Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Mase Mawu Yesus něhengetang su taumata l᷊awọ dingangu su manga murit'E angkuěng,

² "Manga mananěntirong agama ringangu tau Farisi e nakahombang kawasa waụg'u mělahẹ u tita'm Musa.

³ Batụ u ene ute pěmpẹ̌sěmpị bue ringangu pěmpẹ̌tuhụ bue waug'u patikụ apang ipẹ̌parentan sire. Kai kumbahangbe měmpẹ̌těno kakanoạ i sire, u i sire tawe mẹ̌kakoạ apang itẹ̌těntiron sire.

⁴ I sire měmpạnuntụewe manga hal᷊ẹ̌ mawawěhạ dingangu měmpangonggọu atorẹ̌ mawawěhạ, kai mang ta kadiongeng mẹ̌tul᷊ungu taumata tadeạu měmpẹ̌děndal᷊engu ene.

⁵ Patikụ apang kẹ̌koateng i sire kětạeweng mědeạu pakịpandai su taumata. I sire mětẹ̌tatudẹ měpẹ̌pakẹ u wawěkise mawawěnahẹ̌ kereu měmpẹ̌kal᷊iomaneng dingangu mapakanandụ u humbung lakụ i sire.

⁶ I sire papuluang su tampạ kahoroěnge su manga sal᷊iwang dingangu su manga kal᷊aianeng su těngone su ral᷊ungu manga wal᷊en pẹ̌kakal᷊ioamanengang.

⁷ I sire puluang makịadatẹ̌ su manga pasarẹ̌, dingangu mal᷊uasẹ̌ kuiang 'Tuang Guru'.

⁸ Arawe i kamene, abe kapulu kuiang 'i Tuang Guru', u gurunu e mang sěmbaụ kụ i kamene kěbịe kai anạ u sěmbaụ.

⁹ Dingangu kumbahang i kamene kumui su sěngkatau su dunia ini 'Amang', u i Amang i kamene e mang sěmbaụ kụ kai i Amang su Sorga.

¹⁰ Dingangu abe kapulu i kamene kuiang 'Měngangahạ', batụ u měngangahạ i kamene mang sěmbaụ kụ kai Ratu Mananal᷊amatẹ̌ seng nikẹ̌don Duata.

¹¹ I saing kasěllahenge su tal᷊oarang kamene, hinong kakoạ mẹ̌tatangkiang si kamene.

¹² I sai mẹ̌těngkarangẹu watangenge sarung iapakasanạ; arawe i saịewe mẹ̌těngkasanạ, sarung iapakarange."

¹³ "Kaěngkěhang i kamene manga mananěntiro agama ringangu tau Farisi! I kamene taumata mẹ̌mělle. I kamene mạnahaghe taumata mědeạu makoạ dal᷊ohong jamạat'u Mawu. I kamene hala mạdiri makoạ dal᷊ohong jamạat'u Mawu, arawe wal᷊ine apam mapulu e, kahian kamene sahagheěng.

¹⁴ [Kaěngkěhang i kamene manga mananěntiro agama ringangu tau Farisi: I kamene kai měmpẹ̌mělle. I kamene měngẹ̌ngakal᷊ẹ̌ manga wawine wal᷊u ringangu měmpělẹ̌hampasẹ̌ bal᷊en sire kụ mědeạu ipangambung kararal᷊aịe tangu i kamene měkẹ̌kal᷊iomaneng manandu-nandu. Suwụ u ene ute hukumang i kamene e sarung limembong kawěhạe!]

¹⁵ Kaěngkěhang i kamene manga mananěntirong agama ringangu tau Farisi! I kamene kai tahapěmělle! I kamene rụdal᷊eng mararau mạmotọ l᷊audẹ̌, dingangu měmpạměpidẹ̌ banua mědeạu reng makasahionge sěngkatau makakasuẹ̌ agamanu. Kụ sarạeng tau e simuẹ̌ agamanu e ute i sie koateng i kamene ral᷊ohon naraka ruan sul᷊e limembong karal᷊akịe wọu'i kamene!

¹⁶ Kạěngkěhang i kamene manga měngangahạ buta! I kamene měmpạněntirong ini, 'Kereu i sai mẹ̌salu su Wal᷊em Mawu e ute, saluwe tawẹ mangal᷊ene; kai kereu i sie mẹ̌salu su wul᷊aeng su ral᷊ungu Wal᷊em Mawu e ute i sie kạkakaịu salune ene.'

¹⁷ I kamene taumata e wodokẹ̌ o kawe lai wuta! Sude l᷊imembong kapiane: bul᷊aenge arau Wal᷊em Mawu e makasusi wul᷊aenge?

¹⁸ I kamene mạněntirong ini lai, 'Kereu sěngkatau mẹ̌salu ual᷊ingu pananěmbaěng, taumata ene tawe naikị su salune; arawe kereu i sie mẹ̌salu ual᷊ingu sasěmba su wowom pananěmbaěnge, i sie naikị kahian sasalune ene.'

¹⁹ Kai wuta kaěllị i kamene! Sude limembong kapiange? Sasěmbane arau pananěmbaěng kụ makakoạ sasěmba ene masusi?

²⁰ Batụ u ene, kereu piạ u mẹ̌salu su pananěmbaěng, ene mangal᷊ene i sie nẹ̌salu ual᷊ingu kai su pananěmbaěng, měbẹ̌bawa kěbị apạewen mạpapěllọ su wowone.

²¹ Kụ kereu piạ u mẹ̌salu su Wal᷊em Mawu, ene mangal᷊ene i sie měsẹ̌salu kurai su Wal᷊em Mawu e, kurai su Ruata mětẹ̌tumanạ sene.

