Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sewaktu Deside Isa selesẽ ngajahang selapuq hal nike, Ie bemanik lẽq pengiring-pengiring-Ne,

² "Side pade nenaoq, bahwe karing due jelo Hari Raye Paskah, dait Bije Manusie gen teserahang jari tepakuq lẽq kayuq salib."

³ Waktu nike imam-imam kepale dait pemimpin-pemimpin Yahudi bekumpul lẽq istane Imam Agung Kayapas.

⁴ Ie pade berunding jari bau Deside Isa secare tedoq-tedoq dait nyematẽq Ie.

⁵ Laguq ie pade bebase, "Ndaq laksaneang hal nike waktu dengan-dengan kenyeke ngerayeang Paskah, adẽq rakyat ndẽq jari biur lantur."

⁶ Sewaktu Deside Isa kenyeke lẽq Betania, lẽq gedẽng Simon saq piranan sakit kuste,

⁷ araq sopoq dengan nine parek tipaq Deside Isa, dait jauq sopoq botol pualam berisi minyak sengẽh saq mahel. Lẽq waktu Deside Isa melinggih medaran, dengan nine nike nolẽngang minyak sengẽh nike lẽq sirah Deside Isa.

⁸ Pengiring-pengiring Deside Isa serioq hal nike, terus ie pade jari sili dait bebase, "Napi manpaatne minyak sengẽh nike tesẽdaq-ẽdaq?"

⁹ "Minyak sengẽh nike bau tejual siq aji saq mahel, terus kẽpẽngne bau tesedekahang tipaq dengan-dengan miskin!"

¹⁰ Deside Isa wikan pikiran pengiring-pengiring-Ne, terus Ie bemanik, "Kembẽq side pade piaq dengan nine niki susah? Ie ngelaksaneang hal saq solah tipaq Tiang.

¹¹ Dengan miskin tetep araq lẽq antare side pade, laguq Tiang niki ndẽq seterusne araq bareng kance side pade.

¹² Ie minyakin Tiang siq minyak sengẽh nike jari siepang pemakaman Tiang.

¹³ Tiang badaq side: Setetune lẽq seantẽro dunie, lẽq mbẽ juaq Kabar Solah lẽman Allah tesiarang, perbuatan dengan nine niki gen teceriteang ẽndah jari nginget ie."

¹⁴ Beterus salaq sopoq lẽman kedue olas pengiring-pengiring Deside Isa, saq aranne Yudas Iskariot, lumbar ojok imam-imam kepale.

¹⁵ Yudas bebase lẽq imam-imam kepale nike, "Napi saq side pade gen icanin tiang lamun tiang serahang Deside Isa tipaq side pade?" Terus imam-imam kepale nike ngerẽkẽng telung dase kẽpẽng perak, dait serahangne kẽpẽng nike lẽq Yudas.

¹⁶ Mulai lẽman waktu nike Yudas berusahe boyaq kesempatan jari behianat lẽq Deside Isa.

¹⁷ Lẽq jelo penembẽq Perayaan Ruti Ndẽq Beragi, pengiring-pengiring Deside Isa parek lẽq Ie, dait metakẽn, "Lẽq mbẽ Pelungguh kayun adẽq tiang pade siepang Pelungguh keloran Paskah?"

¹⁸ Jawab Deside Isa, "Pade lumbar ojok sopoq dengan lẽq kote, terus sampẽang lẽq ie, 'Manik Guru tiang, sampun waktune Tiang gen ngerayeang Paskah lẽq balẽnde bareng kance pengiring-pengiring Tiang.'"

¹⁹ Pengiring-pengiring-Ne ngelaksaneang napi saq temanikang siq Deside Isa. Ie pade siepang keloran Paskah nike.

²⁰ Sesampun kekelem, Deside Isa dait kedue olas pengiring-Ne melinggih medaran keloran Paskah.

²¹ Sewaktu ie pade kenyeke medaran, Deside Isa bemanik, "Tiang badaq side: Setetune salaq sopoq lẽq antare side pade gen behianat lẽq Tiang."

²² Sewaktu pengiring-pengiring Deside Isa dengah hal nike, ie pade jari asẽq gati, beterus sopoq-sopoq mulai metakẽn lẽq Deside Isa, "Junjungan Saq Mulie, pasti ndẽqne tiang saq temaksut nike?"

²³ Jawab Deside Isa, "Dengan saq bareng-bareng kance Tiang celep ruti lẽq dalem jembung, ie saq gen behianat lẽq Tiang.

²⁴ Mule Bije Manusie gen ninggal maraq saq tetulis lẽq Kitab Suci. Laguq celake gati dengan saq behianat lẽq Bije Manusie nike! Solahan dengan nike ndẽq tebijeang!"

²⁵ Beterus Yudas saq behianat nike bejawab, "Pasti ndẽqne tiang saq Guru maksut nike?" Jawab Deside Isa, "Maraq nike basende!"

²⁶ Sewaktu ie pade medaran, Deside Isa bait ruti, beterus ngucapang do'e syukur. Sesampun nike, peleng-peleng-Ne ruti nike siq gading-Ne terus teicanin tipaq pengiring-pengiring-Ne, dait bemanik, "Silaq bait, terus kelorang; niki ragen Tiang."

²⁷ Sesampun nike, Deside Isa bait sopoq cawan saq berisi anggur. Ie ngucapang do'e syukur tipaq Allah, terus ngicanin cawan nike lẽq pengiring-pengiring-Ne, sambil bemanik, "Silaq selapuqde pade nginem lẽman cawan niki.

²⁸ Sẽngaq niki daraq Tiang saq ngesahang perjanjian Allah -- daraq saq tetumpahang tipaq dengan luwẽq adẽq dose-dose ie pade teampunin siq Allah.

²⁹ Tiang ẽndah badaq side: Tiang ndẽq gen nginem anggur niki malik jangke dateng waktune Tiang gen nginem anggur saq baru bareng kance side pade dalem Kerajaan Bapa Tiang."

³⁰ Beterus ie pade nyanyiang lagu pujian. Sesampun nike ie pade lumbar ojok Bukit Zaitun.

³¹ Beterus Deside Isa bemanik lẽq pengiring-pengiring-Ne, "Kelem niki ẽndah side pade gen pelai bilin Tiang. Sẽngaq lẽq Kitab Suci tetulis: Allah bemanik, 'Tiang gen nyematẽq pengarat nike, dait selapuq dombe-dombene gen bekelin sopoq kance saq lain.'

³² Laguq sesampun Tiang idup malik, Tiang gen senjuluq side pade ojok Galilea."

³³ Petrus matur lẽq Deside Isa, "Timaq selapuqne bilin Pelungguh, tiang nẽnten!"

³⁴ Jawab Deside Isa lẽq Petrus, "Tiang badaq side: Setetune kelem niki ẽndah, sendẽqman manuk ngungkung, side sampun telu kali nilas Tiang."

³⁵ Laguq jawab Petrus, "Timaq tiang harus matẽ bareng kance Pelungguh, tiang nẽnten gen nilas Pelungguh!" Dait selapuq pengiring saq lain ẽndah matur maraq nike.

³⁶ Sesampun nike, Deside Isa lumbar kance pengiring-pengiring-Ne ojok sopoq taoq aranne Getsemani. Lẽq derike Deside Isa bemanik lẽq pengiring-pengiring-Ne, "Tokol lẽq deriki, waktu Tiang lalo bedo'e lẽq derike."

³⁷ Beterus Deside Isa tẽnaq Petrus dait kedue bije Zebedeus lumbar bareng kance Ie. Deside Isa mulai beridap osah dait asẽq.

³⁸ Deside Isa bemanik lẽq pengiring-pengiring-Ne nike, "Angen Tiang sedih gati, idapne maraq gen matẽ doang. Ndot lẽq deriki, dait bejage-jage bareng Tiang."

³⁹ Sesampun nike Deside Isa margi jaoqan sekediq, terus Ie sujut lẽq tanaq dait bedo'e, "Bapa, lamun bau, bait cawan penderitean niki lẽman Tiang laguq sampunang menurut kemẽlẽq Tiang, laguq menurut pekayunan Bapa."

⁴⁰ Sesampun nike, Deside Isa tulak ojok taoq ketelu pengiring-Ne terus ie pade tedait kenyeke tindoq. Deside Isa bemanik lẽq Petrus, "Cume sejam doang side pade ndẽq sanggup bejage kance Tiang?

⁴¹ Bejage-jage dait bedo'e, adẽq side pade ndẽq ngalamin cobe. Mule roh side mẽlẽ ngelaksaneang saq kenaq, laguq side pade ndẽq sanggup sẽngaq awakde nike lemah."

⁴² Karing sekali Deside Isa lumbar bedo'e, manik-Ne, "Bapa, lamun cawan penderitean niki harus Tiang terimaq, menengang pekayunan Bapa saq telaksane."

⁴³ Sesampun nike Deside Isa tulak, terus dait-Ne malik pengiring-pengiring-Ne masih tindoq, sẽngaq ie pade ngantok gati.

⁴⁴ Deside Isa lumbar bilin ie pade terus bedo'e saq ketelu kaline dait ngucapang do'e saq pade.

⁴⁵ Sesampun nike Deside Isa tulak malik tipaq pengiring-pengiring-Ne, dait bemanik, "Napi side pade masih tindoq dait mentelah? Silaq pade serioq, sampun wayene Bije Manusie teserahang ojok ime dengan-dengan bedose.

⁴⁶ Pade ures! Silaq ite lumbar! Pade serioq! Dengan saq behianat lẽq Tiang sampun dateng!"

⁴⁷ Sewaktu Deside Isa masih bebaos, Yudas, salaq sopoq lẽman kedue olas pengiring-Ne nike dateng. Bareng kance Yudas araq ẽndah dengan luwẽq jauq klẽwang dait gegitik. Ie pade tesuruq siq imam-imam kepale dait pemimpin-pemimpin Yahudi.

⁴⁸ Penghianat nike sampun badaq tande niki tipaq ie pade, "Dengan saq tiang siduk, Ie uwah denganne. Bau Ie!"

⁴⁹ Sesampun dateng lẽq taoq nike, Yudas, langsung ojok Deside Isa dait matur, "Salam Bapaq Guru!" Terus ie siduk Deside Isa.

⁵⁰ Jawab Deside Isa, "Semeton, napi maksutde dateng ojok deriki?" Beterus dengan luwẽq nike maju dait bau Deside Isa.

⁵¹ Salaq sopoq dengan lẽman dengan-dengan saq bareng Deside Isa serẽt klẽwangne, terus ngerantek pelayan Imam Agung jangke pegat kentokne.

⁵² Deside Isa bemanik lẽq pengiring-Ne nike, "Tamaqang klẽwangde lẽq dalem sarungne. Sẽngaq sai juaq saq kadu klẽwang gen ninggal siq klẽwang.

⁵³ Side paran Tiang ndẽq bau tunas tulung lẽq Bapa Tiang, adẽq Ie gelis ngirim lebih lẽman due olas pasukan malaẽkat?

⁵⁴ Laguq lamun hal nike Tiang laksaneang, ndẽq gen telaksane napi saq sampun tetulis lẽq dalem Kitab Suci bahwe mule harus telaksane hal maraq niki?"

⁵⁵ Beterus Deside Isa bemanik lẽq dengan luwẽq nike, "Napi Tiang niki perampok, jangke side pade dateng jauq klẽwang dait gegitik jari bau Tiang? Sebilang jelo Tiang ngajahang lẽq Gedẽng Allah, dait side pade ndẽq bau Tiang.

⁵⁶ Laguq mule seharusne maraq niki, adẽqne telaksane napi saq tetulis siq nabi-nabi lẽq dalem Kitab Suci." Sesampun nike, selapuq pengiring-pengiring-Ne pelai bilin Deside Isa.

⁵⁷ Dengan-dengan saq bau Deside Isa jauq Deside Isa ojok gedẽng Imam Agung Kayapas. Lẽq derike ahli-ahli Taurat dait pemimpin-pemimpin Yahudi sampun bekumpul.

⁵⁸ Petrus ngiring Deside Isa lẽman jaoq jangke lelẽah gedẽng Imam Agung. Dait sesampun tame ojok dalem, ie tokol bareng kance pengawal-pengawal. Petrus melẽt nenaoq berembẽ laun kejarianne selapuqne nike.

⁵⁹ Imam-imam kepale dait selapuq anggote Mahkamah Agame berusahe mauq kesaksian palsu adẽq Deside Isa bau tehukum matẽ.

⁶⁰ Laguq ie pade ndẽq mauq, timaq luwẽq dengan saq maju jari saksi duste. Ahirne araq due dengan maju ojok julu.

⁶¹ Ie pade bebase, "Dengan niki sampun bebaos bahwe, 'Ie bau robohang Gedẽng Allah, terus dalem telu jelo Ie sanggup penganjeng malik.'"

⁶² Terus Imam Agung nike nganjeng dait bebase lẽq Deside Isa, "Pelungguh kayun jawab napi saq tetuduhang nike atao nẽnten?"

⁶³ Laguq Deside Isa tetep meneng. Imam Agung nike bebase malik lẽq Deside Isa, "Demi Allah saq idup, sampẽang lẽq tiang pade napi tetu Pelungguh niki Almasih, Bije saq asalne lẽman Allah?"

⁶⁴ Jawab Deside Isa, "Maraq nike basen pelungguh. Laguq Tiang badaq side waktu niki side pade gen serioq Bije Manusie melinggih lẽq sedi kanan Allah saq Mahekuase, dait rauh lẽq atas awan lẽq langit!"

⁶⁵ Make Imam Agung nike ngeroẽk-roẽk kuacene, dait bebase, "Ie menghine Allah! Ndẽq perlu saksi malik. Side pade dengah mẽsaq ucapan nike menghine Allah.

⁶⁶ Mangkin berembẽ pendapet side pade?" Jawab dengan-dengan nike, "Ie salaq, dait harus tehukum matẽ."

⁶⁷ Terus ie pade nijuh penjarupan Deside Isa, dait jagur Ie. Araq ẽndah saq nempẽlẽk Ie,

⁶⁸ dait bebase, "Cobaq badaq tiang pade, hai Almasih! Sai saq ngempuk Side?"

⁶⁹ Petrus kenyeke tokol lẽq luah, lẽq lelẽah. Salaq sopoq pelayan nine dateng ngerapetin Petrus dait beketuan, "Tekan side ẽndah saq bareng kance Deside Isa dengan Galilea nike?"

⁷⁰ Laguq Petrus nilas lẽq julu selapuq dengan nike. "Tiang ndẽq ngerti napi maksut side," basen Petrus,

⁷¹ terus Petrus lumbar ojok jebak. Pelayan nine saq lain ẽndah serioq Petrus, terus bebase lẽq dengan-dengan lẽq derike, "Onẽq dengan niki araq bareng kance Deside Isa dengan Nazaret nike."

⁷² Laguq Petrus nilas malik dait besumpah, "Tiang tetu-tetu ndẽq kenal dengan nike!"

⁷³ Ndẽq ngonẽq sesampun nike, dengan-dengan saq nganjeng lẽq derike dateng ngerapetin Petrus, dait bebase, "Pasti side salaq sopoq lẽman ie pade. Kentare gati agolde."

⁷⁴ Beterus Petrus mulai besumpah-sumpah, dait bebase, "Tiang ndẽq kenal Deside Isa nike!" Lẽq waktu nike ẽndah manuk ngungkung.

⁷⁵ Terus Petrus jari inget bahwe Deside Isa sampun manikang hal nike lẽq ie, "Sendẽqman manuk ngungkung, side sampun telu kali nilas Tiang." Beterus Petrus sugul dait nangis siq asẽqne.

Matius

Video Matius 26

Ikuti Kami:

KONTAK | PARTISIPASI | DONASI