Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai iparsahapkon Jesus ma halak na mabuei ai ampa susian-Ni,
2 nini ma, “Kursi ni si Musa do na hinundulan ni sibotoh surat pakon Parisei.
3 Halani ai, horjahon anjaha irikkon nasiam ma sagala niajarhon ni sidea bani nasiam, tapi ulang ma usihi nasiam pambahenan ni sidea, ai mangkatahon do hansa sidea, seng dong anggo ihorjahon.
4 Irahuti sidea do siboanon na borat, anjaha iampeihon ma ai bani abara ni jolma, tapi sidea sandiri marhitei jari-jari pe seng ra manggiut ai.
5 Sagala pambahenan ni sidea ihorjahon sidea do, ase ididah jolma. Halani ai ipabolag sidea do tali tonggo ni sidea anjaha ipaganjang rambu ni pakeianni.
6 Marosuh do sidea, hundul bani ianan na sangap bani parpestaan, sonai homa bani hundulan lobei-lobei bani parguruan,
7 ambahni ai, bani tabi ni halak i tiga, anjaha ase igoran halak sidea rabbi (guru).
8 Tapi anggo nasiam, ulang ma ra nasiam igoran halak rabbi (guru), ai sada do Guru bani nasiam, anjaha na marsanina do nasiam ganup.
9 Ulang ma parbapa nasiam atap ise i tanoh on, ai sada do Bapa nasiam, ai ma na i nagori atas ai.
10 Ulang ma homa ra nasiam goranon pambobai, ai sada do Pambobai nasiam, ai ma Kristus in.
11 Tapi barang ise sisangapan i tongah-tongah nasiam, ia ma sipangidangi bani nasiam.
12 Ai barang ise na pagijang dirini, sipatoruhon do, tapi barang ise na patoruh dirini, ai do sipagijangon.”
13 “Bursik ma nasiam sibotoh surat ampa Parisei, nasiam sipakulah-kulah, ai itutup nasiam do Harajaon nagori atas in i lobei ni jolma. Nasiam sandiri seng masuk, anjaha halak na sihol masuk ilanglangi nasiam do masuk.
14 Bursik ma nasiam sibotoh surat ampa Parisei, nasiam sipakulah-kulah, ai ibondut nasiam do rumah ni naboru na mabalu marhitei tonggo sipakulah-kulah na ganjang-ganjang. Halani ai borat do uhum na mangonai bani nasiam.
15 Bursik ma nasiam sibotoh surat pakon Parisei, nasiam sipakulah-kulah, na mandalani laut ampa tanoh, laho manarik pala sahalak bani ugama nasiam, anjaha dob saud ia masuk, gabe anak ni naraka do ia ibahen nasiam, lompit dua jahatan humbani nasiam.
16 Bursik ma nasiam pambobai na mapitung, na mangkatahon, ʻBarang ise na marbija hu rumah panumbahan seng mahua ai, tapi barang ise na marbija hu omas na i rumah panumbahan, ai do na hona sibijaon.ʼ
17 E nasiam na oto anjaha na mapitung! Na ija do sisurungan, omas ai do atap rumah panumbahan na papansingkon omas ai?
18 Ambahni ai ihatahon nasiam do, ʻNa marbija hu anjapanjap seng mahua ai, tapi barang ise na marbija hu galangan na i atasni ai, ai do na hona sibijaon.ʼ
19 E nasiam na mapitung! Na ija do sisurungan, galangan ai do atap anjapanjap na papansingkon galangan ai?
20 Barang ise na marbija hu anjapanjap marbija do ai hujai ampa hu haganup na i atasni ai.
21 Na marbija hu rumah panumbahan, marbija do ai hujai ampa hubani na mangiankon ai.
22 Na marbija hu nagori atas, marbija do ai hu paratas ni Naibata, ampa hubani na mangkunduli ai.
23 Bursik ma nasiam sibotoh surat ampa Parisei, nasiam sipakulah-kulah! Igalar nasiam do parsapuluhan ni hosaya, humangei ampa huning, tapi tading do ibahen nasiam titah siharganan, ai ma hapintoron, idop ni uhur ampa habujuron. Sihorjahononkon do na sada on, tapi ulang tading na legan.
24 Nasiam pambobai na mapitung! Itapis nasiam do rongit hu darat, tapi anggo unta ibondut nasiam do.
25 Bursik ma nasiam sibotoh surat pakon Parisei, nasiam sipakulah-kulah! Ai ipaborsih nasiam do darat ni mangkuk ampa pinggan, hape ibagas gok do ai marisi panrampokon ampa uhur haut.
26 E Parisei na mapitung! Parbagas ni panginuman in ma lobei borsih, ase borsih age pardaratni ai.
27 Bursik ma nasiam sibotoh surat pakon Parisei, nasiam sipakulah-kulah! Ai usih do nasiam bani tanoman na hinapur, na dear idahon hun darat, tapi ibagas gok holiholi ni na matei ampa sagala na mabutak.
28 Sonai do homa nasiam, pintor idahon ni halak hun darat, tapi gok do sipakulah-kulah ampa hajahaton ibagas.
29 Bursik ma nasiam sibotoh surat pakon Parisei, nasiam sipakulah-kulah! Ai ipauli nasiam do tanoman ni nabi-nabi, anjaha ipajagar nasiam do tugu ni halak parpintor.
30 Nini nasiam, ʻAmbit manggoluh hanami bani panorang ni ompung-ompungnami, seng anjai dihut hanami parsalah bani daroh ni nabi-nabi ai!ʼ
31 Ase isaksihon nasiam do hape, anak ni sibunuh nabi-nabi ai do nasiam!
32 Ai pe, goki nasiam ma suhat-suhat hajahaton ni ompung nasiam!
33 Nasiam ulog anjaha anak ni ulog darih! Sonaha ma panlembangi nasiam bani uhuman ni naraka?
34 Halani ai, tonggor ma, Ahu do marsuruh bani nasiam nabi-nabi, halak na maruhur ampa sibotoh surat, deba humbani sidea bunuhon anjaha parsilangkonon nasiam do, anjaha deba nari humbani sidea lonsingan nasiam do i rumah parguruan nasiam anjaha parburuon nasiam hun huta na sada hu huta na sada nari,
35 ase mangonai bani nasiam ma sagala daroh ni halak parpintor, na madurus i tanoh on, olat ni daroh ni si Abel na pintor ai ronsi daroh ni si Sakaria, anak ni si Barakya, na binunuh nasiam i holangkolang ni rumah panumbahan ampa anjapanjap ai.
36 Sintong do na Huhatahon on bani nasiam: Haganupan in mangonai do bani bangsa on!”
37 “Jerusalem, Jerusalem, sibunuh nabi-nabi, anjaha sipargijig na sinuruh marayak ham! Domma piga hali sihol patumpuon-Ku anakmu, songon indung ni dayok patumpuhon anakni hu toruh ni habongni, tapi seng ra ham.
38 Tonggor ma, maningon tarulang ma rumah nasiam.
39 Ai Huhatahon ma bani nasiam, seng idahon nasiam be Ahu humbani sonari nari, paima ihatahon nasiam, ʻPinasu-pasu ma na roh ibagas Goran ni Tuhan!ʼ”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA