Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ "Hal Kerajaan Sorge, keadaanne maraq perumpamean niki: Sepulu dedare pengiring pengantẽn pade bait dilahne mẽsaq, beterus ie pade lumbar nyambut pengantẽn mame.

² Lime lẽq antare ie pade bodo, dait lime saq lainne bijaksane.

³ Kelime dedare saq bodo nike jauq dilahne, laguq ndẽq jauq cadangan minyak.

⁴ Kelime dedare saq bijaksane jauq dilah dait cadangan minyak.

⁵ Pengantẽn mame nike telat dateng, jari dedare-dedare nike ngantok terus ketindoqan.

⁶ Tengaq kelem, baruq kedengahan suare dengan bekuih, 'Pengantẽn mame dateng! Silaq sambut ie!'

⁷ Kesepulu dedare nike ures, terus ie pade penyalaq dilahne.

⁸ Dedare-dedare saq bodo nike bebase lẽq dedare-dedare saq bijaksane, 'Bẽng tiang pade sekediq minyakde, sẽngaq dilah tiang pade gen pedaq.'

⁹ 'Ndẽq bau!' jawab dedare-dedare saq bijaksane nike, 'sẽngaq laun tiang pade ẽndah kurangan minyak. Solahan side lumbar ojok dagang minyak dait beli lẽq derike.'

¹⁰ Beterus kelime dedare saq bodo nike lumbar beli minyak. Lẽq waktu ie pade lumbar beli minyak, pengantẽn mame nike dateng. Kelime dedare saq bijaksane nike tame ojok taoq gawẽ bareng kance pengantẽn mame nike, dait lawangne teimpet!

¹¹ Beterus dedare-dedare saq lainne nike dateng. Ie pade bekuih, 'Paq! Paq! Tulung bukaqang tiang pade lawang.'

¹² Laguq jawab pengantẽn mame nike, 'Tiang ndẽq kenal side pade!'"

¹³ Make Deside Isa tutuqang perumpamean nike dait bemanik, "Keranaq nike pade siep sedie, sẽngaq side ndẽq nenaoq piran jelo dait jamne."

¹⁴ "Hal Kerajaan Sorge nike maraq perumpamean niki: Araq sopoq majikan gen lumbar ojok negeri saq jaoq. Majikan nike ngempoh pelayan-pelayanne, terus ie pade tepercaye jagaq dowẽnne.

¹⁵ Sebilang pelayan tebẽng kẽpẽng siq majikanne menurut kemampuanne sopoq-sopoq. Pelayan saq sopoq bẽngne lime iyu kẽpẽng emas, sopoqne malik bẽngne due iyu kẽpẽng emas. Dait sopoqne malik bẽngne siyu kẽpẽng emas. Terus majikan nike berangkat.

¹⁶ Pelayan saq nerimaq lime iyu kẽpẽng emas nike langsung lumbar bedagang, terus ie mauq bati lime iyu kẽpẽng emas malik.

¹⁷ Maraq nike ẽndah pelayan saq nerimaq due iyu kẽpẽng emas nike, mauq bati due iyu kẽpẽng emas malik.

¹⁸ Laguq pelayan saq nerimaq siyu kẽpẽng emas nike lumbar kaliq longkak lẽq tanaq, terus seboqne kẽpẽng majikanne lẽq derike.

¹⁹ Ngonẽq gati baruq majikanne tulak, dait mulai berẽkẽngan kance pelayan-pelayanne.

²⁰ Pelayan saq nerimaq lime iyu kẽpẽng emas nike dateng, terus ie serahang sepulu iyu kẽpẽng emas, dait bebase, 'Paq, pelungguh ngebẽng tiang lime iyu kẽpẽng emas. Mangkin silaq sereminang, tiang mauq bati lime iyu malik.'

²¹ 'Bagus,' basen majikan nike, 'side pelayan saq bagus dait setie. Sẽngaq side bau tepercaye lẽq hal saq sekediq, tiang gen percayeang hal saq luwẽqan malik lẽq side. Silaq tame, milu beseneng-seneng kance tiang!'

²² Terus pelayan saq nerimaq due iyu kẽpẽng emas nike dateng, dait matur, 'Bapaq ngebẽng tiang due iyu kẽpẽng emas. Mangkin silaq sereminang, tiang mauq bati due iyu malik.'

²³ 'Bagus,' basen majikan nike, 'side pelayan saq bagus dait setie. Sẽngaq side bau tepercaye lẽq hal saq sekediq, make gen tiang percayeang lẽq side hal-hal saq luwẽqan malik. Silaq tame, milu beseneng-seneng kance tiang!'

²⁴ Beterus dateng ẽndah pelayan saq nerimaq siyu kẽpẽng emas nike, dait bebase, 'Paq, tiang taoq pelungguh dengan saq kejem. Pelungguh mataq lẽq taoq saq nẽnten pelungguh sawur binẽq, dait bait hasil lẽq taoq saq nẽnten pelungguh talet mẽsaq.

²⁵ Tiang takut, jari tiang lalo seboq kẽpẽng pelungguh lẽq dalem tanaq. Niki kẽpẽng pelungguh nike.'

²⁶ 'Side pelayan saq jahat dait mayus!' basen majikan nike. 'Tekan side nenaoq bahwe tiang mataq lẽq taoq saq ndẽq uwah tiang sawur binẽq, dait bait hasil lẽq taoq saq ndẽq uwah tiang talet mẽsaq?

²⁷ Seharusne side serahang kẽpẽng tiang nike ojok dengan saq ngelampaqang kẽpẽng, adẽq lẽq waktu tiang tulak, tiang bau bait malik kẽpẽng tiang nike bareng rẽntenne.

²⁸ Keranaq nike, bait kẽpẽng nike lẽman ie, terus bẽng pelayan saq bedowẽ sepulu iyu kẽpẽng emas nike.

²⁹ Sẽngaq sebilang dengan saq sampun bedowẽ gen teican luwẽqan malik, dait ie gen bekelimpahan. Laguq dengan saq ndẽq bedowẽ napi-napi, napi juaq saq araq lẽq ie gen tebait.

³⁰ Dait pelayan saq ndẽq araq manpaatne nike, tetetẽh ojok taoq saq peteng dedet lẽq luah. Lẽq derike ie gen nangis dait menderite!'"

³¹ "Lamun Bije Manusie rauh dalem kemuliean-Ne teiring siq selapuq malaẽkat-Ne, Ie gen melinggih lẽq atas tahte-Ne saq mulie.

³² Selapuq bangse gen tekumpulang lẽq arepan-Ne. Terus Ie gen kelin dengan-dengan nike jari due kelompoq, pade maraq pangarat saq kelin dombe kance bẽmbẽq.

³³ Dait Ie gen toloq dombe-dombe lẽq sedi kanan-Ne, bẽmbẽq-bẽmbẽq lẽq sedi kiri-Ne.

³⁴ Beterus Raje nike gen bebase lẽq dengan-dengan saq lẽq sedi kanan-Ne, 'Side pade saq teberkahin siq Bapa Tiang, silaq tame ojok Kerajaan saq sampun tesiepang umaq side lẽman dunie tecipteang.

³⁵ Sẽngaq waktu Tiang seduk, side pade bẽng Tiang bekelor, dait waktu Tiang bedak, side pade bẽng Tiang nginem. Sewaktu Tiang jari dengan pendateng, side pade bẽng Tiang nyodoq lẽq balẽnde.

³⁶ Sewaktu Tiang ndẽq bekelambi, side pade bẽng Tiang kelambi. Sewaktu Tiang sakit, side pade ngerawat Tiang. Sewaktu Tiang tebui, side pade tulung Tiang.'

³⁷ Beterus dengan-dengan solẽh nike matur, 'Junjungan Saq Mulie, piran tiang pade serioq Pelungguh seduk terus tiang pade aturin Pelungguh medaran? Atao tiang pade aturin nginem lẽq waktu Pelungguh bedak?

³⁸ Piran ẽndah tiang pade serioq Pelungguh jari dengan pendateng, terus tiang pade aturin Pelungguh nyodoq lẽq balẽn tiang pade? Piran Pelungguh nẽnten bekuace, terus tiang pade aturin Pelungguh kuace?

³⁹ Piran tiang pade serioq Pelungguh sungkan atao tebui, beterus tiang pade tulung Pelungguh?'

⁴⁰ Raje nike gen bejawab, 'Tiang badaq side: Setetune waktu side pade ngelaksaneang hal nike lẽq salaq sopoq sanak-sanak Tiang saq paling hine, artine side ngelaksaneang hal nike tipaq Tiang!'

⁴¹ Beterus Raje nike gen bebase lẽq dengan-dengan saq araq lẽq sedi kiri-Ne, 'Lalo lẽman tẽ, side pade dengan-dengan saq tekutuk! Pade tame ojok dalem api saq ndẽq iniq pedaq saq sampun tesiepang umaq Belis dait malaẽkat-malaẽkatne!

⁴² Sẽngaq sewaktu Tiang lapah, side pade ndẽq bẽng Tiang bekelor; sewaktu Tiang bedak, side pade ndẽq bẽng Tiang nginem.

⁴³ Sewaktu Tiang jari dengan pendateng, side pade ndẽq bẽng Tiang nyodoq lẽq balẽnde. Sewaktu Tiang ndẽq bekelambi, side pade ndẽq bẽng Tiang kelambi. Sewaktu Tiang sakit dait tebui side pade ndẽq ngerawat Tiang.'

⁴⁴ Beterus ie pade gen bejawab, 'Junjungan Saq Mulie, piran tiang pade serioq Pelungguh seduk, atao bedak, atao jari dengan pendateng, atao nẽnten bekuace atao sungkan dait tebui? Terus tiang pade nẽnten tulung Pelungguh?'

⁴⁵ Raje nike gen bejawab, 'Tiang badaq side: Lẽq waktu side pade ndẽq mẽlẽ tulung salaq sopoq dengan saq paling hine niki, artine side pade ndẽq mẽlẽ tulung Tiang.'

⁴⁶ Make dengan-dengan nike gen tehukum siq hukuman saq kekel. Laguq dengan-dengan saq ngelaksaneang prẽntah Allah gen tame ojok dalem idup sejati dait kekel."

Matius

Video Matius 25

Ikuti Kami:

KONTAK | PARTISIPASI | DONASI