěndaịe? I sie kai nẹ̌koạ munara mapia ringangu mawantugẹ̌ baugu Iạ.

¹¹ Tau kasiang e hanesẹ̌be ene su tal᷊oarang kamene, arawe Iạ ute wal᷊inewe sěntiniạ dingangi kamene.

¹² U pananěbohu l᷊ana mawěngi ene su wadang-Ku e ute, i sie kai mẹ̌děndiahi pělal᷊ěbing baug'u Iạ.

¹³ Pangimangke! Su kaguwạu dunia e suapạeweng Injilẹ̌ ipẹ̌kẹ̌kakeke ute, kakanoạu tau wawine ene sarung ipẹ̌bawěke lai makoạ tatahěndung si sie."

¹⁴ Kutẹu sěngkatau wọ'i sire mapul᷊o dua murit'u Mawu Yesus, kụ arenge i Yudas Iskariot, natamai nẹ̌sěmạu manga imang těmbonange.

¹⁵ I sie nẹ̌berạe si sire, "Apa sarung ionggọ i kamene si siạ kereu iạ manarakang i Yesus si kamene?" Tangu i sire němpěndekengke roitẹ̌ sal᷊aka, těllum pul᷊o su kal᷊ěpane kụ bọu ene nangonggọeng doitẹ̌ ene si sire.

¹⁶ Nanětạ bọu ene i Yudas hanesẹ̌ mědẹ̌deạ loahe mapia měnarakang u Mawu Yesus.

¹⁷ Su ěllo humotong su Sal᷊iwangu Borotẹ̌ Ta Lahaesang, manga murit'u Mawu Yesus němpẹ̌haungke si Sie. I sire nakiwal᷊ọe, "Kai suapa kapulun'U sadiaěng i kami e kaěng u Paskah e waug'i Tuang?"

¹⁸ Mawu Yesus simimbang, "Dakọe sol᷊ong soa pẹ̌sěmạ i anu sene kụ pẹ̌bera si sie, 'Angkuěng i Mananěntiro, tempoku e seng nịdating; kụ Iạ mapulu mẹ̌sal᷊iwang u Paskah e su wal᷊enu ringangkeweng manga muritẹ̌-Ku.'"

¹⁹ Manga murit'i Yesus e němpẹ̌koạ kerẹewe nioron Mawu Yesus si sire. I sire tamai němpěnadia kaěngu Paskah ene.

²⁰ Ene nahěbịe, Mawu Yesus dingang i sire murit'E mapul᷊o dua e němpẹ̌kaiangke su meda.

²¹ Ara i sire kạpahungkaěnge, Mawu Yesus něhengetang, "Daringihẹ̌ko: sěngkatau wọu tal᷊oarang kamene e sarung mẹ̌sunial᷊'u Iạ."

²² Nakaringihẹ̌ ene, manga muritẹ̌ e měngkate něngkasusa tạ sihinge. Mase i sire nasịkiwal᷊ong kiwal᷊one su Mawu Yesus, "Bal᷊inewe iạ sutimonang Kau Mawu?"

²³ Mawu Yesus simimbang, "I sain nangunong borotẹ̌ su ral᷊ungu mangko ringangku ute, i sie sarung mẹ̌sunial᷊ẹ̌ u Iạ e.

²⁴ Kahěngang bue Ahus'u Taumata e sarung mapohong kere mạbawohẹ su ral᷊ungu Winohẹ Susi. Kaiso kạěngkěhang bue i sai mẹ̌sunial᷊'u Ahus'u Taumata! Tau ene mạěndokangbelai nạung tawe kadiongeng piněhanạ!"

²⁵ Mase i Yudas i anụ e nẹ̌sunial᷊ẹ̌ e nẹ̌bera, "Kụ bal᷊inewe iạ ngae itẹ̌timonang Kau Mawu?" I Yesus simimbangke, "Kerẹewe nịbaweranu!"

²⁶ Ene i sire mạhungkaěngke, Mawu Yesus nangal᷊ạe borotẹ̌, mase nẹ̌berang kakal᷊iomaneng tatarimakasẹ. Bọu e i Sie něngangempangke borotẹ̌ ene ringangu l᷊iman'E kụ nitěgone su manga murit'E apid'u něhengetang, "Pěmpangal᷊ạe, pěmpẹ̌kaěngke; ini e kai wadang-Ku."

²⁷ Bọu e i Sie nangal᷊ạe panganginumangu anggorẹ̌ e, mase nakitarimakasẹ su Mawu Ruata. Nitěgone su manga murit'E, kapẹ̌berane, "Panginumẹen kamene kěbị!

²⁸ U ini e kai rahaku ipạnahutěngadẹ̌ pẹ̌kakědon Duata -- dahạ e iapatědọ baugu l᷊awọ ipangampung dosan sire.

²⁹ Pangimangke: Iạ sembeng tawe sarung manginung anggorẹ̌ ini lai sarung tempong Iạ manginung anggorẹ̌ buhu ringangkeweng kamene su Runia Wuhung Amang-Ku e."

³⁰ Bọu e i sire němpẹ̌kantarịu kakantarị daralo sěmbua. Kụ mase i sire nakoạ sol᷊ong Bukid'u Zaitun.

³¹ Ene i Yesus něhengetangke su manga murit'E, "Su hěbi ini e lai i kamene kěbịe ral᷊iu měmpẹ̌tal᷊ang maněntangu Iạ. U su Winohẹ Susi e mạbawohẹ: Mawu Ruata něhengetang, 'Iạ e sarung měmate mělal᷊ukadẹ̌ e, kụ gapaěngu domba e sarung měkal᷊iaesẹ̌.'

³² Kai kereu Iạ seng niapẹ̌bangung kapia, Iạ e sarung měngal᷊imona si kamene sol᷊ong Galilea."

³³ I Petrus simimbang su Mawu Yesus u, "Manilaing i sire wal᷊ine e maněntang i Tuang, arawe iạ e mambeng tala!"

³⁴ "Tahěndunge," angkuěngu Mawu Yesus si sie, "su hěbi ini e lai těntal᷊ang manụ ta kimẹ̌kukụ, i kau e seng těllung sul᷊e nẹ̌sunial᷊'u Iạ."

³⁵ I Petrus simimbang, "Manilaing iạ pateěng sěngkapate ringangu Mawu, kai iạ e mang ta mẹ̌sunial᷊'i Kau Mawu!" Ku kěbị manga muritẹ̌ bal᷊ine e mal᷊aing němpẹ̌bera kerene.

³⁶ Nal᷊iung ene Mawu Yesus natamai ringangu manga murit'E nědeạ tampạ isěsẹ̌ba Getsemani. Sene i Sie něhengetang si sire, "Pahungkaiangko sini těntal᷊ang Iạ deng tamai mẹ̌kal᷊iomaneng."

³⁷ Mase i Sie němaringang si Petrus dingangi rẹ̌dua anạ i Zebedeus sěngkatamai ringang'E. I Sie nanětạe nasusa ringangu ghiměnggang.

³⁸ I Sie něhengetang su manga murit'E, "Naungku e nasusa tạ sihinge, pěndange mẹ̌sul᷊ungu seng mate e. Kěngkatanạko sini i kamene, kụ pěmpẹ̌dal᷊ukadẹ̌ko ringang-Ku."

³⁹ Bọu e Mawu Yesus diọ nẹ̌těngkaghea, kụ i Sie nẹ̌těngkasumagẹ̌ su ěntana kụ nẹ̌kal᷊iomaneng. "O Amang," angkuěng'E, "kereu wotonge, apakarauko wọu Iạ e kasasigěsạ takụ tal᷊udang ini. Kai wal᷊inewe kapuluku e mariadi, kaiso kawe tumuhụ kapulung Amang-Ku e sẹ̌sane."

⁴⁰ Bọu e Mawu Yesus nẹ̌bal᷊ịe su anum manga murit'E i sire těllu, kutẹu sěngkakakěllae i sire kawe kạpahuntikịe. I Sie něhengetangke si Petrus, "Kal᷊ingung lai sěngkaorasẹ̌ kai i kamene těllu e mang tawe nakal᷊ukadẹ̌ dingang-Ku?

⁴¹ Pakaral᷊ukadẹ̌ bue ringangu pěmpẹ̌kal᷊iomanengko mạdiring i kamene kahombangengu sasal᷊ukạ. Těngadẹ̌ bue rohkẹ̌ e mapulu mẹ̌koạ hal᷊ẹ̌ mětẹ̌tahino, kaiso i kamene mang ta makatohạ, batụ u wọu sěmběkang katataumata e kai lome."

⁴² Saụ kapia Mawu Yesus natamai nẹ̌kal᷊iomaneng, angkuěng'E, "O i Amang, kereu kasasigěsạ ini kawe hinong takụ tal᷊udang, kụ tawe ikahipe ute, walạe karariadine kapulung Amang."

⁴³ Bọu e Mawu Yesus nẹ̌sul᷊e kapia, kụ sěngkakěllane manga murit'E kawe wědang kạpahuntikịe, ual᷊ingu tikị i sire kai tumanịu mawěhạ běhạ.

⁴⁴ Sěnsul᷊ẹko l᷊ai Mawu Yesus naněntangken sire kụ katěllun sul᷊ene nẹ̌kal᷊iomaneng, bawerane mẹ̌sul᷊ung u kal᷊amona.

⁴⁵ Bọu e i Sie nẹ̌sul᷊ẹ e kapia su anum manga murit'E kụ něhengetang, "Měngkai wědang měmpẹ̌tẹ̌tikị dingangu měmpạngirul᷊e i kamene? Kakěllạe, seng nidating tempone Ahus'u Taumata isarakang su kawasang taumata waradosa.

⁴⁶ Pěmpẹ̌bangungke, bọe i kitẹ mahundal᷊engke. Tingangke! Taumata mẹ̌sunial᷊'u Iạ e seng ene!"

⁴⁷ Piạ i Yesus bẹ̌dang kạpělẹ̌hengetange i Yudas, sěngkatau wọ'i sire mapul᷊o dua murit'E ene narěntạe. Ringangi sie ute, nahunděntạe lai taumata l᷊awọ kụ piạ pedane ringangu pal᷊o-pal᷊on sire. I sire niroloh'u manga imang těmbonange ringangu manga matatimad'u tau Yahudi.

⁴⁸ I taha pẹ̌sunial᷊ẹ̌ e kai seng nạung něhabarẹ̌ si sire tatiala ini, "I sain takụ děnguange ute ene taumatane. Kụ samẹ e i Sie!"

⁴⁹ Kerene sarang nahumpạu tampạ ene i Yudas měngkatewe himaung su Mawu Yesus kụ nẹ̌bera, "Tabeạ, Tuang Guru!" mase i sie riměngu Mawu Yesus.

⁵⁰ I Yesus simimbang, "Anu, kai waugu apa i kau nakakarěnta sini?" Ene taumata l᷊awọe nẹ̌těngkawahanịe kụ něnamẹ si Yesus.

⁵¹ Sěngkatau wọ'i sire murit'E apang ene sene ringangi Yesus, něnawụ pedane kụ namilị ěllangu imang mawantugẹ̌ sarangkewe nahěnsị tul᷊ine.

⁵² Mawu Yesus něhengetangke su murit'E ene, "Suhịe kapia pedanu e su homane u kěbị apang měmpamateng peda e, sarung lai mateng peda.

⁵³ Arau su naungu Iạ e kai ta makarorong tul᷊ung si Amang-Ku e, kụ i Sie apid'u měndolohu malạekat'E nangělembo wọu mapul᷊o dua su ghapaěnge?

⁵⁴ Arawe mạeng kawe kerene ute, tawẹ kasasěhụe kereu apang kụ seng nitěbal᷊ẹ̌ su ral᷊ungu Winohẹ Susi u mambeng těngadẹ̌ mariadi kere orasẹ̌ ini e?"

⁵⁵ Mase Mawu Yesus něhengetang su taumata l᷊awọ ene, "Unụe Iạ e kai tahapate, hakịu i kamene ruměnta měmpẹ̌bawa warạ dingangu pal᷊o-pal᷊o mědeạu měnamẹ si Siạ? Ěllo-ěllo Iạ e kawe mạněntiro su Wal᷊em Mawu e, kai i kamene tawe měnamẹ Siạ!

⁵⁶ Kai mang seng harusẹ̌ kerene tadeạu misěhụ apang kụ niwohẹu manga nabi e su ral᷊ungu Winohẹ Susi." Bọu e kěbị murit'E nahuntal᷊ang němpaněntangu Mawu Yesus.

⁵⁷ Taumata apạen němpẹ̌namẹ Mawu Yesus němpangěntuden Sie sol᷊ong bal᷊eng Imang Mawantugẹ̌ i Kayafas. Sene manga mananěntirong agama e ringangu manga matatimad'u tau Yahudi e seng němpẹ̌tampung.

⁵⁸ I Petrus tụtol᷊e Mawu Yesus bọu maraune sarang dělah'u wal᷊eng imang marangẹ. Mase i Petrus simuẹ̌ e su ral᷊ungu rělahe, kụ naiangke ringangu manga měndariagạ. I sie mapulu makakasingkạ měnsang kereapa sarung ěnsuene.

⁵⁹ Manga imang těmbonange ringangu patikụewen dal᷊ohong Sanhedrin e mědẹ̌deạ sahidi konti, mědeạu mapakanawong hukumangu papate su Mawu Yesus.

