Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Yesus nanoli basa nanolik sila la boema nafa'da ana mana tunga nala nae,

² "Emi bubuluk bei faik dua seluk soona Fai Malole Paskah, fo neukose Ana Hataholi ka nanafe henik soaneu nanalona-nggangek!"

³ Ndia te malanga imam ala ma lasi-lasi Yahudi la lakabubua nai Imam Matua Ina Kayafa sa uma mane na.

⁴ Lakokola aok fo ala sanga ho'u Yesus no denge-dengek fo ala tao lisan.

⁵ Boema lae, "Tehu, ata boso taon la'e fai feta, te neukose tasibu a da'di nai lau nala dalk."

⁶ Lelek ndia Yesus nai Betania nai Simon uman, fo makahulu na ana hapu he'di lou mangalauk,

⁷ boema inak esa ana mai leo Yesus mai. Inak ndia nini mina ka'boomini mabelik boto esa. Ndia te Yesus bei na'a ninu, boema inak ndia po'a mina kaboominik ndia neu Yesus langa na.

⁸ Yesus ana mana tunga nala lita manda'dik ndia, boema lamanasa de lae, "Sosoa-ndandaak hata didilo-dodolok leo ia ka?"

⁹ "Mina kabooninik ndia nase'on soona beli na makadotok, fo doi na fen leo hataholi nu ta-hata ta kala neu!"

¹⁰ Yesus bubuluk sila dudu'a-aafin ndia, boema nafa'das nae, "Tao le'e de emi tao susa inak ia? Ana tao tatao-nono'i malole ma nanakoa-kiok soaneu Au.

¹¹ Hataholi nu ta-hata ta kala lo emi tataas esa, tehu Au ta o ahele emi fa.

¹² Inak ndia po'a mina ka'boomini ka neu Au ao nga ndia sosoa na nae, ana sadia basa Au natoi-natonong nde ndia so.

¹³ Mamahele leona! te nai basa daebafa ka, su'di bee boe, metema Hala Malole maneme Manetualain mai a nanatui-nanabengak soona, inak ndia tatao-nono'in neukose nanatui-bengak boe, fo ana da'di neu nasanene'dak esa soaneu inak ndia."

¹⁴ Boema Yesus ana mana tungan esa na'de Yudas Iskariot, neu leo malanga ima mala neu.

¹⁵ Boema nafa'das nae, "Metema au fe Yesus neu emi soona, ade emi fe au beek?" Boema ala leke fen doi isi lilofulak telu hulu.

¹⁶ Mulai neme faik ndia mai, Yudas sanga fai loak malole soaneu ana ke'dindiu Yesus.

¹⁷ Nai fai makasososa ka fo nai Feta Loti Lalu Tei Ta ka, Yesus ana mana tunga nala ala mai de latanen lae, "Ama hii ami meu sadia nana'a Paskah nai bee soaneu Ama?"

¹⁸ Boema Yesus nae, "Meu leo hataholi esa nai kota, fo mafa'dan mae, 'Ama Mesen nae, fai na losa soaneu Au so; Au nau tao feta Paskah nai o umam, sama-sama o Au ana mana tunga ngala.'"

¹⁹ Yesus ana mana tunga nala tao tunga hata fo Yesus nadenus ala tao-no'in. Boema leu sadia nana'a Paskah ndia.

²⁰ Le'odae boema, Yesus no ana mana tunga kasanahulu dua nala langatuuk fo la'a-linu.

²¹ Lelek fo ala bei la'a-la'a boema Yesus nae, "Mamanene leona: hataholi esa nai emi dalek ana ke'dindiu Au."

²² Yesus ana mana tunga nala lamanene dede'ak ndia boema, ala susa lanseli. Boema esa-esa mulai natane Yesus nae, "Tao leo bee o Ama mafa'da hataholi a, ta nde au fa hetu?"

²³ Boema Yesus nae, "Hataholi fo ana dope loti na leo mango dale sama-sama no Au a, hataholi ndia nde ke'dindiu Au.

²⁴ Memak Ana Hataholi ka neukose Ana mate sama leo nanasulak nai Susula Malalaok dale. Tehu soe ba'eneu hataholi fo mana ke'dindiu Ana Hataholi ka! Malole lenak hataholi ndia boso bongin makandondook!"

²⁵ Boema Yudas fo mana ke'dindiuk ndia nae, "Tao leo bee o au ta nde Ama Mesen nafa'da ka fa hetu?" Yesus nae, "O nde mae leondia!"

²⁶ Lelek fo la'a boema Yesus ho'i na loti a, de Ana hule-haladoi noke makasi. Basa boema Ana tete'i loti ndia ninik lima na, de Ana fen neu ana mana tunga nala ma nae, "Ho'i man fo mi'an leona; ia nde bee na Au ao paa nga."

²⁷ Basa ndia boema, Ana ho'i na nggalaa angol esa de noke makasi neu Manetualain. Basa boema Ana fe nggalaas ndia neu ana mana tunga nala ma nae, "Basa-basa mala minun leona.

²⁸ Nana Au daang ia daak hehelu-balataak, daak fo nanapo'a henik soaneu fe do'o do ampon neu hataholi ba'u sala-singon.

²⁹ Mamahele leona: te neukose Au ta inu angol ia seluk so'on, losa lelek fo Au inu angol beu ka, sama-sama o emi nai Au Amang Daebafa Beu na dalek."

³⁰ Basa boema lakamee nakamee kokoa-kikiok esa. De basa ndia boema leu leo Pupuku Setun a leu.

³¹ Boema Yesus nafa'da ana mana tunga nala nae, "Nai le'odaek ia boe, neukose emi basa-basa mala malai la'oela Au; nanahu nai Susula Malalaok dale nanasulak nae: Manetualain nafa'da, 'Neukose Au taoisa manafoo ndia, fo bi'ilopo nala lalai tapasasala.'

³² Tehu Au aso'da falik soona, neukose Au u akahuluk emi leo Galilea u."

³³ Boema Petrus nafa'da Yesus, "Leomae basa-basas la'oela Ama o, au ta makandondook!"

³⁴ Boema Yesus nafa'dan nae "Mafandendelek, te le'odaek ia boe, manu a beita kokoa fa te o malelesi Au la'i telu so."

³⁵ Tehu Petrus nataa nae, "Leomae au muse mate o Ama boeo, neukose au ta afa'da ae, au ta alelak Ama fa!" Ma basa ana mana tunga fe'e nala boeo lae leondia.

³⁶ Basa ndia boema, Yesus no ana mana tunga nala leu leo mamanak esa na'de Getsemani. Ala losa naa boema nafa'das nae, "Mangatuuk meme ia te Au u hule-haladoi."

³⁷ Boema Ana leleko Petrus ma Zebedeus anan duas fo sama-sama loon. Ana mulai name'da dale na he'di sa ma ta tesa-tama fa.

³⁸ Boema nafa'da ana mana tunga nala nae, "Au dale nga he'di nanseli. Au ame'dan sama leo sanga mate. Ela emi meme ia fo manea sama-sama mo Au."

³⁹ Basa boema Ana la'ok leo uluk neu doo doo ana faa, de Ana senek boema Ana hule-haladoi nae. "Ama, metema Ama nau soona, madok doidosok fo Au muse lu'a-lepan ia neme Au a mai. Tehu boso tunga Au hihii-nanaaung, te tunga ka'da Ama hihii-nanaun."

⁴⁰ Basa ndia boema, Yesus fali leo ana mana tunga katelu nala neu te nitas ala bei sungu. Boema nafa'da Petrus nae, "Ka'da li'u esa mesa kana boeo, emi telu ta nau manea sama-sama mo Au fa?

⁴¹ Manea ma hule-haladoi leona, fo ela emi boso hapu soso'ba-susu'dik. Memak emi dula dale ma nahiik tao tatao-nono'i ndoos, tehu emi ta mabe'i fan, nana hataholi daebafa ka ha'da-tataon tapandoes."

⁴² Boema Yesus neu hule-haladoi la'i esa seluk nae, "Ama, metema doidosok ia, Au muse la'o la'din, ma ta hapu tao nadoo kana fa soona, neme na fo Ama hihii-nanaun da'di leona."

⁴³ Basa ndia boema, Yesus fali ma'in te ana mana tunga nala bei sungu, nana mata nala ndua ka nanseli.

⁴⁴ Boema Yesus la'oela selu kasa, de neu hule-haladoi soaneu kala'i telu na, ninik huhule-haladoik matak esa.

⁴⁵ Basa ndia boema, Ana fali seluk leo ana mana tunga nala de nafa'das nae, "Ade emi bei sungu ma emi hahae ao mala do? Fo'a fo mete leona, te fai na losa Ana Hataholi ka nanafek leo hataholi masala-masingo kala, koasa na neu.

⁴⁶ Fo'a fo ata la'o leona. Mete mitak hataholi fo neukose ana ke'dindiu Au a, ana mai so!"

⁴⁷ Yesus bei kola-kola te Yudas fo hataholi esa neme ana mana tunga kasanahulu dua nala, ana mai so. No hataholi manini tee tafa ma ai keke'uk makadotok boe. Malanga ima mala ma lasi-lasi Yahudi la nde ladenus ala.

⁴⁸ Tou Mana ke'dindiu ka nafa'da basa ta'du-tanan neu hataholi sila nae, "Au de'i see ka soona, hataholi a nde ndia de ho'un leona!"

⁴⁹ Ala losa mamanak ndia tutika Yudas nakandoo leo Yesus neu de nafa'dan nae, "So'da molek neu Ama Mesen!" boema ana de'i Yesus.

⁵⁰ Boema Yesus naen nae, "Tolanoo ei, sosoak hata tolanoo ka leo ia mai?" Basa boema hataholi makadotok sila la tutulu matak de ala ho'u la Yesus.

⁵¹ Boema Yesus ana mana tungan esa sama-sama no Yesus nai ndia boe. Ana fe'a na tafa na de ana tati imam matua ina ata na, de nalosa ketuheni di'idoo na.

⁵² Yesus nafa'da ana mana tungan ndia nae, "So'dok falik o tafa ma leo mamanan dale neu, nana hataholi fo mana makaminak tafa, neukose ana mate no tafa boe.

⁵³ O maedae nga Au ta hapu oke tutulu-fafalik neme Au Amang mai, fo soaneu hatematak esa mesa kana, Ana haitua fe Au ata nusa so'dak lenak neme bubuak sanahulu dua mai, fo ala tulu fali Au fa do?

⁵⁴ Tehu metema leondiak soona hapu nai bee, hata fo nananafa'da elak nai Susula Malalaok dale, memak muse ana da'di sama leo besak ia?"

⁵⁵ Boema Yesus nafa'da hataholi makadotok sila la nae, "Ade Au ia hataholi mangalauk, de nalosak emi mini tafa ma ai keke'uk fo mai ho'u Au do? Tunga-tunga faik Au anoli nai Manetualain Uman dale, tehu emi ta ho'u Au fa!

⁵⁶ Tehu memak muse leondiak, fo ela hata fo nabi la sula kana nai susula Malalaok dale, ana da'di leona." Basa ndia boema basa ana mana tunga nala lalai la'oelan.

⁵⁷ Ala ho'u la Yesus boema lon Yesus leo Imam Matua Ina Kayafa sa uman neu. Mese agama la ma lasi-lasi Yahudi la lakabubua lai ndia so.

⁵⁸ Petrus tunga Yesus neme doo ka mai, losa imam matua ina uma na so'da na. Boema Petrus neu de nangatuuk sama-sama no mana manea la. Ana nau bubuluk dede'ak ndia, losa mate'e na laketu taon tao leo beek.

⁵⁹ Malanga ima mala ma basa mana Maketu Mala'di Agama Matua Ina, ala sanga enok fo ala hapu sakasii pepekok soaneu laketu huku lisa Yesus.

⁶⁰ Tehu ala ta hapu buti esa boen, leomae hataholi ba'u ka ala mai fo ala da'di sakasii pepekok. Neu mate'e na boema, hataholi dua leu leo uluk leu,

⁶¹ de lae, "Hataholi ia nafa'da nae, 'Au hapu tao atu'u Manetualain Uma na fo Au apadede'ik fali kana, ka'da nai faik telu dale na.'"

⁶² Boema imam matua ina fo'a napadeik de nafa'da Yesus nae, "Ade O ta mataa kalaak fo ala kalaa kana neu O ndia fa do?"

⁶³ Tehu Yesus ka'da denge-denge. Boema imam matua ina natane la'iesa selu kana nae, "No Manetualain fo maso'dak ndia na'de na mafa'da fe ami, ade O nde Mane Mana Fe So'dak fo Manetualain Anan do?"

⁶⁴ Boema Yesus nataa nae, "O nde mafa'da mae leondia. Tehu mamahele leona: te mulai hatematak ia, neukose emi mita Ana Hataholi ka nangatuuk nai Manetualain fo Mana Koasa boboa kona na, boema Ana mai nai ko'as lain nai lalai!"

⁶⁵ Boema imam matua ina ndia ana sisii-lulu'i papake-ngganggaon ma nae, "Nakamumulu-nakamamaek Manetualain! ta paluu sakasii so'on. Emi mamanene matan basa dede'a-kokola nakamumulu-nakamamaek Manetualai na so hetu.

⁶⁶ Besak ia, emi hahapu ma leo beek?" Boema lae, "Hataholi masalak ia de muse huku nisan."

⁶⁷ Boema lasapula ape neu Yesus mata panan ma ala tutu-fepan. Boema nggelok fapan,

⁶⁸ ma lae, "Hei, O mafa'da ami mae, Mane Mana Fe So'da ka nde O! Soba neuk su'dik, see ka nde fapa O a?"

⁶⁹ Petrus bei nangatuuk nai deak nai uma so'da na. Boema ina malalau-maoono esa mai de nafa'da Petrus nae, "Ade o boeo, sama-sama mo Yesus fo hataholi Galilea ndia hetu?"

⁷⁰ Tehu Petrus nalelesi nai basa hataholi sila la matan nae, "Au ta bubuluk o dudu'a ma nae leo bee ndia fa,"

⁷¹ boema neu leo lelesu manai uma so'da na neu. Tehu ina malalau-maoono fe'ek esa nita Petrus boema, nafa'da hataholi manai sila la nae, "Hataholi ia boeo, na'ka sa sama-sama no Yesus fo maneme Nazaret ndia mai boe."

⁷² Boema Petrus nalelesi seluk ma ana supa-soo nae, "Te'e-te'e au ta alelak hataholi ndia fa!"

⁷³ Basa ndia de beita doo ka boen te, hataholi mana mapadeik manai sila la, leu leo Petrus leu de lafa'dan lae, "Tao leo bee o hataholi sila la esa nde o. Ami bubuluk neme o dede'a ma mai."

⁷⁴ Boema Petrus mulai soo-supa nae, "Au ta alelak hataholi ndia fa!" No hatematak ndia boe, manu a kokoa.

⁷⁵ Boema Petrus nafandele Yesus nafa'da basan nae, "Manu a beita kokoa boen te o malelesi Au la'i telu so." Boema Petrus kalua leo deak neu de ana kii-makaleleu ma dale na he'di nanseli.

Matius

Video Matius 26

Ikuti Kami:

KONTAK | PARTISIPASI | DONASI