Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ "Nako ma Jo'oungu ma Dutu wopareta, 'isi'ade-'ade 'isoka 'o mosolese yamogiooko 'o modoka yosiduono. Moi-moi manga poci yo'ese de wisibusuku womo-modoka.

² Ge'enaka dau yamotoa yohaga-haga, de yamotoa yoba-barija.

³ 'O mosolese yamotoa yohaga-haga go'ona, manga poci yo'asa, ma manga goooro yositatu-tatu koya'asawa.

⁴ 'O mosolese yamotoa yoba-barija go'ona, manga poci yo'asa de mita manga goooro yositatu-tatu yadua-duangou.

⁵ Womo-modoka gu'una 'ilati woboa so 'o mosolese go'ona yaki-ki'ooko so yoma'iduokau.

⁶ 'O utu gorona de yo'isene yosigasoko, 'Womo-modoka woboa! Tagi winisoboko!'

⁷ 'O mosolese yamogiooko go'ona yomomiki de yosiamoko manga poci ma lurusu.

⁸ 'O mosolese yohaga-haga gee yongose yoba-barijaka, 'Minikulanosi ma eta nia goooro sababu mia poci 'isongenou so!'

⁹ 'O mosolese yoba-barija go'ona yosango, 'Koidadiwa! Sababu dua kapomasi'adonuwa! Niotagi la nio'ija yomawuku-wukunika.'

¹⁰ So 'o mosolese yohaga-haga go'ona yotagi yomadi'ija. Gee yopasaka de womo-modoka gu'una woboa. 'O mosolese yamotoa gee yomadudu-duangou go'ona yomasidowosama de womo-modoka gu'una 'o rame ma ngiika, de ma ngorana yabenokau.

¹¹ Ge'enaka de 'o mosolese 'iregu go'ona yoboa de yomasigasoko, ''Abae! 'Abae! 'O ngorana minidebelengakasi!'

¹² Ma womo-modoka gu'una wosango, 'Ngoi kotininakowa ngini.'"

¹³ Ge'enaka de 'o Yesus wosiduanga wi 'ade-'ade ge'ena konee, "Sababu ge'ena nimajaga-jaga de nimadudu-duanga, sababu konianakowa 'okia ma wange de 'o takoro muruo 'o Nyawa ma Ngowaka dua woboa."

¹⁴ "Koge'enali mita nako ma Jo'oungu ma Dutu wopareta ge'ena 'isoka 'o 'ade-'ade ne'ena. Wimoi wotagi 'o daeraa 'ikuru-kurutika. 'Una waki'asoko wi ro-riwo wakisijaga wi harataa.

¹⁵ Wi ro-riwo go'ona wakisijaga moteke moi-moi manga barija. Wimoi wikula 'o pipi guraci 'o caana motoa, wimoi 'o caana modidi, de wimoi 'o caana moi, de wotagiokau.

¹⁶ 'O ro-riwo gee wa'ese 'o pipi guraci 'o caana motoa, wotagi womapoti-poti so wamake 'o caana motoali.

¹⁷ Koge'enali mita 'o ro-riwo gee wa'ese 'o pipi guraci 'o caana modidi, 'una wamakeli 'o caana modidioli.

¹⁸ Ma 'o ro-riwo gee wa'ese 'o pipi guraci 'o caana moi, wotagi 'o guruku wodiai so wosibaituku dau 'o tonaoka 'awi balusu ma pipi ge'ena.

¹⁹ Ge'enaka de 'o do'ingo 'asa de 'o ro-riwo go'ona manga balusu woboa de wokurue wakido-doimi.

²⁰ 'O ro-riwo gee wa'ese 'o pipi guraci 'o caana motoa, woboa de wokula 'o caana mogiooko. Wongose, ''Aba, ngona nokula ngoino 'o caana motoa, nalega neda ngoi tamakekau 'o caana motoali.'

²¹ Manga balusu gu'una wongose, ''Isure! Ngona ge'ena 'o ro-riwo ma owa de 'idadi toningaku. De sababu ngona na'akunu 'okia sonaa ma di-dingoono, dua 'asa tonisijaga 'okia sonaa 'ila-laagomo. Nowosama la nomoteke nomasa-sanangi de de ngoi!'

²² Ge'enaka de 'o ro-riwo gee wa'ese 'o pipi guraci 'o caana modidi woboa de wongose, ''Aba, ngona nokula ngoino 'o pipi guraci 'o caana modidi. Nalega nee ngoi tamake ma giliono 'o caana modidioli.'

²³ Manga balusu gu'una wongose, ''Isure! Ngona ge'ena 'o ro-riwo ma owa de 'idadi toningaku. Sababu ngona na'akunu 'o hali ma di-dingoono, so dua tonisijaga 'o hali 'ila-laagomo. Nowosamino la nomoteke nomasa-sanangi de de ngoi!'

²⁴ Ge'enaka de 'o ro-riwo gee 'o pipi guraci 'o caana moi wa'ese-'ese woboa de wongose, ''Aba, ngoi tanako ngona 'o nyawa ma singina 'i'opi-'opini. Ngona konomadutudukuwa ma nomau nomadugutuku ma sowoko. Ngona konopiakoruwa ma nomau nomadunguunu.

²⁵ Nedau ma ni pipi! 'Imodongo so ta'iunika tosibaituku dau 'o tonaoka.'

²⁶ Ma pipi ma dutu gu'una wosango, 'Ngona 'o ro-riwo ma dorou de ma debeturu! Ngona nanakokau ngoi kotomadutudukuwa ma tomau tomadugutuku ma sowoko! De kotopiakoruwa ma tomau tomadunguunu!

²⁷ Nako koge'ena de salingou ma pipi ge'ena nokula yomapoti-potika la yosiputari, la gee ma 'orasi ngoi toliono de ta'ese ma pipi ge'ena de ma 'utungu.'

²⁸ So wosuloko 'awi ro-riwo 'ireguka, 'Nia'ese ma pipi 'unaka, de niokula gee kiaka wi pipi guraci 'o caana mogiookoka.

²⁹ Sababu to nago'ona de ma 'ena, dua 'asa 'iganapu 'ifoloiosi 'ikudai, de 'ona 'asa yofoloiku. Ma to nago'ona koi'iwa, dua gee ma etakasi ma ya'eseka.

³⁰ De 'o ro-riwo gee ma faedaa koi'iwa, wini'umoka doka ma dudunika 'o darusika, ge'enaka doka dua 'una wo'ari de wosangisara.'"

³¹ "'O dunia ma do-dogumoka 'o Nyawa ma Ngowaka 'asa wahakimi 'o nyawa 'iodumu.

³² 'O nyawa 'iodumu 'asa wakikokitoomu. Deika wosikati-tingaka wadiai 'o bolu modidioka 'isoka 'o haewani yoso-sowohi yosikati-tingaka 'o domba de 'o kabingi.

³³ 'O nyawa gee yamote-moteke ma Jo'oungu ma Dutu wi mau, yakitoomu wi giniraoka, de gee koyamote-motekuwa, wi gubalioka.

³⁴ Ge'enaka de ma Koana gu'una dua wakidongose gee wi giniraoka, 'Nou, ngini gee 'ai Dea winisiba-barakati, niowosama wi pareta ma dodaka gee 'idudu-duangou ka ma gurue 'o duniasi 'idadi.

³⁵ Sababu gee ngoi 'isawini, ngini 'o 'inomo nikula. Gee 'ai kibiti 'idudungu, ngini nikula 'o 'akere. Gee ngoi 'o nyawa ma dudunino, ngini nidawongo nia woaka.

³⁶ Gee ngoi 'ai baju 'isidukuranguku, ngini nikula. Gee ngoi 'igogama, ngini nileleani; gee ngoi 'o buioka, ngini nioboa nilega.'

³⁷ Ge'enaka de 'o nyawa go'ona dua yongose, 'Jou, kauruo ngomi minimake ngona nisawini, de ngomi 'o 'inomo minikula? Bolo ni kibiti 'idudungu de 'o 'akere minikula?

³⁸ Kauruo ngomi minimake ngona 'isoka 'o nyawa ma dudunino, de minidawongo 'amia woaka? Kauruo ngomi minimake 'ani baju nisidukurangi de ngomi minikula?

³⁹ Kauruo ngomi minimake ngona nigogama de nobuika, de ngomi miaika minilega?'

⁴⁰ Ma Koana gu'una 'asa wosango, 'Tinisidemo ne'ena, gedagee ngini niodiai koge'ena, ngaro ka 'ai nyawaka moi gee koyopake-pakewa, ge'ena kaimatero de niodiaiokau ngoino.'

⁴¹ Ge'enaka de ma Koana gu'una dua 'asa wakidongose gee wi gubalioka, 'Nioma'aikika gee 'o gorosau niamake-make! Niowosama 'o narakaka gee 'idua-duangou ma ngale 'o Tokata ma Koana de ma mala'ekati.

⁴² Sababu gee ngoi 'isawini, ngini konikulawa 'o 'inomo, de gee ngoi 'ai kibiti 'idudungu, ngini konisi'okeruwa.

⁴³ Gee ngoi 'o nyawa ma dudunino, konisidabinowa nia woaka. Gee ngoi 'ai baju 'isidukuranguku, ngini konikulawa. Gee ngoi 'igogama de 'ibuika, ngini konilegawa.'

⁴⁴ Ge'enaka de dua 'ona yongose 'unaka, 'Jou, kauruo ngomi minimake ngona nisawini, bolo ni kibiti 'idudungu, bolo 'isoka 'o nyawa ma somoa. De kauruo ngomi minimake ni baju nisidukuranguku, bolo nigogama, bolo nobuika de ngomi kominiriwowa?'

⁴⁵ Ma Koana gu'una dua 'asa wosango, wongose 'ato, 'Tinisidemo ne'ena: Nako ngini koniakiriwowa 'o nyawa gee kokiawa yakidae-daene, ge'ena ma ngale koniriwowa ngoi.'

⁴⁶ So 'o nyawa go'ona dua yakihukumu kaisi'ado-'adonika. Ma gee yomote-moteke ma Jo'oungu ma Dutu wi mau, dua yamake 'o 'ahu kaisi'ado-'adonika."

Matius

Video Matius 25

Ikuti Kami:

KONTAK | PARTISIPASI | DONASI