⁶⁰ Kai i sire tawe nakareạ sarang sěmbaụ tatahutěngade, sěmbal᷊iau seng lawọ nial᷊ạ sahidi konti. Nadehọ piạ e ruang katau riměnta.

⁶¹ I rẹ̌dua e němpẹ̌berae, "I anu ěndaịe nẹ̌bera, 'Iạ e makaghoghahẹ̌ bue Wal᷊em Mawu, kụ saụbe ikakoạ-Ku su ral᷊ungu těllu ěllo.'"

⁶² Mase imang mawantugẹ̌ e nẹ̌buạe, kụ nẹ̌bera si Sie, "Kawe unụe i Kau e mang tawẹ sasimbangu su laěnsilẹ̌ ipangěnsilẹ̌ si Kau e?"

⁶³ Arawe Mawu Yesus měngkate tawẹ kěndịe. Nẹ̌saụ kapia imang mawantugẹ̌ e nẹ̌bera si Sie, "Su Těngon Duata Wiahẹ̌ e ute paul᷊ịko si kami měnsang kai i Kau e Ratu Mananal᷊amatẹ̌, Ahus'u Ruata?"

⁶⁴ Mawu Yesus simimbang, "Kere niweranu. Kai pangimangko: u manětạ bọu orasẹ̌ ini e, i kamene sarung makasilo Ahus'u Taumata mạiang su sěmběkang koanengu Mawu Ruata Makawasa, kụ duměnta su wowom binawa su l᷊angị e!"

⁶⁵ Tangu imang mawantugẹ̌ e měngkate naningkasẹ̌ pakeange, kụ nẹ̌berạe, "I Sie něhinakang Duata! Seng ta wahal᷊uasu piạ lai sahidine. I kamene kěbị e seng nakaringihẹ̌ hala pělahinakange su Mawu Ruata e.

⁶⁶ Kụ ini e kerea su tiněnnang kamene e?" I sire němpẹ̌simbang u, "I Sie nẹ̌sal᷊a kụ hinong pateěng."

⁶⁷ Ene i sire nangědụe ghating Yesus, kụ němpangoka si Sie. Sěnggạe wue ute němpameru si Sie,

⁶⁸ ringangu nẹ̌bera, "Kěnangko tikạ dingangu pěhabarẹ̌ko si kami, ei Ratu Mananal᷊amatẹ̌! I sai wue nameru si Kau e?"

⁶⁹ Ene i Petrus kạkaiange su l᷊ikude, su rělahẹ̌. Sěngkatau wọu tal᷊oarang ěllang bawine himaung kụ nẹ̌bera si Petrus, "Bal᷊inẹbe i kau l᷊ai ringang i Yesus tau Galilea e?"

⁷⁰ Kai i Petrus nẹ̌děndil᷊ẹ̌ su těngon sire kěbị. "Iạ e ta nakahěngang měnsang i kau e mạanung a," angkuěng i Petrus,

⁷¹ bọu ene i sie siměbangkě wọu tukadẹ̌ e. Sěngkatau ěllang bawine wal᷊ine nakasilo si Petrus, kụ nẹ̌bera si sire sene, "Tau ěndaị ini e mang mal᷊aing dingang i Yesus bọu Nazaret e."

⁷² Kutẹu saụe wue i Petrus nẹ̌děndilẹ̌, kapẹ̌salune, "Těnga-těngadẹ̌ iạ běgawen tau ene!" angkuěng i Petrus.

⁷³ Ta nararěnnạ wọu ene i sire apang dụdarisị sene němpẹ̌haungke si Petrus dingangu nẹ̌bera, "Mal᷊ahẹ bue, i kau e mang dingang i sire. Ene kinakiral᷊a wue wọu pẹ̌bawisaranu."

⁷⁴ Ene i Petrus nanětạe mẹ̌sẹ̌sasalu kụ nẹ̌bera, "Makakutụe, iạ e wẹ̌gawen tau ene!" Su orasẹ̌ ene lai manụ kimukụ.

⁷⁵ Kụ i Petrus nakatahěndungke u Mawu Yesus seng bọu něhengetang si sie, "Těntal᷊ang manụ deng ta kimẹ̌kukụ, i kau e seng těllun sul᷊e nẹ̌sunial᷊'u Iạ." Bọu e i Petrus simẹ̌bangke kụ simangịe ringangu pẹ̌sasasěsilẹ̌.

Matius

Video Matius 26

Ikuti Kami:

KONTAK | PARTISIPASI | DONASI