Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 "Na tohare Nono Niha andrõ tobali So'aya, ba hulõ gamaedola da'e: Dafulu nono alawe si mõi awõ zangowalu sangai fandrura. Mõi ira wamaondragõ sangowalu.
2 Dalima ba gotaluara zambõ tõdõ ba dalima danõ bõ'õ zatuatua.
3 Ono alawe sambõ tõdõ andrõ la'ohe wandru, ba lõ la'ohe wanikha ngõnangõna.
4 Ono alawe si dalima tanõ bõ'õ satuatua, la'ohe wandru awõ wanikha ngõnangõna.
5 Me ara tohare zangowalu ba ibõrõtaigõ manukõu ndra alawe andrõ ba alau hõrõra.
6 Ba zi talu mbongi, awena terongo li zi'ao, 'Tohare zangowalu! Mi'ae'e mifaondragõ ia!'
7 Maoso ndra alawe si dafulu, latunu wandrura.
8 Lamane ira alawe sambõ tõdõ ba ndra alawe satuatua, 'Mibe'e khõma ma'ifu wanikhami andrõ, no ibõrõtaigõ mate wandruma.'
9 Latema li ira alawe satuatua, 'Tebai sa! Bõrõ ma dania faoma ambõ khõda wanikha. Mi'ae'e mi'õli ba lafo!'
10 Mo mõi ndra alawe sambõ tõdõ andrõ ba wowõli fanikha. Gasagasa we'amõira, no tohare zangowalu. Ira alawe si no mombaloi andrõ fao ira khõ zangowalu ba nahia walõw̃a, ba aefa da'õ laduhõ mbawa ndruhõ!
11 Lõ ara aefa da'õ tohare ndra alawe sambõ tõdõ no mege. Mu'ao ira lamane, 'He Tuha, he Tuha, bokai khõma mbawa ndruhõ!'
12 Ba itema lira sangowalu andrõ imane, 'Lõ u'ila haniha ami!'"
13 I'etu'õ gamaedolania Yesu andrõ Imane, "Bõrõ da'õ, mi'anaro, me lõ mi'ila mbaw̃a awõ ginõtõ."
14 "Na tohare Nono Niha andrõ tobali So'aya, ba hulõ gõi gamaedola da'e. Samõsa niha sofanõ ba danõ sarõu, ikaoni ndra enoninia, ifaduhusi tõdõ khõra haratonia.
15 Ero samõsa enoni ibe'e molo'õ fa'abõlõ zamõsana. Ba zi samõsa ibe'e lima ribu rufia ana'a. Khõ zi samõsa ibe'e dua ribu rufia ana'a, ba khõ zi samõsa tõ ibe'e saribu rufia ana'a. Aefa da'õ mofanõ ia.
16 I'anema'õ gõi mõi maniaga genoni sanema lima ribu rufia ana'a andrõ. Ba isõndra hare lima ribu rufia ana'a gõi.
17 Si manõ genoni sanema dua ribu rufia ana'a andrõ, isõndra gõi hare dua ribu rufia ana'a.
18 Ba hiza, enoni sanema saribu rufia ana'a andrõ mõi ia mukhao danõ, ibini'õ ba da'õ gana'a zokhõ ya'ia.
19 Me no ara sibai aefa da'õ, mangawuli niha sokhõ enoni andrõ, ba ilau mangerai khõra fefu.
20 I'ondrasi ia enoni sanema lima ribu rufia ana'a, ibe'e ba danga zokhõ ya'ia fulu ribu rufia ana'a. Imane, 'He Tuha, no õbe'e khõgu lima ribu rufia ana'a. Faigi, ia da'e no usõndra hare lima ribu rufia ana'a.'
21 Imane sokhõ ya'ia, 'Sõkhi da'õ, enoni si sõkhi ba si lõ farõi ndra'ugõ. Bõrõ me tola mufaduhusi tõdõ ndra'ugõ ba zi ma'ifu, ba ube'e dania rorogõfõu zabõlõ oya. Aine! Tafao ba wa'omuso dõdõ!'
22 I'ondrasi gõi enoni sanema dua ribu rufia ana'a ba imane, 'He Tuha, no õbe'e khõgu dua ribu rufia ana'a. Faigi! Iada'e no usõndra hare dua ribu rufia ana'a.'
23 Imane sokhõ ya'ia, 'Sõkhi da'õ! Enoni si sõkhi ba si lõ farõi ndra'ugõ. Bõrõ me tola mufaduhusi tõdõ ndra'ugõ ba zi ma'ifu, ube'e khõu dania zabõlõ oya. Aine, tafao ba wa'omuso dõdõ!'
24 I'ondrasi gõi ia enoni sanema saribu rufia ana'a, imane, 'He Tuha, u'ila wa niha sabe'e huku ndra'ugõ. Mangozara ndra'ugõ ba nahia si lõ nifazaewemõ ba mamasi'õ ba nahia si lõ nitanõu.
25 Ata'u ndra'odo, andrõ mõido mubini'õ gefe andrõ khõu ba narõ danõ. Iada'e, ya'e gana'a andrõ!'
26 Imane sokhõ ya'ia, 'Enoni sareu ba si lõ sõkhi ndra'ugõ. No nasa õ'ila wa mangozara ndra'o ba nahia si lõ nifazaewegu ba mamasi ndra'o ba nahia si lõ nitarugu.
27 Bõrõ da'õ mena'õ ba sinangea õbe'e gana'agu andrõ ba niha samalali ana'a, ena'õ na mangawulido utema gana'agu andrõ fabaya hare.
28 Bõrõ da'õ, mihalõ gana'a andrõ khõnia, ba mibe'e ba genoni si so fulu ribu rufia ana'a.
29 Ba niha si so tebe'e na khõra, irege fahõna. Ba ba niha si lõ'õ, ba tehogõ khõnia zi so khõnia.
30 Ba enoni si lõ guna andrõ, mitibo'õ ia baero ba zogõmigõmi. Ba da'õ dania fege'ege ba fa'afõkhõ!'"
31 "Na tohare Nono Niha andrõ tobali Razo si fao mala'ika-Nia fefu, dumadao dania Ia yaw̃a ba dadaoma-Nia.
32 Ba fefu niha gulidanõ andre te'owuloi dania fõna-Nia. Ifõfõ'õ dania ira ba zi dombua nahia, si mane kubalo na ifõfõ'õ ira mbiribiri si alawe mbiribiri si matua.
33 Ifa'aso mbiribiri si alawe tanõ ba gambõlõnia ba biribiri si matua tanõ ba gabera-Nia. (Niha samalua somasi Lowalangi i'owuloi tanõ ba gambõlõ-Nia, ba tanõ bõ'õ i'owuloi tanõ ba gabera-Nia.)
34 Aefa da'õ imane Razo ba niha si so ba gambõlõ-Nia, 'Mi'aine, ya'ami nifahowu'õ nama-Gu. Mi'iaigõ mbanua andrõ si no muhõnagõ khõmi i'otarai mbõrõta danõ andre.
35 Me olofo Ndra'o, no mibe'e gõ-Gu, ba me owõkhi dõdõ-Gu, no mibe'e nibadu-Gu nidanõ. Me si fatewu Ndra'o ba zi sambua nahia, no mitema Ndra'o ba nomomi.
36 Me lõ nukha-Gu no mifonukha Ndra'odo. Me mofõkhõ-Do no mirorogõ Ndra'o. Me so-Do ba gurunga, ba no mõi ami mifaigi-Do.'
37 Ba law̃a'õ dania niha andrõ si no mamalua somasi Lowalangi, 'He So'aya, hamega ma'ila olofo Ndra'ugõ ba mabe'e gõ-U, ma zui me owõkhi dõdõ-U, mabe'e õ-U nidanõ?
38 Hamega ma'ila si fatewu Ndra'ugõ ba zi sambua nahia, ba matema'-Õ Ndra'ugõ ba nomoma? Hamega si lõ nukha Ndra'ugõ ba mafonukha'-Õ?
39 Hamega ma'ila mofõkhõ'-Õ, ba labe'e'-Õ ba gurunga, ba mõi ndra'aga mutolo'-Õ?'
40 Itema li Razo andrõ, 'Ya'aboto ba dõdõmi: me milau da'e ba dalifusõ-Gu andrõ fondrege zi numana, ba no khõ-Gu milau da'õ!'
41 Imane Razo andrõ ba niha si so ba gabera-Nia, 'Mi'ofanõ ba da'e, ya'ami ni'elifi! Mi'ae'e ba narako alitõ andrõ si lõ matemate, si no i'asiwai khõmi Afõkha ba mala'ikania!
42 Bõrõ me olofo-Do, lõ mibe'e gõ-Gu; me owõkhi dõdõ-Gu, lõ mifabadugõ khõ-Gu nidanõ.
43 Me si fatewu na Ndra'o ba zi sambua nahia, lõ mitema Ndra'o ba nomomi. Me lõ nukha-Gu, lõ mifonukha Ndra'o. Me mofõkhõ-Do ba me so-Do ba gurunga, lõ mirorogõ Ndra'o.'
44 Ba lamane dania khõ-Nia, 'He So'aya, hamega ma'ila olofo Ndra'ugõ, ma owõkhi dõdõ-U, ma si fatewu Ndra'ugõ, ma lõ nukha-U, ma mofõkhõ'-Õ, ma zui me labe'e'-Õ ba gurunga, lõ nitoloma Ya'ugõ?'
45 Imane wanema li Razo andrõ, 'Mihaogõ wamondrongo: me lõ omasi ami wanolo si numana andrõ, no faoma geluahania lõ mitolo Ndra'o.'
46 Ba gõna huku niha andrõ, fanguhuku si lõ aetu; ba samalua somasi Lowalangi fao ira ba wa'auri safõnu fa'owuawua dõdõ khõ Lowalangi."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA