Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 "Tempo Yaku makava eva Magau, maria tona mainga bo maria tona ntanina nalinga nasimbayu eva porapa hitu: Naria sapulu randaa hau mantomunaka boti langgai, simbo nanggeni poindona.
2 Alima ira nadoyo, bo alima nanoto.
3 Randaa nadoyo nanggeni poindo tapi ledo nipakasadiara lana raisi ri poindora ane maotimo lanana.
4 Tapi randaa nanoto, nanggeni poindo bo nipakasadiara munimo lana raisi ri poindora ane maoti ngena lanana.
5 Nasae mpuu nipopeara, dopa-dopa nakava boti langgai sampe naroyo marata bo namonjo puramo.
6 Natanga bongi naria tona nongare, 'Ritumo boti langgai! Kamaimo kadambanaka ia!'
7 Nangepe haitu, kaliu-liu nembangumo sapulu randaa haitu bo simbo nompakasadia poindona.
8 Bo nanguli randaa-randaa anu nadoyo ka roana nanoto, 'Lea, dekei ka kami sakide lanamu. Mapayamo poindo kami!'
9 Nesana randaa nanoto, 'Ledo magana ngena lana raisi ri poindo kami ane radekei ka komiu sanu. Aginapa komiu mangali lana nte topobalu lana.'
10 Jadi haumo randaa-randaa nadoyo mangali lana. Tapi tempo ira da ri tatanga dala hau mangelo lana, nakavamo boti langgai. Bo randaa-randaa anu nasadia poindona, nesua rabanua posusa nosanggani-nggani ante boti langgai. Naupu haitu niupimo vamba.
11 Naupu sia nakava munimo alima randaa nadoyo pangane. Bo nongaremo ira lako ri savalikuna, 'Tua! Tulungi, buka ka kami vamba!'
12 Tapi nesana boti langgai, 'Ledo nisaniku komiu.'"
13 I Yesus nompakaupu porapaNa ivei: "Haitu sampe komiu kana mainga-inga, apa ledo nisanimiu eona atau jaana Yaku makava."
14 "Tempo Yaku makava mpanjili masimbayu eva porapa hitu: Saito madika nopatuju hau ri ngata nakavao. Dopame ia hau, nirondena batua-batuana bo niparasayana ka ira kakalumanana.
15 Saito niparasayana ka lima-njobu mpeka doi bulava, saitopa niparasayana ka ronjobu mpeka doi bulava, bo saitopa niparasayana ka sanjobu mpeka doi bulava. Ira niparasaya ka doina nangoseaka pompakulera mompopogoli doi. Naupu haitu hau ia ri polipana.
16 Tona niparasaya ka lima-njobu mpeka doi bulava kaliu-liu hau nompagoli doi haitu sampe nikavana anana lima-njobu mpeka muni.
17 Ivesia muni tona anu niparasaya ka ronjobu mpeka doi bulava hau nipagolina doina haitu sampe nikavana anana ronjobu mpeka muni.
18 Tapi tona niparasaya ka sanjobu mpeka doi bulava haitu, hau nombakae lovu ri tana bo nitabuniakana doi nu madikana ri lovu.
19 Naliu haitu nasae mpuu pade nanjili madika. Nanjilipa ia, nirondenamo batuana ala rakitana berimba ira nombaurusi doina.
20 Nakavamo batua niparasayaka lima-njobu mpeka doi bulava haitu nanggeni doi bo anana lima-njobu mpekapa anu nikavana. Bo niulina, 'Pua, komiu nomparasaya ka yaku lima-njobu mpeka doi bulava bara ipia. Peintamo! Nipagoliku doi haitu sampe nanggava anana lima-njobu mpeka muni.'
21 Nanguli madika, 'Nabelomo! Komiu batua nabelo, natutu mantui bago anu niparasayaka komiu. Komiu namala niparasaya ante mbara-mbara sakide. Sabana haitu, mbara-mbara nadea kuparasayaka komiu. Kamaimo madamba mosanggani ante yaku.'
22 Bo nakava munimo batua anu niparasayaka ronjobu mpeka doi bulava. Nanguli ia, 'Pua, komiu nomparasaya ka yaku ronjobu mpeka doi bulava bara ipia. Peinta vei. Nipagoliku doi haitu sampe nanggava anana ronjobu mpeka.'
23 Nanguli madika, 'Nabelomo! Komiu batua nabelo, bo natutu nantui bago niparasayaka komiu. Komiu namala niparasaya ante mbara-mbara sakide. Sabana haitu, madea kuparasayaka komiu. Kamaimo madamba mosanggani ante yaku.'
24 Naupu haitu nakavamo batua niparasayaka sanjobu mpeka doi bulava. Nanguli ia, 'Pua, nisaniku komiu tona nasoa. Komiu nangala asele ntalua anu ledo nitudamiu bo komiu nosombe anu ledo nisavumiu.
25 Naeka raraku, jadi nitabuniakaku doimiu rara lovu ntana. Peintamo! Hitumo doimiu, Pua.'
26 Bo nanguli madika, 'Iko batua nadaa bo nasanda! Nisanimu yaku nangala asele ntalua anu ledo potudaku, bo nosombe anu ledo posavuku.
27 Ane ivesia, nakuya tano ledo nidekeimu doiku ka tona mompopoana doi ala tempo yaku makava, mamala kuala mpanjili doiku ante anana?'
28 Bo niuli madika ka batuana ntanina, 'Alamo doi bulava sanjobu-mpeka haitu lako nte ia, bo dekei ka batua pangane, anu naria sapulu-njobu mpeka!
29 Apa isema naria madea, kana ratambai ka ia sampe madea mpuu nte ia. Tapi isema naria aga sakide, raalasi puramo lako nte ia.
30 Bo tedeakamo batua anu ledo ria gunana haitu hau ri savalikuna ri kalandana. Hamai ia bate-batena motumangi bo masinggiki bagana ante masusa rara.'"
31 "Tempo Yaku, Ana nu Manusia makava mpanjili ri dunia ante reme bo kuasaKu, nosanggani-nggani ante *malaeka-malaekaKu, Yaku monturo ri Gadera PoparentaKu mombatangara mpoMagau.
32 Bo pura-pura manusia rapasiromu ri ngayoKu bo Yaku mogaaraka ira majadi rolunu, nasimbayu eva topoevu nogaaraka bimbana bo tovauna.
33 Bimba, haitumo tona novia dota nu Alatala rapatani ri sabingga ngganaKu, bo tovau, haitumo tona nadaa rapatani ri sabingga njidiKu.
34 Bo Kuuli ka ira ri sabingga ngganaKu ivei: 'Kamaimo komiu nipobelo nTuamaKu. Pesuamo riara KamagauaKu, naria ponturo ri sii nipakasadia ka komiu lako ri lamba pamulana.
35 Sabana tempo naara taiKu, nipakandemiu. Tempo nabai tamboloKu, nipainumiu. Nau Yaku tosangatana, nitarimamiu ri banuamiu.
36 Tempo Yaku ledo ria pakeaKu, nidekeimiu ka Yaku pakea. Tempo Yaku nadua komiu nompelioda Yaku. Tempo Yaku riara ntarunggu komiu nakava nanggita Yaku.'
37 Bo ira ri sabingga ngganaKu maingu rarara bo manguli, 'Pue, ipia panggita kami naara taiMiu bo nipakande kami? Ipia nikita kami Komiu nabai tambolo bo nipainu kami?
38 Ipia Komiu tosangatana bo kami nantarima Komiu ri banua kami? Ipia nikita kami Komiu ledo nopakea bo nidekei kami pakea ka Komiu?
39 Ipia nikita kami Komiu nadua? Ipia Komiu nitarunggu bo kami hau nompelioda Komiu?'
40 Bo Yaku, Magau, mesana, 'Pariaramo tesaKu hitu! Belo nipoviamiu ka sampesuvu-sampesuvuKu hitu, nau tona naede panggana, haitu nasimbayu eva belo nipoviamiu ka Yaku.'
41 Maupu haitu Kuuli ka ira ri sabingga njidiKu, 'Palaimo lako nte Yaku, komiu anu nipindasi nTuamaKu! Koi hau riara apu anu navaya sampe ri kasae-saena nipakasadia ka Magau nu Seta ante malaeka-malaeka anu nangoseaka ia.
42 Apa tempo naara taiKu, ledo nipakandemiu. Tempo nabai tamboloKu ledo nipainumiu.
43 Yaku tosangatana tapi ledo nitarimamiu Yaku ri banuamiu. Yaku ledo nopakea tapi ledo nidekeimiu pakea ka Yaku. Yaku nadua bo nitarunggu, tapi komiu ledo nakava nompelioda Yaku.'
44 Bo ira manguli ka Yaku, 'Pue, ipia nikita kami naara taiMiu, atau nabai tamboloMiu, atau Komiu tosangatana atau ledo nopakea, atau nadua, atau nitarunggu bo kami ledo nantulungi Komiu?'
45 Bo Yaku mesana ka ira, 'Pariaramo tesaKu hitu! Tempo komiu ledo nadota nantulungi sampesuvu-sampesuvuKu hitu anu naede panggana, batuana komiu ledo nadota nantulungi Yaku.'"
46 Bo i Yesus nompakaupu tesaNa ante nanguli, "Pura-pura tona nadaa haitu rahuku sampe ri kasae-saena. Tapi tona nanoa, matuvu mabelo sampe ri kasae-saena."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA