Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali yako etu i Yesu mampogomboka tau boros pasi kami to anaguruNya.
2 Ia manganto’o, “Tau to mampoguru porenta i Musa pasi to Yahudi to aliran Parisi, sira semo to rawaika kuasa mampotundeka porenta i Musa.
3 Wali see naka masipato komi mangalulu samparia to nato’oka nsira komi mangalulu. Pei ne’e mangalulu lengko nsira apa sira taa mampolengkoka anu to napotundeka nsira.
4 Sira mampakasaaka tau mangalulu porenta-porenta to naika nsira semo pei anu to etu masuli raluluka. Porenta etu maya raporapaka ewa kalemba to mabeu kojo naepe ntau mangkoyo. Pei sira bo’onya mangansawang tau mangalulu porenta to etu nempo ojo sangkodi.
5 “Pei samparia palaong to naika nsira, naka pei sira mangika see danakita nto lino. Lo’a kasika to naika nsira danapamposaka santila tuntu i mPue Allah pei danaso’o nsira ri wo’onya pasi ri langolenya. Kasika nsira semo to bae-bae pei kasika nsa’e. Pasi sira mampakarade suno mpake nsira see marade wo’u pei to si sa’e. Palaong etu naika nsira mangampoanika mamporayang kojo i Pue Allah.
6 Pasi tempo sira yau mangkoni ri roa, sira masanang kojo matunda ri tampa to napatunda ntau to bae angganya. Pasi ewa see seja ane yau ri banua to napampatunde nto Yahudi. Sira masanang seja matunda ri gadera nja’u tampa to napatunda ntau to bae angganya.
7 Pasi sira masanang kojo natabea ntau tempo sira yau njo’u pasar, pasi masanang seja nato’oka ntau, ‘Pa’a Guru.’
8 “Pei ane komi, ne’e mangabiaka yunu ngkomi manganto’oka komi, ‘Pa’a Guru,’ apa komi moa’i, pasi Guru ngkomi samba’aja.
9 Pasi ne’e seja manganto’oka yunu ngkomi ri lino si’i, ‘Pa’a,’ apa samba’aja seja Pa’a ngkomi, etu semo i Pue Allah ndate saruga.
10 Pasi ne’e seja mangabiaka yunu ngkomi manganto’oka komi, ‘Kepala,’ apa samba’aja Kepala ngkomi, etu semo i Kerisitu, Makole parajanji i mPue Allah.
11 Pei ane ri oyo ngkomi, tau to bae-bae angganya pei sa’e, matao ane ia damawali to papolaong ngkomi samparia.
12 Apa i sema tau to mampakabae angga ngkoronya, tau etu darapakakodi angganya. Pasi i sema tau to mampakakodi angga ngkoronya, tau etu darapakabae angganya.”
13 Wali yako etu i Yesu manganto’o wo’u, to’oNya, “Ojo kasesa danurata ngkomi to mampoguru porenta i Musa pasi komi to aliran Parisi. Komi ojo gombomu to manoto! Apa komi mangaba’a jaya see tau taa maya mawali tau to Makolenya i Pue Allah. Komi taa rani mawali tau to Ia Makolenya, pasi komi mangamparas sa’e to rani mawali tauNya.
14 “Kasesa danurata ngkomi to mampoguru porenta i Musa pasi komi to aliran Parisi. Komi ojo gombomu to manoto! Komi damangarata kasesa apa komi mangantipu tau balu panewa mangoko yau kasuginya. Pasi tempo komi makai-kai ri tango ntau, komi makai-kai masae kojo see matao nadonge nsa’e, pei tempo etu ojo gombo ngkomi to manoto. Wali see naka i Pue Allah damampakapari wo’u huku to darurata ngkomi.
15 “Ojo kasesa danurata ngkomi to mampoguru porenta i Musa pasi komi to aliran Parisi. Komi to ojo gombomu to manoto! Komi damangarata kasesa apa saba yako lengko ngkomi see naka tau to yusa mawali maja’a kojo. Apa komi mampobuuka nempo parluu mangawote tasi pasi mangalinjak sambawo lino, komi buya seja rayamu ane maya mangarata nempo samba’aja tau to rani damawali anagurumu. Pei tempo tau etu mawalimo anaguru ngkomi, roo see ia mawali madota kojo mampolengkoka seja lengko to si komi, see naka kaja’a to si ia mawali yau dua ngkani kaparinya pei kaja’a ngkomi. Wali komi masipato rahuku la’u apa naraka, pei taa manto’o ia to dua ngkani kaja’anya etu!
16 “Kasesa danurata ngkomi to ewa mata njaya to buta. Komi damangarata kasesa apa komi sala mampotundeka tau, see naka sira ewa masepi yau yako ri jaya to monso. Rapanya tempo komi mampotundeka sira mangkonong mangampake matamanasa tempo mangika parajanji. Tempo etu komi mampotundeka sira manganto’o, ‘Ane re’e tau to mangika parajanji pei manganto’o, “banua i mPue Allah semo to mawali matamanasa parajanjingku,” ane ewa see, tau etu nempo taa mangabanang parajanjinya, taa mawei. Pei tau to manganto’o, “Weyawa to ri raya banua i mPue Allah, etu semo to mawali matamanasa parajanjingku,” ane ewa see, tau etu ia taa maya taa mangabanang parajanjinya etu.’ Ewa see nupatundeka ngkomi.
17 Gete komi madoyo pasi ewa tau buta! To imba to bae-bae batuanginya, bara weyawa bara banua i mPue Allah? Gete, banua i mPue Allah semo to bae-bae batuanginya pei weyawa etu! Apa naka pei weyawa etu mawali i Pue Allah puenya apa saba re’e ri raya banuaNya semo.
18 “Wali komi mampotundeka wo’u resi tau, manganto’o, ‘Ane re’e tau to mangika parajanji pei manganto’o, “palampa mpampue semo to mawali matamanasa parajanjingku,” ane ewa see, tau etu nempo taa mangabanang parajanjinya, taa mawei. Pei tau to manganto’o, “pampue to ri wawo mpalampa, etu semo to mawali matamanasa parajanjingku,” ane ewa see, tau etu taa maya taa mangabanang parajanjinya etu.’
19 Gete komi to ewa tau buta! To imba to bae-bae batuanginya, bara pampue bara palampanya? Palampa mpampue semo to bae-bae batuanginya. Apa palampa i Pue Allah puenya, pei ane pampue, tempo rapamposaka ri wawo mpalampa etu, panewa mawali seja i Pue Allah puenya.
20 Wali see naka ane tau mangampake palampa mpampue mawali matamanasa parajanjinya, batuanginya si’a ojo palampa etu to napake. Ia mangampake seja samparia pampue to re’e ri wawo mpalampa.
21 “Pasi ane tau mangampake banua i mPue Allah mawali matamanasa parajanjinya, batuanginya si’a ojo banua i mPue Allah to napake. Ia mangampake seja i Pue Allah to maroo ri raya banua to etu damawali matamanasa parajanjinya etu.
22 Pasi tau to mangampake saruga mawali matamanasa parajanjinya, batuanginya si’a ojo saruga to napake. Ia mangampake seja gadera i mPue Allah pasi i Pue Allah to matunda ri gadera etu damawali matamanasa parajanjinya etu. Pei komi sala mampotundeka tau mangkonong anu to si’i, wali see naka komi damangarata huku to bae kojo.
23 “Pasi kasesa danurata ngkomi to mampoguru porenta i Musa pasi komi to aliran Parisi. Komi ojo gombomu to manoto! Komi damangarata kasesa apa komi taa mangika anu to bae kojo batuanginya resi i Pue Allah. Komi madota kojo mangalulu porenta-porenta to taa bae kojo batuanginya, ewamo mangawai santila sampuyu yako samparia to komi mangarata. Apa gete, pasiwa pinumuya rampa to rato’oka selasi, adas manis pasi wunga rampa, komi madota mangawaika resi i Pue Allah santila sampuyu. Pei komi taa mangaluluka porenta i Musa to bae wo’u batuanginya. To bae wo’u batuanginya etu semo mangika palaong to masipato raika, pasi mamporayang sa’e, pasi mangika lengko ngkatuwu to masipato nasarumaka nsa’e. Wali komi taa kojo mangaluluka porenta to etu. Wali matao ane tiroowa mangawai santila sampuyu, pei pakadota mangalulu seja porenta to bae wo’u batuanginya etu.
24 Gete, komi ewa mata njaya to buta. Palaong to komi mangika raporapaka ewa mangantiris nsiok yako ri ue naka ne’e manginu yau nsiok etu, pei ane binatang to bae kojo to rato’oka unta komi mangomo yau. Ewa wetu komi apa ane porenta to taa bae batuanginya, komi mangaluluka kojo, pei porenta to bae kojo batuanginya, to etu komi mampobuuka nempo taa raluluka taa mawei!
25 “Kasesa danurata ngkomi to mampoguru porenta i Musa pasi komi to aliran Parisi. Komi ojo gombomu to manoto! Komi damangarata kasesa apa komi madota kojo mangalulu ada to si komi, pei pampobuuka ngkomi pasi raya ngkomi bamporomung kojo pasi boros pamporani ndayamu to maja’a to taa nuta’amaka ngkomi. Wali komi maya raporapaka ewa sangkir bara pingga to rapakayongongika ojo ri wotonya bara ri bengonya, pei rayanya buke anu to makarika.
26 Gete komi to aliran Parisi, komi ewa tau buta! Pakayongongika ruyu anu to raposaka ri raya nsangkir pasi pingga, panewa wotonya pasi bengonya maya rapakayongongika seja.
27 “Kasesa danurata ngkomi to mampoguru porenta i Musa pasi komi to aliran Parisi. Komi ojo gombomu to manoto! Komi damangarata kasesa apa komi ewa dayo to rapalasika cet to buya. Dayo etu ane ri wotonya magaya kojo, pei ane ri rayanya buke wuku ntau mate pasi makarika kojo.
28 Wali ewa see seja komi. Apa ane ri pangkita nu mata ntau, lengko ngkomi singkonong pei i Pue Allah. Pei raya ngkomi maja’a kojo pasi ojo gombo ngkomi to manoto.
29 “Kasesa danurata ngkomi to mampoguru porenta i Musa pasi komi to aliran Parisi. Komi ojo gombomu to manoto! Komi damangarata kasesa apa nempo mampoanika mangika palaong to matao, pei kamonsonya raya ngkomi maja’a. Rapanya komi mangikaka to pantuntu tuntu i mPue Allah dayo to meyawa kojo. Pasi komi mampakagaya woto ndayo ntau to lengkonya singkonong pei i Pue Allah.
30 Pasi komi manganto’o, ‘Ane rapanya kami semo to tuwu tempo bue-bue mami tempo owi, ane ewa see, kami taa mampopate yau to pantuntu tuntu i mPue Allah ewa naika nsira.’ Ewa wetu nuto’o ngkomi.
31 Pei re’e palaong ngkomi to mampakanasanka Aku komi sewaju kojo pei sira. Aku kunsani komi roomo magombo-gombo mangika songka rani mampopate yau Aku. Wali yako ri songka ngkomi etu manasa komi sewaju ewa bue-bue ngkomi to nampopate yau to pantuntu tuntu i mPue Allah etu. Wali komi si’a ojo wiyaa nsira, pei lengko ngkomi sewaju ewa lengko nsira seja.
32 Wali manasa resi Aku komi taa damajea. Wali gete, biakamo! Ika ruyu songka ngkomi etu pei polasaka palaong to maja’a to naika nu bue-bue ngkomi etu!
33 “Wali Aku manganto’oka komi, komi ewa ule to mampeyaa mampiyaika apu nja’u pada pei ia taa nakurang. Apa ewa see seja komi. Komi taa kojo damangampiyaika huku ngkomi la’u apu naraka!
34 “Wali apa saba komi maja’a kojo, see naka Aku mangampokau tau yau resi komi. Tau etu to pantuntu tuntu i mPue Allah, pasi tau to bae kapande to nawaika i mPue Allah sira, pasi re’e seja tau to mampotundeka sa’e porenta i mPue Allah. Pei komi taa mampodongeka tau etu. Kasimbalinya yako etu re’e sira to danupopate yau ngkomi pasi re’e to danupaku yau ngkomi ri kaju pasape. Pasi re’e seja to danutidas ngkomi nja’u banua-banua to napampatunde ngkomi. Panewa re’e wo’u sira to danurubak ngkomi yako ri kota to samba’a rata nja’u kota-kota to yusa.
35 Wali ewa wetu danuika ngkomi resi tau to ipokaungKu etu, wali see naka komi damangarata seja huku to narata ntau to tempo owi to mampopate yau seja tau to tare salanya. Apa mula yako ri temponya i Habel to tare salanya, sira mampopate yau boros kojo tau to taa seja re’e salanya, rataka ri temponya i Sakharia, ana i Berekia rapopate yau. I Sakharia etu napopate yau nu yunu ngkomi ri oyonya banua i mPue Allah pasi palampa mpampue.
36 Wali Aku manganto’oka komi, monso pu’u samparia palaong to maja’a etu, komi to tuwu ri tempo si’i to damangarata seja hukunya.”
37 Wali yako etu i Yesu magombo wo’u, Ia mawo rayaNya manganto’o, “Kuporayang kojo komi to Yerusalem! Yako tempo owi rataka ri tempo si’i komi mampopate yau to pantuntu tuntu i mPue Allah. Pasi tau to napokau i mPue Allah resi komi, tau etu nutasoka ngkomi watu. Pei mandudu ngkani Aku rani mampasiromunaka samparia komi ri awengKu ewa naika manu mampasiromunaka ananya ri ara mpaninya. Pei komi taa rani.
38 Wali kota ngkomi danapiyaika yau i mPue Allah pei darapakaja’aka yau.
39 Wali Aku manganto’oka komi, tempo Aku yau, roo see komi tawa damangkita wo’u Aku sampe rata temponya komi damangantabe Aku, manganto’o, ‘Barong Ia to ma’i napokau i mPue!’”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA