Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Aefa da'õ muhede Yesu ba niha sato awõ ba ndra nifahaõ-Nia,
2 "Latema kuaso ira Sangila Amakhoita awõ ndra Farizai'o, ba wamo'eluaha huku Moze.
3 Bõrõ da'õ mi'o'õ fefu hadia niw̃a'õra khõmi. Ba bõi milau hadia nilaura, bõrõ me lõ la'o'õ hadia wamahaõra.
4 Oi safõkhõ ni'andrõra ba labe'e gamakhoita sabua, ba hiza ma'ifu lõ latolo niha wamalua ya'ia.
5 Fefu hadia ia nilaura, ha ena'õ la'ila ira niha. Lafake lembe sebolo, ba baru sebua si so huruhuru ba gahe!
6 Omasi ira nahia si sõkhi ba gowuloa, ba gurusi soadu ba nahia wangandrõ.
7 Omasi ira nifozumazumange ba fasa. Ba ena'õ lakaoni khõra niha, 'Guru'.
8 Ba ya'ami, bõi lakaoni khõmi niha, 'He Guru', bõrõ me ha samõsa Gurumi ba ya'ami fefu si fatalifusõ.
9 Bõi gõi mikaoni 'Ama,' ba niha gulidanõ andre, bõrõ me ha samõsa namami, ya'ia Nama si so ba zorugo.
10 Ba bõi gõi lakaoni khõmi 'Sondrõnia'õ', bõrõ me ha samõsa zondrõnia'õ ya'ami, ya'ia Razo Sangorifi nifabu'u Lowalangi.
11 Sabõlõ ebua ba gotaluami, ya tobali enonimi.
12 Niha sangebua'õ ya'ia, da'õ ni'ide'ide'õ, ba sangidengide'õ ya'ia da'õ ni'ebua'õ."
13 "Alai ami Sangila Amakhoita ba Farizai'o! Niha samini tõdõ ami! Miba'agõ niha tobali ono mbanua amatõrõw̃a Lowalangi. Ba lõ sa omasi ami tobali ono mbanua wamatõrõ andrõ, ba hiza miba'agõ niha bõ'õ.
14 [Alai ami Sangila Amakhoita ba Farizai'o! No samini tõdõ ami! Milimo lakha mbanua ba worabu omora. Ba milau wangandrõ sanau ba wamini'õ da'õ fefu. Da'õ mbõrõ wa nihuku sabõlõbõlõ ami dania!]
15 Alai ami Sangila Amakhoita ba Farizai'o! No samini tõdõ ami! Mi'õtõ nasi ba mitõrõ danõ ba wolohe samõsa niha fao ba agamami. Ba na no fao ia, mibali'õ ia õsi narako, si mendrua fa'alõsõkhi moroi khõmi!
16 Alai ami niha sau'a sondrõnia'õ niha! Mifahaõ da'e, 'Na so zi mõi ba hõlu ba dõi Nomo Zo'aya, ba lõ aro hõlu andrõ; ba na mõi ia ba hõlu ba dõi gana'a si so ba Nomo Zo'aya, ba aro hõlunia andrõ.'
17 No niha si bodo ami ba sau'a! Hezo zabõlõ moguna: ana'a, ma zui Omo Zo'aya sombali'õ ni'amoni'õ gana'a andrõ?
18 Si mane nasa wamahaõmi, 'Na mõi ba hõlu niha ba dõi naha wame'e sumange, lõ aro hõlunia andrõ; ba na mõi ba hõlu ba dõi zumange yaw̃a ba naha zumange andrõ, aro wahõlusania.'
19 Alai wa'au'ami! Hezo zabõlõ moguna? Sumange andrõ ba ma nahia zumange sombali'õ ni'amoni'õ zumange andrõ?
20 Bõrõ da'õ, na so zi mõi ba hõlu ba dõi naha wame'e sumange, eluahania fahõlu ia ba dõi naha wame'e sumange awõ zumange si so yaw̃a ba da'õ.
21 Ba na fahõlu niha ba dõi Nomo Zo'aya, eluahania, fahõlu ia ba dõi Nomo Zo'aya awõ ba dõi Zo'aya si so ba da'õ.
22 Na fahõlu niha ba dõi mbanua si yaw̃a, eluahania fahõlu ia ba dõi dadaoma Lowalangi, ba ba dõi Lowalangi si dadao ba da'õ.
23 Alai ami Sangila Amakhoita ba Farizai'o! Niha samini tõdõ ami! Mibe'e sambua ni'ofulu selasi, adasi sami ba jita khõ Lowalangi. Ba lõ ba dõdõmi zebua goroisa: Fa'atulõ, fa'ahakhõ dõdõ ba fa lõ farõi. Si lõ tola lõ'õ mibe'e ba dõdõmi ena'õ da'õ awõ danõ bõ'õ nasa.
24 No sau'a sondrõnia'õ niha ami! Mitafi ngalõngalõ ba gõmi idanõ, ba ondra sa ba mitõlõ!
25 Alai ami, Sangila Amakhoita ba Farizai'o! Niha samini tõdõ ami! Misasai gero mako awõ gero wiga khõmi irege sõkhi, ba tanõ bakhania no ta'unõ sibai, safõnu forabu ba folu'alu'a.
26 He Farizai'o sau'a! Misasai ua tanõ bakha wiga andrõ awõ makomi, ena'õ ehao gõi geronia!
27 Alai ami Sangila Amakhoita ba Farizai'o! Niha samini tõdõ ami! Hulõ lewatõ nilau betua safusi ami; wa'asõkhi moroi baero ba bakha ba afõnu tõla ba fefu oi obou.
28 Si manõ gõi ami, no sõkhi ba wamaigi moroi baero, ba sindruhunia afõnu falimosa ba fanawõ oroisa bakha ba dõdõmi."
29 "Alai ami Sangila Amakhoita ba Farizai'o! Niha samini tõdõ ami! Mifazõkhi lewatõ zama'ele'õ ba mihaogõ gowe ba wanõrõ tõdõ niha satulõ tõdõ.
30 Ba mimane, 'Na auri ndra'aga ba ginõtõ ndra tuama mbõrõta, tenga si mane ya'ira ndra'aga wamunu sama'ele'õ.'
31 Tobali, mangaku ami wa nga'õtõ zamunu sama'ele'õ ami!
32 Na si manõ ba mifatohu ba mi'o'ozui horõ ndra tuami andrõ!
33 Niha si lõ sõkhi ami ba nga'õtõ niha si lõsõkhi gõi! Hewisa wa tola mi'efa'õ ami ba huku ba narako?
34 Bõrõ da'õ, mihaogõ wamondrongo: Ufatenge khõmi zama'ele'õ, ba niha satuatua, ba guru; ato ba gotaluara nibunumi, ba tanõ bõ'õ õsa ha miforõfa. So nifakaomi ba nahia wangandrõ, ba migohi moroi ba mbanua si sambua numalõ ba mbanua bõ'õ.
35 Bõrõ da'õ, nihuku ami bõrõ me no mibunu zi lõ sala andrõ -- i'otarai wamunu Habeli si lõ sala, irugi wamunu Zakharia ono Mberekhia, nibunu ba gotalua Nomo Zo'aya faoma nahia wame'e sumange.
36 Ya faduhu dõdõmi: Fefu horõ andrõ tefalu'igõ ba niha si sagõtõ iada'e!"
37 "He Yeruzalema, he Yeruzalema! Samunu sama'ele'õ, ba sanebu kara dengetenge Lowalangi irugi mate! Hame'uga kali Utandraigõ wangowuloi ono mbanua, si mane si fagelo sangowuloi ononia barõ gafinia, ba hiza lõ omasi ami!
38 Bõrõ da'õ' lõ sa'ae fa'awõ khõmi Lowalangi.
39 Uw̃a'õ khõmi: I'otarai da'e lõ mi'ila Ndra'odo sa'ae irege muhede Ndra'o khõmi: 'Ya'ahowu zi so andrõ ba dõi Zo'aya.'"
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA