Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Kutiko Isa Almasih lah salasai ma ajakan kasadonyo parkaro-parkaro tu, mako Baliau bakato kabake pangikuik-pangikuik-Nyo,

² "Angku-angku kan layi tawu, baraso duwo ari lai Ari Rayo Paskah, Anak Manusia ka disarahkan untuak ka disalibkan!"

³ Pado kutiko itu imam-imam kapalo, sarato jo pamimpin-pamimpin Yahudi sadang bakumpua di istana Imam Basa Kayafas.

⁴ Inyo sadang mamparundiangkan, baa caronyo untuak ka manangkok Isa Almasih, sacaro ba anok-anok, sarato ka mambunuah Baliau.

⁵ "Tapi," kecek urang-urang tu, "janlah mukasuik kito tu dilansuangkan dikutiko di Ari Rayo, baiko eboh urang, timbua kalibuik di antaro urang banyak."

⁶ Kutiko Isa Almasih sadang di Betania, di rumah si Simon nan dawulu bapanyakik kulik nan manakuikkan,

⁷ ado surang padusi nan datang kabake Baliau. Inyo mambawok sabuwah boto pualam, nan barisi minyak arun nan sangaik maha. Dikutiko Isa Almasih sadang duduak makan, padusi tu manuwangkan minyak arun tu ka ateh kapalo Baliau.

⁸ Pangikuik-pangikuik Baliau nan maliyek kajadian tu, bi bangih. "Apo gunonyo minyak arun tu dibuwang-buwang?" keceknyo.

⁹ "Minyak arun tu bisa dijuwa jo arago nan sangaik maha, pitihnyo buliah dibarikan kabake urang-urang nan bansaik!"

¹⁰ Isa Almasih mangatawui apo nan dipikiekan dek pangikuik-Nyo tu, Baliau bakato, "Baa mangko angku-angku mambuwek seso urang padusi ko? Inyo mangarajokan sasuatu nan elok, sarato nan tapuji untuak Ambo.

¹¹ Urang nan bansaik ka salamonyo ado di antaro angku-angku, tapi Ambo ko indak kasalamonyo doh jo angku-angku.

¹² Jo sacaro inyo manuwangkan minyak arun ka badan Ambo tu, itu aratinyo adolah, inyo lah muloi mampasiyapkan untuak pangubuaran Ambo.

¹³ Picayolah! Dima-dimanyo di dunia ko, dima sajo Injil dari Allah dibaritokan, mako apo nan lah dipabuwek dek urang padusi ko ka tatap dicuritokan juwo, untuak ka mangana-ngana inyo."

¹⁴ Ado salah surang dari kaduwo baleh pangikuik Isa Almasih, nan banamo si Yudas Iskariot, inyo payi kabake imam-imam kapalo.

¹⁵ Inyo bakato kabake imam-imam tu, "Apo nan ka angku-angku barikan untuak ambo, jikok ambo dapek manyarahkan Isa Almasih kabake angku-angku?" Mako imam-imam kapalo tu, ma etong tigo puluah buwah pitih perak, sudah tu inyo agiahkan kabake si Yudas Iskariot.

¹⁶ Muloi dari sajak itu, si Yudas taruih mancari kutiko nan baiak untuak ka mangkianaik-i Isa Almasih.

¹⁷ Di ari nan partamu di Ari Rayo Roti Indak Baragi, pangikuik-pangikuik Isa Almasih datang kabake Baliau. Pangikuik-Nyo bi batanyo, "Dima nan katuju di Angku, kami manyadiyokan makanan Paskah untuak Angku?"

¹⁸ Baliau manjawab, "Payilah kabake surang urang di kota, katokan kabake inyo, 'Angku Guru mangatokan, baraso lah tibo ko masonyo untuak Ambo; Ambo bamukasuik nak marayokan Paskah di rumah angkau basamo-samo jo pangikuik-pangikuik Ambo.'"

¹⁹ Pangikuik-pangikuik Isa Almasih mangarajokan apo nan disuruahkan dek Baliau kabake inyo. Inyo bi payi manyadiyokan makanan Paskah tu.

²⁰ Baru ari lah malam, Isa Almasih sarato jo kaduwo baleh urang pangikuik-Nyo, bi duduak makan.

²¹ Samantaro inyo sadang bi makan, Isa Almasih bakato, "Dangakanlah kecek Ambo ko: salah surang di antaro angku-angku ado nan ka mangkianaik-i Ambo."

²² Baru mandangakan kecek Baliau tu, sangaik sadiahnyo ati pangikuik-pangikuik-Nyo tu. Sudah tu, balega-lega pangikuik-Nyo tu bi batanyo kabake Baliau, "Kan indak ambo doh nan Angku mukasuikkan, Ngku?"

²³ Isa Almasih manjawab, "Urang nan samo-samo jo Ambo marandamkan roti ka dalam mangkuak, inyo tu lah nan ka mangkianaik-i Ambo.

²⁴ Batua Anak Manusia ka mati sarupo jo nan tasurek di Alkitab. Tapi cilakolah urang nan mangkianaik-i Anak Manusia! Labiah elok lai di urang tu jikok inyo indak dilayiekan ka dunie ko!"

²⁵ Sudah tu, si Yudas, si pangkianaik tu bakato, "Kan indak ambo doh nan Angku Guru mukasuikkan?" Isa Almasih manjawab, "Iyo baitulah, samo jo bakcando nan angkau katokan tu!"

²⁶ Kutiko inyo sadang bi makan, mako Isa Almasih ma ambiak roti, sudah tu Baliau basyukur. Kamudian Baliau mambalah-balah roti tu jo tangan-Nyo, sudah tu, Baliau barikan kabake pangikuik-pangikuik-Nyo sambia bakato, "Ambiaklah ko, makanlah; ikolah tubuah Ambo."

²⁷ Sasudah tu Baliau ma ambiak cawan anggur, sarato basyukur kapado Allah. Kudian Baliau mambarikan cawan tu kabake pangikuik-pangikuik-Nyo, sambia bakato, "Bi minunlah, angku-angku kasadonyo.

²⁸ Dek karano, ikolah darah Ambo nan mansahkan pajanjian Allah -- darah nan dicurahkan untuak urang nan banyak, untuak pa ampuni doso-dosonyo.

²⁹ Picayolah kabake Ambo: Ambo indak ka maminun anggur ko lai sampai tibo masonyo isuak, Ambo maminun anggur nan baru samo-samo jo angku-angku di Karajaan Bapak Ambo."

³⁰ Kudian urang-urang tu bi malagukan lagu pujian. Sasudah tu inyo bi payi ka Bukik Zaitun.

³¹ Sasudah tu Isa Almasih bakato kabake pangikuik-pangikuik-Nyo, "Dimalam ko juwo kasadonyo angku-angku ka bi lari payi maninggakan Ambo; dek karano di Alkitab lah ado tatulih: Allah mangatokan, 'Aden ka mambunuah tukang gubalo tu, mako domba-domba gubaloannyo ka bakecai-kecai.'

³² Tapi, sasudah Ambo di iduikkan baliak, Ambo ka payi mandawului angku-angku ka Galilea."

³³ Si Petrus bakato kabake Isa Almasih, "Biyapun kasadonyo urang ko bi maninggakan Angkau, nan ambo indak!"

³⁴ "Kana-ilah kecek Ambo ko," kecek Isa Almasih kabake inyo, "malam ko juwo, sabalun ayam bakukuak, angkau sampai tigo kali ma engkari Ambo."

³⁵ Si Petrus manjawab, "Biyapun ambo ka mati samo-samo jo Angku, nan ambo indak ka mangatokan doh, baraso ambo indak tawu jo Angku!" Kasadonyo pangikuik Isa Almasih nan lain pun bi mangatokan nan sarupo itu pulo.

³⁶ Sasudah tu Isa Almasih sarato jo pangikuik-pangikuik-Nyo payi ka sabuwah tampaik nan banamo Getsemani. Tibo disinan Baliau bakato kabake pangikuik-pangikuik-Nyo, "Duduaklah disiko samantaro Ambo payi badowa."

³⁷ Isa Almasih ma ajak si Petrus, sarato jo kaduwo urang anak Zebedeus payi samo-samo jo Baliau. Baliau muloi maraso sadiah sarato rasah.

³⁸ Baliau mangecek kabake pangikuik-pangikuik-Nyo, "Ati Ambo sangaik sadiahnyo, rasonyo saroman jo urang nan ka mati. Tagaklah angku-angku disiko, satolah bajago-jago samo jo Ambo."

³⁹ Kudian Isa Almasih payi agak jauah saketek, Baliau tasungkua ka tanah sambia badowa. "Bapak," kecek-Nyo, "jikok buliah, jauahkanlah dari Ambo sansaro nan musti ka Ambo tangguangkan ko. Tapi janlah manuruik kandak Ambo, malainkan manuruik kahandak Bapak lah andaknyo."

⁴⁰ Sasudah tu, Isa Almasih babaliak kabake pangikuik-Nyo nan batigo cako, didapek-i-Nyo pangikuik-Nyo tu sadang bi talalok. Baliau bakato kabake si Petrus, "Di angku-angku nan batigo ko, indak talok doh bajago-jago agak sajam samo-samo jo Ambo?

⁴¹ Bajago-jagolah, sarato badowalah, supayo angku-angku jan mangalami cobaan. Batua roh angku-angku layi namuah mangarajokan apo nan baiak, tapi di angku-angku indak talok, dek karano tabiyaik manusia tu lamah."

⁴² Sakali lai Isa Almasih payi badowa, Baliau mangatokan, "Oih Bapak, jikok sansaro ko musti Ambo tangguangkan juwo, sainggo indak dapek doh dijauahkan, biyalah nan sasuwai jo kahandak Bapak nan tajadi."

⁴³ Sasudah tu Baliau babaliak pulo kabake pangikuik-Nyo, Baliau dapek-i pangikuik-pangikuik-Nyo tu sadang bi lalok pulo, dek karano pangikuik-Nyo tu sabana mangantuak.

⁴⁴ Sakali lai Isa Almasih payi maninggakan pangikuik-Nyo, nan katigo kalinyo Baliau badowa, dowa-Nyo sarupo juwo jo nan cako.

⁴⁵ Sasudah tu Baliau babaliak pulo ka pangikuik-Nyo sambia bakato, "Lalok juwo lai angku-angku? Caliaklah, lah tibo ko wakatunyo Anak Manusia ka disarahkan kabake kuwaso urang-urang badoso.

⁴⁶ Jagolah, molah kito payi. Liyeklah! Urang nan mangkianaik-i Ambo lah tibo!"

⁴⁷ Samantaro Isa Almasih sadang mangecek, si Yudas, nan adolah salah surang dari pangikuik-Nyo nan duwo baleh tu, tibo. Samo-samo jo inyo, tibo pulo urang banyak nan mambawok padang jo palakak. Urang-urang tu disuruah dek imam-imam kapalo, sarato jo pamimpin-pamimpin Yahudi.

⁴⁸ Si pangkiyanaik tu lah mambari tawu kabake urang-urang tu, tando nan bakcando iko, "Nama urang nan ambo ibu, itulah Urangnyo. Tangkoklah Inyo!"

⁴⁹ Sato tibo di tampaik tu, si Yudas lansuang ka adok-an Isa Almasih sambia bakato, "Assalamualaikum, Angku Guru!" Sudah tu lansuang inyo ibu Baliau.

⁵⁰ Isa Almasih manjawab, "Oih sanak, untuak apo sanak datang kamari?" Kudian urang nan banyak tu taruih juwo bi mandakek, sarato lansuang manangkok Baliau.

⁵¹ Salah surang dari pangikuik Isa Almasih nan ado disinan, nan samo-samo jo Baliau, manyentakkan padangnyo, sudah tu dirambahnyo pisuruah imam basa tu, sampai putuih talingonyo.

⁵² Isa Almasih bakato ka pangikuik-Nyo tu, "Masuakkanlah baliak padang angkau tu ka saruangnyo, dek karano, satiyok urang nan suko mampagunokan padang, mako inyo ka dibunuah pulo dek padang.

⁵³ Angkau sangko Ambo ko indak dapek mintak tolong ka Bapak Ambo? Jikok Ambo mintak Baliau ka basugiro untuak mangirinkan saradadu malekaik, labiah dari duwo baleh pasukan banyaknyo.

⁵⁴ Tapi, jikok baitu, dima pulo mungkin ka tajadi apo nan lah dinubuatkan dek Alkitab, baraso iyo musti tajadi nan bakcando iko?"

⁵⁵ Sudah tu Isa Almasih bakato kabake urang nan banyak tu, "Apokoh Ambo ko urang jahek, mangko angku-angku tibo mambawok padang jo palakak, untuak ka manangkok Ambo? Tiyok ari Ambo ma aja di Rumah Allah, tapi angku-angku indak manangkok Ambo doh!

⁵⁶ Tapi, iyo lah baitu samustinyo, supayo basuwoan, apo nan lah disurekkan dek nabi-nabi di Alkitab." Sasudah tu, kasadonyo pangikuik Isa Almasih bi tabang ambua lari maninggakan Baliau.

⁵⁷ Urang-urang nan manangkok Isa Almasih tu, mambawok Baliau ka rumah Imam Basa Kayafas. Guru-guru agamo jo pamimpin-pamimpin Yahudi lah bi bakumpua disinan.

⁵⁸ Si Petrus payi ma iriangkan Isa Almasih dari jauah, sampai ka alaman rumah imam basa. Si Petrus masuak ka alaman rumah tu, inyo sato pulo duduak samo jo pangawal-pangawal. Inyo nak niyo tawu kasadonyo baa akienyo kajadian tu.

⁵⁹ Imam-imam kapalo sarato jo kasadonyo Mahkamah Agamo, lah ba usawo mancari sasi-sasi palasu, supayo inyo buliah dapek manjatuahkan ukunan mati kabake Isa Almasih.

⁶⁰ Tapi indak ciyek juwo doh nan tasuwo, tando Baliau basalah, biyapun lah sambuah sasi panduto nan bi tibo. Akienyo, ado duwo urang nan tagak ka muko.

⁶¹ Inyo mangatokan, "Urang ko dek sari ado mangatokan, 'Ambo bisa maruntuahkan Rumah Allah, sudah tu dalam maso tigo ari Ambo bisa managakkannyo baliak.'"

⁶² Mandangakan nan baitu, imam basa lansuang tagak, sambia bakato kabake Isa Almasih, "Apokoh Angkau indak manulak, tuduahan nan dibabankan kabake Angkau tu?"

⁶³ Tapi Isa Almasih anok sajo. Sakali lai imam basa tu batanyo kabake Baliau, "Demi Allah nan Mahakuwaso, katokanlah kabake kami, apokoh iyo Angkau Rajo Panyalamaik, Anak Allah?"

⁶⁴ Isa Almasih manjawab, "Iyo baitulah, bakcando nan angkau katokan tu. Tapi picayolah: muloi dari sajak kiniko, angku-angku ka maliyek Anak Manusia duduak, di sabalah suwok Allah Nan Mahakuwaso, isuak ka tibo baliak, di ateh awan nan di langik!"

⁶⁵ Mako imam basa tu mancabiak-cabiak bajunyo, sambia bakato, "Inyo ko lah mampasando-sandokan kabasaran Allah! Indak paralu lai di kito sasi. Kasadonyo angku-angku lah mandangakan sandiri, kato-kato-Nyo nan mampasando-sandokan kabasaran Allah.

⁶⁶ Kiniko baa lai pandapek angku-angku?" Urang tu bi manjawab, "Inyo lah basalah, musti di ukun mati."

⁶⁷ Sudah tu urang-urang tu bi maliyua-i muko Isa Almasih, sarato manangani Baliau. Ado pulo nan manampa muko Baliau

⁶⁸ sambia bakato, "Cubolah takok, katokanlah kabake kami, oih Rajo Panyalamaik! Siya ko urang nan manampa Wa-ang ko?"

⁶⁹ Si Petrus sadang duduak diluwa, di alaman. Salah surang palayan nan padusi tibo, inyo bakato kabake Si Petrus, "Indak koh angkau ko tamasuak urang nan samo-samo jo si Isa urang Galilea tu?"

⁷⁰ Tapi si Petrus indak mangaku di adok-an kasadonyo urang tu. "Ambo indak mangarati apo nan angkau mukasuikkan," kecek si Petrus,

⁷¹ sudah tu, inyo payi ka pintu alaman. Ado pulo surang palayan padusi nan lain, manampak si Petrus pulo, inyo mangecekkan kabake urang-urang nan ado di sinan, "Urang ko cako, tamasuak pulo ko, samo jo si Isa dari Nazaret tu."

⁷² Si Petrus indak pulo mangaku, inyo basumpah-sumpah. "Sabana-bananyo ambo indak bakatawuan doh jo Urang tu!" kecek si Petrus.

⁷³ Indak lamo sasudah tu, urang-urang nan bi tagak disinan datang ka si Petrus, sambia bakato, "Lah jaleh, angkau iyo salah surang dari pangikuik Urang Nazaret tu. Kami tawu, dari caro angkau mangecek."

⁷⁴ Mandangakan nan baitu, si Petrus muloi basumpah-sumpah, sarato bakato, "Ambo indak bakatawuan doh jo Urang tu!" Sakutiko tu juwo ayam pun bakukuak.

⁷⁵ Barulah takana dek si Petrus, baraso Isa Almasih lah mangatokan ka inyo, "Sabalun ayam bakukuak, angkau lah tigo kali ma engkari Ambo." Sudah tu si Petrus payi kaluwa, inyo bantai manangih, iyo sabana ibo atinyo.

Matius

Video Matius 26

Ikuti Kami:

KONTAK | PARTISIPASI | DONASI