²² Dingangu kereu piạ u sěngkatau mẹ̌salu ual᷊ingu sorga, ene mangal᷊ene i sie měsẹ̌salu ual᷊ingu kararatuang u Mawu, dingangu ual᷊ingu Ruata kụ mạiang su kal᷊aianeng'E.

²³ Kạěngkěhang i kamene manga mananěntiro agama ringangu tau Farisi! I kamene kai tahapěmělle. I kamene měmpạngonggọu katahạpul᷊ong kapahiakengu salasi, pingkilẹ̌, dingangu pempasẹ̌ e su Mawu. Arawe manga hal᷊ẹ̌ kaghaghuwakenge su ral᷊ungu atorang u agama, kere manga: Kạadilẹ̌, pẹ̌kakakěndagẹ̌, katatuhụe tawe sasěmpikang i kamene. Sěmbal᷊iau kai ene harusẹ̌ koateng i kamene kal᷊amona, su sěmbẹ̌kang ene tamai lai mapakawalan hal᷊ẹ̌ bal᷊ine.

²⁴ I kamene e kawe mangangahạu wuta lai! Lango su inumang sahikang i kamene, arawe onta e kawe ělukangbeng kamene!

²⁵ Kạěngkěhang i kamene mananěntiro agama ringangu tau Farisi! I kamene e tahapěmělle! Manga l᷊ainumang dingangu manga lamạ i kamene lẹ̌uhasengbeng kamene l᷊ikude pakawurẹ̌si, arawe ral᷊unge měngkate apa mal᷊amuhụ kahiạewen hal᷊ẹ̌ kẹ̌kaěbakeng i kamene ual᷊ingu pěmamul᷊aho ringangu pẹ̌bawawusa.

²⁶ I kamene tau Farisi wuta! Uhasẹ̌ko kal᷊amona pakawurẹ̌si ral᷊ungu manga l᷊ainumang dingangu manga l᷊amạ, tadeạu l᷊ikude mal᷊aing burěsi!

²⁷ Kạěngkěhang i kamene mananěntiro agama ringangu tau Farisi! I kamene e tahapěmělle! I kamene kerẹ e manga kubul᷊ẹ̌ nilaburẹ̌ pinakawira, su l᷊ikude ikẹ̌kasilo mal᷊ěnggihẹ̌, arawe su ral᷊unge napenẹu ruhi ringangu kěbịewe apam mawawuhụ.

²⁸ Kerene lai i kamene. Wọu l᷊ikude i kamene kakěllaěng mapia su taumata; arawe su ral᷊unge ute i kamene kawe napenẹ u konti ringangu kararal᷊akị."

²⁹ "Kaěngkěhang i kamene mananěntiro agama ringangu tau Farisi! I kamene e tahapěmělle! I kamene němpangěndụ u watung kubul᷊ẹ̌ maral᷊ěnggihẹ̌ baugu manga nabi e, ringangu lělẹ̌gahengu palẹ̌ tatialạen taumata kakanoạe mapia.

³⁰ Kụ i kamene němpẹ̌bera u, 'Mangawe i kami nẹ̌biahẹ̌ su tempong manga i upung i kami e nạung ute, i kami e tawe timuhụ dingang i sire němpamate manga nabi!

³¹ Kụ i kamene němpangaku hala u i kamene e kai hiten taumata němpamate manga nabi.'

³² Mạeng kerene ute, pěmpanurusẹ̌ e ringangu měngkate pakasuẹ e kal᷊awọu rosa kụ seng niwahětang i upung i kamene e!

³³ I kamene e kai raral᷊aị dingangu kawe hiten taumata raral᷊aị! Kereapa ngae i kamene mapakasal᷊amat'u watangeng bọu hukumangu naraka?

³⁴ Daringihẹ̌ko pakapia-pia: Iạ e sarung měndoloh'u manga nabi, taumata matatahuěnna, ringangu manga mananěntiro; kụ sěnggạ bọ'i sire sarung pateěng i kamene, ringangu sěnggạewe lai wal᷊ine sarung kuruisang i kamene. Piạbe lai sarung pahangeng i kamene su ral᷊ungu wal᷊eng pẹ̌kakal᷊iomanengang, mase saghegheěng i kamene bọu soa sěmbaụ sarang soa wal᷊ine.

³⁵ Batụ u ene i kamene sarung ihukung ual᷊ingu pěmamate kụ nịkakoạ su kal᷊awọu taumata tawẹ sal᷊ane -- nanětạ bọu pěmamate si Habel kụ tawẹ sal᷊ane sarang pěmamate si Zakharia anạ i Berekhya, kụ pinateng kamene su tal᷊oaram Wal᷊em Mawu ringangu pananěmbaěng.

³⁶ Pangimangke: patikụ ene sarung tumuhung su taumata orasẹ̌ ini!"

³⁷ "Yerusalem, Yerusalem! Manga nabi e kawe nịpapatenu. Manga rarolohang u Ruata e niěntungangu watu sarang nate. Seng kapirang sul᷊ẹ e Iạ mapulu mangomol᷊'u patikụ mẹ̌tatumanạu, tabidạeng iněngen manụ mạngokọ manga anạe sual᷊ung u panide, kutẹu i kau e kawe mạdiri!

³⁸ Ual᷊ingu ene Mawu Ruata e tawe lai mahundingang i kamene.

³⁹ Kasingkạko: Manětạ bọu orasẹ̌ ini e i kau seng tawe makasilo Siạ saụ sarang i kau mẹ̌bera, 'Al᷊amatẹ̌ e mahundingang si Sie kụ diměnta su arengu Mawu.'"

Matius

Video Matius 23

Ikuti Kami:

KONTAK | PARTISIPASI | DONASI