Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Tou ti Isa ma yilapato longajari mao lo unga'amila boyito, Tiyo loloiya ode mongomuri-Liyo odiye,

² ”Otawa limongoli bolo duhuyi mola ma medungga dulahu poelaliyo obebasi lo tawu lo Yahudi lonto lipu lo Mesir wawu Walao Manusiya ma wuduwoliyo mao peisalipuliyo!”

³ To wakutu boyito mongotauwa lo imamu wawu ta dudula'a- dudula'a tawu lo Yahudi heambuwa to bele li imamu da'a ta tanggu-tanggula te Kayapas.

⁴ Timongoliyo hepomusawarawa mololohe akali wololo moheupa oli Isa wawu mosalipu mao o-Liyo sambe mate.

⁵ Bo timongoliyo loloiya odiye, ”Alihu dila timimbulu buluhuto to wolota lo raiyati, dila mowali ito moheupa o-Liyo to wakutu tawu herameya to dulahu buka.”

⁶ Tou ti Isa to kambungu lo Betaniya to bele le Simon ta bakasi lo u ohutungo,

⁷ lonao mayi tabuwa ngota ode o-Liyo delo-delo mayi butulu tuwawu tuwa-tuwanga minya monu mahale. Minya boyito pilopaiyo mao to lunggongi Isa tou Tiyo hulo-huloa hemonga.

⁸ Lo'onto mao u odito mongomuri-Liyo lopalato nyawa limongoliyo wawu loloiya odiye, ”Longola minya monu boti bo hepoporugiyola odiye?

⁹ Sababu minya monu boti wonu potali mao mahale haragaliyo wawu doyiliyo mali wohi mao ode tawu-tawuwala ta misikini.”

¹⁰ Tou ilotawa mao li Isa pasali boyito, Tiyo loloiya odiye, ”Longola timongoli hemopo'osusa tabuwa boti? Tiyo ma lohutu piyohe tuwawu ode ola-U.

¹¹ Tawu-tawuwala ta misikini lalayita woluwo to wolota limongoli, bo Wau dila lalayita pe'epe'enta wolimongoli.

¹² Tou tiyo lomopa'ayi minya monu boti ode wawau-U, tiyo ma loposiyapu mao ola-U lobungoliyo.

¹³ Tutuliyotutu polele-U mayi ode olimongoli: Openu boli ode utonu habari mopiyohu lonto Allahuta'ala popotungguloliyo to tudu lo huta botiye, u pilohutu lo tabuwa boti ma otanggula lo tawu poelaliyo oliyo.”

¹⁴ Lapatao ta tanggu-tanggula te Yudas Iskariyot ngotaliyo lo muri li Isa ta mopuladuluwo, lonao ode mongotauwa lo imamu.

¹⁵ Tiyo loloiya odiye, ”Wolo u wohi limongoli olau wonu wau mohudu mayi oli Isa ode olimongoli?” Lapatao timongoliyo longohi mao oliyo doyi tala'a lo Yahudi tolopulu lopita.

¹⁶ Wawu lonteto lomao boyito tiyo ma hemololohe hiyanga mopiyohu mohudu oli Isa ode olimongoliyo.

¹⁷ Lapatao to bohuliyo lo dulahu buka lo roti dila o ragi tou tawu lo Yahudi ma moela obebasi limongoliyo lonto lipu lo Mesir, mongomuri li Isa lonao mayi ode o-Liyo lohintu odiye, ”Toutonu otohila li Guru poposiyapuwa mao lamiyatiya himba alo li Guru?”

¹⁸ Tameti Isa, ”Ponao mota timongoli ode tawu ngota to kota lo Yerusalem wawu poleleya mao ode oliyo, ’Odiye tahuli li Guru: Wakutu-U ma ngope'e medungga. To delomo belemu to dulahu buka Wau ohila monga pe'epe'enta wolo mongomuri-U.’”

¹⁹ Lapatao mongomuri-Liyo ma lohutu odelo u pilomarenta li Isa ode olimongoliyo wawu timongoliyo ma loposiyapu mao lo u paralu olimongoliyo to dulahu buka boyito.

²⁰ Tou ma lolango ti Isa lotihuloa pe'epe'enta wolo mongomuri-Liyo ta mopuladulota boyito.

²¹ Wawu tou timongoliyo hepongala, ti Isa loloiya ode limongoliyo odiye, ”Tutuliyotutu polele-U mayi ode olimongoli: Woluwo ngota to wolota limongoli boti ta ma mohiyanati ola-U.”

²² Wawu wolo hilawo otutu hewolola ngota-ngota timongoliyo hipoloiyawa ode o-Liyo odiye, ”Ma tantu dila watiya ta hepatujuwo li Guru.”

²³ Ti Isa lolametao odiye, ”Tiyo hemonga wola-U pe'epe'enta masatiya to meja boti, tiyo ta ma mohiyanati ola-U.

²⁴ Walao Manusiya memangi musi molola mao duniya boti debo odelo u tula-tuladu to kitabi tomimbihu Tiyo, bo matilopotala ta ma mohiyanati o-Liyo. Lebe mopiyohu oliyo wonu deu tiyo dila pilotutuliyo mayi de duniya boti.”

²⁵ Te Yudas ta ma mohiyanati o-Liyo lolametao odiye, ”Ma tantu dila watiya ta hepatujuwo li Guru.” Ti Isa lolametao odiye, ”Tingga uwalo loiyamu odito.”

²⁶ Wawu tou timongoliyo ma hepongala, ti Isa lohama mayi roti, losukuru wawu lodua lohile barakati ode Allahuta'ala. Lapatao lomita-mitanga mota roti boyito wawu yiluduliyo mao ode mongomuri-Liyo. Tiyo loloiya odiye, ”Hamawa mota limongoli roti boti wawu ala mola, uti-utiyelo batanga-U.”

²⁷ Lapatao uwito Tiyo lohama mayi halati tuwa-tuwanga angguru, losukuru wawu lodua lohile barakati ode Allahuta'ala. Lapatao halati boyito yilohi-Liyo mao ode olimongoliyo wawu loloiya odiye, ”Pongilulo timongoli nga'amila to halati boti.

²⁸ Sababu uti-utiyelo duhu-U, duhu lo janjiya, deuwitoyito tutumulu-U u kurubaniyo-U mayi alihu tawu ngohuntuwa ambunguwo lo Allahuta'ala dusaliyo.

²⁹ Bo polele-U mayi ode olimongoli: Monto umasatiya lomao boti Wau didu mongilu hasili lo angguru boti sambe demola dulahe pongiluma-U, deuwitoyito mongilu angguru bohu, pe'epe'enta woli mongoli to Yiladiya lo Allahuta'ala ti Papa-U.”

³⁰ Lapato uwito timongoliyo ma lomanyanyi wawu lomuji Allahuta'ala. Lapatao timongoliyo lolola mao kota lo Yerusalem lonao ode huidu Jayitun.

³¹ Tou timongoliyo ledungga mota ode huidu Jayitun, ti Isa loloiya ode limongoliyo odiye, ”Yinti huyi boti timongoli nga'amila ma mowali didu paracaya ode ola-U. Sababu woluwo tula-tuladu to delomo kitabi odiye, ’Allahuta'ala ma mohinggi nyawa lo diti lo himba wawu himba-himbawala ngokawangi boyito ma mowali ambulati.’

³² Bo tou Wau ma mobongu mayi monto kuburu, Wau ma motitimulo mota limongoli ode lipu lo Galileya.”

³³ Te Petrus lolametao ode o-Liyo odiye, ”Openu nga'amila tawu ma mowali didu paracaya ode oli Guru, bo watiya openu bo ngointi mao dila.”

³⁴ Ti Isa loloiya ode ole Petrus odiye, ”Tutuliyotutu polele-U mayi ode olemu: Yinti huyi boti dipo mokukuyu'u maluo yio ma po'otolu lomahu deu Wau gurumu.”

³⁵ Te Petrus loloiya ode oli Isa odiye, ”Dila, openu watiya musi mate pe'epe'enta woli Guru, watiya debo tatapu mongaku deu Ito Guru latiya!” Nga'amila muri li Isa wuwewo loloiya odito olo.

³⁶ Ti Isa wolo mongomuri-Liyo ma ledungga mota ode tambati tuwawu u tanggu-tanggula Getsemani. Lapatao Tiyo loloiya ode mongomuri-Liyo odiye, ”Potihulo'opo timongoli teye. Wau donggo mota modua temota ngope'e.”

³⁷ Wawu Tiyo lotiyanga ole Petrus wawu walae Jebedewus dulota lonao pe'epe'enta wo-Liyo. Lonteto lomao hila-Liyo otutu ma yilololo.

³⁸ Lapatao Tiyo loloiya ode olimongoliyo odiye, ”Hila-U otutu mololo masatiya, odelo ta ma mate rasaliyo. Potitolapo teye timongoli wawu pomulahu pomayi wola-U.”

³⁹ Tiyo ma lodiyambanga mota ngointi, lapatao losujudu wawu lodua, dualiyo odiye, ”Wu Allahuta'ala ti Papa Latiya, wonu deu mowali halati lo sikisa boti lawode to o-Latiya, bo dila kohondaki Latiya u mowali, bo kohondaki li Papa.”

⁴⁰ Yilapato uwito Tiyo ma lohuwalinga mota ode mongomuri-Liyo boyito wawu ilodungga-Liyo mota timongoliyo hetuluhe. Wawu Tiyo loloiya ode ole Petrus odiye, ”Dila mo'otahangi timongoli momulahu openu ngojamu mao wola-U?

⁴¹ Po'odaha timongoli wawu potidua-dua alihu timongoli dila odungga lo yimontalo. Roh lo manusiya memangi yinawo mohutu u mopiyohu bo dagingi molulupuhu.”

⁴² Lapatao Tiyo lonao poli oluwoliyo wawu mota lodua, upilodua-Liyo odiye, ”Wu Allahuta'ala ti Papa Latiya, wonu deu halati lo sikisa botiye dila mowali lumawodu to o-Latiya, huli lomao ma tolimo Latiya odelo kohondaki li Papa!”

⁴³ Wawu tou Tiyo lohuwalinga mota poli ode mongomuri-Liyo, ilodungga-Liyo mota timongoliyo debo ta hetuluhe, sababu mato limongoli modiduta da'a.

⁴⁴ Lapatao ma tilola mao li Isa timongoliyo teto wawu Tiyo muli lonao otoluliyo mota lodua to tambati entiye wawu dua-Liyo debo odito olo.

⁴⁵ Yilapato uwito Tiyo lonao mota ode mongomuri-Liyo wawu loloiya ode limongoliyo odiye, ”Debo ta donggo hetuluhe wawu hehuheliya timongoli masatiya. Bilohi limongoli, sa'atiliyo ma ledungga Walao Manusiya wuduwoliyo ode tawu-tawuwala ta heodusawa.

⁴⁶ Pobongulo wawu dulolo ito ma monao. Bilohi, timao tiyo ta lohiyanati ola-U ma ledungga mayi.”

⁴⁷ Tou ti Isa donggo bisa-bisala, ma ledungga mayi te Yudas tala ngota lo muri li Isa ta mopuladuluwo wawu tiyo nao-nao mayi wolo tawu ngolemboa ngohuntuwa hedelowa wamilo wawu bubohu. Timongoliyo pilarenta mayi lo mongotauwa lo imamu wawu ta dudula'a-dudula'a tawu lo Yahudi.

⁴⁸ Ta lohiyanati oli Isa ma lopolele mayi olimongoliyo tuwota tuwawu odiye, ”Tawu ta o'odeu wawu dilou tataboyitolo Tiyo, mota waupalo.”

⁴⁹ Wawu tiyo ma lato lomaju mota ode oli Isa wawu loloiya odiye, ”Salamu alayikum Rabi.” Lapatao tiyo longo'ode mota oli Isa wawu lodila o-Liyo.

⁵⁰ Bo ti Isa loloiya mao ode oliyo odiye, ”Weyi tamani-U, popotunggulalo niyatimu lonao mayi ode ola-U.” Lapatao timongoliyo lomaju mota lodihu oli Isa wawu loheupa o-Liyo.

⁵¹ Debolo woluwo ngotaliyo lo ta pe'epe'enta woli Isa lomahutayi wamiliyo wawu lomontode mota wato li imamu ngota sambe loputu bulongaliyo.

⁵² Ti Isa loloiya mao ode tala ngota lo muri-Liyo boyito odiye, ”Muli taupa mola wamiluma boyito. Sababu titalotita ta moyitohu wamilo mate lo wamilo.

⁵³ Tingga harapumu Wau dila mowali mohile turungi to Allahuta'ala ti Papa-U, alihu Tiyo hua molawo mayi malaikati mopuladuluwo lo pasukan momantu ola-U.

⁵⁴ Wonu pohile-U u odito, wololo mowali ganapu u tula-tulade to kitabi u loloiya mayi deu Walao Manusiya musi wuduwoliyo ode ta heodusawa?”

⁵⁵ To sa'ati boyito ti Isa loloiya ode tawu ngohuntuwa odiye, ”Harapu limongoli Wau botiya ta mototaowa, tunggulo timongoli monao mayi moheupa ola-U hedelowa mayi wamilo wawu bubohu. Wau timi'idu dulahu hemongajari to pango bele lo Eya wawu timongoli dila loheupa ola-U.

⁵⁶ Bo nga'amila boti mowali alihu me ganapu u tula-tulade to kitabi lo nabi-nabiyalo.” Odito u yiloiya li Isa ode ta moheupa o-Liyo. Lapatao nga'amila muri-Liyo boyito ma tilonggoteteo lolola mao o-Liyo.

⁵⁷ Tou timongoliyo yilapato loheupao oli Isa, timongoliyo ma lodelo o-Liyo ode ole Kayapas ti imamu da'a. Teto heambuwa mongoahali lo Tawurat wawu ta dudula'a-dudula'a tawu lo Yahudi.

⁵⁸ Wawu te Petrus tunu-tunuhe o-Liyo lonto umolamingo sambe demota pango bele li imamu da'a. Lapatao tiyo lotihuloa pe'epe'enta wolo ta hipokkawaliya, alihu otawaliyo wolo u ma mowali to oli Isa.

⁵⁹ Mongotauwa lo imamu wawu nga'amila ta to Mahkama lo agama boyito hipololohe bukti dila banari u popotalaliyo oli Isa, alihu Tiyo mowali hukumaniyoliyo mate.

⁶⁰ Bo timongoliyo dila lo'otapu, openu boli ma tilimihulayi ngohuntuwa ta hiposakusiya lo u yimbulo. Bo lapatao ma tilimihulayi ta dulota

⁶¹ ta hipoleleya odiye, ”Tawu botiye loloiya deu Tiyo mowali molohube bele lo Eya wawu to delomo u tolohuyi ma muli bongulo-Liyo mayi.”

⁶² Lapatao ti imamu da'a boyito ma tilimihulo wawu lohintu ode o-Liyo odiye, ”Longola Yio dila molameta openu bo ngotahe mao u hepopotuludu mayi lo tawu-tawuwala boti ode ole-Mu?”

⁶³ Bo ti Isa debo ta po'opo'oyo. Lapatao ti imamu da'a boyito loloiya odiye, ”Wolo uhemolanggula tanggulo Allahuta'ala ta tumu-tumulo, poleleya mayi olami wonu Yio boti te Almasih Walao Allahuta'ala ta pilojanjiya-Liyo mowali olongiya ta mo'osalamati manusiya boyito?”

⁶⁴ Ti Isa lolametao, ”Banari u yiloiya li tuwani boyito. Bo polele-U mayi ode olimongoli: Monto umasatiya lomao boti timongoli ma mo'onto Walao Manusiya hulo-huloa to olowala lo Allahuta'ala ta kawasa wawu monao mayi to yitato hengo to hulungo!”

⁶⁵ Ti imamu da'a boyito loyingo wawu longulantanga pakeyangiliyo wawu loloiya odiye, ”Tiyo hemohujati Allahuta'ala. Donggo paralu wolo ito hipololohe sakusi? Masatiya ma ilodungohe limongoli Tiyo hemohujati Allahuta'ala.

⁶⁶ Wololo pahamu limongoli?” Timongoliyo lolameta mota odiye, ”Tiyo patuti hukumaniyola mate!”

⁶⁷ To wakutu boyito timongoliyo heloponula lo yiyohu to laku li Isa wawu helohumbade o-Liyo. Wawu tawu-tawuwala wuwewo helolambali lota'apo o-Liyo

⁶⁸ wawu hipoloiyawa odiye, ”Almasih, wonu banari Yio hemololimo wahyu lonto Allahuta'ala, nte tapula tatonu ta hemohumbade ole-Mu?”

⁶⁹ Tou te Petrus hulo-huloa to pango bele li imamu da'a boyito, lonao mayi ode oliyo tabuwa ngota wato li imamu da'a wawu loloiya odiye, ”Yio olo ta lalayita pe'epe'enta woli Isa tawu lo lipu lo Galileya boyito.”

⁷⁰ Bo tiyo lomahu to talu lo tawu nga'amila boyito, uwaliyo mao, ”Dila otawau wolo patujumu.”

⁷¹ Lapatao tiyo lonao mota ode bubunggalo u pomasowa mayi ode pango boyito wawu woluwo poli wato ngota wuwewo tabuwa lo'onto oliyo wawu loloiya ode tawu nga'amila ta woluwo teto odiye, ”Tawu boti ta pe'epe'enta woli Isa tawu lo kota lo Najaret boyito.”

⁷² Wawu tiyo lomahe poli wawu lotadiya deu tiyo dila motota li Isa.

⁷³ Dila lohihewo mola tawu-tawuwala ta heambuwa teto boyito lonao mayi ode ole Petrus wawu loloiya odiye, ”Banari yio boti tala ngota limongoliyo, onuhe to pobisalamu.”

⁷⁴ Lapatao te Petrus ma hemolotadiyawa wawu loloiya odiye, ”Wau dila mo'otawa wolo tawu boyito.” To sa'atilo boyito maluo ma lokukuyu'u.

⁷⁵ Wawu te Petrus ma lo'oela mayi upilolele li Isa ode oliyo odiye, ”Tou dipo mokukuyu'u maluo, yio ma po'otolu lomahu deu Wau gurumu.” Lapatao te Petrus ma lonao ode diluwari wawu hilumoyongo sababu lole'e.

Matius

Video Matius 26

Ikuti Kami:

KONTAK | PARTISIPASI | DONASI