Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 "Kareb ineh Imet surga mepad kudeng pulu' burur decur luk pun mebaruh, luk nenguit lapungdeh, idi iné' ngapu' deléi luk sikal ngaweh.
2 Idi rat arangdeh inan limeh burur luk mebacé, idi limeh burur luk mileh.
3 Ideh luk mebacé nenguit lapungdeh, iamo' na ideh nenguit umau.
4 Iamo' ideh luk mileh nenguit umau bang seréi' dengan lapungdeh.
5 Deléi ineh mio macing, pad maung-amungdeh medacep mateh idi rudap.
6 "Iamo' kareb tangal dacem inan lun ngitang, kebalaneh, 'Kulat muyuh! Deléi luk sikal ngaweh macing peh! Remuat muyuh ngapu' neneh!'
7 Idi pulu' decur luk pun mebaruh ineh netumui idi nengasa' lapungdeh.
8 Idi decur luk mebacé nepebala kuan decur luk mileh, 'Maré nekai sebuang umau muyuh; ngaceku lapung kai sikal milep.'
9 Iamo' kebala decur luk mileh, 'Kian, na miak kuan kai idi kuan muyuh teh lek, meluun do' muyuh amé' inan luk masui umau, idi melih kuan muyuh sebuleng.'
10 Idi litaddeh iné' melih umau deléi luk sikal ngaweh nacing peh; idi ideh luk netemina' nesemuet maya' neneh ku irau paweh, idi tanga' ineh initek peh.
11 "Pangeh ineh, decur luk pun mebaruh luk baken ineh nacing peh, idi nepebala, 'Tuan, Tuan, ngukab tanga' kuan kai.'
12 Iamo' kebala deléi luk sikal ngaweh ineh, 'Na ui miti nemuyuh.'"
13 Idi kebala Yésus, "Matar do'-do', ngaceku muyuh na kali' aco idi karebneh.
14 "Imet surga mepad kudeng selemulun luk sikal amé' ngarang bang bawang baken, idi ieh nenawar amung-amung demulunneh, idi nemaré binawehneh bang paladdeh.
15 Idi kuan sebuleng ieh nemaré limeh ngeribu rigit, idi kuan sebuleng dueh ngeribu rigit, idi kuan sebuleng meribu rigit, anid-anid maya' ilehneh. Idi ieh nenalan peh.
16 Idi demulun luk nengalap limeh ngeribu rigit petacu iné' idi pepua' ku usin ineh pad ieh nengalap uli'neh limeh ngeribu rigit teh.
17 Kudeng ineh teh lemulun luk nengalap dueh ngeribu rigit nengalap uli'neh dueh ngeribu rigit teh.
18 Iamo' ieh luk nengalap meribu rigit iné' idi nengukat tana', idi nengapung usin tuanneh.
19 "Idi mio-mio tuan demulun ineh nuli' peh idi ieh nengiap uli'deh.
20 Idi ieh luk nengalap limeh ngeribu rigit iné' idi nenguit limeh ngeribu rigit baken teh, idi keburi'neh, 'Tuan, iko nemaré negku atun limeh ngeribu rigit. Siruh, ui pangeh nengalap uli'neh limeh ngeribu rigit teh.'
21 Idi tuanneh nepebala neneh, 'Do' luk inau'mu, O demulun luk do' idi lutep niat. Iko pangeh nelutep ratnan luk isuut, pad ui sikal nganau' namu ngimet luk mula'. Do' iko ngalap awang pad-pad denganku.
22 Idi ieh luk nengalap dueh ngeribu rigit iné' teh, idi keburi'neh, 'Tuan, iko nemaré negku atun dueh ngeribu rigit. Siruh, ui pangeh nengalap uli'neh dueh ngeribu rigit teh.'
23 Idi tuanneh nepebala neneh, 'Do' luk inau'mu, O demulun luk do' idi lutep niat. Iko pangeh nelutep ratnan luk isuut, pad ui sikal nganau' namu ngimet luk mula'. Do' iko ngalap awang pad-pad denganku.'
24 Idi ieh luk nengalap meribu rigit iné' teh,k idi keburi'neh, 'Tuan, ui kali' iko aceh lemulun luk metueh niat, idi iko ngeranih ratnan su luk inan iko na nengisak; idi iko ngamung teh rat su luk inan iko netunap.
25 Ui matot, idi ui iné' nanem rigitmu bang tana'. Siruh, ini teh rigit tuan di.'
26 Iamo' kebala tuanneh, 'Iko demulun luk dat idi mekupé, iko kali' ui ngeranih rat su luk inanku na nengisak, idi ngamung rat su luk inanku na netunap.
27 Ngaceku ineh, do' kudeng iko pangeh nemaré usinku kuan lemulun luk mileh pepua', pad ui miak ngalap mula' usinku dengan uli'neh teh kareb ui macing.
28 Do' muyuh ngalap usin ineh rat neneh, idi maré neneh kuan lemulun luk inan pulu' ngeribu rigit.
29 Ngaceku idé-idé luk inan anun-anun, kuan lemulun ineh miak barén teh, iamo' lemulun luk na anun-anun, luk ieh kuan pana' miak lapen rat neneh peh.
30 Idi do' muyuh nala' demulun luk na ulek ini bang dacem luk déi' liang. Su ineh lemulun tangi'-tangi' idi pekatep lipen.'
31 "Kareb Anak-Lemulun macing mangun ku raca' dengan amung melaikatNeh, idi Ieh miak tudo luun kerusiNeh,
32 idi amung-amung pupu mepamung pa kiungNeh. Kareb ineh Ieh sikal matad kiungNeh. Kareb ineh Ieh sikal matad nedeh seburur ratnan seburur, mepad kudeng lun matar dumba matad dumba ratnan amék.
33 Ieh sikal ngamung dumba-dumba pa tinuehNeh, iamo' amék-amék ineh pa kabingNeh.
34 Idi Raca' ineh sikal pebala kuan lemulun luk pa tinuehNeh, 'Amé' muyuh luk pangeh nengalap peruan ratnan TamanKu, lapen muyuh rat pun-pun tana' pinudut.
35 Ui melau, idi muyuh nemaman Negku; Ui meparing, idi muyuh nemaré Negku luk rupen; Ui lun sakai, idi muyuh nenganak Negku;
36 Ui lubpa, idi muyuh nengayung Negku; Ui pangeh mét, idi muyuh nengasa' Negku; Ui netudo bang tutup, idi muyuh nengikak Negku.'
37 Idi lemulun luk matu miak ngor, keburi'deh, 'O Tuhan, idanké kai nenier Iko melau, idi nemaman Namu, Iko meparing, idi kai nemaré Namu luk rupen?
38 Idi idanké kai nenier Iko lun sakai, idi kai nenganak Namuké, Iko lubpa, idi kai nengayung Namu?
39 Idi idanké kai nenier Iko mét idi bang tutup, idi kai nengikak Namu?'
40 Idi Raca' ineh sikal ngor, kebalaNeh, 'Ui pebala nemuyuh, ngaceku muyuh nenganau' kudeng ini kuan seburur kinanakKu lun dat, ieh ineh luk inau' kuanKu teh.'
41 "Idi Ieh pebala kuan lemulun luk pa kabingNeh, 'Buro rat Negku, O muyuh luk binulung, idi semuet bang apui luk meruked, luk tinina' kuan Iblis dengan melaikat-melaikatneh!
42 Ui melau, iamo' na muyuh nemaman Negku; Ui meparing, iamo' muyuh na nemaré luk rupenKu;
43 Ui lun sakai, iamo' muyuh na nenganak Negku; Ui lubpa, iamo' muyuh na nengayung Negku; Ui pangeh mét idi netudo bang tutup, iamo' muyuh na nengikak Negku.'
44 Kareb ineh ideh miak ngor balaNeh, keburi'deh, 'O Tuhan, idanké kai nenier Iko melau, meparing, lun sakai, lubpa, mét, bang tutup, idi na kai nengasa' Namu?'
45 Idi Raca' ineh sikal ngor baladeh, keburi'Neh, 'Setuneh, Ui pebala nemuyuh, ngaceku muyuh na nenganau' kudeng ini kuan seburur kinanakKu lun dat, muyuh na nenganau' kuanKu teh.'
46 Lemulun ini semuet bang ukum ruked-ruked peh, iamo' lemulun luk matu semuet bang ulun luk meruked."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA